नेपाल चेम्बर अफ कमर्स र गैरआवासीय नेपाली संघ (एनआरएनए) बीच नेपालमा लगानी प्रवर्द्धन, व्यापार र आर्थिक सहकार्य विस्तार गर्न सम्झौतापत्रमा हस्ताक्षर भएको छ। उक्त समझदारीअनुसार प्रत्यक्ष वैदेशिक लगानी, ज्ञान हस्तान्तरण, नवप्रवर्तन, प्रविधि आदानप्रदान र निजी क्षेत्रमैत्री नीति निर्माणमा संयुक्त पहल गरिनेछ। दुवै पक्षले लगानी सम्मेलन, रोड शो, शिखर सम्मेलन र तालिम सञ्चालन गरी गैरआवासीय नेपालीको पूँजी र सिप नेपालमा भित्र्याउने सहमति जनाएको छ। ७ भदौ, काठमाडौं।
सम्झौतापत्रमा चेम्बर अध्यक्ष कमलेश कुमार अग्रवाल र एनआरएनएका अध्यक्ष डा. हेमराज शर्माले हस्ताक्षर गरेका छन्। सम्झौताअनुसार नेपालमा प्रत्यक्ष वैदेशिक लगानी भित्र्याउन सहजीकरण गरिनेछ भने व्यापार, उद्योग तथा उद्यमशीलताको विकास र स्वदेशी तथा गैरआवासीय नेपाली व्यवसायीबीच सहकार्य विस्तार गरिनेछ। साथै ज्ञान हस्तान्तरण, नवप्रवर्तन र प्रविधि आदानप्रदानलाई प्रोत्साहन गर्दै निजी क्षेत्रमैत्री नीति निर्माणमा संयुक्त पहल गरिनेछ।
चेम्बर र एनआरएनएले संयुक्त रूपमा लगानी सम्मेलन, रोड शो, व्यापारिक शिखर सम्मेलन तथा व्यवसायिक कार्यक्रम आयोजना गरेर विदेशी तथा गैरआवासीय नेपाली लगानीकर्ता र नेपाली व्यवसायीबीच प्रत्यक्ष सम्पर्क र व्यावसायिक साझेदारीका अवसर सिर्जना गर्नेछन्। साथै निर्यातमुखी उद्योग, साना तथा मझौला उद्यम र स्टार्टअपलाई सहयोग गर्ने र क्षमता अभिवृद्धिका लागि तालिम, कार्यशाला र सेमिनार सञ्चालन गर्ने सहमति पनि भएको छ।
चेम्बर अध्यक्ष अग्रवालले आर्थिक विकासका लागि केवल राम्रो नीति मात्र पर्याप्त नभई त्यसको प्रभावकारी कार्यान्वयन, कानुनी स्पष्टता र लगानीमैत्री वातावरण आवश्यक रहेको बताएका छन्। उनले नीति तथा कानुनी संरचनामा स्थिरता र स्पष्टता नहुँदा स्वदेशी तथा विदेशी लगानीकर्ता पूर्ण रूपमा विश्वस्त हुन नसक्ने बताए। साथै लगानी सुरक्षा, राजनीतिक स्थिरता र सहज व्यावसायिक वातावरण निर्माणमा सरकार र निजी क्षेत्रको संयुक्त पहल आवश्यक रहेको उनले जोड दिएका छन्।
