बलात्कार आरोपितका बयान र गृहमन्त्रीसँग रहेका पीडितका आफन्तको भिडिओ सार्वजनिक हुँदा उठेका प्रश्नहरू
बारामा एक बालिकाको बलात्कारपछि हत्या गरिएको भनिएको घटनासँग जोडिएका आरोपित र पीडित परिवारका विभिन्न दृश्यहरू सामाजिक सञ्जालमा आएपछि यसको गोपनीयताको हकको गम्भीर उल्लङ्घन भएको भन्दै विभिन्न पक्षबाट विरोध भएको छ। संसद्मा सत्तारूढ र विपक्षी दुवै पक्षका नेताहरूले यस विषयमा विरोध जनाएका छन् भने राष्ट्रिय मानवअधिकार आयोगका एक पूर्वआयुक्तले भिडिओ सार्वजनिक गर्दा गोपनीयता हनन हुने र मानवअधिकारको सिद्धान्तको उल्लङ्घन हुने बताए। नेपाल प्रहरीले आफ्नो नियन्त्रणमा रहेका आरोपितको भिडिओ सार्वजनिक भएको घटनाको अनुसन्धान जारी राखेको छ भने बाराका प्रमुख जिल्ला अधिकारीले उक्त कार्यमा संलग्न एक जनालाई पक्राउ गरिएको जानकारी दिएका छन्।
सरकारसँग शनिबार राति तीनबुँदे सहमति गरेपछि पीडित परिवारले आफ्नी छोरीको शवको अन्तिम संस्कार गरेका छन् भने आन्दोलनका कार्यक्रमहरू पनि फिर्ता भएका छन्, अधिकारीहरूले बताएका छन्। प्रहरीले उक्त घटनाको अनुसन्धान भइरहेको र अभियुक्त भनेर चिनिएका नौ जनालाई पक्राउ गरिएको जनाएको छ। सामाजिक सञ्जालमा भाइरल भएको प्रहरीको नियन्त्रणमा रहेका एक किशोरको बयानले सामाजिक सञ्जालमा ठूलो चर्चा पाएको छ भने धेरैले त्यसलाई लिएर आक्रोश व्यक्त गरिरहेका छन्।
सोमवार अपराह्न बीबीसीसँग कुरा गर्दै बाराका प्रमुख जिल्ला अधिकारी धर्मेन्द्रकुमार मिश्रले भने, “अहिलेसम्म एक जना प्रहरी कर्मचारीको प्रत्यक्ष संलग्नता पाइए पछि कारबाही सुरु भएको छ। यो निकै संवेदनशील घटना हो। यसमा हामी शून्य सहनशीलता अपनाउँछौं।” उनले भिडिओ निर्माण र सार्वजनिक गर्ने कार्यमा अन्य व्यक्तिहरूको पनि संलग्नता भेटिए कारबाही गरिने बताए। नेपाल प्रहरीका प्रवक्ता नायब महानिरीक्षक अविनारायण काफ्लेले उक्त विषयमा अनुसन्धान भइरहेको बताएका छन्।
सरकारसँग पीडित परिवारले गरेको तीनबुँदे सहमतिमा सात दिनभित्र बलात्कार सम्बन्धी कसुर र सजायको कानुनी व्यवस्था पुनरावलोकन गरी प्रस्ताव पेश गर्न सात सदस्यीय संसदीय सङ्कल्प समिति गठन गर्ने उल्लेख छ। जितपुरसिमराले श्रावण ३१ गतेदेखि हराइरहेकी ती बालिकाको शव भदौ २ गते फेला परेको भन्दै उक्त जघन्य हत्यामा संलग्न सबैलाई कडा कारबाहीको माग गरेको थियो।
