नेपालमा डिजाइन गरी उत्पादन गरिएको यात्रीको विद्युतीय स्कुटर ‘पी-२’ बजारमा सार्वजनिक

यात्रीले सिप्रदी ट्रेडिङसँगको सहकार्यमा नेपालमै डिजाइन तथा उत्पादन गरिएको विद्युतीय स्कुटर पी-२ बजारमा ल्याएको छ। पी-२ को लागि कम्पनीले ५.२, ३.७ र ३ किलोवाट आवरका तीन ब्याट्री विकल्प विकास गरेको छ, र ठूलो ब्याट्रीले १५७ किलोमिटर दूरी तय गर्न सक्ने दाबी गरेको छ। कम्पनीका अनुसार पी-२ को विकास प्रक्रिया डिजाइन, सिमुलेसन, इलेक्ट्रिकल आर्किटेक्चरसँगै ब्याट्री परीक्षण, च्यासिस निर्माण, एसेम्ब्ली र सडक परीक्षणमाथि आधारित छ। (९ भदौ, काठमाडौं)

सवारीसाधन बजारमा सार्वजनिक हुनुअघि यसको विकास कारखानाको एसेम्ब्ली लाइनबाट नभएर एउटा सानो स्केचबाट सुरु हुन्छ। डिजाइनरले कागज वा कम्प्युटर स्क्रिनमा कोरेको रेखाले बिस्तारै इन्जिनियरिङ डिजाइनको रूप लिन्छ। त्यसपछि कम्प्युटरमा हजारौं पटक परीक्षण गरी सम्भावित कमजोरीहरू पहिचान गरिन्छ, डिजाइन सुधार र पुन: परीक्षण गरिन्छ। नेपाली ब्रान्ड ‘यात्री’ को नयाँ विद्युतीय स्कुटर ‘पी-२’ को यात्रा पनि यस्तै कठोर प्रक्रियाबाट अघि बढेको छ।

दुई वर्षभन्दा बढी समयको अनुसन्धान, डिजाइन, र नेपाली सडकमा गरिएका परीक्षणपछि यात्रीले पी-२ बजारमा ल्याएको हो। सिप्रदी ट्रेडिङसँगको सहकार्यमा नेपालमै डिजाइन तथा उत्पादन गरिएको पी–२ तीन फरक ब्याट्री क्षमतामा उपलब्ध छ। ग्राहकहरूले ५.२ किलोवाट आवर, ३.७ किलोवाट आवर र ३ किलोवाट आवरका ब्याट्री विकल्प रोज्न सक्छन्। सबैभन्दा ठूलो ५.२ किलोवाट आवर ब्याट्री भएका स्कुटरले एक पटक पूर्ण चार्जमा १५७ किलोमिटर दूरी तय गर्न सक्छन् भन्ने कम्पनीको दावा छ।

यात्रीका हेर्ड अफ प्रडक्ट कृष्णप्रसाद श्रेष्ठका अनुसार पी-२ को सुरुवात एक साधारण लाइन स्केचबाट भएको थियो। उनी भन्छन्, ‘फर्स्ट फर्म’ वा पहिलो ठोस रेखाचित्र यही हो। स्कुटरको च्यासिस, स्विङ आर्म लगायत सबै पार्ट कारखानामा उत्पादन अघि कम्प्युटरमा परीक्षण गरिन्छ। यात्रीका इन्जिनियरहरूले कुनै पार्टमाथि अत्यधिक दबाब पर्छ कि पर्दैन; खाल्डाखुल्डीमा गुड्दा च्यासिसमा समस्या आउँछ कि आउँदैन भनी अध्ययन गर्छन्। यस्तो कमज़ोरी देखिएपछि त्यसलाई सच्याइन्छ।