टोखा चण्डेश्वरी दाफा खलःले लाखे नाच प्रदर्शन गर्दै बाढी पीडितहरूको लागि ४३ हजार ५८७ रुपैयाँ सहयोग सङ्कलन गरेको छ। १५ भदौ, काठमाडौं। टोखाको चण्डेश्वरी दाफा खलःले सांस्कृतिक लाखे नाच प्रदर्शनमार्फत बाढीपीडितलाई सहयोग स्वरूप रकम सङ्कलन गरेको छ। हिजो टोखामा रोपाइँ जात्राको अवसरमा लाखे नाच प्रदर्शन गरी टोखा नगर क्षेत्रमा परिक्रमा गर्दै सहयोग रकम सङ्कलन गरिएको थियो।
संकलित रकम टोखा नगरपालिका–२ का वडा अध्यक्ष धर्मेन्द्र श्रेष्ठको रोहबरमा गणना गरिएको बताए चण्डेश्वरी दाफा खलःले। सङ्कलित ४३ हजार ५८७ रुपैयाँ आज प्रधानमन्त्री दैवी प्रकोप उद्धार कोषमा जम्मा गरिने तयारी छ। वर्षौंदेखि सक्रिय रहेको यस दाफा खलःले टोखाको लिच्छवीकालीन संस्कृति र संस्कार प्रवर्द्धनमा महत्वपूर्ण योगदान दिँदै आएको छ। धर्म र संस्कृतिको संरक्षणका लागि दाफा खलःहरू स्थापना भएको र मानवतालाई केन्द्रमा राखेर संकटमा परेकाहरूको सेवा गर्ने उद्देश्यका साथ यो पहल गरिएको दाफाले जानकारी गराएको छ।
