रसुवा-त्रिशूली बाढीपछि घरबार गुमाएका थुप्रै मानिसहरू रसुवा, नुवाकोट, धादिङ र काठमाडौंका विभिन्न होल्डिङ सेन्टरहरूमा बस्दै आएका छन्। सुरुमा ती सेन्टरहरूमा बस्न आउनेहरूको संख्या कम भए पनि सोमबारदेखि बढ्दै गएपछि खाना, आवास र स्वास्थ्य समस्या देखिन थालेको छ। रसुवाका बाढीपीडित दावा मिङ्मार तामाङ नुवाकोटको विदुर नगरपालिका वडा २ मा रहेको कभर हलमा चार दिनदेखि बस्दै आएका छन्। पहिला दुई दिन खाना र बसाइ राम्रो भए पनि अहिले मानिसहरूको चाप बढेसँगै समस्या देखिन थालेको उनले बताए। “यहाँ ग्याँस सकिएपछि बाहिरबाट रोटी मगाएर खान बसालेको थियो। सुरुको समयमा सबै व्यवस्थापन राम्रो थियो। अहिले मान्छे बढेपछि समस्या देखिएको हो,” उनले भने। उनका अनुसार उक्त कभर हलमा हाल १४८ जना राखिएका छन्। होल्डिङ सेन्टरमा स्वास्थ्यकर्मीहरू दैनिक बिहान र साँझ उपस्थित भई परीक्षण गर्छन्, तामाङले बताए।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार नुवाकोट, धादिङ, रसुवा र काठमाडौंका विभिन्न होल्डिङ सेन्टरहरूमा करिब २९ सय मानिसहरू राखिएका छन्। नुवाकोटमा सबैभन्दा धेरै १९ होल्डिङ सेन्टरमा करिब २५ सय मानिस राखिएका छन्। रसुवाकी पेम्बा घले तामाङ विदुर नगरपालिका वडा ४ मा रहेको तामाङ प्लाजाका ब्याङ्केट हलमा शनिबारदेखि बस्दै आएकी हुन्। “यहाँ खाना समस्या छैन। तर मौसम कारणले हो या अरूले हो बच्चाहरूलाई रुघा, खोकी र ज्वरो लागेको छ। ठूलो उमेरका मानिसहरूलाई पनि वान्ता हुने समस्या देखिएको छ,” पेम्बाले भनिन्। “हिजो प्रहरीले ती मानिसहरूलाई गाडीमा राखेर नजिकैको स्वास्थ्य चौकीमा लगेर उपचार गराएको छ।
कसरी कुनै होल्डिङ सेन्टरमा स्वास्थ्यकर्मी नहुनु वा खाना पकाउने ग्यासको अभाव हुँदा व्यवस्थापन मिलाइरहेको छ? विदुर नगरपालिकाका मेयर राजन श्रेष्ठले भने, “ग्यासको अभाव पुगेको थाहा लाग्दैछ भन्ने खबर आएपछि प्रमुख जिल्ला अधिकारीसँग समन्वय गरी ग्यासको व्यवस्था अघि बढाइएको छ। साथै स्वास्थ्य समस्याका लागि स्वास्थ्य अधिकारी र विदुर स्वास्थ्य प्रमुख, प्रमुख प्रशासकीय अधिकृतसँगको टोलीले स्वास्थ्यकर्मी नहुँदै शिविरहरूमा पनि स्वास्थ्यकर्मी पठाएको छ र अझै पठाउने क्रम जारी छ।” बास गुमाएका मात्र होइन, आफ्ना आफन्त खोज्न आउनेहरूका लागि पनि बस्ने व्यवस्था मिलाइएको छ भनेर अधिकारीहरूले बताएका छन्। बाढीमा हराइरहेका व्यक्तिहरूको खोजी गर्न आउनेहरूको खानपान, आवास र औषधी उपचारका लागि चितवनका विभिन्न सङ्घसंस्था, उद्यमी, व्यवसायी र अस्पतालहरूले सहयोग गरिरहेको प्रमुख जिल्ला अधिकारी गणेश अर्यालले बताए।
