भोटेकोशी-त्रिशूली बाढी: ‘मान्छेहरू सुरुङभित्र पावरहाउसमा हुन सक्छन्’ – कुलमान घिसिङ

भोटेकोशी र तल त्रिशूली नदीमा आएको बाढीले त्यहाँका जलविद्युत् केन्द्रहरू ध्वस्त हुँदा उक्त क्षेत्रका धेरै मानिसहरू, विशेष गरी सुरुङहरू भित्र हुन सक्ने अनुमान गरिएको छ। प्रधानमन्त्री वलिन्द्र शाहले सरकारले बाढी प्रभावित क्षेत्रमा “अझै पनि खोज तथा उद्धारमा केन्द्रित” रहेको बताएका छन्।

सो क्षेत्रमा जलविद्युत् विकासमा अग्रणी भूमिका निभाएका नेपाल विद्युत् प्राधिकरणका पूर्व कार्यकारी निर्देशक कुलमान घिसिङले धेरै मानिसहरू अझै पनि सुरुङभित्र रहेको पावरहाउसको संरचनामा फसेको हुन सक्ने बताए। उनले भने, “रसुवागढी आयोजनाको सुरुङभित्रको पावरहाउसमा झन्डै १२ जना फसेको विवरण छ। चिलिमेमा करीब ६ जना, र लाङ्टाङ आयोजनामा करिब २५ जना फसेझैं छ।” उनले थपे, “माथिल्लो त्रिशूली १ मा हजारौँ मानिस संलग्न निर्माण कार्य भइरहेको छ र सुरुङभित्र मात्र करीब ३०० जनासम्म सम्पर्कविहीन छन्।”

उद्धारको सम्भावना र चुनौतीका बारेमा उनले भने, “ती सबै सुरुङ क्षेत्रमा केही उद्धार कार्यहरु भएको छ। म आफैं तीन दिनअघि यहाँको सुरुङको अवलोकन गरेर आएको थिएँ र सेना तथा उद्धारकर्मीहरूलाई कसरी उद्धार गर्न सकिन्छ भन्नेबारे छलफल पनि गरेँ।” उनले भने, “सुरुङभित्र पसेको भए पनि पावरहाउससम्म पुग्न नसकिएको, ‘लक्ड’ भएको भन्ने सुनिएको छ। तर सुरुङभित्र फसेकाहरू भित्रै पावरहाउसमै हुन सक्छन्।”

कुलमान घिसिङले भने, “सुरुङभित्र काम गर्न बसेकाहरू पावरहाउसमै बस्छन्। त्यहाँका संरचनाहरू चार तहसम्मका हुन्छन्। बाढी आएपछि उनीहरू मशीन फ्लोरभन्दा माथि गएर बस्न सक्छन्।” उनले चिलिमेमा लेदो निकाल्न पम्प र डीजल जेनरेटर ल्याएर काम गर्न प्रयास भइरहेको जानकारी दिए। उनले जोड दिए, “अब छिटोभन्दा छिटो उद्धारमा ध्यान दिनुपर्छ।”