भोटेकोशी र तल त्रिशूली नदीमा आएको बाढीको १३ औं दिन सोमबारसम्म पनि करिब पाँच हजार मानिस सम्पर्कविहीन रहेको राष्ट्रिय विपद् जोखिम न्यूनीकरण तथा व्यवस्थापन प्राधिकरणले जनाएको छ। सुरक्षा निकायहरूले चीनसँगको सीमासँग जोडिएको रसुवादेखि भारतसँगको सीमा जोडिएको नवलपरासी पश्चिमसम्म मानिसहरूको खोजी गरिरहेको बताएका छन्। रसुवामा भोटेकोशी भनिने त्यही नदी नुवाकोट पुगेर त्रिशूली बनिन्छ, चितवन देवघाटभन्दा तल्लो भूभागमा नारायणी नदी र भारत प्रवेश गरेपछि गण्डक नदी भनेर चिनिने गरेको छ।
सोमबार बिहानसम्म कम्तीमा १,३५५ जनाको शव वा पार्थिव अवशेष फेला परेको छ। खोज, उद्धार तथा राहतको समन्वय गर्दै आउँदै गरेको उक्त सरकारी निकायले जनाएको छ। शवहरू फेला पर्ने क्रम जारी छ। नेपाली सेना विभिन्न जलविद्युत आयोजनाका सुरुङ्हरू र भूमिगत विद्युत गृह तथा हवाई मार्गबाट खोजी तथा उद्धारमा केन्द्रित छ। सशस्त्र प्रहरीले रसुवाको टिमुरेदेखि नवलपरासी (बर्दघाट सुस्ता पश्चिम)को गण्डक नहरसम्म नदी किनारसम्म स्थलगत खोजी गरिरहेको छ।
सोमबार १३ औं दिनको खोजीका क्रममा चिलिमे जलविद्युत आयोजनाको पावरहाउससम्म पुग्ने प्रयास हुने सैनिक प्रवक्ता राजाराम बस्नेतले जानकारी दिए। उनका अनुसार, यो आयोजनाको भूमिगत पावरहाउसभित्र जाने सुरुङमा हालसम्म १०० मिटरभन्दा अगाडि जान सकिएको थिएन। “१०० मिटर भित्र गएपछि पूर्णरूपमा बन्द छ। त्यहाँभित्र जान मिनी एक्स्काभेटरले काम गरिरहेको छ। त्यहाँको अगाडिको भाग पूरै बाढीले तानेर लगेको कारण हेलिकप्टरले पनि सामान लैजान सक्दैन। त्यहाँ ल्यान्ड गर्न सक्दैन। अहिले त्यहाँ ब्लास्टिङ गरेर बाटो बनाएर थप एक्स्काभेटर लैजान प्रयास गर्दैछौँ,” प्रवक्ता बस्नेतले भने।
चीनसँगको सीमानजिकै रहेको रसुवागढी जलविद्युत आयोजनाको भूमिगत विद्युत गृहसम्म उद्धार टोली पुगे पनि मान्छे नफेला परेको नेपाली सेनाले जनाएको छ। “रसुवागढीको छैटौँ तला पूर्ण रूपमा खोजिएको छ। त्यो अपरेशन कक्ष रहेको पाइयो। त्यहाँ केही भेटिएन। त्यसपछि खोजी तथा उद्धार गर्ने क्रममा पाँचौँ तलासम्म पूर्ण रूपमा हिलो र लेदोले भरिएको फेला परेको छ,” बस्नेतले भने।
