ट्रायथलन संघको नवौँ साधारण सभा सम्पन्न, राष्ट्रिय खेलकुदमा समावेशीकरणका लागि निरन्तर प्रयास

नेपाल ट्रायथलन संघको नवौँ वार्षिक साधारण सभा शनिबार सम्पन्न भएको छ। संघका अध्यक्ष निलेन्द्रराज श्रेष्ठले दशौँ राष्ट्रिय खेलकुदमा ट्रायथलन नसमावेश हुनु प्रति दुःख व्यक्त गर्दै सुर्खेतमा आयोजना हुने प्रतियोगितामा ‘लेट इन्ट्री’ मार्फत खेललाई समावेश गराउने प्रयास भइरहेकामा जानकारी गराए। उनले भने, “यसअघिका सबै राष्ट्रिय खेलकुदमा ट्रायथलन समावेश हुँदै आएकोमा प्राविधिक कारण देखाउँदै यसपटक नसमावेश हुनु दुःखद कुरा हो।”

सभामा मानार्थ अध्यक्ष गणेशमान पुन प्रमुख अतिथि र संस्थापक अध्यक्ष विश्वशंकर पालिखे विशेष अतिथिका रूपमा उपस्थित थिए। अध्यक्ष श्रेष्ठले आगामी जापानको आइची–नागोयामा हुने एसियाली खेलकुदमा नेपालबाट कुनै खेलाडी सहभागी नहुने र टेक्निकल अफिसरका रूपमा चाहना शाह र पुष्परत्न वज्राचार्य मात्र रहने जानकारी दिएका छन्।

विश्व ट्रायथलन संघका अध्यक्ष एन्टोनियो एरिमानीले भिडियो सन्देशमार्फत नेपालमा आएको बाढीपहिरोप्रति समवेदना प्रकट गर्दै सहयोग गर्न प्रतिबद्धता जनाएका छन्। अध्यक्ष श्रेष्ठका अनुसार बाढीपीडितलाई सहयोगका लागि विश्व ट्रायथलन संघले समेत सहयोग गर्ने प्रतिबद्धता जनाएका छन्। महासचिव युवराज सुनारले वार्षिक कार्यक्रम तथा आगामी योजना प्रस्तुत गरेका थिए भने कोषाध्यक्ष निरज श्रेष्ठले आर्थिक वर्षको आय–व्यय विवरण पेश गरेका थिए।