समाचार सारांश: श्रीलंकाका बायाँहाते ब्याटिङ अलराउन्डर चरिथ असलंका तेस्रो संस्करणको नेपाल प्रिमियर लिगमा विराटनगर किङ्ससँग आबद्ध भएका छन्। विराटनगर किङ्सले सामाजिक सञ्जालमार्फत असलंका आफ्नो विदेशी खेलाडीको रूपमा घोषणा गरेको छ। असलंकाले श्रीलंकाका लागि ७७ टी–२० अन्तर्राष्ट्रिय खेलमा १,४६६ रन र ७ विकेट लिएका छन्। १ असोज, काठमाडौं।
श्रीलंकाका बायाँहाते ब्याटिङ अलराउन्डर चरिथ असलंका तेस्रो संस्करणको नेपाल प्रिमियर लिग (एनपीएल) खेल्न विराटनगर किङ्सको टोलीमा सहभागी भएका छन्। विराटनगर किङ्सले सामाजिक सञ्जालमार्फत श्रीलंकाली स्टारलाई आफ्नो विदेशी खेलाडीको रूपमा सार्वजनिक गरेको हो। असलंका बायाँहातको ब्याटिङ र दायाँहातको अफब्रेक बलिङमा निपुण छन्। २९ वर्षे असलंका हालसम्म श्रीलंकाका लागि ७७ टी–२० अन्तर्राष्ट्रिय खेल खेल्दै १,४६६ रन जोडेका छन्। उनले यी खेलहरूमा ७ विकेट पनि हात पारिसकेका छन्।
उनको कुल टी–२० क्रिकेट करिअर अझ प्रभावशाली छ। असलंका १८५ खेलमा ३,७१५ रन बनाइसकेका छन् र ३७ विकेट पनि लिएका छन्। उनी क्यारेबियन प्रिमियर लिग (सीपीएल), लंका प्रिमियर लिग (एलपीएल), पाकिस्तान सुपर लिग (पीएसएल) र यूएईको इन्टरनेशनल लिग टी–२० लगायतका प्रतिष्ठित फ्रेन्चाइज प्रतियोगितामा समेत खेलिसकेका छन्। “विराटनगर किङ्ससँग मिलेर उत्कृष्ट क्रिकेट प्रदर्शन गर्ने, टोलीका लागि मेरो अनुभव र क्षमता प्रयोग गर्ने तथा समर्थकहरूलाई स्मरणीय क्षणहरू प्रदान गर्ने मेरो लक्ष्य हुनेछ। एनपीएलमा नयाँ चुनौती र नयाँ वातावरणमा खेल्न पाउनु मेरो लागि विशेष अनुभव हो। विराटनगर किङ्सको परिवारमा सामेल हुन पाउँदा म गर्व र उत्साहित छु,” असलंकाले उल्लेख गरे। विराटनगरले यसअघिको दोस्रो संस्करणमा फाफ डुप्लेसीलाई पनि समावेश गरेको थियो।
