इंग्ल्यान्डका ३६ वर्षीय पेस बलर मार्क वूडले चोटका कारण अन्तर्राष्ट्रिय क्रिकेटबाट सन्यास लिने घोषणा गरेका छन्। वूडले ११ वर्षको करिअरमा ३८ टेस्टमा ११९, ७० एकदिवसीयमा ८० र ३८ टी–२० अन्तर्राष्ट्रियमा ५४ विकेट लिए। उनले २०१९ को एकदिवसीय विश्वकप र २०२२ को टी–२० विश्वकप जितमा इंग्ल्यान्डलाई योगदान दिएका थिए।
६ असोज, काठमाडौं। इंग्ल्यान्डका अनुभवी पेस बलर मार्क वूडले अन्तर्राष्ट्रिय क्रिकेटबाट सन्यास लिने घोषणा गरेका छन्। ३६ वर्षीय वूडले चोटका कारण टेस्ट र एकदिवसीय क्रिकेट खेल्न सम्भव नभएको चिकित्सकीय सल्लाहपछि आफ्नो ११ वर्ष लामो अन्तर्राष्ट्रिय करिअर टुंग्याउने निर्णय गरेका हुन्। सन् २०१५ मा न्युजिल्यान्डविरुद्ध लर्ड्समा टेस्ट डेब्यु गरेका वूडले ३८ टेस्टमा ११९ विकेट लिएका छन्।
उनी चार एसेस शृङ्खला खेलेका थिए भने २०१५ मा ट्रेन्ट ब्रिजमा जित दिलाउने विकेट र २०२३ मा हेडिङ्लीमा गरेको तीव्र स्पेल विशेष रूपमा सम्झिने प्रदर्शन बने। वूड इंग्ल्यान्डको दुई विश्वकप विजेता टोलीका सदस्य पनि हुन्। उनले २०१९ को घरेलु एकदिवसीय विश्वकपमा १८ विकेट लिएर उपाधि यात्रामा महत्वपूर्ण योगदान दिएका थिए। त्यस्तै २०२२ को टी–२० विश्वकप जित्दा उनले चार खेलमा ९ विकेट लिएका थिए।
सन्यास घोषणा गर्दै वूडले भने, ‘इंग्ल्यान्डबाट खेल्नु मेरो जीवनकै सबैभन्दा ठूलो सम्मान थियो। चोटबाट फर्किने प्रयास बारम्बार गरेँ, तर यसपटक त्यो लडाइँ जित्न सकिनँ।’ इंग्ल्यान्ड क्रिकेटका प्रबन्ध निर्देशक रोब कीले वूडलाई आफ्नो पुस्ताका सबैभन्दा रोमाञ्चक तीव्र गतिका बलरमध्ये एक भन्दै दुई विश्वकप र एसेस सफलतामा उनको योगदानको प्रशंसा गरेका छन्।
