मदन भण्डारी कप अन्तर्राष्ट्रिय आमन्त्रण पुरुष भलिबल प्रतियोगिता असोज १२ देखि सुरु हुने

मदन भण्डारी कप अन्तर्राष्ट्रिय आमन्त्रण रनिङ शिल्ड पुरुष भलिबल प्रतियोगिता असोज १२ देखि १७ गतेसम्म बुटवलमा आयोजना हुँदैछ। प्रतियोगितामा नेपाल, भारत र श्रीलंकाका आठ टोली सहभागी हुने आयोजकले जानकारी दिएका छन्। विजेता टोलीले रनिङ शिल्डसहित सात लाख रुपैयाँ पुरस्कार पाउनेछ भने उपविजेताले तीन लाख ५० हजार रुपैयाँ प्राप्त गर्नेछन्।

यो दोस्रो संस्करण ‘‘मदन भण्डारी कप अन्तर्राष्ट्रिय आमन्त्रण रनिङ शिल्ड पुरुष भलिबल प्रतियोगिता–२०८३’’ लुम्बिनी प्रदेशको बुटवलमा आयोजना गरिनेछ। मदन भण्डारी स्पोर्ट्स एकेडेमीको आयोजनामा हुने प्रतियोगितामा नेपालबाट नेपाल पुलिस क्लब, नेपाल एपीएफ क्लब, मणिमुकुन्द भलिबल क्लब, सभापोखरी भलिबल क्लब (संखुवासभा) र गल्कोट भलिबल क्लब सहभागी हुनेछन्। भारतबाट गुजरात स्टेट भलिबल एसोसिएसन र खैरा क्लब पञ्जाब तथा श्रीलंकाको पुलिस टोलीले पनि प्रतिस्पर्धा गर्नेछन्।

प्रतियोगितामा सहभागी आठ टोलीलाई दुई समूहमा विभाजन गरिनेछ र समूह चरणबाट शीर्ष दुई टोली सेमिफाइनलमा प्रवेश गर्नेछन्। विजेताले रनिङ शिल्डसहित सात लाख रुपैयाँ पुरस्कार पाउनेछन् भने उपविजेताले तीन लाख ५० हजार, तेस्रो हुने टोलीले एक लाख ७५ हजार र सान्त्वना पुरस्कारको रूपमा ७५ हजार रुपैयाँ पाउनेछन्। प्रतियोगिताको उत्कृष्ट खेलाडीलाई १५ हजार रुपैयाँ प्रदान गरिनेछ।

मदन भण्डारी स्पोर्ट्स एकेडेमीले यसअघि खेलकुदका बहुआयामिक गतिविधिहरू गर्दै आएको छ। आगामी वर्षदेखि प्रतियोगितालाई अझ फराकिलो बनाउँदै ठूला देशका टोलीलाई समेत सहभागी गराउने योजना अघि बढाइएको छ। प्रतियोगिताको पहिलो संस्करणको उपाधि त्रिभुवन आर्मी क्लबले जितेको थियो।