इरानी राष्ट्रपति पेजेस्कियानको संयुक्त राष्ट्र महासभामा सम्बोधन: इरानी जनता आतंकवादको पीडित
संयुक्त राष्ट्रसंघको महासभामा इरानी राष्ट्रपति मसुद पेजेस्कियानले सम्बोधन गरेका छन्। उनी सम्बोधन गरिरहेको बेला अमेरिकी प्रतिनिधिमण्डल महासभामा उपस्थित थिएन। पेजेस्कियानले सम्बोधन सुरु गरेसँगै अमेरिकी प्रतिनिधिमण्डल महासभाबाट बाहिरिएका थिए। यसअघि हिजो अमेरिकी राष्ट्रपति डोनाल्ड ट्रम्पको सम्बोधन गर्दा इरानी र क्युबाली प्रतिनिधिमण्डल महासभाबाट बाहिरिएका थिए। महासभामा सम्बोधन गर्दै इरानी राष्ट्रपति पेजेस्कियानले अमेरिका र इजरायलको आक्रमणको कडा निन्दा गरे। उनले इरानी जनता “आतंकवादका पीडित” भएको व्यहोरा व्यक्त गरे। उनले इरानमाथि भएका अमेरिकी हमला अवैध भएको दाबी गर्दै महासभामा ती हमलाहरूको कडा आलोचना गरे।
‘म त्यही इरानबाट आएको हुँ, जहाँ हाम्रा सम्मानित सर्वोच्च नेता बिना कुनै कानुनी प्रक्रिया वा कारणको हत्याका शिकार भएका छन्,’ उनले भने। उनी यतिबेला अमेरिका र इजरायलको हमलामा मारिएका इरानका तत्कालीन सर्वोच्च नेता आयतुल्लाह अलि खामेनीको तस्वीर हातमा बोएर महासभालाई देखाएका थिए। ‘म त्यही इरानबाट आएको हुँ, जहाँ वास्तवमा एउटा विद्यालयमा बम बारी गरिएको छ,’ उनले फेरि विद्यालयको तस्वीर देखाउँदै भने। पेजेस्कियानले इरानले अमेरिकी आक्रमणको जवाफ दिएको पनि बताए। ‘तीहरूले वरिपरिका क्षेत्रमा प्रवेश गरे र हाम्रा विश्वविद्यालय, स्वास्थ्य केन्द्र, विद्यालय, अस्पताल तथा पूर्वाधारलाई लक्षित गरे–यी सबै अन्तर्राष्ट्रिय कानुनको उल्लङ्घन हुन्,’ पेजेस्कियानले भने।
‘हाम्रा निर्दोष जनता हाम्रो देशमाथि थोपिएको कायरतापूर्ण आक्रमण र आक्रमणका शिकार बनेका छन्,’ उनले भने, ‘हामीले पूर्ण शक्तिका साथ आफ्नो रक्षा गर्यौं।’ ‘इरानले २०० वर्षमा कसैमाथि आक्रमण गरेको छैन’ इरानी राष्ट्रपति पेजेस्कियानले पछिल्ला २०० वर्षमा इरानले कसैमाथि हमला नगरेको दाबी गरे। तर, इरानलाई क्षेत्रीय अस्थिरताको स्रोत र आतंकवादीका रूपमा चित्रित गरिएकोमा उनले आपत्ति जनाए। ‘हामी आक्रमण वा आक्रामकता गर्न शक्ति खोज्दैनौँ,’ उनले भने, ‘हामी प्रगतिका लागि ऊर्जा चाहन्छौँ, समाजमा हतियारमार्फत डर देखाउन होइन।’
