बङ्गालको खाडीमा विकसित न्यूनचापीय प्रणालीको प्रभावका कारण नेपालका विभिन्न स्थानमा वर्षा भइरहेको छ। अविरल वर्षाका कारण धादिङ जिल्लामा पर्ने पृथ्वी राजमार्गस्थित कृष्णभीर क्षेत्रमा पुनः पहिरो गएको छ। अधिकारीहरूले भने अनुसार उक्त सडकको केही भाग पनि पहिरोले बगाएको छ।
अघिल्लो महिनामा भोटेकोशी र त्रिशूली नदीमा आएको ठूलो बाढीले कृष्णभीर सडक कटानमा परेकोले केही हप्तासम्म सवारी साधन आवागमन रोकिएको थियो। त्यसयता कृष्णभीरमा सडकभन्दा माथि केही भाग काटेर वैकल्पिक बाटो निर्माण गरिएको थियो र उक्त बाटो असोज १ गतेदेखि सञ्चालनमा आएको छ।
