म्यान्चेस्टर सिटीलाई प्रिमियर लिगले लगाएको ११५ आर्थिक आरोपमध्ये अधिकांशमा दोषी ठहर गरेको छ। स्वतन्त्र प्यानलले निर्णय गरिसकेको भएता पनि क्लबमाथि कस्तो सजाय लाग्ने भन्ने विषयमा भने अझै निर्णय हुन बाँकी छ। प्रिमियर लिगले सन् २००९ देखि २०१८ सम्मका वित्तीय उल्लंघनका ११५ आरोप सिटीमाथि लगाएको थियो।
इंग्लिश फुटबल क्लब म्यान्चेस्टर सिटीलाई प्रिमियर लिगले लगाएको ११५ आर्थिक आरोपमध्ये अधिकांशमा दोषी ठहर गरेको रिपोर्ट छ। स्वतन्त्र प्यानलले निर्णय गरिसकेको भए पनि क्लबमाथि के कस्तो सजाय लाग्ने भन्ने विषयमा अन्तिम फैसला भइनसकेको छ। रिपोर्ट अनुसार सिटीले अधिकांश उल्लंघनमा आफ्नो गल्ती स्वीकार्दै दोषी ठहर भएको छ भने द एथलेटिकले ११५ मध्ये एकबाहेक सबै आरोपमा क्लब दोषी रहेको बताएको छ।
प्रिमियर लिगले यस विषयमा कुनै प्रतिक्रिया दिएका छैनन्। म्यान्चेस्टर सिटीले पनि निर्णय सम्बन्धी प्रत्यक्ष प्रतिक्रिया नदिँदै प्रक्रिया हाल पनि गोप्य र जारी रहेको जनाएको छ। क्लबले सन् २०२३ मा दिएको आफ्नो आधिकारिक धारणा अझै कायम रहेको र आठ वर्षदेखि न्यायिक प्रक्रियाको सम्मान गर्दै आएको जनाएको छ।
अन्तिम निर्णय क्लबको विरुद्ध आएमा म्यान्चेस्टर सिटीले त्यसबिरूद्ध अपिल गर्ने तयारीमा रहेको छ। प्रिमियर लिगले सन् २००९ देखि २०१८ सम्मको अवधिसँग सम्बन्धित ११५ आर्थिक उल्लंघनका आरोप सिटीमाथि लगाएको थियो। तीमध्ये ५४ आरोप सही आर्थिक विवरण नदिएको, १४ आरोप खेलाडी तथा प्रशिक्षकको पारिश्रमिक विवरणमा गलत तथ्य राखेको, ५ आरोप युइएफएको वित्तीय नियम उल्लंघन गरेको, ७ आरोप प्रिमियर लिगको पीएसआर नियम उल्लंघन गरेको र ३५ आरोप अनुसन्धानमा सहयोग नगरेको भनी लगाइएको छ। म्यान्चेस्टर सिटीमाथिको विवाद सन् २०१८ मा ‘फुटबल लिक्स’ मार्फत सुरु भएको थियो।
