अन्तर्राष्ट्रिय मैत्रीपूर्ण फुटबलमा भारतले बैंगलोरमा पानामासँग १–१ गोलको बराबरी खेलेको छ। भारतका लागि रायन विलियम्सले ४१औं मिनेटमा गोल गरे भने पानामाका ओमार भ्यालेन्सियाले ६८औं मिनेटमा बराबरी गोल फर्काए। भारतले अब ३ अक्टोबरमा कोलकातामा ब्राजिलसँग तथा तीन दिनपछि उरुग्वेसँग मैत्रीपूर्ण खेल खेल्नेछ।
बैंगलोरको श्री कान्तिरावा रंगशालामा भएको खेलमा भारतका लागि विलियम्सले पहिलो हाफमा गोल गरे। आकाश मिश्राले अगाडि पठाएको लामो पासलाई सदुपयोग गर्दै विलियम्सले गोलरक्षक मार्कोस रेयेसलाई छल्दै भारतलाई १–० को अग्रता दिलाए। पहिलो हाफमा भारतले केही राम्रा अवसर सिर्जना गरेको थियो। ८औं मिनेटमा आकाश मिश्राको कटब्याकमा विलियम्सले प्रहार गर्ने अवसर पाए पनि सफल हुन सकेनन्।
दोस्रो हाफमा पानामाले आक्रमण बढायो। भारतका गोलरक्षक गुरप्रीत सिंह सन्धुले ५०औं मिनेटमा जियोभानी हर्बर्टको प्रयास रोकेर टोलीलाई अग्रता कायम राख्न मद्दत गरे। तर ६८औं मिनेटमा ओमार भ्यालेन्सियाले पेनाल्टी क्षेत्र बाहिरबाट गरेको लामो दूरीको प्रहार गोलमा परिणत गर्दै पानामालाई खेलमा फर्काए। भारतले पनि खेलको अन्तिमतिर गोलका अवसर बनाएको थियो।
फिफा वरीयतामा १३८औं स्थानमा रहेको भारतले ४४औं स्थानको पानामाविरुद्ध बराबरी खेलेको हो। भारतले बैंगलोरमै सन् २०२३ मा साफ च्याम्पियनसिप जितेको थियो। अब अक्टोबर ३ मा कोलकातामा पाँचपटकको विश्व विजेता ब्राजिलसँग मैत्रीपूर्ण खेल खेल्नेछ।
