९ असोज, टोकियो (रासस/सिन्ह्वा) । पूर्वी जापानको कान्टो क्षेत्रमा आएको आँधीपछिको भारी वर्षाका कारण पहिरो र बाढीमा परी मृत्यु हुनेको संख्या ११ पुगेको छ भने तीन जना अझै बेपत्ता छन् । स्थानीय सञ्चार माध्यमका अनुसार मृतकमध्ये टोकियोको पूर्वतर्फ पर्ने चिबा प्रिफेक्चरका सात जना र राजधानीको दक्षिणपश्चिमतिर रहेको कानागावा प्रिफेक्चरका चार जना छन् । जापानको सार्वजनिक प्रसारण संस्था एनएचकेका विवरण अनुसार कानागावाको योकोसुकामा पहिरोले बेपत्ता भएकी ७० वर्षीया महिलाको शव हालै फेला परेको छ । प्रहरी र अग्नि नियन्त्रकहरूले बेपत्ता व्यक्तिहरूको खोजी कार्य जारी राखेका छन्।
सोमबार जापानको पूर्वी प्रशान्ती तटमा पुगेको ‘डुजुआन’ आँधीले कान्टो क्षेत्र र इजु टापु क्षेत्रमा भारी वर्षा गराएको थियो। वर्षाका कारण पहिरो र नदीमा बाढी आएपछि टोकियो वरिपरि विशेषगरी चिबा प्रिफेक्चरमा ठूलो क्षति पुगेको छ। एनएचकेका विवरण अनुसार बिहीबार दिउँसोसम्म चिबा र कानागावा प्रिफेक्चरमा आँधीका कारण लगभग एक हजार भवनहरू ध्वस्त, क्षतिग्रस्त वा डुबानमा परेका छन्। उत्तरी चिबाको इम्बानु ताल क्षेत्रमा आँधीपछिका केही बाँध भत्किँदा वरिपरिका बस्ती, धानखेत, र सडकहरू डुबानमा परेका छन्। पानीको सतह कम हुँदै गए पनि केही ठाउँमा बाढीको अवस्था कायम रहेको र शुक्रबारसम्म पुनःस्थापनाको काम भइरहेको जनाइएको छ। आँधीका कारण जनजीवन र यातायात पनि प्रभावित भएका छन्। शुक्रबार बिहान ६ बजेसम्म चिबा र कानागावा प्रिफेक्चरमा करिब ११ हजार ७९० घरपरिवारमा विद्युत सेवा अवरुद्ध रहेको थियो। चिबाका केही रेलमार्गमा सेवा स्थगित वा कटौती गरिएको छ। यसैबीच, जापानको मौसम विज्ञान विभागले जनाएको छ कि यस सिजनको २६औँ आँधी आगामी दिनहरूमा जापान नजिक पुग्न सक्ने सम्भावना छ। उक्त आँधीले ओकिनावा र अन्य क्षेत्रहरूमा समुद्रमा उच्च छालो उठाउने र खराब मौसम ल्याउने चेतावनी दिइएको छ।
