इरानका विदेशमन्त्री अब्बास अरागचीले अमेरिकासामु केही सर्तहरू पूरा भएमा एक साताभित्र स्ट्रेट अफ होर्मुज पुनः खोल्ने प्रस्ताव राखेको बताएका छन्। उनले शुक्रबार संयुक्त राष्ट्रसंघको मुख्यालयमा पत्रकारहरूसँगको संवादमा यस्तो जानकारी दिएका हुन्। अरागचीका अनुसार, अमेरिकाले सम्झौतामा उल्लेख गरिएका आवश्यक सर्तहरू पूरा गरेपछि होर्मुज जलडमरू खोल्ने प्रक्रिया सुरु हुनेछ। यद्यपि, उनले ती सर्तहरूको विस्तृत विवरण भने सार्वजनिक गरेका छैनन्।
अरागचीले ती सर्तहरू यसअघि जुन महिनामा अमेरिका र इरानबीच भएको समझदारीपत्र (एमओयू) मा नै उल्लेख गरिएको बताएका छन्। उनले अब निर्णय गर्ने जिम्मेवारी अमेरिकाको रहेको स्पष्ट पारेका छन्। उनका अनुसार, इरानको प्रस्ताव कतारमार्फत अमेरिकासम्म पठाइएको छ। इरानको प्रस्तावबारे अमेरिकी अधिकारीहरूले दुई देशबीच मध्यस्थकर्तामार्फत सकारात्मक संवाद भइरहेको बताएका छन्। ती संवादमा आणविक मुद्दा समेत समावेश रहेको जानकारी दिएका छन्।
अमेरिका र इरानबीच जुन १८ मा भएको १४ बुँदे एमओयूको उद्देश्य युद्धविराम लागू गर्नु र होर्मुज जलडमरूलाई आंशिक रूपमा खोल्नु थियो। समझदारीमा इरानले आणविक हतियार हासिल नगर्ने विषय समावेश थियो। साथै, अमेरिका, इरान र उनीहरूका सहयोगी पक्षहरूबाट सबै मोर्चामा सैन्य कारबाही अन्त्य गर्ने उल्लेख थियो। एमओयूमा अमेरिकी नौसैनिक नाकाबन्दी अन्त्य गर्ने तथा इरानमाथि लगाइएका प्रतिबन्धहरूमा राहत दिने प्रावधानसमेत राखिएको थियो।
