विराटनगर किङ्सले ‘ड्रिम टु प्ले’ यू–२३ टी–२० प्रतियोगिताबाट पाँच युवा खेलाडीलाई तयारी क्याम्पका लागि चयन गरेको छ। चयन भएका खेलाडीहरू अमर यादव, धवन साहनी, आयुष न्यौपाने, कबिराज खत्री र सुयोग भट्टराई हुन्। उनीहरू सेप्टेम्बर २९ देखि गोरखपुरमा आयोजना हुने क्याम्पमा सहभागी हुनेछन्।
क्याम्पमा प्रदर्शन, क्षमता, अनुशासन र सम्भावनाका आधारमा एक खेलाडीलाई विराटनगर किङ्सको ‘आइकोनिक प्लेयर’को उपाधि दिइनेछ। नेपाल प्रिमियर लिग (एनपीएल) को फ्रेन्चाइज टिम विराटनगर किङ्सले ‘ड्रिम टु प्ले’ कार्यक्रममार्फत कोशी प्रदेशका प्रतिभाशाली युवा क्रिकेटरहरूलाई व्यावसायिक क्रिकेटमा अघि बढ्न सहयोग पुर्याउने लक्ष्य राखेको छ।
विराटनगर किङ्सले ‘ड्रिम टु प्ले’ बाट क्याम्पसम्मको यात्रा युवा प्रतिभाका लागि ठूलो अवसर रहेको जनाएको छ। क्याम्पका क्रममा ती पाँचै खेलाडीले विराटनगर किङ्सका अनुभवी खेलाडीहरूसँग प्रशिक्षण गर्नेछन्। प्रशिक्षकहरूले उनीहरूको प्रदर्शन र क्षमताको नजिकबाट मूल्यांकन गर्ने व्यवस्था गरिएको छ।
