जलसतह बढ्दै गर्दा नारायणी नदीको पानी शनिबार सुस्ताको बस्तीमा पुगेपछि ७० भन्दा बढी घरहरू डुबानमा परेको स्थानीय अधिकारीहरूले जानकारी दिएका छन्। डुबानबाट प्रभावित बासिन्दाहरूलाई सुरक्षित स्थानमा सारिएको नवलपरासी (बर्दघाट सुस्ता पश्चिम) का प्रमुख जिल्ला अधिकारी दीपकराज नेपालले बताएका छन्। “करिब एक हजार बासिन्दा छन्। कतिपय आफन्तकहाँ गएका छन् भने ४०० भन्दा बढीलाई हामीले अहिले सुरक्षित स्थानमा सारिसकेका छौँ,” उनले भने। प्रजिअ नेपालले आफू पनि प्रभावित क्षेत्रतर्फ जाने तयारीमा रहेको बताएका छन्।
लाइफज्याकेट लगाएका सशस्त्र प्रहरीहरूले स्थानीय बासिन्दाहरूलाई सुरक्षित स्थानतर्फ जान सहयोग गरिरहेको छ, जसका तस्वीरहरू सार्वजनिक भएका छन्। धेरै भारी वर्षा भएको छ र मौसम पूर्वानुमान महाशाखाका अनुसार गत २४ घण्टामा डेढ दर्जनभन्दा बढी स्थानमा वर्षा मापन गरिएको छ। “कम्तीमा २० वटा मापन केन्द्रमा १०० मिलिमिटरभन्दा बढी पानी परेको छ। १०० मिलिमिटरभन्दा माथिको वर्षालाई धेरै भारी वर्षा मानिन्छ,” महाशाखाका मौसमविद् सञ्जीव अधिकारीले बताए।
गत २४ घण्टामा म्याग्दी, कास्की, लमजुङ, मनाङ, गोरखा, स्याङ्जा, पाल्पा, अर्घाखाँची, बाँके, बर्दिया, दैलेख, कालिकोट, सुर्खेत, हुम्ला, अछाम, डोटी, डडेलधुरा लगायतका क्षेत्रमा भारी वर्षा भएको महाशाखाले जनाएको छ। साथै हिमाली क्षेत्रका केही स्थानमा शनिबार हिमपात पनि भएको छ। “हिमाली भूभागमा मध्यमदेखि भारी हिमपात भएको छ,” अधिकारीले बताए।
बाढी र पहिरोका कारण देशभरका विभिन्न राजमार्गहरू अवरुद्ध हुँदा सवारी आवागमन ठप्प भएको प्रहरीले जनाएको छ। अहिलेको स्थिति कस्तो छ? मौसम पूर्वानुमान महाशाखाका अनुसार देशभर मनसुनी र पश्चिमी वायुको आंशिक प्रभाव छ। मौसमविद् अधिकारीका अनुसार अहिले न्यूनचापीय प्रणाली भारतको उत्तर प्रदेश आसपासमा रहेको छ र नेपालमा त्यसको प्रभाव छ। आगामी १२ घण्टामा यो क्रमशः कमजोर हुँदै न्यूनचापीय क्षेत्रमा परिणत हुने सम्भावना छ।
“शनिबार गण्डकी प्रदेशदेखि पश्चिमसम्म बढी जोखिम रहन्छ। आइतवार गण्डकीदेखि पश्चिमका प्रदेशहरूमा मात्र वर्षा हुनेछ र बाग्मती प्रदेशमा धेरै सुधार आउने देखिन्छ,” मौसमविद् अधिकारीले भने। आइतवार दिउँसोदेखि मौसममा क्रमिक सुधार आएपछि सोमबारसम्म धेरै सुधार हुने पूर्वानुमान छ। पछिल्ला दिनमा परेको वर्षाका कारण देशका विभिन्न प्रमुख नदीहरू र तिनका सहायक नदीहरूमा जलसतह सतर्कता तहभन्दा माथि पुगेको बाढी पूर्वानुमान महाशाखाले जनाएको छ।
