१५ असोज, काठमाडौं । सन् २०२७ मा दक्षिण अफ्रिका, जिम्बाबे र नामिबियामा संयुक्त रूपमा आयोजना गरिने आईसीसी एकदिवसीय क्रिकेट विश्वकपको समूह विभाजन र खेल तालिका सार्वजनिक गरिएको छ। दक्षिण अफ्रिकाको केप टाउनमा बिहीबार आयोजित कार्यक्रममा विश्वकपको समूह विभाजनसँगै खेल तालिकासमेत सार्वजनिक गरिएको हो। समूह विभाजन अनुसार, समूह ‘ए’ मा अफगानिस्तान, अस्ट्रेलिया, भारत, पाकिस्तान, जिम्बाबे र क्वालिफायरबाट आउने एउटा टोली रहेका छन्। समूह ‘बी’ मा इंग्ल्यान्ड, न्यूजिल्यान्ड, दक्षिण अफ्रिका, बंगलादेश, श्रीलंका र छनोटबाट आउने अर्को टोली रहनेछ। समूह चरणको पहिलो खेल भारत र अस्ट्रेलियाबीच हुनेछ। सन् २०२३ को विश्वकप फाइनलमा अस्ट्रेलियाले भारतलाई पराजित गर्दै छैटौँ पटक उपाधि जितेको थियो।
नयाँ विश्वकप ढाँचाअनुसार, ओडीआई वरियताका शीर्ष ८ टोलीसँगै सहआयोजक दक्षिण अफ्रिका र जिम्बाबेले सिधै मुख्य समूह चरणमा स्थान पाएका छन्। छनोट प्रतियोगिता विजेता थपिँदा मुख्य चरणमा ११ टोली सुनिश्चित हुनेछन्। छनोट प्रतियोगितामा दोस्रो, तेस्रो र चौथो हुने टोलीले विश्वकपको पहिलो चरण ‘सुपर सिरिज’ खेल्नुपर्नेछ। यस चरणमा तीन टोलीबीच दुई-दुई खेल हुनेछन् र विजेताले मात्र मुख्य समूह चरणमा स्थान पाउनेछ। बाँकी टोली दुई खेलमै विश्वकपबाट बाहिरिनेछन्।
मुख्य चरणमा १२ टोलीलाई दुई समूहमा विभाजन गरिने छ, जुन माथि उल्लेख गरिएको छ। प्रत्येक समूहका शीर्ष तीन टोलीसँगै दुई समूहमध्ये उत्कृष्ट अर्को एउटा टोली ‘सुपर ७’ चरणमा प्रवेश गर्नेछन्। राउन्ड रोबिन फर्म्याटमा संचालन हुने सुपर ७ बाट शीर्ष चार टोली सेमिफाइनल खेल्न योग्य हुनेछन्। विश्वकप छनोटमा १० टोली सहभागी हुनेछन्। सहआयोजकबाहेकका ओडीआई वरियताका दुई पूर्ण सदस्य राष्ट्र, लिग–२ का शीर्ष चार टोली र विश्वकप छनोट प्लेअफबाट आउने चार टोली यसमा सहभागी हुनेछन्।
विश्वकप छनोट प्लेअफमा लिग–२ का पछाडिका चार टोली र च्यालेन्ज लिगका चार टोलीबीच प्रतिस्पर्धा हुनेछ। त्यहाँबाट शीर्ष चार टोलीले विश्वकप छनोट प्रतियोगितामा स्थान बनाउन सक्छन्। नेपाली क्रिकेट टोलीले विश्वकप छनोटका लागि प्लेअफ खेल्ने प्रबल सम्भावना छ। प्लेअफबाट छनोटमा स्थान बनाउँदा नेपालले मुख्य समूह चरणमा सहभागी हुन सक्नेछ। विश्वकप छनोट विजेताले सिधै समूह चरणमा प्रवेश पाउनेछन् भने छनोट जित्न नसकेका चौथो स्थानसम्मका टोलीले अर्को अवसरबाट समूह चरणमा स्थान बनाउन सक्छन्।
