कपिलवस्तुमा रोकिराखेको ट्रकमा भारतीय नम्बरको कार ठोक्किँदा दुईको मृत्यु, तीन घाइते

कपिलवस्तु नगरपालिका–१२ पिप्रहवामा रोकिराखिएको ट्रकमा भारतीय नम्बरको कार ठोक्किँदा दुई जनाको मृत्यु भएको छ। दुर्घटनामा तीन जना घाइते भएका छन् र उनीहरुको उपचार जारी छ। प्रहरीले दुर्घटनाबारे अनुसन्धान गरिरहेको जनाएको छ। १३ वैशाख, काठमाडौं।

मृत्यु हुनेमा कपिलवस्तु नगरपालिका–११ का ५० वर्षीय राधेश्याम कुर्मी र शिवराज नगरपालिका–६ की ५५ वर्षीया चिन्नी कुर्मी रहेका जिल्ला प्रहरी कार्यालय कपिलवस्तुले जनाएको छ। दुर्घटनामा महाराजगन्ज नगरपालिका–११ का ६५ वर्षीय नन्दप्रसाद दुबे, शिवराज नगरपालिका–१० का २८ वर्षीय मोतीलाल कुर्मी र शिवराज नगरपालिका–११ का २० वर्षीय सुरेश कुर्मी घाइते भएका छन्। उनीहरुको उपचार जारी छ।

बहादुरगञ्जबाट तौलिहवातर्फ जाँदै गरेको यूपी ३२ सीए ८४३४ नम्बरको स्कार्पियो गाडी अनियन्त्रित भई सडक किनारमा रोकिराखेको लु १ ख ९५४९ नम्बरको ट्रकमा ठोक्किएको थियो। दुर्घटनाबारे थप अनुसन्धान भइरहेको प्रहरीले जनाएको छ।