राष्ट्रिय मानव अधिकार आयोगको टोली सुकुमवासीको अवस्था बुझ्न कीर्तिपुरस्थित राधा स्वामी सत्सङ्ग व्यास पुगेको छ। शनिबार थापाथली र गैह्रीधारा क्षेत्रबाट सुकुमवासीलाई नेपाल प्रहरी र नगर प्रहरीले हटाएर नागार्जुन र कीर्तिपुरका सत्सङ्ग भवनमा राखिएको छ। आयोगले २०६९ सालमा गरेको सिफारिसपछि सुकुमवासीको पहिचान गरी वैकल्पिक बसोबास मिलाएर मात्र व्यवस्थापन गर्न सरकारलाई निर्देशन दिएको थियो। १३ वैशाख, काठमाडौं।
राष्ट्रिय मानव अधिकार आयोगको टोली सुकुमवासीको अवस्था बुझ्न फिल्डमा सक्रिय छ। आयोगको टोली आज बिहान कीर्तिपुरस्थित राधा स्वामी सत्सङ्ग व्यासमा पुगेको छ। शनिबार थापाथली र गैह्रीधारा क्षेत्रबाट सुकुमवासीलाई हटाइएको थियो। नेपाल प्रहरी र नगर प्रहरीको टोलीले उनीहरुलाई नागार्जुन, कीर्तिपुरका सत्सङ्ग भवन लगायतका स्थानमा लगेर राखेको छ। मानव अधिकार हननको आरोप लागेकाले आयोगको टोली अनुगमनका लागि खटिएको हो।
आयोगका प्रवक्ता डा. टीकाराम पोखरेलले सुकुमवासीहरुको अवस्था बुझ्न टोली खटाएको जानकारी दिएका छन्। आयोगले सुकुमवासीको व्यवस्थापनमा २०६९ सालमा सरकारलाई दिएको सिफारिस कार्यान्वयन गर्न वैशाख ११ गते पत्राचार गरेको थियो। तत्कालीन सिफारिस अनुसार, वास्तविक सुकुमवासीको पहिचान गरी वैकल्पिक बसोबासको व्यवस्था मिलाएर मात्र व्यवस्थापन गर्न निर्देशन दिइएको छ। साथै, अतिक्रमित जग्गाको घर टहरा खाली गर्दा अत्यधिक बल प्रयोग नगर्न र संयमित रूपमा अघि बढ्न निर्देशन पनि दिइएको थियो।
