२६ जेठ, धनगढी। कैलालीको धनगढीबाट मृत अवस्थामा फेला परेका युवकको हत्या भएको प्रहरीले पुष्टि गरेको छ। उपमहानगरपालिका–९ त्रिवेणीघाटस्थित मोहना नदी किनारमा बेवारिसे अवस्थामा भेटिएका २० वर्षीय राजकुमार रानाको हत्या भएको तथ्य प्रकट भएको छ। जिल्ला प्रहरी कार्यालयका प्रवक्ता प्रहरी नायव उपरीक्षक (डीएसपी) योगेन्द्र तिमिल्सिनाले आइतबार मृत फेला परेका कैलारी गाउँपालिका–९ गदरियाका रानाको हत्या भएको प्रारम्भिक अनुसन्धानले देखाएको जानकारी दिएका छन्।
उनका अनुसार हत्यामा संलग्न भएको आरोपमा धनगढी उपमहानगरपालिका–८ का ६० वर्षीय बम्मन राना र ५८ वर्षीय भँगु रानालाई पक्राउ गरिएको छ। पक्राउ परेकाहरू सहित चार जनाले कुटपिट गरी रानाको हत्या गरी शव मोहना नदी किनारमा फालेको प्रहरी जानकारीमा उल्लेख छ। उनीहरूविरुद्ध कर्तव्य ज्यानको मुद्दामा म्याद थप गरी व्यवस्थित अनुसन्धान भइरहेको छ भने अन्य दुई जनाको खोजी कार्य जारी रहेको प्रहरीले जनाएको छ।
