१४ वैशाख, काठमाडौं । मनोहरा सुकुमवासी बस्तीका बाँकी घर टहरा आज बिहानदेखि डोजरको सहायता लिएर भत्काउन थालिएको छ। बिहान ७ बजेबाट १३ वटा डोजर परिचालन गरी बाँकी रहेका घर टहरा ध्वस्त पार्न लागिएको हो। मनोहरा खोला किनारमा अवस्थित बस्ती आइतबार बिहानदेखि भत्काउन थालिएको थियो। केही घर टहरा अझै बाँकी रहेकाले आज पनि उक्त कार्य निरन्तरता दिइएको छ। घर टहरा भत्काउने कार्यमा भक्तपुरबाट प्रहरी र काठमाडौं महानगरपालिकाको नगर प्रहरी टोलीसहित डोजर परिचालन गरिएको छ।
प्रधानमन्त्री बालेन शाहको निर्देशनमा यसअघि थापाथली र गैह्रीगाउँ क्षेत्रमा रहेका सुकुमवासी बस्तीका घरहरू भत्काइएको थियो। त्यहाँका बासिन्दाहरूलाई नगर प्रहरीले कीर्तिपुर, नगरजुन र भक्तपुरमा व्यवस्थापन गरेको छ। काठमाडौं उपत्यकामा झण्डै २७ स्थानमा, बागमती नदी किनारसहित सुकुमवासी नाममा सरकारी जग्गामा अतिक्रमण भएको छ। संबंधित पक्ष, अधिकार सम्पन्न बागमती सभ्यता एकीकृत विकास समितिले ४ मंसिर ०८० मा सर्वोच्च अदालतमा बुझाएको लिखित बहस नोट अनुसार ती क्षेत्रमा ३,४९६ घरटहरा रहेको छ। जसमा काठमाडौं महानगरपालिकामा २,१७०, कागेश्वरी मनोहरामा ९०, बुढानीलकण्ठमा १५६, गोदावरीमा २१५, ललितपुर महानगरपालिकामा १७ र भक्तपुर जिल्लामा ७७३ घरटहरा रहेका छन्। देशव्यापी करिब १५ देखि १६ लाखसम्म सुकुमवासी परिवार रहेको सरकारी तथ्यांकले देखाएको छ।
