१४ वैशाख, काभ्रेपलाञ्चोक । गत शनिबार साँझदेखि अवरुद्ध बिपी राजमार्ग अझै सञ्चालनमा आउन सकेको छैन। १२ गते शनिबार रोशी खोलामा आएको बाढीले बिगारेको डाइभर्सन आइतबार प्रायः स्थानमा बनेको भए पनि पुनः १३ गते आइतबार साँझको पानीले बनेका डाइभर्सन बगाएको थियो। राजमार्गका चिउरीबास, नार्के र चार सय बेशीमा आइतबार बनेका डाइभर्सनहरु बगेका छन्।
इलाका प्रहरी कार्यालय मंगलटारका प्रमुख प्रहरी निरीक्षक ईश्वर कार्कीका अनुसार, रोशी खोलाले बगाएका १३ स्थानका डाइभर्सनमध्ये ८ स्थानमा डाइभर्सन निर्माण भए पनि आइतबार साँझको पानीले तिनि बिग्रएको जानकारी दिएका छन्। पुनः आज (सोमबार) बिहानदेखि डाइभर्सन बनाउन सुरु गरिएको छ भन्ने कार्कीको भनाइ छ। शनिबार रोशी खोलाको बाढीले चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, बोक्सीकुना, कालढुंगा, डालाबेशी, बुलढुंगा तथा माम्तीमा डाइभर्सन बगाएको थियो भने सिन्धुली तर्फ आँपघारी र नेपालथोकमा पनि डाइभर्सन बगाएको थियो।
प्रहरीका अनुसार सडक डिभिजन कार्यालय र ठेकेदार कम्पनीले मौसममा सुधार आएपछि क्षतिग्रस्त डाइभर्सन मर्मत गरी यातायात पुनः सञ्चालनमा ल्याउने तयारीमा लागेको छ।
