‘हाम्रो सुदूरपश्चिम हामी चिनाउँछौं’ अभियानअन्तर्गत धनगढीका मेयरको नेतृत्वमा टोली अपि बेस क्याम्पतर्फ प्रस्थान

१४ वैशाख, धनगढी । धनगढी उपमहानगरपालिका मेयर गोपाल हमालको नेतृत्वमा एक टोलीले अपि बेस क्याम्प यात्रा सुरु गरेको छ। सुदूरपश्चिम प्रदेशको पर्यटन प्रवर्द्धनका लागि धनगढी उपमहानगरपालिकाले ‘हाम्रो सुदूरपश्चिम हामी चिनाउँछौं’ भन्ने नारासहित अभियानको सुरुवात गरेको हो। मेयर हमाल नेतृत्वको ३० सदस्यीय टोली सोमबार बिहान धनगढीबाट अपि बेस क्याम्पतर्फ यात्रा आरम्भ गरेको छ। १० दिने यस यात्रामा टोलीले अपि हिमालको बेस क्याम्पसम्म पुग्ने लक्ष्य राखेको छ।

सुन्दर सुदूरपश्चिमका अभियन्ता समेत रहेका मेयर हमालले स्थानीय सरकारको तर्फबाट निरन्तर हिमाल र पर्यटकीय क्षेत्रको प्रचारप्रसार गर्ने उद्देश्यले यो अभियान थालिएको बताएका छन्। अपि बेस क्याम्प यात्रामा जनप्रतिनिधिसँगै कर्मचारी, व्यापारी र विभिन्न सर्वसाधारणको पनि सहभागिता रहेको छ। टोलीलाई धनगढीबाट बाजागाजा र फूलमालाले बिदाइ गरिएको छ। यस अभियानले सुदूरपश्चिमका धार्मिक र पर्यटकीय स्थलहरूको प्रचारप्रसारमा महत्वपूर्ण योगदान दिन सक्ने विश्वास व्यक्त गरिएको छ।