लेखक: space4knews

सभामुख डोलप्रसाद अर्यालले तोकिएको समयमा संसद् भवन निर्माण कार्य सम्पन्न गर्न सहरी विकास मन्त्रालयका कर्मचारी र निर्माण कम्पनीलाई निर्देशन दिएका छन्। २०७६ असोज १८ मा रु सात अर्ब ९४ करोडमा संसद् भवन निर्माण सम्झौता भएको थियो र अहिलेसम्म छ पटक समय थप भइसकेको छ। भवनको करिब ९४ प्रतिशत निर्माण सम्पन्न भइसकेको छ र सहरी विकास मन्त्रालयले जेठ ९ भित्र निर्माण पूरा गर्न भनेको छ। ३० चैत, काठमाडौँ।

सभामुख डोलप्रसाद (डिपी) अर्यालले संसद् भवन निर्माणप्रति गहिरो चासो व्यक्त गरेका छन्। सहरी विकास मन्त्रालयका कर्मचारी र निर्माण कम्पनीका प्रतिनिधिसँग आज भएको छलफलमा उनले तोकिएको समयमा भवन निर्माण कार्य समयमै सम्पन्न गर्न निर्देशन दिएका छन्। छलफलमा राष्ट्रियसभाका अध्यक्ष नारायणप्रसाद दाहाल, प्रतिनिधिसभाका उपसभामुख रूबीकुमारी ठाकुर र राष्ट्रियसभा उपाध्यक्ष लिलाकुमारी भण्डारी पनि उपस्थित थिए।

विसं २०७६ असोज १८ मा तुन्डी शेख जेभीसँग संसद् भवन निर्माणका लागि रु सात अर्ब ९४ करोडमा सम्झौता भएको थियो। प्रारम्भमा तीन वर्षभित्र निर्माण पूरा गर्ने लक्ष्य राखिएको तर अहिलेसम्म छ पटक समय थप भइसकेको छ। पछिल्लो सम्झौताअनुसार आगामी जेठ ९ भित्र निर्माण पूरा गर्नुपर्नेछ। हाल भवनको करिब ९४ प्रतिशत निर्माण सम्पन्न भइसकेको सहरी विकास मन्त्रालयले जनाएको छ। भवनको इन्टेरियर ठेक्का केसी श्यामसुन्दर बानिया जेभीसँग रु दुई अर्ब ३४ करोडमा र छाना निर्माणको ठेक्का चेनलिङ्क इञ्जिनियरिङसँग रु तीन करोड ८० लाखमा सम्झौता गरिएको छ।

३० चैत, काठमाडौं। आज २०८२ सालको अन्तिम दिन हो। यस वर्ष नेपाली जनताले धेरै उतारचढाव भोग्नुपरेको छ। बाढी पहिरोदेखि वर्षौं जरो गाडेर बसेकाहरू पुराना राजनीतिक दलहरूको बहिर्गमनसम्म २०८२ सालले थुप्रै घटना देखाएको छ। विशेषगरी भदौको तेस्रो साता भएको जेनजी आन्दोलन र त्यसपछिका घटनाक्रम यस वर्षकै केन्द्रमा रहे। सामाजिक सञ्जाल बन्द गर्ने तत्कालीन केपी शर्मा ओली नेतृत्वको सरकारको विरोधमा युवाहरू सडकमा उत्रिएका थिए। यिनै प्रदर्शनहरूले ओली नेतृत्वको सरकारलाई सत्ताच्यूत हुन बाध्य बनाए। त्यही क्रममा अन्तरिम सरकार गठन भयो र सोही सरकारले निर्वाचन सम्पन्न गरायो। २०८२ को अन्त्य हुँदै गर्दा, पुराना राजनीतिक दलहरूलाई बिर्सनलायक वर्ष र नयाँ दलहरूको लागि सम्झनायोग्य वर्ष बन्न पुगेको छ। पश्चिम एसियामा देखिएको द्वन्द्वको प्रभाव नेपाली बजारको महंगीलाई पनि यो वर्षले खेप्न बाध्य बनाएको छ। राजनीति, अर्थतन्त्र, खेलकुद लगायतका क्षेत्रहरूमा यस वर्षले सम्झनायोग्य बनाएका ५० तस्वीरहरू यहाँ प्रस्तुत गरेका छौँ—

काठमाडौं उपत्यकाका विभिन्न स्थानबाट चोरी भएका ५० वटा मोटरसाइकल र स्कुटरहरू आफ्नो मालिकहरूलाई फिर्ता गरिएको छ। काठमाडौं उपत्यका ट्राफिक प्रहरी कार्यालयले गत साउनदेखि ३९४ वटा सवारी साधनका मालिकहरूलाई जिम्मा लगाइसकेको छ। चोरीमा संलग्न ३६ जनालाई नियन्त्रणमा लिई आवश्यक कारबाहीका लागि प्रहरी परिसरमा पठाइएको छ।

काठमाडौं उपत्यका ट्राफिक प्रहरी कार्यालयद्वारा आयोजित एक कार्यक्रममा प्रहरी वरिष्ठ उपरीक्षक नवराज अधिकारीले ३३ वटा मोटरसाइकल र १७ वटा स्कुटर सम्बन्धित मालिकहरूलाई आज हस्तान्तरण गरेका हुन्। ट्राफिक प्रहरीले विभिन्न स्थानबाट फेला पारिएका सवारी साधनहरूको अनुसन्धान गर्दा केहीमा वास्तविक नम्बर प्लेट र केहीमा नक्कली नम्बर प्लेट लगाइएको पाइयो। फेला पारिएका स्थानहरूमा भीमढुङ्गा, स्वयम्भू, नेपालटार, चमती, कपन, थली, बौद्ध, साँखु, नयाँबस्ती, गोकर्ण, माछापोखरी, महाराजगंज, सुकेधारा, पुल्चोक, साङ्ला, फस्कु, चापागाँउ, गठ्ठाघर, एयरपोर्ट, कमलबिनायक, मालिगाउँ, काँडाघारी, जनसेवा, जम्बुडाँडा, मण्डिकाटार र चुनदेवी रहेका छन्।

आज फिर्ता गरिएका ५० वटा सवारीसहित, गत साउनदेखि काठमाडौं उपत्यका ट्राफिक प्रहरीले ३९४ वटा सवारी साधनका मालिकहरूलाई जिम्मा लगाइसकेको छ। चोरी भएका २२ वटा दुईपाङ्ग्रे सवारीसहित चोरीमा संलग्न ३६ जनालाई नियन्त्रणमा लिएर आवश्यक कारबाहीका लागि विभिन्न प्रहरी परिसर तथा प्रहरी वृत्तहरूमा पठाइएको छ। सवारी साधन चोरी वा हराइरहनबाट जोगाउन ट्राफिक प्रहरीले सवारीलाई सुरक्षित स्थानमा पार्क गर्ने, ह्यान्डिललक, डिस्कलक र सुरक्षा प्रणाली जडान गर्न सुझाव दिएको छ।

समाचार सारांश निलम्बित क्यान महानिर्देशक प्रदीप अधिकारीले भ्रष्टाचार मुद्दा मिलाउन जेनजी अगुवाको साथ खोजेको पाइएको छ। अधिकारीले जेनजी मिलाउने व्यक्तिसँग भेटघाट र रकम कारोबार गरेको डिजिटल फरेन्सिक रिपोर्टमा देखिएको छ। अधिकारीविरुद्ध भ्रष्टाचार, संगठित अपराध र आपराधिक षड्यन्त्रसम्बन्धी अनुसन्धान भइरहेको छ। ३० चैत, काठमाडौं ।

भ्रष्टाचार कसुरमा पुर्पक्षका लागि हाल डिल्लीबजार कारागारमा रहेका नागरिक उड्डयन प्राधिकरण (क्यान) का निलम्बित महानिर्देशक प्रदीप अधिकारीले मुद्दा मिलाउन अन्तिम समयमा जेनजीको समेत साथ खोजेको पाइएको छ। अख्तियार दुरुपयोग अनुसन्धान कार्यालयले भक्तपुरको नलिन्चोकमा बनेको हेलिपोर्ट र पोखरा अन्तर्राष्ट्रिय विमानस्थलमा भएको भ्रष्टाचारबारे अनुसन्धान अन्तिम चरणमा पुर्‍याएर मुद्दा दर्ताको प्रक्रिया अघि बढाउन लागेको थियो। यसबाट बच्न उनले जेनजी अगुवाको साथ लिएको पाइएको छ।

सुरुवाती दिनहरूमा भैरहवामा भएको ट्याक्सी वे र एप्रोनको ठेक्का लिँदै काम गरेका अधिकारीले उनका पूर्वचिनजान नवीनराज बस्नेत मार्फत अख्तियारको मुद्दा मिलाउने प्रयास गरेका थिए। त्यस क्रममा बस्नेतले तत्कालीन प्रधानमन्त्री केपी शर्मा ओलीका स्वकीय राजेश बज्राचार्यमार्फत अख्तियार प्रमुख प्रेमकुमार राईसँग मुद्दा मिलाउने संवाद समेत गरेको थियो, जुन विषय पहिले सार्वजनिक भइसकेको थियो। तर प्रयास असफल भएपछि अधिकारीले भारतीय तान्त्रिक बाबा ४३ वर्षीय सरया किन्नेरा (जय जगद्ब्बे) नाम भएका व्यक्तिको प्रयोग गरेका थिए। उक्त तान्त्रिक बाबालाई अख्तियार प्रमुखको फोटो पठाएर तान्त्रिक विधिबाट क्षति पुर्‍याउने योजना समेत बनाइएको थियो।

अधिकारीले प्रयोग गरेको मोबाइलको डिजिटल फरेन्सिक ल्याब रिपोर्ट अनुसार उनले एक व्यक्तिसँग जेनजी मिलाउने भन्दै कुराकानी गरेको देखिन्छ। तहाँ अधिकारीले एक जेनजी अगुवाको नाम लिंदै “के चाहिन्छ यिनलाई म तयार छु” भनि भनेका छन्। जवाफमा जवाफ दिनेलाले “मिलाउँछु” भनिएको छ र अधिकारीले ती जेनजी अगुवालाई भेट्न पनि भनेका छन्। जेनजी मिलाउँछु भनि जवाफ दिनेले पुनः “ओके” भनी जवाफ फर्काएका छन्। अधिकारीले भनेका छन्– “अलि छिटो”। जेनजी मिलाउने व्यक्तिले भने– “म सेट गर्छु”।

क्यानबाट जेनजी मिलाउने व्यक्तिले ५ लाख नगद पनि लिएको प्रमाण भेटिएको छ। क्यानकै कर्मचारी चाँदमाला श्रेष्ठले त्यो रकम नगदमा लिएर पठाएकी थिइन्। रकम लिन कार्यालय पुगेपछि चाँदमाला श्रेष्ठले प्रदीपलाई मेसेज गरेका थिए– “…लाई दिने हो? फाइभ लग्यो तर ६ अपेक्छा गरिएको थियो।” अधिकारीले जवाफ फर्काए– “ओके।” चाँदमालाले सोधे– “एक म दिउँ?” अधिकारीले भने– “त्यत्रो छ कि ! अहिले यति महँगो भो । सरलाई गाह्रो भो । पछि गरौँला, कल गर।” जेनजी मिलाउने व्यक्तिले क्यानको अफिसमा अर्को व्यक्तिलाई पठाएर पनि पैसा लिएको देखिएको छ। क्यानकै कर्मचारी विष्णुप्रसाद पौडेलमार्फत चाँदमाला श्रेष्ठको कार्यालयमा ५ लाख नगद रकम लिएको प्रमाण फेला परेको छ। यस शंकास्पद ५ लाखको लेनदेनबारे अधिकारीले भनेका छन् कि यो आफ्नो व्यक्तिगत रकम हो। उनी भन्छन्, ‘आफू विरुद्ध आएको झूठा समाचारलाई खण्डन गर्ने र जनमानसमा सो सम्प्रेषण गर्ने हेतुले म ती व्यक्तिहरूसँग काम गरेको हुँ। मैले मेरो व्यक्तिगत तलब भत्ता र अन्य आय स्रोतबाट त्यो रकम खर्च गरेर नगद उपलब्ध गराएको हुँ। क्यानले यस विषयमा कुनै औपचारिक निर्णय गरेको छैन।’

नेपाल आयल निगमले अन्तर्राष्ट्रिय बजारमा इन्धनको मूल्य अत्यधिक वृद्धि भएकाले करिब सात अर्ब एकाउन्न करोड पैंसठ लाख रुपैयाँ घाटा व्यहोर्दै आएको जनाएको छ। निगमले एलपी ग्यास सिलिन्डरमा प्रति सिलिन्डर ३३१ रुपैयाँ २५ पैसा तथा डिजेलमा प्रतिलिटर ८७ रुपैयाँ ९९ पैसा घाटा भोगिरहेको जानकारी दिएको छ। सामाजिक सञ्जालमा फैलिएका भ्रमपूर्ण सूचना प्रति ध्यानाकर्षण गर्दै निगमले अन्तर्राष्ट्रिय बजारमा मूल्य घटेपछि उपयुक्त मूल्य समायोजन गर्ने प्रतिबद्धता प्रकट गरेको छ। ३० चैत, काठमाडौं।

नेपाल आयल निगमले पेट्रोलियम पदार्थको मूल्य र नाफा-घाटा सम्बन्धी सामाजिक सञ्जालमा फैलिएका नकारात्मक सूचनाप्रति गम्भीर ध्यानाकर्षण भएको जनाएको छ। निगमले सोमबार जारी गरेको सूचनामा अन्तर्राष्ट्रिय बजारमा इन्धनको मूल्य अत्यधिक बढेकाले उनीहरूले हप्तामा करिब सात अर्ब एकाउन्न करोड पैंसठ लाख रुपैयाँ घाटा व्यहोर्दै आएको जानकारी गराएको छ। निगमका अनुसार, इन्डियन आयल कर्पोरेसन (आईओसी) बाट चैत १७ गतेको पछिल्लो मूल्यसूचीअनुसार पेट्रोलियम पदार्थको खरिद लागत अत्यन्तै महँगो छ।

सार्वजनिक तथ्यांकअनुसार हाल सबैभन्दा बढी घाटा एलपी ग्यास र डिजेलमा छ। मूल्य समायोजनपछि पनि निगमलाई सिलिन्डरमा ३३१ रुपैयाँ २५ पैसा र डिजेलमा प्रति लिटर ८७ रुपैयाँ ९९ पैसा घाटा भैरहेको छ। पेट्रोलमा प्रतिलिटर २ रुपैयाँ ३२ पैसा, मट्टितेलमा ३६ रुपैयाँ ७० पैसा र आन्तरिक हवाई इन्धनमा ९२ पैसा प्रतिलिटर घाटा छ। आईओसीबाट प्राप्त मूल्यका आधारमा निगमलाई पेट्रोल खरिद लागत प्रतिलिटर २ सय २१ रुपैयाँ ३२ पैसा पर्छ भने खुद्रा बिक्री मूल्य २ सय १९ रुपैयाँ मात्र तोकिएको छ।

यी जटिल आर्थिक अवस्थाहरू र अत्यधिक घाटा हुँदाहुँदै पनि निगमले पेट्रोलियम पदार्थ आपूर्तिको सहजता र व्यवस्थापन कायम राखिरहेको दाबी गरेको छ। अन्तर्राष्ट्रिय बजारले सिर्जना गरेको यस परिस्थितिलाई बुझ्न र सामाजिक सञ्जालमा रहेका अफवाहहरूमाथि विश्वास नगर्न निगमले सबै उपभोक्तालाई आग्रह गरेको छ। साथै, अन्तर्राष्ट्रिय बजारमा मूल्य घटेपछि नेपालमा पनि उपयुक्त मूल्य समायोजन गर्ने प्रतिबद्धता व्यक्त गरेको छ।

पृथु बास्कोटा कर्पोरेट टी-१० लिगका ब्रान्ड एम्बासडर नियुक्त भएका छन्। उनले आफूलाई ब्रान्ड एम्बासडर बनाउनुमा अत्यन्त उत्साहित र गर्व महसुस भएको बताएका छन्। कर्पोरेट टी-१० लिग वैशाख १० देखि १७ गतेसम्म काठमाडौंको तल्लो मुलपानी क्रिकेट मैदानमा आयोजना गरिनेछ।

काठमाडौं स्पोर्ट्स एन्ड इभेन्ट्स प्रालिद्वारा आयोजना हुन लागेको कर्पोरेट टी-१० लिगका लागि नेपाली राष्ट्रिय क्रिकेट खेलाडी पृथु बास्कोटा ब्रान्ड एम्बासडरका रूपमा नियुक्त भएका छन्। आज आयोजित औपचारिक कार्यक्रममा उनलाई लिगको ब्रान्ड एम्बासडरको रूपमा सार्वजनिक गरियो। पृथु बास्कोटा नेपालका अनुभवी क्रिकेटरमध्ये एक मानिन्छन्।

बास्कोटा आफ्नो स्थिर प्रदर्शन र खेलप्रतिको समर्पणका लागि प्रख्यात छन्। उनले नेपाल राष्ट्रिय टोलीबाट खेल्दै विभिन्न अन्तर्राष्ट्रिय प्रतियोगितामा महत्वपूर्ण भूमिका निर्वाह गरेका छन्। कार्यक्रममा बोल्दै बास्कोटाले आफूलाई कर्पोरेट टी–१० लिगको ब्रान्ड एम्बासडर बन्न पाउँदा अत्यन्त उत्साहित र गौरवान्वित महसुस भएको बताए।

काठमाडौं स्पोर्ट्स एन्ड इभेन्ट्स प्रालिका निर्देशक ज्योति भण्डारीले पृथु बास्कोटालाई ब्रान्ड एम्बासडरको रूपमा स्वागत गर्न पाउँदा खुशी लागेको बताए। उनले भने, ‘पृथु जस्ता अनुभवी र प्रेरणादायी खेलाडीको साथले हाम्रो प्रतियोगिता अझ उचाइमा पुर्‍याउने विश्वास लिएका छौं।’

३० चैत, काठमाडौं । प्रतिनिधिसभाका सभामुख डोलप्रसाद अर्यालले संसदीय अभ्यास र प्रणालीसम्बन्धी विषयमा पूर्वसभामुखहरूसँग छलफल गरेका छन् । चैत २२ गते सभामुख पदमा निर्वाचित अर्यालले आज पूर्वसभामुख देवराज घिमिरे र अग्निप्रसाद सापकोटासँग भेटवार्ता गरेका हुन् । त्यस अवसरमा नेपालको संसदीय अभ्यास, विगतका अनुभव, सङ्घीय संसद्को प्रभावकारी सञ्चालन, विधायन प्रक्रिया सुदृढीकरणजस्ता विषयमा व्यापक छलफल भएको सभामुखको सचिवालयले जनाएका छन् ।

सनराइजर्स हैदराबादले आईपीएल २०२६ मा राजस्थान रोयल्सलाई ५७ रनले पराजित गरेको छ। डेब्यूटान्ट प्रफुल हिंगेले ४ विकेट लिए भने साकिब हुसेनले पनि ४ विकेट लिए। राजस्थानले १९ ओभरमा १५९ रनमा अलआउट भयो र हैदराबादले २१६ रन बनाएको थियो। ३० चैत, काठमाडौं। दुई नयाँ खेलाडी प्रफुल हिंगे र साकिब हुसेनले प्रभावकारी बलिङ गरेपछि सनराइजर्स हैदराबादले इन्डियन प्रिमियर लिग (आईपीएल) २०२६ मा राजस्थान रोयल्सलाई पराजित गरेको छ। सोमबार राति सम्पन्न खेलमा हैदराबादले राजस्थानलाई ५७ रनले पराजित गर्‍यो। हैदराबादले दिएको २१७ रनको लक्ष्य पछ्याएको राजस्थान १९ ओभरमा १५९ रनमा अलआउट भयो। प्रफुलले पहिलो ओभरमै तीन विकेट लिए। उनले आक्रामक ओपनर वैभव सूर्यवंशीलाई शून्यमै आउट गरे भने ध्रुव जुरेल र लुहान्द्रे प्रेटोरियसलाई पनि शून्यमै आउट गराए। त्यसपछि यशश्वी जैसवाल साकिब हुसेनको बलमा १ रनमा आउट भए भने कप्तान रियान पराग प्रफुलकै बलमा ४ रनमा आउट भएपछि राजस्थान ९-५ को कमजोर अवस्थामा पुगेको थियो। त्यसपछि डोनोभन फेरेरा र रविन्द्र जडेजाले मिलेर छैटौं विकेटका लागि ११८ रनको साझेदारी गरेका थिए। फेरेराले सर्वाधिक ६९ रन बनाए भने जडेजाले ४५ रन जोडे। प्रफुल र साकिब दुवैले ४-४ विकेट लिए। प्रफुलले ४ ओभरमा ३४ रन खर्चेर ४ विकेट लिए भने साकिबले ४ ओभरमा २४ रन दिएर ४ विकेट लिए। इशान मलिंगाले २ विकेट लिए। टस हारेर पहिला ब्याटिङ गरेको हैदराबादले २० ओवरमा ६ विकेट गुमाएर २१६ रन बनायो। कप्तान इशान किशनले ४४ बलमा ९१ रन बनाए। हेनरिक क्लासेनले ४० रन बनाउँदा नितिश रेडीले २८ र सलिल अरोराले अविजित २४ रन बनाए। राजस्थानका जोफ्रा आर्चरले २ विकेट लिए भने सन्दीप शर्मा, तुशार देशपान्डे र रियान परागले १-१ विकेट लिएका थिए। प्रतियोगितामा पहिलो हार बेहोरेको राजस्थान ५ खेलमा ८ अंकसहित शीर्ष स्थानमा छ। हैदराबाद ५ खेलमा ४ अंकसहित चौथो स्थानमा छ।

रास्वपकाकी पूर्वसांसद विन्दबासिनी कंशाकारले मानव शरीर जलन नियन्त्रण र यसको सजाय सम्बन्धी विधेयक ल्याउन माग गरेकी छिन्। सभामुख डोलप्रसाद अर्यालले उक्त विधेयक आगामी संसदको अधिवेशनमा प्रस्तुत गर्न सहजीकरण गर्ने प्रतिबद्धता व्यक्त गरेका छन्। पूर्वसांसद कंशाकारले विधेयक पारित भएपछि जलन पीडितहरुको उपचार, संरक्षण र न्याय सुनिश्चित हुने बताएकी छिन्।

३० चैत, काठमाडौं। रास्वपकाकी पूर्वसांसद विन्दबासिनी कंशाकारले मानव शरीर जलन नियन्त्रण तथा सजाय विधेयक ल्याउन माग गरेकी छिन्। उनले सभामुख डोलप्रसाद अर्याल र उपसभामुख रुवी कुमारीलाई भेटेर अघिल्लो संसदमा उक्त विधेयक दर्ता भएको विषयमा जानकारी गराएकी छन्। सभामुख अर्यालले आगामी संसद अधिवेशनमा विधेयक प्रस्तुत गर्न सहयोग गर्ने प्रतिबद्धता व्यक्त गरेका छन्। ‘यदि यो विधेयक संसदीय रूपमा पारित भएमा जलन पीडित नागरिकहरूको उपचार, संरक्षण र न्याय सुनिश्चित गर्न ठूलो सहयोग पुग्नेछ,’ कंशकारले सार्वजनिक रूपमा बताएका छन्। यसअघि रास्वपाले यो विधेयक गैरसरकारी विधेयकको रूपमा दर्ता गरिसकेको छ।

गौरिशंकर सुपर लिग यू–१७ क्रिकेट प्रतियोगितामा काठमाडौं जिल्ला यू–१७, ग्रेट हिमालय र नेक्सस टोलीले महत्वपूर्ण जीत हासिल गरेका छन्। काठमाडौं जिल्ला यू–१७ ले रेडियन्ट क्रिकेट एकेडेमी यू–१७ लाई ५८ रनले हरायो। पहिलो ब्याटिङ गर्दै काठमाडौंले १५ ओभरमा ८ विकेट गुमाएर १०९ रन जोड्यो। करण यादवले २२, विशाल बुढाले २० र शुभा रेग्मीले १५ रन बनाए। सौर्य सिंह ठाकुरी १२ रनमा अविजित रहे भने अतिरिक्तबाट २७ रन थपियो। बलिङतर्फ रेडियन्टका मुन्ना जयसवालले ४ विकेट लिए भने मोहम्मद आमिरले २ विकेट लिए। जवाफमा ११० रनको लक्ष्य पछ्याएको रेडियन्ट १३.४ ओभरमा ५१ रनमै अलआउट भयो। मोहम्मद आमिर (१३) र अंकित कुमार (१४) बाहेक अन्य ब्याटरले प्रभावशाली प्रदर्शन गर्न सकेनन्। काठमाडौंका पारख रसाइली, दिवास क्षेत्री र सौर्य सिंह ठकुरीसहितका बलरहरूले उत्कृष्ट बलिङ गरे।

दोस्रो खेलमा ग्रेट हिमालय क्रिकेट एकेडेमी यू–१७ ले जोरपाटी क्रिकेट एकेडेमी यू–१७ लाई ८६ रनले पराजित गर्‍यो। ग्रेट हिमालयले १५ ओभरमा ५ विकेट गुमाएर १४६ रन जोड्यो। सुप्रिम सुनारले ४१, स्पर्श तामाङ्ले ३१ र अनिकेत गजुरेलले २६ रन बनाए। जोरपाटीका सागर र सोहितले २–२ विकेट लिए। १४७ रनको लक्ष्य पछ्याएको जोरपाटी १४.२ ओभरमा ६० रनमै अलआउट भयो। आरोन जंग गिरीले २१ र निमेश योञ्जनले १५ रन बनाए। ग्रेट हिमालयका सागर बी र कमल शाहीले ३–३ विकेट लिए।

तेस्रो खेलमा नेक्सस क्रिकेट एकेडेमी यू–१७ ले भक्तपुर क्रिकेट सेन्टर यू–१७ लाई ७ विकेटले हरायो। भक्तपुर ९.५ ओभरमा ५४ रनमै अलआउट भयो, जसमा श्रेराज वीर श्रेष्ठले १९ रन बनाए। नेक्ससका सिमोन पन्तले ४ र लोकेन्द्र कार्कीले ३ विकेट लिएका थिए। ५५ रनको लक्ष्य नेक्ससले ९.५ ओभरमा ३ विकेट गुमाएर पूरा गर्‍यो। सरजिल अली मन्सारी १७ रनमा अविजित रहे भने आरव श्रेष्ठले १३ रन जोडेर जित सुनिश्चित गरे।