

काठमाडौं । मुलुकको विदेशी विनिमय सञ्चिति ४१ खर्ब ६१ अर्ब रुपैयाँ पुगेको छ। नेपाल राष्ट्र बैंकले सार्वजनिक गरेको चालु आर्थिक वर्ष २०८३/८४ को पहिलो तीन महिनाको वित्तीय स्थिति प्रतिवेदनअनुसार असोज मसान्तसम्म विदेशी मुद्रा सञ्चिति उल्लेख्य रूपमा वृद्धि भएको हो। राष्ट्र बैंकका अनुसार असोज मसान्तसम्म कुल विदेशी विनिमय सञ्चिति २७ अर्ब ३९ करोड अमेरिकी डलर बराबर पुगेको छ। गत असार मसान्तको तुलनामा सञ्चिति नेपाली रुपैयाँमा ६.८ प्रतिशत र अमेरिकी डलरमा ८.२ प्रतिशतले बढेको हो। कुल विदेशी विनिमय सञ्चितिमध्ये नेपाल राष्ट्र बैंकसँग ३६ खर्ब ९५ अर्ब २४ करोड रुपैयाँ रहेको छ। राष्ट्र बैंकबाहेकका बैंक तथा वित्तीय संस्थासँग भने ४ खर्ब ६५ अर्ब ९० करोड रुपैयाँ बराबरको विदेशी मुद्रा सञ्चिति रहेको प्रतिवेदनमा उल्लेख छ।
असोज मसान्तसम्मको कुल विदेशी विनिमय सञ्चितिमा भारतीय मुद्राको हिस्सा २१ प्रतिशत रहेको छ। राष्ट्र बैंकका अनुसार हाल कायम विदेशी मुद्रा सञ्चितिले मुलुकको १७.२ महिनाको वस्तु तथा सेवा आयात धान्न सक्ने अवस्था छ। चालु आर्थिक वर्षको पहिलो तीन महिनाको आयातलाई आधार मान्दा बैंकिङ क्षेत्रसँग रहेको विदेशी विनिमय सञ्चिति १९.९ महिनाको वस्तु आयात र १७.२ महिनाको वस्तु तथा सेवा आयातका लागि पर्याप्त हुने देखिएको हो। विदेशी मुद्रा सञ्चितिमा भएको वृद्धिले मुलुकको बाह्य आर्थिक क्षेत्र थप सहज अवस्थामा रहेको संकेत गरेको छ। यसैबीच, चालु आर्थिक वर्षको असोज महिनामा मात्रै २ खर्ब ६७ अर्ब ३४ करोड रुपैयाँ रेमिट्यान्स भित्रिएको छ। यो मासिक रेमिट्यान्स आप्रवाह हालसम्मकै उच्च रहेको विवरणमा उल्लेख छ।
भदौ महिनामा २ खर्ब २१ अर्ब रुपैयाँ रेमिट्यान्स भित्रिएको थियो। गत आर्थिक वर्षको असोजमा भने २ खर्ब १ अर्ब २२ करोड रुपैयाँ रेमिट्यान्स प्राप्त भएको थियो। चालु आर्थिक वर्षको पहिलो तीन महिनामा कुल रेमिट्यान्स आप्रवाह २७.२ प्रतिशतले बढेर ७ खर्ब ३ अर्ब ७० करोड रुपैयाँ पुगेको छ। अघिल्लो आर्थिक वर्षको सोही अवधिमा रेमिट्यान्स आप्रवाहको वृद्धिदर ३५.४ प्रतिशत रहेको थियो। अमेरिकी डलरमा रेमिट्यान्स आप्रवाह १६.७ प्रतिशतले वृद्धि भई ४ अर्ब ६० करोड डलर पुगेको छ। अघिल्लो वर्षको सोही अवधिमा अमेरिकी डलरमा रेमिट्यान्स आप्रवाह २९.२ प्रतिशतले बढेको थियो।
त्यस्तै, समीक्षा अवधिमा खुद ट्रान्सफर आय ७ खर्ब ६२ अर्ब ९० करोड रुपैयाँ पुगेको राष्ट्र बैंकले जनाएको छ। राष्ट्र बैंकको विवरणअनुसार असोज महिनामा वैदेशिक रोजगारीका लागि १ लाख २१ हजार ८७९ नेपालीले नयाँ श्रम स्वीकृति लिएका छन्। त्यस्तै, पुनः श्रम स्वीकृति लिने नेपालीको संख्या ८२ हजार ३६९ पुगेको छ। वैदेशिक रोजगारीबाट प्राप्त हुने रेमिट्यान्स नेपालको विदेशी मुद्रा आर्जनको प्रमुख स्रोतमध्ये एक हो। रेमिट्यान्स आप्रवाहमा भएको वृद्धिले विदेशी विनिमय सञ्चिति बढाउन सहयोग पुर्याएको देखिन्छ। विदेशी मुद्रा सञ्चिति र रेमिट्यान्स दुवैमा देखिएको वृद्धिले नेपालको बाह्य आर्थिक अवस्था बलियो बन्दै गएको संकेत गरे पनि दीर्घकालीन आर्थिक स्थायित्वका लागि उत्पादन, निर्यात र स्वदेशमै रोजगारी सिर्जना बढाउनु उत्तिकै आवश्यक देखिन्छ।

सम्बन्धित खबर










