काठमाडौँ फिल्म फेस्टिभलमा शबाना आजमी आउने, सबै चलचित्र निःशुल्क हेर्न पाइने
काठमाडौँ : कात्तिक १३ देखि १५ गतेसम्म आयोजना हुने काठमाडौँ फिल्म फेस्टिभलमा भारतीय अभिनेत्री शबाना आजमी सहभागी हुने भएकी छन्। काठमाडौँ महानगरपालिकाले आयोजना गर्ने महोत्सवमा सबै चलचित्र निःशुल्क हेर्न पाइनेछ।
मंगलबार आयोजित पत्रकार सम्मेलनमा फेस्टिभल निर्देशक आयुशा श्रेष्ठले चलचित्र हेर्न दर्शकले सिट भने आरक्षण गर्नुपर्ने जानकारी दिइन्। महोत्सवमा नेपाली तथा विदेशी चलचित्र प्रदर्शनसँगै अन्तरसंवाद, मास्टर क्लास, सम्पदा यात्रा र अवार्ड समारोह आयोजना गरिनेछ।
आजमी कात्तिक १४ गते नेपाल पर्यटन बोर्डमा हुने ‘चलचित्र, महोत्सव र सार्थक जीवन’ विषयक संवादमा सहभागी हुने कार्यक्रम छ। सोही दिन जापानी निर्देशक ताकायुकी नाकामुराले राष्ट्रिय सभागृहमा जापानको यामागाता युनेस्को फिल्म सिटीबारे प्रस्तुति दिनेछन्।
महोत्सवको पहिलो दिन वसन्तपुरमा सम्पदा यात्रा आयोजना गरिनेछ। कात्तिक १५ गते राष्ट्रिय सभागृहमा रेड कार्पेट कार्यक्रमसँगै पुरानो नेपाली चलचित्र ‘के घर के डेरा’ प्रदर्शन गर्ने तयारी छ।
‘नेपाल पानोरामा सर्ट्स’ अन्तर्गत खुला आह्वानबाट प्राप्त ७५ चलचित्रमध्ये १० वटा छनोट गरिएको आयोजकले जनाएको छ। छनोट भएका प्रत्येक चलचित्रलाई एक लाख रुपैयाँ प्रोत्साहन पुरस्कार प्रदान गरिनेछ।
काठमाडौँको संस्कृति, परम्परा र सम्पदाको प्रवर्द्धन तथा पुराना कलाकारको योगदानलाई नयाँ पुस्तासँग जोड्नु महोत्सवको उद्देश्य रहेको आयोजकले जनाएको छ।
। डेविड मलानको उत्कृष्ट अर्धशतक र कमल ऐरीको प्रभावशाली बलिङको मद्दतमा चितवन राइनोजले नेपाल प्रिमियर लिग (एनपीएल)मा विजयी सुरुवात गरेको छ। कीर्तिपुरस्थित त्रिवि क्रिकेट मैदानमा आज भएको पहिलो खेलमा चितवनले विराटनगर किंग्सलाई ८ रनले पराजित गरेको हो।