लेखक: space4k

काठमाडाैं । नेपाली कम्युनिष्ट पार्टी (नेकपा)का नेता लेखनाथ दाहालले बालेन्द्र साह नेतृत्वको सरकार राष्ट्रियता र जनजीविकाको सवालमा पूर्णतः असफल भइसकेको टिप्पणी गर्नुभएको छ ।
मंगलवार राजधानीमा आयोजित एक कार्यक्रममा बोल्दै उहाँले यस्तो टिप्पणी गर्नुभएको हो । उहाँले बजेट कार्यान्वयन समेत प्रभावकारी रुपमा हुन नसकेको भन्दै सरकारको आलोचना गर्नुभयो । सरकार गठन भएको आठ महनिासम्म समेत भौतिक विकासका कुनैपनि ठेक्का प्रक्रिया अगाडि नबढेको उहाँको भनाइ छ । उहाँले अर्थमन्त्री स्वर्णिम वाग्लेले खर्च व्यवस्थापन र  बजेट कार्यान्वयनमा ध्यान दिन नसकेको आरोप समेत लगाउनु भयो । वाग्ले कानूनतः नेपालको अर्थमन्त्री भएपनि वल्र्ड बैंक र युएनडिपीको जागिरे भएको आरोप लगाउनु भयो । विश्व बैंकबाट ऋण लिएर फजुल खर्च कसरी गर्ने भन्ने कुरामा मात्र अर्थमन्त्री केन्द्रित रहेको उहाँको आरोप छ । उहाँले राष्ट्रिय स्वतन्त्र पार्टीका सभापति रवि लामिछानेले भारत भ्रमणका क्रममा नेपाल–भारत सम्बन्ध र विगतका विवादबारे दिएको अभिव्यक्तिप्रति समेत आपत्ति जनाउनुभयो । उहाँले सरकारका प्रतिनिधि र सत्तारुढ दलका नेताहरुले भारतलाई लिएर दिएका अभिव्यक्तिले मुलुकको स्वाभिमानमा गम्भीर चोट पु¥याएको पनि बताउनुभयो । उहाँले सरकारले बाढी प्रभावित नागरिकको पुनःस्थापनामा ध्यान दिनुपर्नेमा जोड दिनुभयो

काठमाडौँ : राष्ट्रिय सभाअन्तर्गतको भोटेकोशी एवं कालीगण्डकी कोरिडोर विपद्सम्बन्धी अध्ययन तथा अनुगमन संसदीय विशेष समितिले विपद्प्रभावित प्रत्येक वडामा पुगेको राहत र क्षतिको विस्तृत विवरण सरकारसँग माग्ने भएको छ।

मंगलबार बसेको बैठकमा समिति सभापति कृष्णप्रसाद पौडेलले समग्रमा वितरण गरिएको राहतको रकम मात्र पर्याप्त नहुने बताए। प्रभावित पालिका र वडामा कति नगद, खाद्यान्न तथा अन्य सहायता पुग्यो भन्ने स्पष्ट विवरण आवश्यक रहेको उनको भनाइ थियो।

प्रभावित करिब ४९ वडाबारे आफूले जानकारी पाएको उल्लेख गर्दै पौडेलले वडागत तथ्याङ्क व्यवस्थित रूपमा उपलब्ध गराउन सम्बन्धित मन्त्रालयसँग समन्वय गर्न सचिवालयलाई आग्रह गरे।

समितिले क्षतिको वैज्ञानिक अभिलेखीकरणलाई प्राथमिकता दिने जनाएको छ। वडा अध्यक्ष र प्राविधिकको हस्ताक्षरसहित तयार गरिने विवरणमा मृतक तथा बेपत्ताको सङ्ख्या, प्रभावित बालबालिकाको अवस्था, पशुपन्छी र खेतीपातीको क्षतिसँगै परिवारको सामाजिक तथा आर्थिक अवस्था समेट्ने योजना छ।

रोजगारी, उद्योग–व्यवसाय र विद्यालय सञ्चालनको अवस्थासमेत अभिलेखमा राख्नुपर्ने पौडेलले बताए। सरकारी विवरण र स्थानीय नागरिकबाट प्राप्त जानकारीबीच फरक देखिए सम्बन्धित निकायलाई बोलाएर जवाफ मागिने उनको भनाइ थियो।

प्रस्तावित कार्ययोजनाअनुसार समितिले कात्तिक १७ देखि २१ गतेसम्म रसुवा, नुवाकोट र धादिङका विपद्प्रभावित क्षेत्र अनुगमन गर्ने तयारी गरेको छ। धादिङको गल्छी, नुवाकोटको विदुर र रसुवाको धुन्चेमा सरोकारवालासँग छलफल गर्ने प्रस्ताव छ।

बैठकमा सांसदहरूले गोरखा तथा बूढीगण्डकी करिडोरका प्रभावित क्षेत्रलाई पनि अनुगमनमा समेट्नुपर्ने बताएका थिए। अनुगमनमा मानसिक स्वास्थ्य, रोजगारी र कृषिलगायतका विषयका विज्ञ तथा सम्बन्धित सरकारी प्रतिनिधिलाई सहभागी गराउनुपर्ने उनीहरूको सुझाव थियो।

काठमाडौँ : नेपाली कांग्रेसको भ्रातृ संस्था नेपाल तरुण दलले ७४औँ स्थापना दिवसका अवसरमा विभिन्न जिल्लामा सामाजिक तथा रचनात्मक कार्यक्रम आयोजना गरेको छ।

मंगलबार काठमाडौँको संकटा मन्दिर परिसरमा सरसफाइ अभियानको नेतृत्व गर्दै अध्यक्ष मनिष कोइरालाले तरुण दललाई युवाको आवाज र जनतासँग जोडिएको संस्थाका रूपमा अघि बढाउने बताए।

कोइरालाका अनुसार स्थापना दिवसमा करिब ३० देखि ३५ जिल्लामा रक्तदान, अस्पतालमा फलफूल वितरण, फुटबल प्रतियोगिता र धार्मिकस्थल सरसफाइजस्ता कार्यक्रम सञ्चालन गरिएका छन्। बाँके, वीरगञ्ज र धादिङलगायतका क्षेत्रमा पनि सरसफाइ अभियान सञ्चालन भइरहेको उनले जानकारी दिए।

तरुण दलप्रति समाजमा रहेको बुझाइ बदल्दै सामाजिक रूपान्तरण र युवाको सशक्तीकरणमा केन्द्रित हुने उनको भनाइ थियो।

प्रविधिको विकाससँगै युवालाई कृत्रिम बौद्धिकतासम्बन्धी क्षेत्रमा जोड्ने योजना रहेको पनि कोइरालाले बताए। आगामी एक महिनाभित्र युवा लक्षित छवटा नयाँ कार्यक्रम सार्वजनिक गर्ने तयारी भइरहेको उनले जानकारी दिए।