लेखक: space4knews

९ असार, काठमाडौं । नेपाल ओलम्पिक कमिटी (एनओसी) ले विश्वव्यापी नाराअनुसार ‘लेट्स मुभ– यू क्यान डु धिस!’ अभियानसहित मनाइएको ओलम्पिक डे २०२६ को सफल समापन गरेको छ । अन्तर्राष्ट्रिय ओलम्पिक कमिटी (आईओसी) को स्थापना दिवस तथा ओलम्पिक डेको अवसरमा ललितपुरको सातदोबाटोस्थित एनओसी भवनमा मुख्य समारोह आयोजना गरिएको थियो । कार्यक्रममा प्रमुख अतिथि तथा एनओसी अध्यक्ष जीवनराम श्रेष्ठले ओलम्पिक डे २०२६ का संयोजक एवं उपाध्यक्ष अशोक रत्न बज्राचार्यले कार्यक्रम सफल बनाउन गरेको योगदानको प्रशंसा गरे । कार्यक्रममा आयोजक समितिको स्वागत मन्तव्यपछि महासचिव राजीव श्रेष्ठले धारणा राखेका थिए । अध्यक्ष श्रेष्ठले राष्ट्रिय झण्डा फहराएका थिए भने उपाध्यक्ष तथा कार्यक्रम संयोजक बज्राचार्यले ओलम्पिक झण्डा फहराएका थिए । यस अवसरमा आईओसी अध्यक्ष किर्स्टी कोभेन्ट्रीको ओलम्पिक डे सन्देशसमेत वाचन गरिएको थियो ।

समारोहलाई सम्बोधन गर्दै अध्यक्ष श्रेष्ठले ओलम्पिक दिवसको महत्व र खेलमार्फत एकता, मित्रता तथा स्वस्थ जीवनशैली प्रवर्द्धनमा खेलको भूमिकाबारे प्रकाश पारे । त्यसपछि एक ओलम्पियनलाई प्रतीकात्मक रूपमा ओलम्पिक मशाल हस्तान्तरण गर्दै ओलम्पिक डे र्‍यालीको औपचारिक शुभारम्भ गरिएको थियो । कार्यक्रम संयोजक अशोक रत्न बज्राचार्यले राष्ट्रिय खेल संघ, शैक्षिक संस्था, सुरक्षा निकाय, स्वयंसेवक तथा सहभागीहरूको सक्रिय सहयोगका कारण कार्यक्रम सफल भएको भन्दै सबैप्रति आभार व्यक्त गरे । असार ४ देखि ९ गते (जुन १८–२३) सम्म देशभर विभिन्न राष्ट्रिय खेल संघ, विद्यालय, कलेज, प्रि-स्कुल, सामुदायिक संस्था, नेपाली सेना, सशस्त्र प्रहरी बल र नेपाल प्रहरीको सहभागितामा विभिन्न कार्यक्रम सञ्चालन गरिएको थियो । खेल प्रदर्शन, र्‍याली, फिटनेस कार्यक्रम, शैक्षिक सत्र, जनचेतनामूलक अभियान तथा सामुदायिक सहभागितामूलक गतिविधिहरूमार्फत ओलम्पिक अभियानलाई देशव्यापी बनाइएको थियो । ओलम्पिक डे २०२६ को सफल आयोजनाले उत्कृष्टता, मित्रता र सम्मानका ओलम्पिक मूल्यहरूलाई प्रवर्द्धन गर्दै खेलमार्फत सबै उमेर समूहका मानिसलाई सक्रिय र स्वस्थ जीवनशैली अपनाउन प्रेरित गर्ने नेपालको प्रतिबद्धतालाई पुनः उजागर गरेको एनओसीले जनाएको छ ।

९ असार, काठमाडौं । फिफा विश्वकप २०२६ समूह ‘एल’ अन्तर्गत क्यानडाको टोरन्टोस्थित टोरन्टो स्टेडियममा मध्य अमेरिकी टोली पानामा र युरोपेली अनुभवी टोली क्रोएसिया विश्वकप यात्रामा बाँकी रहने लक्ष्यसहित मैदानमा उत्रँदैछन्। समूह चरणको पहिलो खेलमा दुवै टोलीले हार बेहेरेका कारण नकआउट चरणमा उत्रनको लागि यो खेल दुवैका लागि ‘जसरी पनि जित्नै पर्ने’ बनिसकेको छ। क्रोएसियाले पहिलो खेलमा उपाधि दावेदार इंग्ल्यान्डसँग दुई पटक खेलमा फर्किए पनि अन्ततः ४-२ ले पराजित भयो। पानामाले घाना विरुद्ध उत्कृष्ट ‘प्रेसिङ’ र खेल प्रदर्शन गर्दा पनि इन्जुरी समयको ९५ औं मिनेटमा गोल खाएर १-० को हार व्यहोर्नुपर्यो।

इतिहासमै पहिलो पटक विश्वकप अंक जोड्न खोजिरहेको पानामा र लगातार दुई पटक सेमिफाइनल पुगेको क्रोएसियाबीचको यो खेल निकै रणनीतिक र निर्णायक हुनेछ। हेड-टु-हेड फुटबलको इतिहासमा पानामा र क्रोएसियाबीच यो पहिलो अन्तर्राष्ट्रिय भेट हो। विश्वकप वा अन्य अन्तर्राष्ट्रिय प्रतिस्पर्धामा यी दुई टोली कहिल्यै आमनेसामने भएका छैनन्। पानामाले आफ्नो विश्वकप इतिहासका चार खेलमध्ये अहिले सम्म कुनै पनि अंक जोड्न सकेको छैन भने क्रोएसिया विश्वकपमा सामान्यतया शुरुवाती खेलमा कमजोर देखिन्छ, ६ विश्वकपमा ४ चोटि ओपनिङ खेल हारेको छ। तर, क्रोएसियाले सन् २००२ बाट लगातार दुई खेल हारेको रेकर्ड बनाएको छैन, त्यसैले यो खेलमा सुधारको अपेक्षा छ।

टिम समाचार
पानामा: प्रशिक्षक थोमस क्रिस्टियान्सेनले घाना विरुद्ध राम्रो प्रदर्शन गरेको डिफेन्स लाइनलाई निरन्तरता दिने सम्भावना छ। विङ्गब्याक सेसर ब्ल्याकम्यान र मिडफिल्डर कार्लोस हार्भेले पहेंलो कार्ड पाएका कारण दबाबमा हुनेछन्। ग्रोइन चोटका कारण पहिलो खेल गुमाएका मुख्य मिडफिल्डर अडालबर्टो कार्रास्किया प्रशिक्षणमा फर्किए पनि सुरुवाती ११ मा कमै सम्भावना छ। गोल्ड कपका शीर्ष गोलकर्ता इस्माइल डियाजलाई सुरुवाती टोलीमा मौका दिइने प्रबल देखिन्छ।
क्रोएसिया: इंग्ल्यान्डसँगको पहिलो खेलमा खराब शुरुवात गरेपनि ४० वर्षीय कप्तान लुका मोड्रिच पहिलो ११ मा रहनेछन्। मार्टिन बटुरिनाले आक्रमक मिडफिल्डरको रूपमा लगातार स्थान पाउनेछन्। पहिलो खेलमा गोल गरेका पिटर मुसाको स्थानमा अनुभवी एन्ड्रे क्रामारिच वा एन्टे बुडिमिरलाई स्ट्राइकरको रूपमा सुरुवाती अवसर दिने बारे प्रशिक्षक जाल्त्को डालिचले निर्णय गर्न बाँकी राखेका छन्।

भाइचुङ भुटिया विशेष प्रिम्याच तथा पोस्ट म्याच कार्यक्रमहरूमा सहभागी हुनेछन्। हिमालय स्पोर्ट्सले जानकारी दिएको छ कि उनी आजै बेलुका यी कार्यक्रमहरूमा सहभागी हुनेछन्। ९ असार, काठमाडौं। दक्षिण एसियाका चर्चित फुटबल खेलाडी र भारतीय फुटबलका पूर्व कप्तान भाइचुङ भुटिया फिफा विश्वकप २०२६ को विशेष प्रिम्याच र पोस्ट म्याच कार्यक्रममा सहभागी हुन नेपाल आइपुगेका छन्। भुटिया मंगलबार दिउँसो नेपाल आइपुगेका हुन्। उनलाई हिमालय स्पोर्ट्स टेलिभिजनका प्रमुख कार्यकारी अधिकृत सुरज गिरी लगायतले त्रिभुवन अन्तर्राष्ट्रिय विमानस्थलमा स्वागत गरेका थिए। नेपालमा फिफा विश्वकप २०२६ को आधिकारिक तथा विशेष प्रसारणकर्ता हिमालय स्पोर्ट्सले भुटियाको उपस्थितिमा विश्वकप प्रसारण अभियानलाई थप मनमोहक बनाउने घोषणा गरिसकेको छ।
यस अवसरमा हिमालय स्पोर्ट्सका सीईओ र निर्देशक सुरज गिरीले विश्वकप प्रसारणमा सहभागी हुनुहुने भुटियालाई नेपालमा स्वागत गर्न पाउँदा खुशी लागेको व्यक्त गरे। उनले भने, ‘भुटियाको उपस्थिति नेपाली फुटबल स्टारहरूसँगै देशभरका फुटबल प्रेमीहरूका लागि विश्वकप अनुभवलाई अझ स्मरणीय बनाउनेछ।’
भुटिया विशेष प्रिम्याच र पोस्ट म्याच शोमा सहभागी हुनेछन्। हिमालय स्पोर्ट्सले जनाएको छ कि उनी आजै बेलुका यी कार्यक्रमहरूमा उपस्थित हुनेछन्। कार्यक्रममा नेपालका चर्चित फुटबल खेलाडी तथा फुटबल सम्बन्धित व्यक्तित्वहरू समेत सहभागी हुनेछन्। भारतीय फुटबलका पूर्व कप्तान र देशकै सर्वाधिक सफल तथा चर्चित खेलाडी भाइचुङ भुटिया ‘सिक्किमीज स्नाइपर’ उपनामले परिचित छन्।
सिक्किमको मध्यम वर्गीय किसान परिवारमा जन्मिएका उनले सानै उमेरदेखि फुटबलमा असाधारण प्रतिभा देखाउँदै अन्तर्राष्ट्रिय स्तरमा भारतको प्रतिनिधित्व गरेका थिए। सन् १९९० र २००० को दशकमा भारतीय फुटबललाई नयाँ उचाइमा पुर्याएका भुटिया युरोपेली क्लब बेरी एफसीसँग सम्झौता गर्ने पहिलो भारतीय फुटबलर हुन्। उनले भारतका लागि १०० भन्दा बढी खेल खेलेर ४० भन्दा बढी अन्तर्राष्ट्रिय गोल गरेका छन्।
विश्वकै सबैभन्दा ठूलो फुटबल प्रतियोगिताको हुँदै गरेको उत्साहमा भुटिया र नेपाली फुटबल दिग्गजहरूको उपस्थिति नेपाली दर्शकहरूका लागि विश्वकप अनुभवलाई अझ विशेष बनाउने अपेक्षा गरिएको छ। फिफा विश्वकप २०२६ का खेलहरू नेपालमा हिमालय स्पोर्ट्स एचडी मार्फत टेलिभिजनमा र डिजिटल प्लेटफर्म डीजीओ मार्फत प्रसारण भइरहेको छ। दर्शकहरूले टेलिभिजन हेर्नका लागि ९९९ रुपैयाँ र मोबाइलबाट डीजीओमार्फत ५४९ रुपैयाँको प्याकेज किन्न सक्छन्।
विश्वकप प्रसारण अभियानमा रेड बुल शीर्ष प्रायोजकका रूपमा रहेको छ भने प्रोटोन ईमास सह–प्रायोजकको रूपमा छ। साथै, कोकाकोला प्रस्तुतकर्ता साझेदारको रूपमा सहभागी भएको छ। रियल जुस, वाईवाई चाउचाउ र टीभीएस मोटरसाइकल पनि साझेदारका रूपमा जोडिएका छन्। राष्ट्रिय र अन्तर्राष्ट्रिय खेलाडीहरूका सहभागिताले विश्वकपको नेपाली प्रसारण अभियानलाई अझ व्यापक र प्रभावकारी बनाउने विश्वास गरिएको छ। हिमालय स्पोर्ट्स नेपालमा स्थानीय तथा अन्तर्राष्ट्रिय खेलकुद सामग्री प्रसारण गर्ने प्रमुख स्पोर्ट्स प्लेटफर्म हो र फिफा विश्वकप २०२६ को नेपालका लागि आधिकारिक तथा विशेष प्रसारणकर्ता पनि हो।

९ असार, काठमाडौं । भारतीय विकेटकिपर ब्याट्सम्यान ऋषभ पन्त फेरि दिल्ली क्यापिटल्समा फर्किएका छन् । इन्डियन प्रिमियर लिग (आईपीएल) अन्तर्गत भएको खेलाडी आदानप्रदान (ट्रेड) मार्फत पन्त दिल्लीमा फर्किँदा स्पिनर कुलदीप यादव लखनउ सुपर जायन्ट्समा पुगेका छन्। आईपीएलले आधिकारिक रूपमा उक्त सम्झौताको पुष्टि गरेको छ । दिल्लीले पन्तलाई १५ करोड भारतीय रुपैयाँमा अनुबन्ध गरेको छ भने लखनउले कुलदीपलाई १३ करोड ५० लाख रुपैयाँमा आफ्नो टोलीमा भित्र्याएको छ ।

पन्तले यसअघिदेखि सन् २०१६ देखि २०२४ सम्म दिल्लीको प्रतिनिधित्व गरेका थिए । सो अवधिमा उनले टोलीका लागि सर्वाधिक १११ खेल खेलेका थिए भने सन् २०२१ देखि २०२४ सम्म ४३ खेलमा कप्तानीसमेत गरेका थिए । सन् २०२५ को मेगा नीलामीमा कीर्तिमानी २७ करोड रुपैयाँमा लखनउ पुगेका पन्तले भने अपेक्षाअनुसार प्रदर्शन गर्न सकेनन् । उनले २०२५ मा २६९ रन र २०२६ मा ३१२ रन बनाएका थिए ।

उनको कप्तानीमा लखनउ क्रमशः सातौँ र दशौँ स्थानमा सीमित भएको थियो । यता कुलदीपले चार सिजन दिल्ली क्यापिटल्सबाट खेलेका थिए । उनले ६५ खेलमा ७२ विकेट लिँदै ८.३८ को इकोनोमीमा बलिङ गरेका थिए । तर २०२६ सिजन कुलदीपका लागि सम्झनलायक रहेन । उनले १० विकेट मात्र लिए भने १०.३० को इकोनोमीमा रन खर्चिए, जुन उनको १० वर्षे आईपीएल करियरकै सबैभन्दा महँगो बलिङ थियो । आईपीएल २०२६ सकिएको एक महिनाभित्रै सम्पन्न भएको यस ट्रेडमार्फत दिल्लीले आफ्नो पुरानो प्रभावशाली खेलाडीलाई पुनः टोलीमा फर्काएको छ भने लखनउले अनुभवी स्पिनरमार्फत आफ्नो बलिङ आक्रमणलाई मजबुत बनाएको छ ।

फिफा विश्वकप २०२६ को समूह ‘एल’ अन्तर्गत बोस्टनस्थित बोस्टन रंगशालामा आज दुई अपराजित टोलीहरू इङ्गल्याण्ड र घाना बीच रोमाञ्चक भिडन्त हुँदैछ। पहिलो खेलमा क्रोएसियालाई ४-२ ले पराजित गर्दै शानदार सुरुवात गरेको इङ्गल्याण्ड विश्वकपको इतिहासमा पाँचौं पटक आफ्ना सुरुवाती दुई खेल जित्ने ऐतिहासिक कीर्तिमान नजिक छ। मुख्य प्रशिक्षक थोमस टुचेलको आक्रमक रणनीति क्रोएसिया विरुद्ध रक्षात्मक रूपमा केही कमजोर देखिए पनि अग्रपङ्क्तिमा निकै विष्फोटक सावित भएको थियो।

अर्कोतर्फ, समूहको पहिलो खेलमा पानामालाई १-० ले हराएर ३ अंक जोडिसकेको घाना पनि उच्च मनोबलका साथ मैदानमा उत्रँदैछ। घानाका अनुभवी प्रशिक्षक कार्लोस क्विरोजका लागि यो खेल पुरानो बदला लिने अवसर हो, किनभने कतार विश्वकपमा उनको प्रशिक्षणमा रहेको इरानलाई इङ्गल्याण्डले ६-२ ले पराजित गरेको थियो। आजको खेल जितेमा इङ्गल्याण्ड नकआउट चरणमा प्रवेश गर्नेछ भने त्यसपछिको अर्को खेलमा क्रोएसियाले पानामालाई हराएमा इङ्गल्याण्ड एक खेल अगावै समूह विजेता बन्नेछ।

हेड-टु-हेडमा इङ्गल्याण्ड र घानाबीच फुटबल इतिहासमा यो केवल दोस्रो भेट हो भने विश्वकप वा कुनै पनि आधिकारिक प्रतियोगितामा पहिलो प्रतिस्पर्धात्मक खेल हो। यसअघि सन् २०११ मा भएको एकमात्र मैत्रीपूर्ण खेल १-१ को बराबरीमा सकिएको थियो। फिफा वरीयतामा चौथो स्थानमा रहेको इङ्गल्याण्ड र ७३औं स्थानमा रहेको घानाबीच ठूलो अन्तर छ। विश्वकप इतिहासमा इङ्गल्याण्डले अफ्रिकी टोलीहरू विरुद्ध खेलेका ८ खेलमा अहिलेसम्म हार बेहोर्नु परेको छैन। यद्यपि सन् २०२५ को जुनमा भएको मैत्रीपूर्ण खेलमा भने सेनेगलले इङ्गल्याण्डलाई ३-१ ले पराजित गरेको थियो।

टिम न्युज: इङ्गल्याण्डमा चोटग्रस्त टिनो लिभ्रामेन्टोको स्थानमा आकस्मिक रूपमा बोलाइएका डिफेन्डर ट्रेभोह चालोबाह टोलीसँग पूर्ण रूपमा जोडिएका छन्। विङ्गर बुकायो साकाको कुर्कुच्चाको चोटका कारण नोनी माडुएकेले नै सुरुवाती ११ मा निरन्तरता पाउने सम्भावना छ र साकालाई दोस्रो हाफमा मात्र मैदान प्रवेश गराइने छ। घानामा पहिलो खेलमा भिसा समस्याका कारण क्यानडा प्रवेश गर्न नसकेका स्टार मिडफिल्डर थोमस पार्टे यस खेलका लागि उपलब्ध छन्। पहिलो खेलमा ग्रोइन चोट लागेका पहिलो रोजाइका गोलकिपर लरेन्स अति-जिगी प्रशिक्षणमा फर्किएका छन्, तर उनी फिट नभए बेन्जामिन असारेले गोलपोस्ट सम्हाल्नेछन्।

प्लेयर्स टु वाच:
इङ्गल्याण्ड
ह्यारी केन (स्ट्राइकर): क्रोएसिया विरुद्धको जितमा उत्कृष्ट प्रदर्शन गरेका कप्तान ह्यारी केन टोलीका मुख्य गोल मेसिन हुन्। घानाको शारीरिक रूपमा बलियो रक्षालाई तोड्न उनकी बक्सभित्रको चलाखीपूर्ण गति र फिनिसिङ क्षमताले इङ्गल्याण्डका लागि सबैभन्दा ठूलो हतियार हुनेछ।
नोनी माडुएके (विङ्गर): बुकायो साका पूर्ण रूपमा फिट नभएका कारण सुरुवाती ११ मा मौका पाउने माडुएके हाल उच्च फर्ममा छन्। विङ्गबाट उनको विष्फोटक गति र ड्रिब्लिङ कौशलले घानाका डिफेन्डरहरूलाई खेलभरि नै व्यस्त राख्नेछन्।
जुड बेलिङहम (मिडफिल्डर): इङ्गल्याण्डको मिडफिल्डका मुख्य स्तम्भ बेलिङहमले खेलको लय नियन्त्रण गर्नसाथै आक्रमक विङ्गरहरूको लागि सटिक पासहरू निकाल्नेछन्। क्रोएसिया विरुद्ध जस्तै मिडफिल्डबाट अचानक विपक्षी बक्समा छिरेर गोल निकाल्ने उनको शैली घानाको लागि घातक बन्न सक्छ।
घाना
थोमस पार्टे (मिडफिल्डर): साउदी प्रो लिगमा खेलिरहेको आर्सनलका पूर्व मिडफिल्डर थोमस पार्टे यस खेलमा घानाको मिडफिल्डका मुख्य इन्जिन हुनेछन्। इङ्गल्याण्डको बलियो आक्रमक मिडफिल्ड र जुड बेलिङहमलाई रोक्न रक्षापङ्क्तिको ठीक अगाडि बसेर खेल बिगार्ने जिम्मेवारी उनको काँधमा हुनेछ।
कलेब यिरेन्की (मिडफिल्डर): पानामा विरुद्धको खेलमा इन्जुरी समयमा निर्णायक गोल गरेका यिरेन्की अहिले टोलीका नायक हुन्। मिडफिल्डमा थोमस पार्टेसँगको उनी साझेदारी र काउन्टर अट्याकमा गोल निकाल्ने शैलीले इङ्गल्याण्डका लागि चुनौती प्रस्तुत गर्नसक्छ।
ब्रान्डन थोमस-असान्टे (स्ट्राइकर): पहिलो खेलमा जोर्डन आयुले स्ट्राइकरको रूपमा संघर्ष गरेपछि प्रशिक्षक क्विरोजले बेन्चबाट प्रभाव पार्ने आक्रमक फरवार्ड थमस-असान्टेलाई सुरुवाती ११ मा मौका दिन सक्छन्। उनको शारीरिक शक्ति र गतिले इङ्गल्याण्डको केही कमजोर देखिएको डिफेन्स लाइनलाई दबाबमा राख्नेछ।