क्वान्टम कम्प्युटरले कम संख्यामा क्युबिट्समा बिटक्वाइन ह्याक गर्न सक्ने खुलासा
गुगलका क्वान्टम अनुसन्धानकर्ताहरूले बिटक्वाइन र इथरियमको सुरक्षा प्रणालीलाई न्यूनतम शक्ति खर्च गरेर क्वान्टम कम्प्युटरले तोड्न सक्ने नयाँ अनुसन्धानपत्र सार्वजनिक गरेका छन्। उच्च गुणस्तरका करिब १२०० देखि १४५० क्युबिट्स प्रयोग गरी ९ मिनेटभित्रै बिटक्वाइनको प्राइभेट की पत्ता लगाउन सकिने गुगलको क्वान्टम एआई टोलीले जनाएको छ। गुगलले सन् २०२९ सम्म प्रभावकारी क्वान्टम प्रणाली विकास गर्ने लक्ष्य राखेको छ, जसले क्रिप्टो जगतलाई पोस्ट-क्वान्टम सुरक्षा प्रणालीमा शीघ्र रूपान्तरण गर्न दबाब दिएको छ।
गुगलको यस नयाँ अध्ययनले बिटक्वाइनको ‘इन्क्रिप्सन’ तोड्न करोडौं ‘क्युबिट्स’ चाहिने भन्ने पुरानो अनुमानलाई चुनौती दिएको छ। अनुसन्धानले ५ लाखभन्दा कम क्युबिट्सले पनि यो काम गर्न सकिने देखाएको छ। गुगलको क्वान्टम एआई टोलीका अनुसार, ९ मिनेटमा बिटक्वाइनको ‘प्राइभेट की’ पत्ता लगाउन सकिन्छ, जसले ह्याकरलाई ट्रान्जेक्सन पुष्टि हुनु अघि नै ४१ प्रतिशत जोखिम निम्त्याउने सम्भावना देखाएको छ।
सन् २०२१ मा सम्पन्न बिटक्वाइनको ‘ट्यापरुट’ अपडेटले गोपनीयता र कार्यक्षमतामा सुधार ल्याए पनि यसले सुरक्षामा नयाँ चुनौती उत्पन्न गरेको छ। हाल करिब ६९ लाख बिटक्वाइन यस्ता वालेटहरूमा छन्, जसको पब्लिक की कुनै न कुनै रूपले सार्वजनिक भइसकेको छ। इथरियम जस्ता अन्य क्रिप्टोकरेन्सीहरूमा ट्रान्जेक्सन पुष्टि हुने समय कम भएको कारण यो विशेष ‘रियल-टाइम’ आक्रमणको जोखिम केही कम भए तापनि समग्र क्वान्टम खतरा भने कायम रहेको छ। गुगलले यो संवेदनशील तथ्याङ्क सार्वजनिक गर्दा ‘जिरो-नलेज प्रुफ’ प्रविधिको प्रयोग गरेको छ, जसले ह्याकिङको विस्तृत विधि सार्वजनिक नगरी अनुसन्धानको सत्यता मात्र प्रमाणित गरेको छ।
