झापाको मेचीनगर नगरपालिका–७ मा बस र मोटरसाइकल ठोक्किँदा दुई जनाको मृत्यु भएको छ। दुर्घटनामा गम्भीर घाइते भएका अजय राजवंशी र अजय माझीलाई अस्पताल पुर्याएलगत्तै चिकित्सकले मृत घोषित गरेका थिए। प्रहरीले दुर्घटना गराउने विद्यालय बस र चालक निरेन धिमाललाई नियन्त्रणमा लिएर अनुसन्धान सुरु गरेको छ। २० जेठ, विराटनगर।
मेचीनगर–७ सञ्जय सिमेन्ट फ्याक्ट्री अगाडि गोमनसरीबाट धुलाबारी तर्फ जाँदै गरेको होलिबेल इङ्ग्लिश बोर्डिङ स्कूलको मे १ क ३९१ नम्बरको बस र विपरीत दिशाबाट आउँदै गरेको मे ९ प ९९०४ नम्बरको मोटरसाइकल ठोक्किँदा दुर्घटना भएको र दुई जनाको मृत्यु भएको हो। प्रहरीका अनुसार मोटरसाइकल चालक मेचीनगर–७ का २१ वर्षीय अजय राजवंशी र पछाडि सवार भारतको गलगलिया निवासी ३२ वर्षीय अजय माझी गम्भीर घाइते भएका थिए। दुवैलाई उपचारका लागि मेची प्रादेशिक अस्पताल भद्रपुर लगिएको थियो। अस्पतालमा पुर्याएलगत्तै चिकित्सकले मृत घोषणा गरेका छन्। घटनापछि प्रहरीले बस र चालक मेचीनगर–११ का ४५ वर्षीय निरेन धिमाललाई नियन्त्रणमा लिएको छ।
२० जेठ, काठमाडौं । नेपाल राष्ट्र बैंकले निर्धारण गरेको विदेशी मुद्राको विनिमय दर अनुसार आज पनि अमेरिकी डलर, युरो, युके पाउण्डको भाउ बढेको छ। त्यस्तै, अष्ट्रेलियन डलर, क्यानाडियन डलर, सिंगापुर डलर र जापानी येनको भाउ पनि आज बढेको देखिएको छ। आज अमेरिकी डलरको खरिददर १५२ रुपैयाँ ८४ पैसा र बिक्रीदर १५३ रुपैयाँ ४४ पैसा रहेको छ। हिजो अमेरिकी डलरको खरिददर १५२ रुपैयाँ १३ पैसा र बिक्रीदर १५२ रुपैयाँ ७३ पैसा थियो।
आज युरोको खरिददर १७७ रुपैयाँ ५८ पैसा र बिक्रीदर १७८ रुपैयाँ २८ पैसा छ। हिजो युरोको खरिददर १७७ रुपैयाँ १९ पैसा र बिक्रीदर १७७ रुपैयाँ ८८ पैसा रहेको थियो। आज पाउण्ड स्टर्लिङको खरिददर २०५ रुपैयाँ ६२ पैसा र बिक्रीदर २०६ रुपैयाँ ४३ पैसा छ। हिजो पाउण्ड स्टर्लिङको खरिददर २०४ रुपैयाँ ९० पैसा र बिक्रीदर २०५ रुपैयाँ ७० पैसा थियो। आज स्वीस फ्रैंकको खरिददर १९३ रुपैयाँ ७५ पैसा र बिक्रीदर १९४ रुपैयाँ ५१ पैसा रहेको छ।
आज अष्ट्रेलियन डलरको खरिददर १०९ रुपैयाँ ५८ पैसा र बिक्रीदर ११० रुपैयाँ १ पैसा छ। हिजो यसको खरिददर १०९ रुपैयाँ २६ पैसा र बिक्रीदर १०९ रुपैयाँ ६९ पैसा थियो। आज क्यानाडियन डलरको खरिददर ११० रुपैयाँ ३३ पैसा र बिक्रीदर ११० रुपैयाँ ७६ पैसा रहेको छ। हिजो यसको खरिददर १०९ रुपैयाँ ८३ पैसा र बिक्रीदर ११० रुपैयाँ २६ पैसा थियो। आज सिंगापुर डलरको खरिददर ११९ रुपैयाँ २५ पैसा र बिक्रीदर ११९ रुपैयाँ ७२ पैसा रहेको छ। हिजो यसको खरिददर ११८ रुपैयाँ ९८ पैसा र बिक्रीदर ११९ रुपैयाँ ४५ पैसा थियो। आज जापानी येन १० को खरिददर ९ रुपैयाँ ५६ पैसा र बिक्रीदर ९ रुपैयाँ ६० पैसा छ। हिजो यो खरिददर ९ रुपैयाँ ५२ पैसा र बिक्रीदर ९ रुपैयाँ ५६ पैसा थियो। हेर्नुहोस् आजको विनिमय दर–
२० जेठ, बुटवल । नेकपा एमालेका नेता सुरेन्द्र पाण्डेले पार्टीले छिटोभन्दा छिटो काँचुली फेर्नुपर्ने आवश्यकता रहेको बताएका छन्। प्रेस चौतारी रुपन्देहीले बुधबार बुटवलमा गरेको पत्रकार सम्मेलनमा बोल्दै पाण्डेले गत निर्वाचनको नतिजाले पार्टीलाई ठूलो खबरदारी दिएको र अप्ठेरो अवस्थामा पुर्याएको बताए। ‘पार्टीले छिटोभन्दा छिटो काँचुली फेर्नुपर्छ, किनभने हामी अप्ठेरो अवस्थामा छौँ,’ उनले भने, ‘जनताको त्यो खबरदारीलाई बुझ्न सकेनौं र सतर्क भएनौं भने आगामी दिनमा पार्टी झन् कमजोर हुन्छ।’
नेता पाण्डेले बदलिंदो राजनीतिक तथा प्रविधिगत परिवेशअनुसार पार्टी सञ्चालनको शैलीमा आमूल परिवर्तन गर्नुपर्ने बताए। ‘अब रिफर्मेसनले मात्र पुग्दैन, पार्टीको नेतृत्वदेखि संगठनको संरचनासम्म रिभोलुसन (क्रान्ति) नै चाहिन्छ,’ उनले भने। कसले पद छाड्ने भन्दा पनि पार्टीलाई काँचुली फेराउन सबै नेता कार्यकर्ताले आ–आफ्नो पद छाड्न तयार हुनुपर्ने पाण्डेको भनाइ छ।
नेता पाण्डेले अबको युग आर्टिफिसियल इन्टेलिजेन्स (एआई) र डिजिटल प्रविधिको भएको उल्लेख गर्दै एमालेलाई परम्परागत भौतिक संरचनाबाट डिजिटल प्रणालीमा रूपान्तरण गर्नुपर्ने बताए। पाण्डेले समाज निरन्तर परिवर्तनशील रहेको र त्यसअनुसार पार्टीका विचार, नेतृत्व विकासको शैली तथा संगठनात्मक संस्कृतिमा पनि समयानुकूल सुधार आवश्यक पर्ने बताए। ‘मदन भण्डारीको समयदेखि अहिलेसम्म विश्व र समाजमा ठूलो परिवर्तन आइसकेकाले पार्टीले पनि आफूलाई बदल्नुपर्छ,’ नेता पाण्डेले भने।
पाण्डेले निर्वाचनमा पार्टीको नतिजा, उमेर, स्वास्थ्य अवस्था लगायतका चुनौतीहरूलाई ध्यानमा राख्दै एमाले अध्यक्ष केपी ओलीले नेतृत्व छाड्नुपर्ने बताएका छन्। ‘उहाँ १७४ सांसद भएको दलको नेता, प्रधानमन्त्रीबाट २५ सांसद भएको दलको नेतामा आउनुभएको छ, यो ग्राफले के बताउँछ?’ उनले भने। पाण्डेले बजेटको आकार २५ प्रतिशतले बढे पनि राज्यको स्वरूप परिवर्तन गर्ने कुनै योजना समावेश नभएको दावी गरे।
पाण्डेले बजेट कार्यान्वयन चुनौतीपूर्ण रहेको बताए। ‘बजेटले पुराना कार्यक्रम मात्र बोकेको छ, नयाँ शब्दमात्र राखिएको छ। तात्विक रुपान्तरण हुने कुनै नयाँ घोषणा छैनन्,’ उनले भने। चालु आर्थिक वर्षमा पुँजीगत बजेट खर्च हुन नसकेको बताउँदै उनले २१ खर्बको बजेटमै पुँजीगत खर्च डेढ खर्ब मात्र भए कसरी देश अघि बढ्ला भन्दै प्रश्न उठाए।
समस्याग्रस्त सहकारी व्यवस्थापन समितिको कार्यालयले समस्याग्रस्त घोषित कान्तिपुर सेभिङ एण्ड क्रेडिट सहकारीका १०० जना ऋणीहरूको नाम सार्वजनिक गरेको छ। समितिले २०८३ जेठ २० गतेको निर्णय अनुसार उक्त नामावली सार्वजनिक गरिएको जनाएको छ। उपलब्ध ऋण विवरणका आधारमा नामावली सार्वजनिक गरिएको बताइएको छ।
समितिले ऋण चुक्ता गरिसकेका तर नामामा समावेश रहेका व्यक्तिहरूलाई प्रमाणसहित उपस्थित हुन अनुरोध गरेको छ। त्यस्तै, ऋण तिर्न बाँकी रहेका ऋणीहरूलाई छिटो ऋण तिर्नका लागि समितिको कार्यालयमा सम्पर्क गर्न सूचित गरिएको छ। अन्यथा प्रचलित कानुनअनुसार ऋण असुली प्रक्रिया अघि बढाइने चेतावनी समितिले दिएको छ।
समस्याग्रस्त सहकारी व्यवस्थापन समितिले सहकारी रकम फिर्ता गराउने र बचतकर्ताको हित संरक्षण गर्ने उद्देश्यले ऋणीहरूको विवरण सार्वजनिक गरिएको स्पष्ट पारेको छ।
२० जेठ, खोटाङ । हलेसी तुवाचुङ नगरपालिका–९ सल्लेमा ‘एक घर, एक धारा’ कार्यक्रम लागू भएपछि स्थानीय उपभोक्ताहरूले फाइदा पाएका छन्। गोर्खा वेलफेयर ट्रष्टको आर्थिक तथा प्राविधिक सहयोगमा निर्माण गरिएको खानेपानी आयोजना सञ्चालनमा आएपछि सल्लेका ३१ घरका मगर परिवारहरूले सुविधा पाएका छन्। सुक्खा प्रभावित क्षेत्र सल्लेमा सञ्चालनमा आएको लिफ्टिङ प्रविधिद्वारा खानेपानी आयोजनाको कुल लागत ५३ लाख रुपैयाँ रहेको जनाएको छ। जसमा गोर्खा वेलफेयर ट्रष्टले ४६ लाख रुपैयाँ र स्थानीय उपभोक्ताले ७ लाख रुपैयाँ बराबरको श्रमदान तथा नगद सहयोग गरेको वडाध्यक्ष काशीराज राईले बताए।
स्थानीय ठूलो पँधेरो मुहानबाट लिफ्टिङ प्रविधिद्वारा पानी तानेर वस्तीमा वितरण गरिएको निर्माण उपभोक्ता समितिले जानकारी दिएको छ। वर्षौंदेखि खानेपानीको समस्या भोगिरहेका सल्लेका ३१ घरका मगर परिवारहरूले अब आफ्नै घरको आँगनमा स्वच्छ खानेपानी पाउन थालेका छन्। लिफ्टिङ प्रविधिबाट खानेपानी योजना निर्माण सुरु भएको ७२ दिनभित्रै सम्पन्न गरी नगरपालिका समक्ष हस्तान्तरण गरिएको गोर्खा वेलफेयर सोसाइटी धरानका सिनियर अफिसर केदार राईले जानकारी दिए। खानेपानी आयोजनाअन्तर्गत २६ घरमा निजी र दुई वटा सार्वजनिक धाराहरू जडान गरिएको छ। लिफ्टिङ प्रविधिको खानेपानी योजना सञ्चालनमा आएपछि दैनिक उपभोगका लागि टाढा–टाढाबाट पानी बोकेर ल्याउनु पर्ने बाध्यता अन्त्य भएको स्थानीयवासीले बताएका छन्। –रासस
जिल्ला प्रशासन कार्यालय काठमाडौंको निर्देशनपछि नेपाल वैदेशिक रोजगार व्यवसायी संघको नयाँ निर्वाचन प्रक्रिया अघि बढेको छ। संघका अध्यक्ष भुवनसिंह गुरूङको कार्यशैलीप्रति असन्तुष्टि जनाउँदै दुई तिहाइ पदाधिकारीहरूले सामूहिक राजीनामा दिएका थिए। सल्लाहकारहरूको नेतृत्वमा गठित प्रबन्ध समितिले आगामी २४ जेठमा संघको विशेष साधारणसभा र नयाँ कार्यसमितिको निर्वाचन गर्ने निर्णय गरेको छ।
नेपाल वैदेशिक रोजगार व्यवसायी संघमा दुई तिहाइ पदाधिकारीहरूले सामूहिक रुपमा राजीनामा दिएपछि नयाँ निर्वाचन प्रक्रिया अघि बढाइएको हो। जिल्ला प्रशासन कार्यालय काठमाडौंले अध्यक्ष भुवनसिंह गुरूङ नेतृत्वको कार्यसमितिलाई विघटन गर्ने निर्देशन गरेसँगै नयाँ कार्यसमितिको निर्वाचन प्रक्रिया औपचारिक रूपमा अघि बढाइएको हो। आज आयोजित पत्रकार सम्मेलनमा प्रबन्ध समितिले निर्वाचन प्रक्रिया अघि बढेको जानकारी गराएको छ।
संघको विधानको दफा २६ (४) (ख) बमोजिम सल्लाहकारहरूको नेतृत्वमा प्रबन्ध समिति गठन गरिएको थियो। उक्त प्रबन्ध समितिले जेठ २४ गते संघको विशेष साधारणसभासहित निर्वाचन प्रक्रिया अघि बढाएको जनाएको छ। संघका निवर्तमान अध्यक्ष तथा प्रबन्ध समिति सदस्य राजेन्द्र भण्डारीले संघका दुई तिहाइ पदाधिकारीहरूको सामूहिक राजीनापछि विधान बमोजिम प्रबन्ध समिति गठन गरिएको बताउनुभएको छ।
हाल निर्वाचनका लागि प्रतिनिधि संकलन कार्य जारी रहेको छ र विशेष परिस्थितिमा हुन लागेको निर्वाचनमा सहभागी भएर नयाँ नेतृत्व चयन गर्न व्यवसायीहरूलाई भण्डारीले अनुरोध गर्नुभएको छ। प्रबन्ध समितिले वर्तमान परिस्थितिमा सम्पूर्ण व्यवसायीलाई लोकतान्त्रिक प्रक्रियामा सहभागी हुन आग्रह गर्दै संघको स्थायित्व, संस्थागत विकास र सक्षम नेतृत्व निर्माणमा योगदान दिन आह्वान गरेको छ।
२० जेठ, काठमाडौं । राष्ट्रपति रामचन्द्र पौडेलले खेलकुदका माध्यमबाट आपसी मित्रता, भाइचारा र सम्बन्ध सुदृढ गर्दै राष्ट्रिय एकताको भावना विकास हुने बताएका छन्। उनले खेलका माध्यमबाट अन्तर्राष्ट्रिय सम्बन्ध विस्तारमा पनि महत्वपूर्ण योगदान पुग्ने बताए। राष्ट्रिय खेलकुद परिषदद्वारा बुधबार आयोजित १६ औं राष्ट्रपति रनिङ शिल्ड प्रतियोगिताको उद्घाटन समारोहमा सम्बोधन गर्दै राष्ट्रपति पौडेलले अहिलेको युगमा खेलकुद केवल प्रतिस्पर्धा, पेसा, प्रख्याती र पहिचानका लागि मात्रै सीमित नभएको बताएका छन्।
‘यो व्यक्तिको सर्वाङ्गिण विकासको सशक्त माध्यम हो। अनि अनुशासन, सहकार्य नेतृत्व, आत्मविश्वास र राष्ट्रिय एकताको जग र आधार पनि हो’, उनले भने। राष्ट्रपति पौडेलले नेपालमा खेलप्रतिको क्रेज बढ्दैगएको पनि बताए। यस्तो बेला राज्यले ‘खेल प्रतियोगितामा मेरो भविष्य सुरक्षित छ’ भन्ने भावना जागृत गर्नुपर्नेमा जोड दिए।
‘विद्यालयतहदेखि नै खेल र शिक्षासँगको अन्तरसम्बन्ध र महत्वलाई एकसाथ अघि बढाउँदै खेल संस्कृतिको विकास र विस्तारका लागि यस्ता प्रतियोगितालाई संघ, प्रदेश र स्थानीयस्तरमा सञ्चालन गर्न कञ्जुस्याई गर्न हुँदैन’, उनले भने।
सरकारले नेपालमा मोटरसाइकल उत्पादन बढाउनका लागि पार्टपूर्जा आयातमा लाग्ने भन्सार दर १० प्रतिशत बिन्दुले घटाएको छ। नयाँ नियम अनुसार २०० देखि २५० सीसीसम्मका मोटरसाइकल पार्टपूर्जामा भन्सार दर ३० प्रतिशत कायम गरिएको छ। साथै, २५० देखि ५०० सीसीसम्मका पार्टपूर्जा आयातमा लाग्ने भन्सार १० प्रतिशतले बढी गरी ८० प्रतिशत पुर्याइएको छ।
२० जेठ, काठमाडौं । सरकारले नेपालमा पूर्ण वस्तु उत्पादनका लागि पार्टपूर्जा आयातमा लाग्ने भन्सार दरमा समायोजन गरेको छ। आगामी आर्थिक वर्षको बजेटमार्फत यो नयाँ व्यवस्था लागू गरिएको हो। पछिल्लो बजेट सार्वजनिक भएको भोलिपल्ट अर्थात् जेठ १६ देखि लागू गरिएको नयाँ भन्सार दरअनुसार नेपालमै तयारी हुने मोटरसाइकलका लागि पार्टपूर्जा आयातमा लाग्ने करदरमा १० प्रतिशत बिन्दुको कटौती गरिएको छ।
२०० देखि २५० सीसीसम्मका पार्टपूर्जा आयातमा चालु आर्थिक वर्षमा ४० प्रतिशत भन्सार लाग्नेमा, आगामी आर्थिक वर्षदेखि ३० प्रतिशत कायम गरिएको छ। तर, २५० देखि ४०० सीसी क्षमताका पार्टपूर्जा आयातमा भन्सार १० प्रतिशतले वृद्धि गर्दै ८० प्रतिशत पुर्याइएको छ। यसअघि ७० प्रतिशत लाग्ने ती पार्टपूर्जा अब ८० प्रतिशत भन्सारमा आउँछन्। त्यस्तै ४०० देखि ५०० सीसी क्षमताका बाइक पार्टपूर्जामा पनि भन्सार दर बढाएर ८० प्रतिशत कायम गरिएको छ।
पोयटपूर्जा आयात गरी अन्तिम वस्तु उत्पादन गर्ने कम्पनीहरूमा रोयल इन्फिल्ड, होन्डा, यामाहा, हिरो, टीभीएस र बजाज रहेका छन्। यी कम्पनीहरूले विदेशी मुलुकबाट पार्टपूर्जा आयात गरी नेपालमै बाइक एसेम्बल गर्दै आएका छन् र एसेम्बल्ड प्लान्टहरू स्थापना गरी सञ्चालनमा ल्याएका छन्।
२० जेठ, रोल्पा । रोल्पा जिल्लाको गंगादेव गाउँपालिका–६ रातामाटा क्षेत्रमा खहरे खोलाको बाढीले बगाउँदा दुई बालकको मृत्यु भएको छ। बुधबार साँझ विद्यालयबाट घर फर्कँदै गरेका क्रममा खोलाको बाढीमा बगेका रातामाटाका निमबहादुर खड्काका ७ वर्षिया छोरा गोपाल खड्का र सर्वजित खत्रीका ६ वर्षिया छोरा समिर केसीको मृत्यु भएको हो। साँझ पौने ६ बजे घटनाको खबर प्राप्त हुनासाथ इलाका प्रहरी कार्यालय जिनावाङबाट प्रहरीले तुरुन्तै घटनास्थलमा पुगेको थियो। त्यसैगरी, इलाका प्रहरी कार्यालय घर्तीगाउँबाट पनि थप टोली घटना स्थलमा गएको जिल्ला प्रहरी कार्यालय रोल्पाका सूचना अधिकारी इन्स्पेक्टर सुनिल थापा नेपालीले जानकारी दिए।
नखिपोट युथ क्लबसँगै आयोजना हुने पाँचौं नखिपोट खुला पुरुष र महिला बास्केटबल प्रतियोगिता आगामी आइतबारदेखि सुरू हुँदैछ। प्रतियोगितामा अहिलेसम्म पुरुषतर्फ १८ र महिलातर्फ ७ टोलीको सहभागिता सुनिश्चित भएको आयोजकले जनाएका छन्। प्रतियोगिता ललितपुर महानगरपालिका वडा नं १४ को प्रमुख प्रायोजनमा सञ्चालन हुनेछ र यसको फाइनल खेल जेठ ३० गते हुनेछ।
आयोजक क्लबका अध्यक्ष इन्द्रजित लिम्बूले बुधबार पत्रकार सम्मेलनमा जानकारी दिनु भएको छ कि टोली दर्ताको समय शुक्रबारसम्म खुला छ, त्यसैले सहभागिता थप हुनसक्नेछ। पुरुषतर्फ खेल नकआउट विधिमा हुनेछ भने महिलातर्फ लिग कम नकआउट विधि अपनाइने छ। पुरुषतर्फ गत विजेता नेपाल आर्मी र महिलातर्फ माउन्टेन मुभर्स रहेका छन्।
प्रतियोगितामा प्रत्येक टोलीले ३ विदेशी खेलाडी अनुबन्ध गर्न सक्नेछन्, तर मैदानमा दुई जनामात्र खेल्न पाउने व्यवस्था छ। क्लब सदस्य तथा प्रतियोगिता संयोजक विनोद श्रेष्ठले, दुवै टोली धरानबाट भएकाले जोन एन्ड द लोकल ब्यान्ड र धरान टोलीले सहभागिता पक्का गरिसकेको बताए। यो पहिलो पटक मोफसलबाट टिम सहभागी हुने मौका हो।
पुरुषतर्फ विजेताले रु १ लाख र उपविजेताले रु ५० हजार नगद पुरस्कार पाउनेछन्। महिलातर्फ पहिलो हुनेले रु ५० हजार र दोस्रोले रु २५ हजार नगद पुरस्कार पाउनेछन्। पुरुषतर्फ ‘मोस्ट भ्यालुएबल प्लेयर’ ले रु २० हजार र महिलातर्फ रु १५ हजार नगद पुरस्कार प्राप्त गर्नेछ। उदीयमान पुरुष र महिला खेलाडीहरूलाई प्रत्येकलाई रु १० हजार नगद पुरस्कार दिइनेछ। प्रतियोगिता सञ्चालनका लागि करिब रु १५ लाख खर्च लाग्ने घोषणा आयोजक क्लबका कोषाध्यक्ष सुजन राईले गरेका छन्।
वैदेशिक रोजगार विभागले केयरगिभर तालिम लिएका व्यक्तिहरूको विवरण ३ दिनभित्र उपलब्ध गराउन तालिम प्रदान गर्ने संस्थाहरूलाई निर्देशन दिएको छ। विभागले इजरायलका दीर्घकालीन स्याहार केन्द्रहरूमामा २,३०० नेपाली सहायक कामदार पठाउनको लागि १७ जेठदेखि ७ असारसम्म आवेदन खुलाएको छ। विगतमा नक्कली प्रमाणपत्र पेश गरी आवेदन दिने समस्या देखिएका कारण यस पटक विभागले पहिल्यै विवरण रुजु गर्न लागेको हो।
२० जेठ, काठमाडौं। वैदेशिक रोजगार विभागले केयरगिभर तालिम लिएका व्यक्तिहरूको विवरण माग गरेको छ। विभागले केयरगिभर तालिम प्रदायक संस्थाहरूसँग सुरुदेखि हालसम्म तालिम लिएका व्यक्तिहरूको विवरण ३ दिनभित्र उपलब्ध गराउन भनेको हो। विभागले, सीटीईभीटी र एनएभीटीमा दर्ता भएका तालिम प्रदायक संस्थाहरूसँग प्रारम्भदेखि हालसम्म केयरगिभर तालिम लिएका प्रशिक्षार्थीहरूको विवरण उपलब्ध गराउन अनुरोध गरेको छ।
विभागले इजरायलका दीर्घकालीन स्याहार केन्द्रहरूमा नेपाली सहायक कामदारका लागि २ हजार ३ सय कोटामा आवेदन आह्वान गरेको छ। सोही प्रयोजनका लागि विभागले तालिम प्रदायक संस्थाहरूमा हालसम्म तालिम लिएका व्यक्तिहरूको विवरण माग गरेको हो। यसअघि २०७८ असार ११ गते केयरगिभरका लागि दोस्रो चरणको विज्ञापन खुलिसकेको थियो जसमा २ हजार जनाको लागि आवेदन माग गरिएको थियो। त्यतिबेला कतिपय केयरगिभर तालिम प्रदायक संस्थाहरूले तालिम नदिई प्रमाणपत्र मात्र प्रदान गरेको पाइएको थियो। त्यसपछि विभागले छानबिन गर्दै नक्कली प्रमाणपत्रधारीहरूको आवेदन रद्द गरेको थियो।
विगतमा जस्तो नक्कली प्रमाणपत्र लिएर आवेदन दिने समस्या नदोहोरियोस् भनेर विभागले सुरुदेखि हालसम्म तालिम प्रदान गरेका व्यक्तिहरूको विवरण माग गरेको हो। विभागले जेठ १७ गतेदेखि असार ७ गतेसम्मको समयावधि तोकेर आवेदन आह्वान गरेको छ। हाल आवेदन प्रक्रिया चलिरहेको छ र आवेदन मिति सकिएपछि रुजु तथा छनोट प्रक्रिया अघि बढ्ने विभागले जनाएको छ।
सशस्त्र प्रहरी मुख्यालय हल्चोकस्थित सवारी शाखामा बुधबार साँझ विद्युत सर्ट भएर आगलागी भएको छ। सशस्त्र प्रहरीका अनुसार, आगलागीका कारण त्यहाँ रहेका केही गाडीहरू जलेर नष्ट भएका छन्। २० जेठ, काठमाडौं। सशस्त्र प्रहरीका प्रवक्ता डीआईजी विष्णुप्रसाद भट्टले आगलागीको घटनाको जानकारी गराउँदै भने, “केही क्षति भएको छ। आगो अहिले नियन्त्रणमा आइसकेको छ।”
नेपाली क्रिकेट टोलीले आगामी जुलाईमा हुने आईसीसी क्रिकेट विश्वकप लिग २ शृङ्खलाअघि जर्सी भ्रमण गर्ने योजना बनाएको छ। नेपाल क्रिकेट संघका अनुसार, नेपालले जर्सीमा जुलाई १३ र १५ मा दुई अभ्यास एकदिवसीय खेल खेल्नेछ। यस शृङ्खलामा नेपाल, नामिबिया र नेदरल्यान्ड्सबीच जुलाई २१ देखि प्रतियोगिता प्रारम्भ हुने तालिका रहेको छ।
२० जेठ, काठमाडौं। नेपाली क्रिकेट टोलीले आगामी जुलाई महिनामा आयोजना हुन लागेको आईसीसी क्रिकेट विश्वकप लिग २ शृङ्खलाअघि जर्सी भ्रमण गर्ने निश्चित गरेको छ। नेपाल क्रिकेट संघ (क्यान)ले जनाएको छ कि टोली जर्सीमा तयारी क्याम्पको हिस्सा स्वरूप दुई अभ्यास एकदिवसीय खेल खेल्नेछ। पहिलो अभ्यास खेल जुलाई १३ र दोस्रो जुलाई १५ मा निर्धारित गरिएको छ। यसैगरी, नेपाल, नामिबिया र नेदरल्यान्ड्सबीच जुलाई २१ गतेबाट लिग २ को शृङ्खला सुरु हुनेछ। यो तयारीका लागि उपयुक्त वातावरण बनाउने उद्देश्यले जर्सीमा खेल आयोजना गरिँदैछ। नेपालले अघिल्लो केही हप्तामा दुई घरेलु शृङ्खलाहरु खेलिसकेको छ र आठ खेलमध्ये छमा विजय हासिल गरी लिग २ अंक तालिकामा आफ्नो स्थिति बलियो बनाएको छ।
सरकारले नेपाली यात्रुहरूले विदेश जाने क्रममा ल्याउन र लैजान पाउने सामानहरूको नयाँ सूची सार्वजनिक गरेको छ। १२ महिनाको वैदेशिक रोजगारी पूरा गरेर फर्किने नेपालीले ६५ इन्चसम्मको टेलिभिजन महसुल छुटमा ल्याउन पाउने व्यवस्था गरिएको छ। स्थलमार्गबाट आवतजावत गर्ने यात्रुहरूका लागि महसुल छुटको सीमा १०० रुपैयाँबाट बढाएर ५०० रुपैयाँ कायम गरिएको छ। २० जेठ, काठमाडौं। सरकारले झिटीगुन्टासम्बन्धी व्यवस्थाअनुसार भारतबाट नेपाल आउँदा ल्याउन पाउने सामानको मूल्यलाई ५ सय रुपैयाँ पुर्याएको छ। यसअघि १ सय रुपैयाँभन्दा बढी मूल्यको सामान ल्याउँदा भन्सार तिर्नुपर्ने व्यवस्था रहेकोमा नयाँ आर्थिक विधेयकले संशोधन गर्दै यो सीमा बढाएको हो। यसअघि सीमामा सर्वसाधारणले १ सय रुपैयाँभन्दा बढी मूल्यको सामान भारतबाट ल्याउँदा भन्सार तिर्नुपर्ने भएको कारण देशव्यापी विरोध भएको थियो। अब सरकारले बजेटमार्फत यस सीमालाई बढाएको छ।
साथै, भारतमा अध्ययनरत विद्यार्थीले ल्याएको वा साथमा राखेको एक थान ल्यापटप, ट्याबलेट वा कम्प्युटरमध्ये कुनै एकमा भन्सार महसुल नलाग्ने व्यवस्था गरिएको छ। सरकारले नेपाली यात्रुहरूले यात्रा गर्दा ल्याउन र लैजान पाउने सामानहरूको नयाँ सूची सार्वजनिक गरेको छ, जसमा अधिकांश वस्तुहरू गत वर्षकै सूची दोहोरिएका छन् भने केही वस्तु र सीमा परिवर्तन गरिएको छ। अर्थ मन्त्रालयका अनुसार नेपालबाट स्थायी बसोबास गर्ने नेपाली विदेशमा गएर नेपाल फर्कंदा व्यक्तिगत प्रयोगका लागि साथमा रहेका सामानहरू पूर्ण महसुल छुटका साथ ल्याउन सक्नेछन्।
त्यसमा प्रयोग गरिएका लुगाफाटा, बरबिछ्यौना, घरधन्दा तथा पुराना सामान, उपचारका लागि ल्याइएको औषधि, शारीरिक अशक्त व्यक्तिले प्रयोग गर्ने सहकारी सामग्री, भन्सार महसुल ऐन २०८१ को अनुसूची ४ को प्रकरण १ मा तोकिएको सीमा भित्र पर्ने सुनचाँदीका गहना समेत समावेश छन्। अर्कोतर्फ प्रयोग गरिएका ट्याबलेट, ल्यापटप वा डेस्कटप कम्प्युटर, घडी, क्यामरा, भिडियो क्यामरा र मोबाइल फोन एक/एक थान ल्याउन समेत भन्सार छुट छ। वैदेशिक रोजगारीमा १२ महिना काम गरी फर्केका नेपालीले ६५ इन्चसम्मको टेलिभिजनमा महसुल छुट पाउने भएका छन्। यसअघि यस्तो छुट सामाजिक सुरक्षा कोषमा सूचीकृत नागरिक मात्र पाउने व्यवस्था थियो र सूचीकृत नभएका ३२ इन्च टेलिभिजन मात्र छुटमा ल्याउन पाइन्थ्यो। यस्तै प्रकारको छुट सुविधा एकपटक मात्र उपलब्ध हुनेछ।
भक्तपुरको चाँगुनारायण नगरपालिका-८ मञ्जुश्री गुम्बा नजिकै मजदुर बोकेको ट्र्याक्टर दुर्घटना हुँदा दुई जनाको मृत्यु भएको छ। कलमसिस्थित एक होटलमा ढलान सकेर १२ जना मजदुर बोकी फर्कँदै गरेको ट्र्याक्टरको ब्रेक फेल भएर दुर्घटना भएको हो।
दुर्घटनामा घाइते भएका मजदुरहरूको स्थानीय अस्पतालहरूमा उपचार भइरहेको छ। जिल्ला प्रहरी परिसर भक्तपुरका अनुसार ट्र्याक्टर पल्टिएर च्यापिँदा दुई मजदुरको मृत्यु भएको जानकारी प्राप्त भएको छ। भक्तपुरका प्रहरी उपरीक्षक सूर्यबहादुर खड्काले यस घटनाबारे थप जानकारी दिएका छन्।
