नर्वेलाई कहिल्यै जित्न नसकेको ब्राजिल, विश्वकपमा ३६ वर्षकै कमजोर प्रदर्शन
रोचक तथ्य के छ भने ब्राजिलले अन्तराष्ट्रिय फुटबलमा अहिलेसम्म ८८ टिमसँग खेल्दा नर्वेलाई मात्र कहिल्यै जित्न सकेको छैन। २२ असार, काठमाडौं। सधैं फिफा विश्वकपलाई उपाधिको दावेदार मानिएको ब्राजिल उत्तर अमेरिकामा जारी २३औं संस्करणको विश्वकपमा अन्तिम १६ मा नै बाहिरिएको छ। युरोपियन राष्ट्र नर्वेसँग २-१ ले पराजित भए पनि ब्राजिलको यात्रा यहीँ समाप्त भयो। अमेरिकाको न्युयोर्क न्यु जर्सी स्टेडियममा भएको खेलमा एर्लिङ हालान्डका दुई शानदार गोलले नर्वेले ब्राजिलमाथि २-१ को जित हात पार्दै विश्वकपमा पहिलो पटक क्वार्टरफाइनलमा स्थान बनाएको छ। २८ वर्षपछि विश्वकपमा पुनरागमन गरेको नर्वेले प्रत्येक खेलमा इतिहास रचेको छ भने विश्वकप फुटबलको पर्याय बनेको ब्राजिल अन्तिम १६ बाटै घर फर्कन बाध्य भयो।
ब्राजिल मात्र नभएर विश्वभरका फुटबल प्रेमीहरूका लागि पनि यो अप्रत्याशित जीत हो। २४ वर्षपछि विश्वकप उपाधि जित्दै छैटौं तारा थप्ने लक्ष्य राखेको ब्राजिलको यो चाहना यसपटक अधुरो रह्यो। ब्राजिलले यस विश्वकपअघि नर्वेसँग ४ खेल खेल्दा एक पनि खेल जित्न सकेको थिएन। यसपटक अन्तिम १६ मा पराजित भएपछि ब्राजिल ५ खेलसम्म नर्वेको विरुद्ध विजयी हुन सकेको छैन। नर्वेलाई जित्न ब्राजिललाई अझै पर्खिनुपर्नेछ। रोचक कुरा के छ भने ब्राजिलले अन्तराष्ट्रिय फुटबलमा अहिलेसम्म ८८ टिमसँग खेल्दा नर्वेलाई मात्र हराउन सकेको छैन। यस्तै ब्राजिल ५० राष्ट्रसँग भने अपराजित रहेको छ। ब्राजिलले सन् २००२ मा जापान र दक्षिण कोरियामा संयुक्त रुपमा भएको विश्वकप उपाधि जितेको थियो। यसअघि २४ वर्षको अन्तरालमा उपाधि जितेको ब्राजिल यसपटक पनि त्यस्तै उपलब्धि गर्ने अपेक्षा राखेको थियो।
सन् १९७० मा तेस्रो पटक विश्वकप जितेको ब्राजिलले त्यसको २४ वर्षपछि अर्थात् १९९४ मा अमेरिकामा भएको विश्वकप उपाधि जितेको थियो। तर सन् २००२ को विश्वकप जितेपछि ब्राजिललाई विश्वकपमा चुनौतिहरू सामना गर्नुपरेको छ। त्यसयता ब्राजिल फाइनलसम्म पुग्न सकेको छैन। सन् २०१४ मा आफूहरू होस्ट हुँदा सेमिफाइनलमा पुगे पनि घरेलु मैदानमा जर्मनीसँग ७-१ को हारपछि फाइनल पुग्न असफल भयो। यस पटक अन्तिम १६ माै पराजित भएको ब्राजिलले झन् खस्किएको कीर्तिमान बनायो। ब्राजिल ३६ वर्षपछि विश्वकपको क्वार्टरफाइनलमा पुग्न असफल भयो। सन् १९९० मा पछिल्लो पटक ब्राजिल अन्तिम १६ बाटै बाहिरिएको थियो। इटलीमा भएको त्यो विश्वकपमा क्लाउडियो कानिजियाको एक मात्रै गोलमा अर्जेन्टिनाले ब्राजिललाई १-० ले हराएको थियो। विश्वकपमा ब्राजिलको यसपटकको प्रदर्शन सबैभन्दा कमजोर मध्ये एक रह्यो। ब्राजिल फिफा विश्वकपमा कुल ३ पटक अन्तिम १६ बाटै बाहिरिएको छ।
सन् १९३० मा पहिलो विश्वकपमा समूह चरणमै बाहिरिएको ब्राजिल सन् १९३४ को दोस्रो विश्वकपमा सिधा नकआउट चरणमा पुगे पनि पहिलो खेलमा अन्तिम १६ बाटै बाहिरिएको थियो। त्यसपछि सन् १९९० मा पनि अन्तिम १६ बाट बाहिरिएको ब्राजिलले अहिले ३६ वर्षपछि उस्तै नियति भोग्नुपर्यो। यस विश्वकपमा समूह सी मा रहेको ब्राजिलले पहिलो खेलमा मोरक्कोसँग १-१ को बराबरी खेलेको थियो। उक्त खेलमा पनि ब्राजिलले सुरुमै गोल खाएको थियो तर पछि खेल बराबरीमा ल्याएको थियो। त्यसपछि हाइटी र स्कटल्यान्डलाई पराजित गर्दै समूह विजेताको रुपमा ब्राजिल नकआउट चरणमा पुगेको थियो। राउण्ड अफ ३२ मा जापानलाई २-१ ले पराजित गरेको थियो जहाँ ब्राजिल पहिलो हाफमा गोलले पछि परेको तर दोस्रो हाफमा दुई गोल गरेकै थियो। नर्वेलाई पराजित गरेको अन्तिम १६ खेलमा ब्राजिलले सुरुमा अग्रता लिन नसक्दा महंगो मूल्य तिर्नुपर्यो। ब्राजिलले सुरुमै पेनाल्टी पाएको थियो तर ब्रुनो गुमाइरेजले १४औं मिनेटमा प्रहार गरेको पेनाल्टी नर्वेको गोलकिपर नाएल्यान्डले बचाएपछि अग्रता लिन सकिएन। विश्व फुटबलकै सबैभन्दा घातक स्ट्राइकर एर्लिङ हालान्डलाई सुरुमै ब्राजिलका डिफेन्डरहरूले रोक्न खोजे पनि अन्तिम समयमा भने हालान्ड नायक बने। उनले ७९औं मिनेटमा पहिलो गोल गरे र नर्वेलाई अग्रता दिलाए। त्यसपछि ब्राजिल बराबरीको प्रयासमा थियो। तर हालान्डले ९०औं मिनेटमा व्यक्तिगत दोस्रो गोल गरेपछि नर्वे दुई गोलले अघि रहेको थियो। इन्जुरी समयमा ब्राजिलले पेनाल्टी पाएर नेमारले गोल गरे पनि हार रोक्न सकेन। यो हारपछि ब्राजिलका सर्वाधिक ८० अन्तराष्ट्रिय गोलकर्ता नेमारले फुटबलबाट सन्यास घोषणा गरेका छन्।
