५ वैशाख, वीरगञ्ज। लामो समयदेखि अवरुद्ध रहेको वीरगञ्जको मुख्य सडक विस्तारको काम भोलिदेखि बिहान सुरु हुने भएको छ। सडक डिभिजन कार्यालय हेटौंडाका अनुसार, त्रिभुवन राजपथ अन्तर्गत पर्ने गण्डक चोकदेखि मितेरी पुलसम्मको सडक २५–२५ मिटर दायाँ-बायाँ विस्तार गरिने छ। पर्साका प्रमुख जिल्ला अधिकारी भोलाप्रसाद दाहालले भने, सडकको मध्य भागबाट २५ मिटर क्षेत्रभित्र पर्ने घर, टहरा तथा अन्य संरचना हटाउने काम भोलिदेखि बिहानै सुरु गरिने छ।
यसका लागि हेटौंडाबाट डोजर, जेसीबी र एक्साभेटरसमेत नौवटा उपकरण वीरगञ्जमा ल्याउने तयारी भइरहेको बताए। सडक विस्तारलाई प्रभावकारी बनाउन पाँचवटा स्थानबाट एकै पटक काम सुरु गर्ने योजना छ। यसका लागि वीरगञ्ज महानगरपालिका, प्रहरी तथा अन्य सरोकारवाला निकायहरूसँग समन्वय भइरहेको छ। सर्वोच्च अदालतले २०८१ फागुन २८ गते उक्त सडक विस्तार सम्बन्धी मुद्दामा सरकारको पक्षमा फैसला गर्दै विपक्षीको रिट खारेज गरेपछि परियोजना अघि बढ्ने बाटो खुलेको हो। यसअघि करिब हजार दुई सय घरधनीहरूले मुआब्जा र वैकल्पिक सडकको माग गर्दै रिट दायर गरेका थिए, जसका कारण झन्डै १३ वर्षदेखि सडक विस्तार अन्योलमा परेको थियो। अदालतको निर्णयपछि अब प्रशासनले संरचना हटाउँदै चरणबद्ध रूपमा सडक विस्तार अगाडि बढाउने योजना बनाएको छ।
५ वैशाख, काठमाडौं । स्ट्रेट अफ होर्मुजमा पुनः तनाव बढेको छ। शनिबार दुई भारतीय जहाजमाथि गोलीबारी भएको खबर आएको छ। भारतका झन्डावाहक यी जहाजहरूमा गोलीबारी भएपछि दुवैले आफ्नो यात्रा मार्ग परिवर्तन गर्न बाध्य भएका छन् भनी बीबीसी हिन्दीले जनाएको छ। बीबीसीले समुद्रमा ट्यांकरहरूको आवतजावत नियमन गर्ने वेबसाइट ‘ट्यांकरट्र्याकर्स’बाट उद्धृत गर्दै, गोलीबारी पश्चात् यी जहाजहरूले मार्ग परिवर्तन गर्नुपरेको जानकारी प्राप्त गरेको छ।
भारतीय कार्गो जहाज ‘शीप जग अर्नव’ र तेल ट्यांकर ‘सनमार हेराल्ड’ माथि इरानको इस्लामिक रिभोल्युसनरी गार्ड कोर (आईआरजीसी)ले गोलीबारी गरी बाटो परिवर्तन गर्न आदेश दिएको बताइएको छ। त्यसपछि दुवै जहाजले युटर्न गरेर फर्किएका छन्। तेल ट्यांकर सनमार हेराल्ड इराकबाट तेल भरेर आएको भनिएको छ। यसै दिन बेलायतको मेरिटाइम ट्रेड अपरेशन्सले पनि होर्मुज स्ट्रेटमा एउटा ट्यांकरमा आईआरजीसीले गोलीबारी गरेको जानकारी दिएको छ। उक्त घटना ओमानबाट २० नटिकल माइल उत्तरपूर्वमा भएको उल्लेख गरिएको छ।
यसअघि मात्रै शुक्रबार इरानी विदेशमन्त्री अब्बास अरागचीले होर्मुज स्ट्रेट पूर्ण रूपमा खुला रहेको घोषणा गरेका थिए। तर आज इरानी मिडियाले होर्मुज स्ट्रेट बन्द भएको खबर दिएका छन्। इरानी मिडियाका अनुसार इरानी सेनाले होर्मुज क्षेत्रमा पुनः नियन्त्रण कायम गरेको भन्दै समाचार आएका थिए। त्यसपछि त्यहाँबाट धेरै जहाजहरूले आफ्नो मार्ग परिवर्तन गरेका थिए। अर्कोतर्फ, अमेरिका र इरानबीचको युद्धविराम सम्झौतामा अझै चार दिन बाँकी छन्। हालसम्म उनीहरूबीच अर्को चरणको शान्तिवार्ताको कुनै अन्तिम निष्कर्ष भएको छैन। यसअघि पाकिस्तानको इस्लामावादमा भएको शान्तिवार्ता वार्ता निष्कर्षोन्मुख भएको थियो। आजै पूर्व अमेरिकी राष्ट्रपति डोनाल्ड ट्रम्पले भनेका छन् कि इरानले बुधबार (अप्रिल २२) भित्र ठूलो सम्झौता नगरेमा पुनः बमबारी सुरु गर्नेछन्।
आईएमएफको एसिया प्यासिफिक विभागका निर्देशक कृष्ण श्रीनिवासनले नेपालमा आर्थिक वृद्धिको प्रक्षेपण ५.२ प्रतिशतबाट घटाएर ३ प्रतिशतमा राखेको जानकारी दिएका छन्। आईएमएफले सन् २०२६ मा एसिया प्यासिफिक क्षेत्रको आर्थिक वृद्धि ४.४ प्रतिशत हुने जनाएको छ। प्रतिवेदनमा नेपाल, लाओस र म्यानमारमा रासायनिक मलको लागत वृद्धि हुने र यसले किसानको आम्दानी घटाउने प्रक्षेपण गरिएको छ। ५ वैशाख, काठमाडौं। अन्तर्राष्ट्रिय मुद्राकोष (आईएमएफ)ले नेपालको चालु आर्थिक वर्षको आर्थिक वृद्धिको प्रक्षेपण २.२ प्रतिशतले घटाएको छ। यसअघि गत अक्टोबरमा आईएमएफले ५.२ प्रतिशत आर्थिक वृद्धि हुने अनुमान प्रस्तुत गरेको थियो। तर, हालको प्रक्षेपणमा यो वर्ष ३ प्रतिशत मात्र आर्थिक वृद्धि हुने बताइएको छ।
मध्यपूर्वमा जारी तनाव र गत सेप्टेम्बरमा नेपालमा भएको युवा आन्दोलनको प्रभावले नेपालको आर्थिक वृद्धि कम हुने आईएमएफले उल्लेख गरेको छ। आगामी आर्थिक वर्ष २०२७ को आर्थिक वृद्धिको प्रक्षेपण पनि ०.५ प्रतिशतले घटाएर ४.६ प्रतिशतमा सीमित गरिएको छ। आईएमएफका उपनिर्देशक थोमल हेल्ब्लिङले वर्तमान कठिन परिस्थितिमा नेपाललाई सहयोग गर्न तयार रहेको बताएका छन्।
आईएमएफले मध्यपूर्वको तनावले मूल्यवृद्धिको दबाब अझ बढाउने जनाएको छ। रासायनिक मलको लागत बढ्ने अनुमानले किसानको आम्दानी घटाउने र खाद्यान्नको मूल्य बढाउने खतरा रहेको छ। पेट्रोलियम पदार्थको मूल्यवृद्धिले ढुवानी लागत बढाउने र त्यसको प्रभाव भान्छासम्म पुग्ने देखिन्छ। आईएमएफका निर्देशक कृष्ण श्रीनिवासनले एसिया विश्व आर्थिक वृद्धिको अगुवाको रूपमा कायम रहने बताएका छन्।
सन् २०२६ मा एसियामा मुद्रास्फीति २.६ प्रतिशत पुग्ने अनुमान गरिएको छ, जुन गत वर्षको १.४ प्रतिशतभन्दा धेरै हो। ऊर्जा संकट लामो समयसम्म रहँदा सन् २०२७ सम्ममा यस क्षेत्रको कुल गार्हस्थ्य उत्पादनमा १ देखि २ प्रतिशतसम्म कमी आउन सक्ने चेतावनी दिइएको छ। महँगी नियन्त्रणका लागि मौद्रिक नीतिलाई गतिशील बनाउनुपर्ने र विदेशी विनिमय दरलाई बजारको आधारमा चल्न दिनुपर्ने आईएमएफको सुझाव छ।
५ वैशाख, काठमाडौं । नेपाली कांग्रेसको विवाद समाधानका लागि धारणा तय गर्नका लागि निवर्तमान कार्यवाहक सभापति पूर्णबहादुर खड्काको निवास गोल्फुटारमा सम्पन्न भएको पूर्वपदाधिकारी बैठक समाप्त भएको छ। बैठकपछिको पत्रकार भेटघाटमा निवर्तमान शेरबहादुर देउवा पक्षका नेता मीनबहादुर विश्वकर्माले पार्टी विवाद समाधानमा सर्वोच्च अदालतको फैसलामा विभिन्न असहमति भएता पनि आफ्नो पक्षले उक्त निर्णयलाई स्वीकार गर्ने विषयमा छलफल भएको जानकारी दिए। ‘नेपाली कांग्रेस सधैं कानूनी शासनलाई मान्ने र शक्ति पृथकीकरणको सिद्धान्तअनुसार स्वतन्त्र न्यायपालिकाको आदेश तथा निर्णयलाई आत्मसाथ गर्नेधारणामा निरन्तर अघि बढिरहेको छ,’ विश्वकर्माले भने।
‘उक्त परम्पराअनुसार, हाम्रो पार्टीका अग्रज नेता तथा निवेदकहरूले फैसलामा पर्याप्त असन्तुष्टिका बावजुद पनि विरोधाभाषपूर्ण र विवादास्पद हुँदा पनि यो निर्णय स्वीकार गर्ने विषयमा आज छलफल भयो।’ उनले थपे। आजको छलफल कुनै औपचारिक बैठक नभइ अनौपचारिक भेटघाट र संवाद मात्र भएको उनले स्पष्ट पारे। ‘यस छलफलमा आगामी दिनमा पार्टीलाई कसरी एकताबद्ध बनाउने भन्ने विषयमा परामर्श भएको थियो। विभिन्न बैठकहरू निरन्तर सञ्चालन गरिनेछन् र देशका विभिन्न भागबाट आएका सदस्यहरू तथा पदाधिकारीहरूबाट सुझाव तथा परामर्श लिने र अन्ततः एउटा निष्कर्षमा पुगिनेछ,’ उनी भन्छन्।
फैसलाअघि पूर्णबहादुर खड्कालाई ‘कार्यवाहक सभापति’ रहेको उल्लेख गर्दै विश्वकर्माले हिजोदेखि ‘निवर्तमान कार्यवाहक सभापति’ भएको जानकारी दिए। ‘उहाँ अदालतमा कार्यवाहक सभापतिको हैसियतमा जानुभएको हो। मुद्दा विचाराधीन रहेको बेला उहाँ कार्यवाहक सभापति नै हुनुहुन्थ्यो,’ उनले भने। अदालत निर्णयलाई स्वीकार गर्दै अब कार्यवाहक सभापतिको हैसियतमा समानान्तर गतिविधि नहुने पनि उनले बताए। ‘हामीले उक्त निर्णय स्वीकार गरेका छौं। यो कानुनी तथा वैधानिक विषय टुंगिएको छ। राजनीतिक विषय भनेको पार्टी एकताको विषय हो,’ उनले स्पष्ट पारे।
पार्टी एकताको विषयमा लगातार चिन्ता व्यक्त भइरहेको उनले बताए। ‘हामी मात्र होइन, सबै पक्षहरूले अब पार्टीलाई कसरी अघि बढाउने भन्ने विषयमा चिन्ता गर्नु पर्दछ,’ उनले भने। विमलेन्द्र निधिले फैसला स्वीकार नगर्ने बताएको छैन भनी उनले जानकारी दिए। ‘फैसला त मान्नुपर्छ तर निर्णयका केही त्रुटिपूर्ण पक्षहरू स्वीकार्य नभएको उहाँको भनाइ हो।’ अदालतको निर्णयप्रति विभिन्न असहमति भएता पनि स्वतन्त्र न्यायालयको आदेशलाई मान्ने उनी बताउँछन्। खड्का निवासमा पार्टी एकताका लागि आवश्यक जिम्मेवारी अब सभापति गगन थापाको हातमा रहेको विषयमा पनि छलफल भएको उनले बताए।
स्ट्याग च्याम्पियन्स टेबलटेनिस एकेडेमीले आइटिटिएफ एटिटियु दक्षिण एसियाली युथ टेबलटेनिस च्याम्पियनसिपमा पदक हासिल गरेका खेलाडीहरूलाई सम्मान गरेको छ। एकेडेमीले निश्चल थापा र सुरम्या शाक्यलाई नगद, स्मार्ट वाच र प्रमाणपत्रसहित सम्मान गरेको हो। ५ बैशाख, काठमाडौं।
स्ट्याग च्याम्पियन्स टेबलटेनिस एकेडेमीले शनिबार निश्चल र सुरम्यालाई सम्मान गरेको थियो। उनीहरूले उक्त प्रतियोगितामा नेपालको प्रतिनिधित्व गर्दै पदक जितेका थिए। अखिल नेपाल टेबलटेनिस संघका पूर्व उपाध्यक्ष गोवर्धन श्रेष्ठ, सुमन खड्गी र एसियाली टेबलटेनिस युनियनका उपाध्यक्ष शंकर गौतमले उनीहरूलाई सम्मान गरेका थिए। यस अवसरमा प्रशिक्षक राकेश महर्जनलाई पनि सम्मान गरिएको थियो।
प्रतियोगिता भारतको सिमलामा ८ देखि ११ अप्रिलसम्म सञ्चालन भएको थियो। नेपालले यु-१५ महिला र पुरुष तथा यु-१९ महिला डबल्समा सहभागिता जनाएको थियो। नेपालले कुल तीन रजत र सात कांस्य पदक जितेको थियो। निश्चलले यु-१५ ब्वाइज डबल्समा एक रजत र यु-१५ ब्वाइज टिममा एक कांस्य पदक जितेका थिए भने सुरम्याले यु-१५ गर्ल्स डबल्समा एक रजत र यु-१५ गर्ल्स टिममा एक कांस्य पदक हात पारेका थिए।
नेपाल पानी उद्योग महासंघले उत्पादन लागतमा करिब ४० प्रतिशत वृद्धि भएपछि मूल्य समायोजन गर्न आफ्ना सदस्य उद्योगहरूलाई आग्रह गरेको छ। महासंघले शनिबार जारी गरेको विज्ञप्तिमा अन्तर्राष्ट्रिय द्वन्द्व र पेट्रोलियम पदार्थहरूको मूल्य वृद्धिलाई कच्चा पदार्थको मूल्य बढ्नुको मुख्य कारणको रूपमा उल्लेख गरेको छ।
५ वैशाख, काठमाडौं। महासंघका अनुसार पानी उद्योगमा प्रयोग हुने बोतल, क्याप, र्यापिङ रोल, जार तथा जारको क्याप लगायत कच्चा पदार्थहरूको मूल्य करिब ४० प्रतिशतसम्म वृद्धि भएको छ। पेट्रोलियम पदार्थ (डिजेल)को मूल्य अत्यधिक बढेसँगै ढुवानी खर्च पनि उल्लेखनीय रूपमा बढेको छ।
महासंघका महासचिव ध्रुवप्रसाद अधिकारीले भने, “यो कुनै नाफामूलक निर्णय होइन, उत्पादन लागत, ढुवानी खर्च र कच्चा पदार्थ मूल्य वृद्धिका कारण उत्पन्न बाध्यात्मक अवस्था हो।” महासंघले सबै सदस्य उद्योगीहरूलाई कच्चा पदार्थ र सञ्चालन लागतमा भएको वृद्धिको अनुपातमा मूल्य समायोजन गरी बिक्री गर्न आग्रह गरेको छ।
महासंघले सरकारसँग उद्योगमैत्री नीति ल्याउन, कूटनीतिक पहलबाट कच्चा पदार्थको उपलब्धता सुनिश्चित गर्न र ढुवानी लागत नियन्त्रणका उपायहरू अवलम्बन गर्न अनुरोध गरेको छ। साथै, आम उपभोक्ता, वितरक र सरोकारवालाहरूलाई उद्योग संरक्षण, रोजगारी सुरक्षा र सेवाको निरन्तरताका लागि गरिएको यो बाध्यात्मक मूल्य समायोजनमा सहयोग गर्न पनि अपिल गरेको छ।
५ वैशाख, काठमाडौं । राष्ट्रिय स्वतन्त्र पार्टी (रास्वपा) ले सचिवालय बैठक बोलाएको छ । सभापति रवि लामिछानेले भोलि आइतबार दिउँसो साढे ३ बजे पार्टी केन्द्रीय कार्यालय वनस्थलीमा सचिवालयको बैठक राखेको जानकारी दिएका छन्, जसको सूचना प्रवक्ता मनिषले दिएका छन् । बैठकमा ६ वटा मुख्य एजेन्डा तय गरिएको छ ।
उनका अनुसार जिल्ला अधिवेशन कार्यविधि, बैंक खाता सञ्चालन, केन्द्रीय आयोग, सल्लाहकार परिषद्, संघीय नेतृत्व मञ्च र विभागहरूको मनोनयन, महाधिवेशन कार्यविधि मस्यौदा समिति गठन, विज्ञहरू, योजनाहरू आह्वान र विविध अन्य विषयहरूमा छलफल हुनेछन् । विविध विषयहरूमा पनि प्रतिनिधिसभा सदस्यहरूको संगठनात्मक जिम्मेवारी, केन्द्रीय समिति बैठक, संसदीय दलका लागि प्राविधिक सहायता तथा लेबी सम्बन्धमा छलफल गर्ने एजेन्डा रहेको छ भन्ने जानकारी उनले दिएका छन् ।
५ वैशाख, काठमाडौं। सनराइजर्स हैदरबादले इन्डियन प्रिमियर लिग (आईपीएल) क्रिकेटमा तेस्रो जित दर्ता गरेको छ। शनिबार राति सम्पन्न खेलमा हैदरबादले चेन्नई सुपर किङ्सलाई १० रनले पराजित गरेको हो। हैदरबादले दिएको १९५ रनको लक्ष्य पछ्याएको चेन्नईले पूरा २० ओभरमा ८ विकेट गुमाउँदै १८४ रन मात्र बनाउन सकेको छ। म्याट शर्टले सर्वाधिक ३४ रन बनाएका थिए।
५ वैशाख, गुल्मी। गुल्मीको रेसुङ्गा विमानस्थलबाट आजदेखि हप्तामा चार पटक हवाई उडान सञ्चालन गरिने भएको छ। नेपाल वायुसेवा निगमले काठमाडौंदेखि गुल्मीका लागि आइतबार, मंगलबार, बिहीबार र शनिबार उडान तालिका सार्वजनिक गरेको छ। यसअघि नियमित रूपमा आइतबार, मंगलबार र बिहीबार उडान सञ्चालन हुँदै आएको थियो। निगमका आन्तरिक उडानका लागि राखिएका ट्विनअटर जहाजको मर्मतपछि उडान तालिका थप गरिएको रेसुङ्गा स्टेशनका प्रमुख सुमन थापाले जानकारी दिए।
उनका अनुसार नयाँ तालिका थप भएपछि भाडादरमा पनि वृद्धि भएको छ। पेट्रोलियम पदार्थको मूल्य वृद्धिका कारण रेसुङ्गा–काठमाडौं हवाई उडानको भाडा वृद्धि भएको स्टेसन प्रमुख थापाले बताए। नयाँ भाडादर अनुसार काठमाडौंबाट रेसुङ्गाका लागि १० हजार ९०२ रुपैयाँ र रेसुङ्गाबाट काठमाडौंका लागि १० हजार ७०२ रुपैयाँ तोकिएको छ। यसअघि निगमले काठमाडौंबाट रेसुङ्गाका लागि ७ हजार ५०० र गुल्मीबाट काठमाडौंका लागि ७ हजार ३०० रुपैयाँ भाडादर निर्धारण गरेको थियो।
पछिल्लो समयमा यात्रु भीड धेरै हुने र पेट्रोलियम पदार्थ मूल्यवृद्धिका कारण भाडा तीन हजार ४०२ रुपैयाँले बढाइएको छ, उनले बताए। वर्षा मौसम र प्रतिकूल अवस्थालाई बाहेक पछिल्लो पाँच महिनादेखि रेसुङ्गा विमानस्थलमा नियमित हवाई सेवा सञ्चालन हुँदै आएको छ। निगमले १८ सिट क्षमताको ट्विनअटर जहाजबाट काठमाडौं–रेसुङ्गा सेवा दिन्छ।
गुल्मीमा हवाई उडान सुरु भएपछि जिल्लामा आउने आन्तरिक तथा बाह्य पर्यटकको संख्या बढ्दै गएको छ। करिब १६ देखि १८ घण्टा लाग्ने स्थलमार्ग यात्रा नि:शुल्क हुँदै आएको यात्रुहरूले बताए। सेवा सुरु भएपछि हवाई मार्गबाट ४५ देखि ५० मिनेटमै गुल्मीबाट राजधानी आउजा गर्न सकिन्छ। नेपाल वायुसेवा निगमले विक्रम संवत २०८० वैशाख २९ देखि व्यावसायिक रूपमा गुल्मी हवाई उडान सञ्चालन गरेको हो।
५ वैशाख, काठमाडौं । राष्ट्रिय जेनजी नागरिक अभियानले इन्धनको मूल्य घटाउन सरकार र नेपाल आयल निगमलाई २४ घण्टे अल्टिमेटम दिएको छ । शनिबार राजधानीको संवाद डबलीमा पत्रकार सम्मेलन गर्दै सो संगठनले २४ घण्टाभित्र मूल्य नघटाए आयल निगमलाई घेर्ने चेतावनी दिएको हो । ‘जनतालाई पुरानाहरूको जञ्जालबाट मुक्त गर्ने नयाँहरूले जनतालाई महँगीले दबाउने काम गर्दैछन्,’ सो अभियानका संयोजक सुनिल सिंहले भने, ‘दुई तिहाइको उपहार यही हो? यदि सरकारले जनताको आवाज सुनेन भने आयल निगमको अस्तित्वलाई समाप्त पार्न संघर्ष गर्नेछौं।’
सो अभियानका सह–संयोजक अजय सोडारीले छिमेकी देशहरूमा पेट्रोलियम पदार्थको मूल्य यथावत रहँदा पनि नेपालमा अत्यधिक मूल्य वृद्धि गरिएको भन्दै आपत्ति जनाए। ‘भारतमा पेट्रोलको मूल्य ९५ रुपैयाँ छ भने नेपालमा २१९ हुनु लाजमर्दो कुरा हो,’ सोडारीले भनिन्। सरकारले ५० प्रतिशत कर छुट गरेको भ्रम फैलाएर जनतामाथि झन् महँगी थोपरेको आरोप लगाउँदै उनले भने, ‘कर छुटको नाटक गर्ने सरकार र आयल निगमलाई घेराबन्दी गर्नबाट कसैले नछुटोस्।’
सरकार आफैं महँगी थप्दै गर्दा व्यापक विरोध हुनुको सट्टा सबै मौन रहेकोप्रति उनी धेरै रोष प्रकट गरे। ‘महँगी बढ्दैछ र मानौँ यो सरकार र जनताका लागि मौन अवधि हो, यस्तो हुँदा पनि सबै चुपचाप छन्,’ उनले भने। जेनजी अभियन्ता प्रकाश बमले जेनजी आन्दोलनको बलबाट आएको बालेन्द्र शाह नेतृत्वको सरकार निरंकुश शैलीमा सिंहदरबारमा सर्वसाधारणलाई निषेध गरेर बसेको भन्दै आक्रोश पोखे।
५ वैशाख, सुर्खेत । सल्यानको बनगाड कुपिण्डे नगरपालिकाको पुथालामा जन्ती बोकेको गाडी दुर्घटना हुँदा तीन जनाको मृत्यु भएको छ। सोही नगरपालिकाको ८ नम्बर वडाबाट कालीमाटीको लक्ष्मीपुरतर्फ जन्ती बोकेर जाँदै गरेको लु.प्र.०१००१ ज ०२७१ नम्बरको जिप दुर्घटना भएको हो। मृत्यु हुनेमा कुपिण्डे नगरपालिका-८ का ५० वर्षीय टोपबहादुर थापा, ५० वर्षकै ठगे घर्ती र २९ वर्षीय कर्णबहादुर पुन रहेका छन्, जिल्ला प्रहरी कार्यालय सल्यानका इन्सपेक्टर देवराज भट्टराईले जानकारी दिए।
उद्धारमा खटिएका वडानम्बर ८ का वडाध्यक्ष कुलबहादुर पुरीका अनुसार जिपमा १८ जना सवार थिए। तीमध्ये १५ जना घाइते भएका छन्। उनीहरुलाई उद्धार गरी सुर्खेतको मेहेलकुना अस्पताल पठाइएको छ। घाइतेहरुको सूचीमा ३० वर्षीय मनबहादुर थापा, ६४ वर्षीय अम्मरसिंह कँवर, २७ वर्षीय डम्मर घर्ती, ३० वर्षीय जनक थापा, ४९ वर्षीय भुपेन्द्र कँवर, ३० वर्षीय भुलबहादुर थापा, ५६ वर्षीय जुगसिंह पुन, ३८ वर्षीय अम्मर पुन, २८ वर्षीय नरसिंह थापा, २५ वर्षीय प्रेमबहादुर घर्ती, २५ वर्षीय नरबहादुर थापा, ३८ वर्षीय कर्णबहादुर थापा, ४५ वर्षीय लाल ब. घर्ती, १५ वर्षीय तिलक थापा र चालक ३८ वर्षीय कुलबहादुर राना रहेका छन्।
यो देश-जीर्ण हुँदै गरेको एउटा फाइल हो, जसलाई धमिराले आफ्नो विश्रामस्थल बनाएका छन्। धुवाँले खाएको दराजको अँध्यारो कुनामा थन्किएको बेवारिसे र विस्मृत फाइल पहिचान गर्न गाह्रो भइसकेको छ। यसको इतिहास-फाइलका पानामा कोरिएका ती वाचाहरू हुन्, जो घाम नझुल्किँदै पहेँला भएर झर्छन्। यसको गातामा जमेको बाक्लो धुलोले जनताको आँसुको हिसाब लुकाएको छ।
फाइलभित्र आश्रम जमाएर बसेको छ भ्रष्टाचार-कार्बन पेपरजस्तो हजारौँ प्रतिलिपिहरू निकालिएका छन्। यहाँ माथिदेखि तलसम्म सबैका हातमा कार्बनका दाग छन्। सुशासन यहाँ एउटा भूलभुलैयाको रूपमा छ, जहाँ कुनै फाइल अगाडि बढ्छन्, कुनै हराउँछन्, बाँकी फाइलहरू थन्किएर बस्छन्। नियमका अक्षरहरू यहाँ सिसाकलमले लेखिएका छन्। ठेकेदारहरू खल्तीभरि रबर बोकेर हिँडिरहेका छन्।
कुशासनले प्रत्येक फाइललाई एउटा चिहान बनाएको छ। इन्साफ खोज्दै भौँतारिरहेको मान्छे भर्खरै ढलेको छ। गरिबका उजुरी र थिचिएका आवाजहरू जिउँदै पुरिएका छन्। मुन्सीहरू ढुकुटीमाथि चढेर स्रेस्ठा मिलाउन व्यस्त छन्। यो देश-मुखमा ‘अत्यन्त जरुरी’ छापिएको तर ‘पेन्डिङ’को चाङमा अड्किएको एउटा फाइल हो।
जहाँ नपढिएका फाइलहरूको पहाडमुनि देशको तक्दिर थिचिएको छ। आज प्रतीक्षारत आँखाहरू सोधिरहेछन्, कोही यहाँ? जसले नत्थी गरिएका, ओस्सिएका, र च्यातिएका फाइलहरूको यो अनन्त महासागरबाट निकाल्न सकोस्—निस्सासिँदै गरेको एउटा देश।
५ वैशाख, सुर्खेत। कर्णाली प्रदेशका मुख्यमन्त्री यामलाल कँडेलले स्थानीय तहका प्रमुख प्रशासकीय अधिकृतहरूलाई प्रदेश सरकारको मातहत राख्नुपर्ने सुझाव दिएका छन्। शनिबार राष्ट्रिय समाचार समिति (रासस) सँगको अन्तरवार्तामा मुख्यमन्त्री कँडेलले संघीय सरकारले स्थानीय तहका प्रमुख प्रशासकीय अधिकृतको नियुक्ति र व्यवस्थापनको जिम्मेवारी प्रदेश सरकारलाई दिनुपर्ने आवश्यकता रहेको बताएका छन्।
‘संघीय मामिला तथा सामान्य प्रशासन मन्त्रालयले हाल स्थानीय तहमा प्रमुख प्रशासकीय अधिकृत खटाउँदै आएको छ। यस्तो प्रणालीले तहगत सरकारहरूबीच समन्वय, सहकार्य र कार्यान्वयन प्रक्रियामा चुनौती निम्त्याउँछ। त्यसैले समस्याको समाधानका लागि व्यवस्था परिमार्जन गर्नु आवश्यक छ,’ उनले भने। उनले संघीय मामिला तथा सामान्य प्रशासन मन्त्रालयले सम्बन्धित प्रदेशमा एकसाथ प्रमुख प्रशासकीय अधिकृत खटाउने काम गर्ने र प्रदेशको मुख्यमन्त्री तथा मन्त्रिपरिषद्को कार्यालयले रिक्त रहेको स्थानीय तहमा व्यवस्थापन गर्ने काम गर्नुपर्ने सुझाव दिएका छन्।
मुख्यमन्त्री कँडेलले संविधानले परिकल्पना गरेअनुसार संघीयतालाई पूर्ण रूपमा कार्यान्वयन गर्न अधिकार बाँडफाँडका विषयहरू शीघ्र टुंग्याउनुपर्ने बताएका छन्। ‘संविधानमा संघ, प्रदेश र स्थानीय तहबीचको सम्बन्ध सहकार्य, सहअस्तित्व र समन्वयको सिद्धान्तमा आधारित रहने व्यवस्था गरिएको छ। अधिकारमा हस्तक्षेप र द्विविधा नहोस् भनेर संविधानले तीनै तहका सरकारका साझा र एकल अधिकारको स्पष्ट व्यवस्था गरेको छ,’ उनले थपे।
साथै, उनले संविधान र संघीय कानुनसँग नभेटिने गरी प्रदेश र स्थानीय तहले आफ्नो एकल अधिकारअन्तर्गत कानुन बनाउन र कार्यान्वयन गर्न सक्ने व्यवस्था स्पष्ट गरिएको बताए। ‘त्यसैले प्रदेश वा स्थानीय तहको एकल अधिकारको सन्दर्भमा कानुन वा नीति बनाउँदा संघीय सरकारले हस्तक्षेप गर्न नपाउने व्यवस्था पालना हुनुपर्छ,’ उनका शब्दमा।
इलाममा सुरु भएको तेस्रो इलाम गोल्डकप फुटबल प्रतियोगिताको उद्घाटन खेलमा पथरी ११ मोरङले आयोजक रेडहर्स फुटबल क्लबलाई पराजित गरेको छ। प्रतियोगितामा दुई विदेशी टोलीसहित ८ टोली सहभागी छन्। विजेताले १० लाख रुपैयाँसहित ट्रफी, मेडल र प्रमाणपत्र पाउनेछ भने उपविजेताले ५ लाख रुपैयाँसहित पुरस्कार पाउनेछन्।
५ बैशाख, इलाम। इलामको स्थानीय खेलमैदान ठूलो टुँडिखेलमा भएको खेलमा पथरी ११ मोरङले टाइब्रेकरमा ४-२ को अन्तरले आयोजक रेडहर्सलाई पराजित गर्दै सुखद सुरुवात गरेको हो। निर्धारित समय १–१ गोलको बराबरीमा सकिएपछि खेलको निर्णय टाइब्रेकरबाट गरिएको थियो। खेलको तेस्रो मिनेटमै रेडहर्सका सन्देश खड्काले गोल गर्दै आयोजकलाई अग्रता दिलाएका थिए।
दुवै टोलीबीच प्रतिस्पर्धात्मक खेल देखिएको थियो। निर्धारित समयसम्म रेडहर्सले अग्रता जोगाइरहे पनि थप गरिएको इन्जुरी समयमा पथरी ११ का सौर्य राउतले गोल फर्काएपछि खेल बराबरीमा पुगेको थियो। टाइब्रेकरमा पथरी ११ मोरङले उत्कृष्ट प्रदर्शन गर्दै जित हात पार्यो। खेलमा उत्कृष्ट प्रदर्शन गरेका पथरी ११ मोरङका आशिष लावतीलाई ‘प्लेअर अफ दि म्याच’ घोषणा गरिएको थियो।
प्रतियोगिताको उद्घाटन इलाम निर्वाचन क्षेत्र नं. २ का सांसद सुहाङ नेम्वाङले गरेका थिए। प्रतियोगितामा आइतबार रोलिङ स्पोर्टिङ क्लब धुलाबारी, झापा र फिदिम स्पोर्टिङ क्लब पाँचथरबीच प्रतिस्पर्धा हुनेछ। यस प्रतियोगितामा स्वदेशी तथा विदेशी गरी ८ टोलीको सहभागिता रहेको छ।
नेपाल शारीरिक सुगठन तथा फिटनेस महासंघको आयोजनामा छैटौं मिस्टर काठमाडौं शारीरिक सुगठन तथा फिजिक स्पोर्ट्स च्याम्पियनसिप भदौ तेस्रो साता दशरथ रंगशाला कभर्डहलमा हुने भएको छ। प्रतियोगितामा ५५ देखि ८० केजीभन्दा माथिका ७ तौल समूहमा खेलाइनेछ र नयाँ ८०+ तौल समूह पनि समावेश गरिएको छ। ओभरअल विजेतालाई मिस्टर काठमाडौं उपाधिसहित रु ५ लाख नगद, पदक, ट्रफी र ब्यानेट प्रदान गरिने आयोजकले जनाएको छ। ५ बैशाख, काठमाडौं। नेपाल शारीरिक सुगठन तथा फिटनेस महासंघको तत्वावधानमा काठमाडौँ शारीरिक सुगठन तथा फिटनेस संघको आयोजनामा छैटौं मिस्टर काठमाडौं शारीरिक सुगठन तथा फिजिक स्पोर्ट्स च्याम्पियनसिप २०७३ भदौ तेस्रो साता सञ्चालन हुने भएको छ। ‘स्वास्थ्य नै धन हो’ भन्ने मुल नारा सहित हुने प्रतियोगिता भदौ १९ र २० गते काठमाडौंको त्रिपुरेश्वरस्थित दशरथ रंगशाला कभर्डहलमा हुने आयोजकले शनिबार पत्रकार सम्मेलनमार्फत जानकारी दिएका छन्। राष्ट्रिय स्तरको यस प्रतियोगितामा मिस्टर काठमाडौं शारीरिक सुगठन प्रतियोगिता, मास्टर मिस्टर काठमाडौं प्रतियोगिता, जुनियर मिस्टर काठमाडौं प्रतियोगिता, पुरुष एथलेटिक फिजिक्स प्रतियोगिता, महिला एथलेटिक फिजिक्स प्रतियोगिता तथा पुरुष स्पोर्ट्स फिजिक्स प्रतियोगिता हुने आयोजकले बताएका छन्। २०७३ सालदेखि सुरु गरिएको मिस्टर काठमाडौंको हालसम्म पाँच संस्करण भव्य रुपमा सम्पन्न भइसकेको छ। नेपालभरका शारीरिक सुगठन खेलाडीहरूलाई समेट्न र प्रतियोगितालाई अझ आकर्षक बनाउन छैटौं संस्करणलाई परिमार्जित एवं परिस्कृत रूपमा राष्ट्रियस्तरमा आयोजना गर्न लागिएको आयोजकको भनाइ छ। मिस्टर काठमाडौं शारीरिक सुगठन प्रतियोगितामा ५५, ६०, ६५, ७०, ७५, ८० तथा ८० केजीभन्दा माथि (८०+) समूह गरी कूल ७ तौल समूहमा खेलाइनेछ। यस अघि ७५ केजी माथिसम्म मात्र तौल समूह राखिएकोमा यस वर्ष प्रतिस्पर्धालाई अझ व्यवस्थित र प्रतिस्पर्धात्मक बनाउन नयाँ ८०+ तौल समूह पनि समावेश गरिएको छ। जुनियर मिस्टर काठमाडौं शारीरिक सुगठन प्रतियोगितामा २०८२ चैत्र मसान्तसम्म २१ वर्ष ननाघेका खेलाडीहरूले प्रतिस्पर्धा गर्न पाउनेछन् भने मास्टर मिस्टर काठमाडौं प्रतियोगितामा ४०+ उमेरका खेलाडीले प्रतिस्पर्धा गर्न पाउनेछन्। त्यसैगरी महिला एथलेटिक्स फिजिक्स खुला उचाइ अन्तर्गत प्रतिस्पर्धा गरिनेछ। पुरुष स्पोर्ट्स फिजिक्स अन्तर्गत अन्तर्राष्ट्रिय मापदण्ड अनुसार तौल र उचाइ अनुसार १७० से.मी. सम्म र १७० से.मी. भन्दा माथिको उचाइ समूह गरी दुई समूहमा प्रतियोगिता सञ्चालन गरिनेछ। दुई दिन चल्ने प्रतियोगिताको पहिलो दिन तौल र उचाइ नापिनेछ। शारीरिक सुगठनमा प्रत्येक तौल समूहमा दोश्रो र तेश्रो हुने खेलाडीहरूलाई रु २०,००० र रु १०,००० नगद पुरस्कार प्रदान गरिनेछ। तौल समूहमा प्रथम हुनेले ओभरअल च्याम्पियनसिपमा प्रतिस्पर्धा गरेपछि रु ४०,००० नगद, पदक र प्रमाणपत्र प्रदान गरिनेछ। ओभरअल विजेतालाई मिस्टर काठमाडौंको उपाधि सहित रु ५ लाख नगद, पदक, ट्रफी तथा ब्यानेट प्रदान गरिनेछ। महिला प्रतिस्पर्धामा फाइनल राउण्डमा छनोट भएका पाँच खेलाडीबीच प्रतिस्पर्धा गराएर ओभरअल विजेतालाई रु ५०,००० नगद, पदक, ट्रफी तथा ब्यानेट प्रदान गरिनेछ। दोस्रो र तेश्रो हुनेलाई क्रमशः रु ३०,००० र रु २०,००० नगद र पदक प्रदान गरिनेछ भने चौथो र पाँचौ हुनेलाई पदक तथा प्रमाणपत्र दिइनेछ। मास्टर मिस्टर काठमाडौं, जुनियर मिस्टर काठमाडौं, पुरुष एथलेटिक फिजिक्स र पुरुष स्पोर्ट्स फिजिक्स अन्तर्गत फाइनलमा छनोट भएका पाँच खेलाडीबीच प्रतिस्पर्धा गराएर विजेतालाई रु ५०,००० नगद, पदक, ट्रफी र ब्यानेट प्रदान गरिनेछ। दोस्रो र तेश्रो हुनेलाई क्रमशः रु २०,००० र रु १०,००० नगद र पदक दिइनेछ भने चौथो र पाँचौं हुनेलाई पदक तथा प्रमाणपत्र प्रदान गरिनेछ। यस प्रतियोगिताको अनुमानित बजेट करिब रु ५० लाख रहेको आयोजकले बताए। शारीरिक सुगठन खेलले खेलाडीहरूको शरीरलाई स्वस्थ, आकर्षक र शक्तिवान बनाउन मद्दत गर्ने साथै प्रतिस्पर्धात्मक खेलमा खेलाडीहरूले कलात्मक र दक्षतापूर्वक आफ्नो शरीरको प्रदर्शन गर्न सक्षम हुने आयोजकको विश्वास छ।
