रेडबुल दशौं पीएम कप एनभीए महिला तथा पुरुष भलिबल लिग २०८३ को पाँचौं दिन नेपाल पुलिस क्लबका दुवै टोली विजयी भएका छन्। पुरुषतर्फ नेपाल पुलिस क्लबले खिल्जी युवा क्लबलाई ३२-३०, २५-२३, २५-१२ ले हराउँदै लगातार चौथो जित हात पारेको छ। महिलातर्फ नेपाल पुलिस क्लबले त्रिभुवन आर्मी क्लबलाई ३-१ ले हराउँदै लगातार तेस्रो जित हात पारेको छ। १४ वैशाख, काठमाडौं।
त्रिपुरेश्वरस्थित दशरथ रंगशाला कभर्डहलमा जारी एनभीए लिगमा सोमबार पुरुषतर्फ नेपाल पुलिस क्लबले खिल्जी युवा क्लबलाई सोझो सेटमा हरायो। पुलिसले खिल्जीलाई ३२-३०, २५-२३, २५-१२ ले पराजित गरेको हो। लगातार चार खेलबाट पुलिसले १२ अंक जोडेको छ। उही पुरुषतर्फको विभागीय डर्बी खेलमा त्रिभुवन आर्मी क्लबले नेपाल एपीएफ क्लबलाई ३-२ ले पराजित गर्दै पुनरागमन जित हात पारेको छ।
महिलातर्फ, नेपाल पुलिस क्लबले विभागीय टोली त्रिभुवन आर्मी क्लबलाई ३-१ ले पराजित गर्दै लगातार तेस्रो जित हात पारेको हो। पहिलो सेट त्रिभुवन आर्मीले २५-२१ ले जिते पनि पछि पुलिसले तीन सेट २५-१५, २५-१५, २५-१५ ले जितेर खेलमा पुनरागमन गर्यो। लगातार तीन जितपछि पुलिसले ९ अंक जोडेको छ। मंगलबार पनि एनभीए लिगमा पुरुषतर्फ ३ र महिलातर्फ २ खेलहरू हुनेछन्।
अर्थमन्त्री डा. स्वर्णिम वाग्लेले १४ वैशाख २०८३ मा अर्थतन्त्रको वर्तमान अवस्थाबारे विस्तृत प्रतिवेदन सार्वजनिक गरेका छन्। पश्चिम एसियामा जारी युद्धले नेपाली कामदार र रेमिट्यान्स क्षेत्रमा बहुआयामिक चुनौती थपिएको अर्थ मन्त्रालयले जनाएको छ। नेपालले आर्थिक वृद्धिदर औसत ४.२ प्रतिशत कायम राख्दै मर्यादित रोजगारी र पूँजीगत खर्चमा कमजोरी भोगिरहेको छ।
अर्थमन्त्री वाग्लेले १३ चैत २०८२ मा पदभार ग्रहण गर्दा गरेको प्रतिवद्धताअनुसार अर्थतन्त्रको वर्तमान अवस्थाबारे प्रतिवेदन १४ वैशाख २०८३ मा सार्वजनिक गरे। उनले भने, “नेपाल स्रोत, सम्भावना र सदिच्छामा समृद्ध भए तापनि सोच, संकल्प र शासकीय सदाचारको अभावले समुन्नत हुन सकेको छैन।” उनले मुलुकको अर्थतन्त्र पुनर्संरचना र स्तरोन्नतिको चरणमा प्रवेश गरेको उल्लेख गरे।
अर्थ मन्त्रालयले हालैको विश्व भूराजनीतिक तनाव र पश्चिम एसियामा जारी युद्धले नेपालको अर्थतन्त्रमा बहुआयामिक चुनौती थपेको स्वीकार गरेको छ। मन्त्रालयका अनुसार पश्चिम एसियाका १५ मुलुकमा करीब साढे १७ लाख नेपाली कामदार छन्, जसले कुल रेमिट्यान्सको ३७.४ प्रतिशत हिस्सा ओगटेको तथ्यांक छ।
अर्थ मन्त्रालयको आर्थिक स्थितिपत्रअनुसार, पछिल्लो एक दशकमा नेपालको आर्थिक वृद्धिदर औसत ४.२ प्रतिशत मात्र रहेको छ। यस अवधिमा २.४ प्रतिशतको संकुचनदेखि ९ प्रतिशतसम्मको बृद्धि अर्थव्यवस्थामा देखा परेको छ। मन्त्रालयले भन्यो, “यो रेटिङ नेपालका लागि सकारात्मक सुरुवात बिन्दु हो, जसले वैदेशिक लगानी भित्र्याउन र अन्तर्राष्ट्रिय मञ्चमा वित्तीय विश्वसनीयता कायम गर्न मद्दत गर्नेछ।”
प्यूठानमा घरेलु विवादका क्रममा बुवा सानू नेपालीले पेट्रोल छर्केर आगो लगाउँदा आफैं र छोरी अञ्जली नेपाली गम्भीर घाइते भएका छन्। घाइते दुवैको प्रारम्भिक उपचार जिल्ला अस्पतालमा गरिएको र गम्भीर हुनाले थप उपचारका लागि मिसन अस्पताल पाल्पा पठाइएको छ। १४ वैशाख, प्यूठान।
घरेलु झगडाका क्रममा पेट्रोल छर्किएर आगो लाग्दा बुवा–छोरी गम्भीर घाइते भएका छन्। प्यूठान नगरपालिका-९ पारपाखाका ४५ वर्षीय सानू नेपाली र उनका १८ वर्षीया छोरी अञ्जली नेपाली घाइते भएको प्रहरीले जनाएको छ। जिल्ला प्रहरी कार्यालय प्यूठानका अनुसार, घरेलु झगडा हुँदा बुवा सानू नेपालीले आफैंमा पेट्रोल छर्केर आगो लगाउने प्रयास गरेका थिए।
त्यसै क्रममा छोरी अञ्जलीले प्रयास गर्दा पेट्रोल छरिएर दुबै जना जलेर घाइते भएको प्रहरी निरीक्षक हरि भट्टराईले जानकारी दिए। घाइते दुवैको प्रारम्भिक उपचार जिल्ला अस्पतालमा गरिएको र गम्भीर अवस्थामा रहेकाले थप उपचारका लागि मिसन अस्पताल पाल्पा पठाइएको छ।
१४ वैशाख, काठमाडौं । पाकिस्तानबाट रुस भ्रमणमा निस्केका इरानी विदेशमन्त्री अब्बास अराघची मस्कोमा रुसी राष्ट्रपति भ्लादिमिर पुटिनसँग भेटवार्ता गरेका छन्। रुसको समाचार एजेन्सी तासका अनुसार, दुई नेताबीच वार्ता हालसम्म जारी छ। तासको समाचारमा पुटिनले इरानी जनता आफ्नो सम्प्रभुताका लागि साहसपूर्वक संघर्ष गरिरहेको बताएका छन्। उनले भनी सकेका छन् कि यी कठिन परिस्थितिबाट उत्रिएपछि इरानमा शान्ति स्थापित हुने विश्वास छ।
पुटिनले अराघचीसँग भने, “रुसले सकेसम्म चाँडो मध्यपूर्वमा शान्ति ल्याउन सबै सम्भव प्रयास गर्नेछ।” भेटका क्रममा इरानी विदेशमन्त्री अराघचीले रुस र इरानबीचको सम्बन्ध रणनीतिक साझेदारी हो र आगामी दिनहरुमा अझ बलियो हुने आशा व्यक्त गरे। बैठकमा पुटिनसँगै रुसका विदेशमन्त्री सर्गेई लाभरोभ, राष्ट्रपति कार्यालय क्रेमलिनका सहयोगी युरी उसाकोभ र रुसी खुफिया एजेन्सीका प्रमुख इगोर कोस्त्युकोभ पनि सहभागी थिए। इरानबाट उपविदेश मन्त्री काजेम गरिबाबादी र मस्कोमा रहेका इरानी राजदूत काजिम जलाली पनि उपस्थित थिए।
आईपीएल क्रिकेटमा रायल च्यालेन्जर्स बेंगलुरुले दिल्ली क्यापिटल्सलाई ९ विकेटले पराजित गर्यो। बेंगलुरुले ७६ रनको लक्ष्य ६.३ ओभरमा १ विकेट मात्र गुमाएर पूरा गर्यो। दिल्ली १६.३ ओभरमा ७५ रनमै सबै खेलाडी आउट भयो र बेंगलुरु दोस्रो स्थानमा छ। १४ वैशाख, काठमाडौं।
सोमबार रातिको खेलमा बेंगलुरुले दिल्ली क्यापिटल्सलाई ९ विकेटले हरायो। सानो लक्ष्य ७६ रन बेंगलुरुले एक विकेट गुमाउँदै ६.३ ओभरमा पूरा गर्यो। देवदत्त पडिक्कलले ३४ रन बनाए भने विराट कोहलीले २३ रन अनआउट खेले। ज्याकब बेथेलले २० रन बनाए। दिल्लीबाट काइल जेमिसन मात्र एक विकेट लिन सफल भए।
टस हराएर पहिले ब्याटिङ गरेको दिल्ली टोली १६.३ ओभरमा ७५ रनमै अलआउट भयो। सुरुवातमै ८ रनमा ६ विकेट गुमाएको थियो। दोस्रो बलमै साहिल पारख बिना रन आउट भए र दुई रन जोडिन् सँगै केएल राहुल पनि आउट भए। त्यसपछि समीर रिज्भी पनि आउट भएपछि दिल्लीको स्थिति २ विकेटको ३ रन थियो। स्कोर ७ मा ट्रिस्टन स्टब्स र कप्तान अक्षर पटेल आउट भए भने स्कोर ८ मा नितिश रानाले पनि विकेट गुमाए, जसले गर्दा दिल्लीको स्थिति ८ विकेटको ६ रन भयो।
अन्तिम विकेटका रूपमा अभिषेक पोरेल ३० रनमा आउट भएसँगै दिल्ली ७५ रनमै अलआउट भयो। बेंगलुरुका जोश हेजलवुड र भुवनेश्वर कुमारले सुरुवाती ४ ओभरभित्र ३-३ विकेट लिए। हेजलवुडले ३.३ ओभरमा १२ रन खर्चेर ४ विकेट लिए भने भुवनेश्वरले ३ ओभरमा ५ रन खर्चेर ३ विकेट लिए। यस ठूलो जितसँगै बेंगलुरुले ८ खेलबाट १२ अंक जोडेर दोस्रो स्थानमा रह्यो भने हारका बाबजुद दिल्ली ८ खेलबाट ६ अंकसहित सातौं स्थानमा छ।
इन्स्टाग्रामले आफ्ना प्रयोगकर्ताहरूलाई भावना र विचारहरू व्यक्त गर्न तथा साथीहरूसँग अन्तर्क्रिया गर्नका लागि विभिन्न प्रकारका स्टिकरहरू उपलब्ध गराएको छ। यी स्टिकरहरूले तपाईँको मूड, स्थान वा सन्देशलाई थप जीवंत र आकर्षक बनाउँछन्। इन्स्टाग्राममा उपलब्ध स्टिकरका प्रकारहरूमा अन्तर्क्रियात्मक (Interactive) स्टिकर, एक्स्प्रेसिव स्टिकर, यूटिलिटी स्टिकर र म्युजिक स्टिकर समावेश छन्।
अन्तर्क्रियात्मक स्टिकरमा क्विज, पोल, प्रश्न सोध्ने फिचर र ‘Add Yours’ जस्ता स्टिकरहरू पर्छन्। नयाँ ‘Magic Ball’ स्टिकरमार्फत तपाईँले आफ्ना प्रश्नहरूको उत्तर सार्वजनिक रूपमा साझा गर्न सक्नुहुन्छ। एक्स्प्रेसिव स्टिकरमा इमोजी, एनिमेटेड एभाटारहरू र GIF स्टिकरहरू समावेश छन्, जसले तपाईँको व्यक्तित्व र भावना प्रस्ट पार्छन्। यूटिलिटी स्टिकरमा समय, स्थान र मौसम देखाउने स्टिकरहरू पर्छन्।
रचनात्मक स्टिकरहरू खोज्नका लागि किवर्डको प्रयोग गर्न सकिन्छ। स्टिकर ट्रे खोलेर “Birthday”, “Food”, वा “Mood” जस्ता शब्दहरू टाइप गरेर आफूलाई चाहिएको स्टिकर खोज्न सकिन्छ। GIPHY को प्रयोगले ट्रेन्डिङ GIF र नयाँ डिजाइन भएका स्टिकरहरूको विशाल संग्रहमा पहुँच प्रदान गर्छ। इन्स्टाग्राममा रहेका ‘Cutouts’ वा ‘Your Stickers’ फिचरमार्फत तपाईँले आफ्ना फोटोहरूलाई स्टिकरमा परिणत गर्न सक्नुहुन्छ।
सर्वोच्च अदालतले काठमाडौंका नदी किनार र सार्वजनिक स्थानमा बसोबास गर्दै आएका सुकुमवासी बस्तीहरू खाली गर्ने विषयमा दायर गरिएको रिट निवेदनमा कारण देखाउ आदेश जारी गरेको छ। न्यायाधीश शान्तिसिंह थापाको एकल इजलासले जिल्ला प्रशासन कार्यालय काठमाडौं र काठमाडौं महानगरपालिकालाई लिखित जवाफ दिनका लागि आदेश दिएको छ।
सर्वोच्च अदालतका प्रवक्ता अर्जुनप्रसाद कोइरालाका अनुसार, दुवै पक्षलाई छलफलका लागि यही वैशाख २२ मा बोलाउने आदेश गरिएको छ। गोपाल रन लगायत ११ जनाले यही वैशाख ११ गते सुकुमवासी बस्ती खाली गर्न लागिएको विरुद्ध रिट निवेदन दर्ता गरेका थिए।
काठमाडौंका नदी किनारका सुकुमवासी बस्तीहरू खाली गर्न जिल्ला प्रशासन कार्यालय र काठमाडौं महानगरपालिकाले सूचना जारी गरेपछि सो विरुद्ध रिट निवेदन दर्ता गरिएको हो। रिट निवेदनमा काठमाडौं उपत्यका तथा देशभरका नदी किनार वा अन्य कुनै स्थानका सुकुमवासी बस्तीका भूमिहीन परिवारहरूको पहिचान, प्रमाणीकरण र वैकल्पिक व्यवस्था नगरी कुनै पनि परिवारलाई हटाउने, उठाउने, विस्थापित गर्ने वा जबरजस्ती कुनै कारबाही नगर्न आग्रह गरिएको थियो।
चीनका प्रमुख औद्योगिक कम्पनीहरूको नाफा मार्च महिनामा ६ महिनादेखि सर्वाधिक स्तरमा पुगेको छ। इरान युद्धका कारण सिर्जित अवरोधहरूका बीच लामो समयसम्म दबाबमा रहेका ‘फ्याक्ट्री-गेट’ मूल्यमा आएको सुधारले यो वृद्धिलाई थप बल प्रदान गरेको छ। राष्ट्रिय तथ्याङ्क विभाग (एनबीएस) ले सोमबार सार्वजनिक गरेको तथ्याङ्क अनुसार वार्षिक २० मिलियन युआनभन्दा बढी राजस्व भएका ठूला औद्योगिक प्रतिष्ठानहरूको कुल नाफा गत महिना १५.८ प्रतिशतले वृद्धि भएको छ, जुन सेप्टेम्बरसम्मकै सबैभन्दा तीव्र वृद्धि दर हो। यस वर्षको पहिलो त्रैमासिकमा कुल नाफा १.६९६ ट्रिलियन युआन पुगेको छ, जुन विगत वर्षको सोही अवधिको तुलना गर्दा १५.५ प्रतिशतले बढी हो। गत वर्ष पहिलो त्रैमासिकमा नाफा वृद्धि दर केवल ०.८ प्रतिशतमा सीमित थियो।
उद्योगहरूबाट बाहिरिएको सामानको मूल्य मापन गर्ने ‘प्रोड्युसर प्राइस इन्डेक्स’मा तीन वर्षपछि पहिलो पटक मार्चमा सुधार देखिएको छ। अमेरिका-इजरायल र इरानबीचको युद्धले विश्वव्यापी रूपमा कमोडिटी मूल्य वृद्धि गरेपछि चीनका कारखानाले उत्पादन गर्ने सामानको मूल्य पनि उकालो लागेको छ। क्षेत्रीय रुपमा हेर्दा, उत्पादन (म्यानुफ्याक्चरिङ) क्षेत्रमा त्रैमासिक नाफा १९.१ प्रतिशतले वृद्धि भएको छ भने खानी (माइनिङ) क्षेत्रमा १६.२ प्रतिशत सुधार आएको छ। विशेषगरी आर्टिफिसियल इन्टेलिजेन्स र सेमिकन्डक्टर उद्योगमा देखिएको तीव्र प्रगतिले अप्टिकल-फाइबर उत्पादनमा ३३६.८ प्रतिशत र डिस्प्ले-डिभाइस उत्पादनमा ३६.३ प्रतिशतको अत्यधिक वृद्धि ल्याएको छ। त्यस्तै, कम्प्युटर र सञ्चार उपकरण उत्पादन गर्ने क्षेत्रमा नाफा १२० प्रतिशतले बढेको तथ्याङ्कले देखाएको छ। विश्लेषकहरूका अनुसार कम्पनीहरूको नाफा वृद्धिले राजस्व वृद्धिको तुलनामा धेरै तीव्रता प्रस्तुत गरेको छ, जसले तिनीहरूले आफ्नो कार्यक्षमता बढाएको वा लागत समायोजनबाट फाइदा लिएको संकेत गर्दछ। हङकङस्थित पिनपोइन्ट एसेट म्यानेजमेन्टका प्रमुख अर्थशास्त्री झाङ झिवेईले भने, ऊर्जा मूल्यको बढोत्तरी र कमजोर वैदेशिक मागले आउँदा महिनाहरूमा चीनको निर्यातमा दबाब सिर्जना गर्न सक्ने चेतावनी दिएका छन्।
अख्तियार दुरुपयोग अनुसन्धान आयोगले भेपभित्र लुकाइएको सुनको विषयमा प्रमुख भन्सार अधिकृत अम्बिकाप्रसाद खनालसहितका कर्मचारीमाथि भ्रष्टाचार मुद्दा चलाएको छ। प्रमुख भन्सार अधिकृत खनालले भेप साटिएको प्रतिवेदन तयार पारेका थिए, तर अख्तियारले उनलाई सूचना लुकाएको आरोप लगाएको छ। जिल्ला अदालतले सुन तस्करीमा संलग्नलाई दोषी ठहर गरेको छ र भन्सारका कर्मचारीहरूलाई सरकारी साक्षी बनाएको थियो। १४ वैशाख, काठमाडौं।
‘२०८० वैशाख १९ गते गोदामको नियमित निरीक्षण तथा मालवस्तु भेरिफिकेसन गर्दा सामानको प्रकृति अनुसार एउटै भेपको ठाँउमा फरक-फरक प्याकेजिङ सहितको मालवस्तु राखी सामान साटफेर भएको देखिएको। यसरी मालवस्तु किन र के उद्देश्यका साथ साटफेर भयो भनी कार्यालयले नासु रेवन्त खड्कासँग बुझ्न खोज्दा विभिन्न बाहनामा अनुपस्थित र सम्पर्क विहीन हुने गरेको। उक्त घटनाबारे प्रमुख भन्सार प्रशासनले नासुलाई कार्यालयमा तत्काल बोलाई सोधपुछ गर्न र औचित्यपूर्ण जवाफ प्राप्त हुन नसकेमा आवश्यक अनुसन्धानका लागि अनुसन्धानात्मक निकायमा जानकारी गराउन उचित हुने देखि यो प्रतिवेदन पेश गरेको छु।’ २५ वैशाख २०८० मा त्रिभुवन अन्तर्राष्ट्रिय भन्सार कार्यालयका प्रमुख भन्सार अधिकृत अम्बिकाप्रसाद खनालले तयार पारेको प्रतिवेदनको सारांश हो।
अख्तियारले खनाल लगायत केही भन्सारका कर्मचारीहरूमाथि आरोप लगाएको छ कि ‘भेपमा सुन लुकाएर ल्याइएको थाहा पाएपछि पनि सूचना लुकाएर उनीहरूले सुन तस्करीलाई सहयोग गरे।’ तर, सुन तस्करीमा नासु रेवन्त खड्का र कार्यालय सहयोगी निर्मलकुमार विक बाहेक अरु कर्मचारीको संलग्नतासम्बन्धी प्रमाणबिना नै अख्तियारले सबैजसो कर्मचारीहरूमाथि मुद्दा चलाएको हो। चार आरोप अख्तियार दुरुपयोग अनुसन्धान आयोगले विशेष अदालतमा पेश गरेको आरोपपत्रमा भन्सारका उपसचिव (प्रमुख भन्सार अधिकृत) अम्बिकाप्रसाद खनालमाथि तीनवटा आरोप लगाएको देखिन्छ।
अख्तियारको आरोपपत्रमा भनिएको छ, ‘उक्त कर्तूतबाट बच्ने बचाउने र सुन बेचेर खाने मनसायले दसी प्रमाण समेत नष्ट गरी गराएको देखिन्छ।’ तर, विशेष अदालतमा पेश भएको आरोपपत्रमा अख्तियारले आफ्नो दाबी अनुसारको प्रमाण पेश गरेको देखिँदैन। प्रमुख भन्सार अधिकृत अम्बिकाप्रसाद खनालमाथि कार्यालयमा प्राप्त सूचना बदनियतपूर्वक लुकाएको आरोप लगाएपछि जिल्ला र विशेष अदालतमा पेश भएका कागजातले खनालको प्रतिवेदनपछि मात्रै भेपभित्र सुन लुकाइएको तथ्य खुलेको देखिन्छ।
अख्तियारले खनालले प्रतिवेदन पेश गर्नुअघि नै भेपमा सुन लुकाइएको थियो भन्ने कागजात, प्रमाण वा अरु लिखित विवरण विशेष अदालतमा पेश गरेको छैन। सुन तस्करीबारे सुटकेस जाँचबुझ गर्ने र भेप साटिएको भनी प्रतिवेदन दिने प्रमुख भन्सार अधिकृत अम्बिकाप्रसाद खनालमाथि नै अख्तियारले अनुसन्धान थाल्यो। त्यसपछि उनले अख्तियारमा गएर, आफूलाई पुरस्कृत गर्नुपर्नेमा उल्टै मुद्दा चलेको भनेर अनुसन्धानमाथि प्रश्न उठाएका थिए।
‘प्रस्तुत मुद्दाको उठान नै भन्सार कार्यालयबाट गरी नेपाल सरकारलाई थप सम्भावित हानी हुनबाट रोक्ने प्रयास गरेको साथै कानूनको अधिनमा रही आफ्नो जिम्मेवारी तथा कर्तव्य पालना गरेको हो’ खनालले अख्तियारमा गएर बयानमा भनेका थिए, ‘मलाई कारवाहीको सट्टा थप हौसला उत्प्रेरणा वा पुरस्कारको व्यवस्था हुनुपर्ने मेरो बुझाई छ।’
पोखरा महानगरपालिकाले वैशाख ४ गते सार्वजनिक जग्गा अतिक्रमण गरी बसोबास गरेका सबैलाई ३५ दिनभित्र हट्न सूचना जारी गरेको छ। पोखरा बसपार्क र संस्थान क्षेत्रमा अव्यवस्थित बसोबासी र सुकुमबासीहरूको संरचना हटाउन डोजर चलाउने तयारी भइरहेको छ। राष्ट्रिय भूमि अधिकार मञ्च कास्कीले विस्थापन रोक्न ३५ सदस्यीय संघर्ष समिति गठन गरेको छ। १४ वैशाख, पोखरा। पोखरा महानगरका मेयर पदका उम्मेदवारहरूको मुख्य एजेन्डा मध्ये एक हो — अव्यवस्थित बसोबासी र सुकुमबासी व्यवस्थापन। र सदैव विवाद र चर्चामा रहने ठाउँ पनि हो — पोखरा बसपार्क। २०३१ सालमा अधिग्रहण गरिएको पोखरा बसपार्कको जग्गा अहिले अव्यवस्थित बसोबासी र सुकुमबासीले बनाएका संरचनाले भरिएको छ।
पृथ्वीचोकस्थित बसपार्कसँगै संस्थान क्षेत्रमा पनि अव्यवस्थित बसोबासी र सुकुमबासीले सार्वजनिक जमिन कब्जा गरी बसेको अवस्था छ। राजनीतिक दलका भातृ संगठन, मजदुर र वाईसीएल लगायतको नाममा पनि पोखरा उपत्यका नगर विकास समितिको जग्गा कब्जा गरी संरचना निर्माण गरिएको छ। कांग्रेस, एमाले र नेकपाभन्दा निकट रहेका मजदुर संगठनहरूले उक्त जग्गा कब्जा गरेर त्यसमा भाडामा लगाएर प्रयोग गरिरहेका छन्। देशमा भएको जनआन्दोलनपछि संस्थान क्षेत्रमा राजनीतिक दल निकट भातृ संगठनहरूले कब्जा गरेका संरचना हटाउन महानगरले पत्राचार गरेको थियो। तर पहिल्यैका प्रयासहरू असफल भएका जसरी महानगर नेतृत्वले पनि सफलता पाउन सकेको थिएन।
पोखरा महानगरपालिकाले वैशाख ३ गते कामकाजी समितिको निर्णयअनुसार वैशाख ४ गते सूचना जारी गर्यो। तर सूचना जारी भएको बाबजुद धेरैले अर्थै लगाएनन्। जब प्रधानमन्त्री बालेन्द्र शाहले अव्यवस्थित बसोबासी र सुकुमबासीलाई हटाउन डोजर चलाउन थाले, तब मात्र पोखरा नगर त्रसित भयो। वैशाख ४ गते महानगरले सार्वजनिक ऐलानी/पर्ति जग्गा, बिना अनुमति अतिक्रमण गरी लामो समयदेखि विभिन्न व्यक्तिहरू तथा संस्थाहरूले कब्जा गरेका संरचनाहरूलाई ३५ दिनभित्र हटाउन आह्वान गरेको छ। विभिन्न व्यक्तिहरू तथा संस्थाहरूले कार्यालय सञ्चालन, भाडामा लगाउने र पर्खाल लगाएर जग्गाभित्र्याएको जस्ता जनगुनासाहरू प्राप्त भएपछि महानगरले आफैं खाली गर्न र हटाउन सूचना जारी गरेको हो।
१४ वैशाख, नेपालगन्ज । नेपालगन्जमा पहिलो पटक आयोजना गरिएको स्ट्रिट फुड एन्ड बेभरेज फेस्टिभलमा दर्शकहरूको उत्साहजनक उपस्थिती देखिएको छ। होटल व्यवसायी संघ बाँके र होटल संघ नेपाल बाँके च्याप्टरले संयुक्त रूपमा यो फेस्टिभल संचालन गरेका थिए। फेस्टिभलमा दैनिक करिब १२ हजार दर्शकले सहभागी भई अवलोकन गरेका थिए। नेपालगन्जसहित बाँके जिल्लाको पर्यटन प्रवर्द्धन गर्ने उद्देश्यले यस कार्यक्रम आयोजना गरिएको आयोजकहरूले बताएका छन्।
पर्यटनिय स्थलहरूको प्रचार–प्रसार, स्थानीय परिकारको पहिचान र प्रवर्द्धन तथा होटल व्यवसायको विकास गर्ने लक्ष्यसहित फेस्टिभल सञ्चालन गरिएको थियो। स्वदेशी र छिमेकी भारतका पर्यटकहरूलाई लक्षित गरी आयोजना गरिएको यस फेस्टिभलमा स्ट्रिट फुडदेखि पाँच तारे होटलका विभिन्न स्वादिष्ट परिकारहरू एउटै स्थानमा प्रस्तुत गरिएका थिए। फेस्टिभलमा स्थानीय तहका परम्परागत र आधुनिक खानाका परिकार तथा पेयपदार्थहरू उपलब्ध गराइएका थिए।
यहाँ एउटै स्थानमा सेलरोटी, चिकेन थाई माम, बिरयानी, बँदिया भाले साँधेको, पिज्जा, सेकुवा, छोइला, ढिक्री, घोंगी, सातु, राबडी, सुशी, नवाबी कबाब लगायत सयौं परिकारहरू प्रस्तुत थिए। स्थानीय कला, संस्कृति र मनोरञ्जनात्मक कार्यक्रमहरू पनि चलिरहेका थिए। फेस्टिभलमा होटल तथा अन्य व्यापारिक प्रतिष्ठानका ५५ वटा स्टलहरू थिए। तीन दिनसम्म चल्ने यस फेस्टिभलमा करिब पाँच हजार भारतीय पर्यटकसहित कुल ३५ हजार दर्शकहरूले अवलोकन गरेका थिए, भनी होटल व्यवसायी संघ बाँकेका अध्यक्ष भीम कँडेलले जानकारी दिए।
नेपालगन्जको प्रचण्ड गर्मीका बीच साँझ ६ बजेदेखि राति ११ बजेसम्म सञ्चालन गरिएको यस फेस्टिभलमा पर्यटकहरूले निकै रमाइलो अनुभव गरेका छन्, भनी होटल संघ बाँकेका उपाध्यक्ष केशव न्यौपानेले बताए।
१४ वैशाख, काठमाडौं । भारतको राजस्थानको बाँसवाडा जिल्लाको टामलिया गाउँमा एक युवकको हत्या भएपछि उत्पन्न तनावले अर्को गाउँका करिब ३० घरमा आगजनी भएको छ। आइतबार घटेको यो घटनाले क्षेत्रभित्र क्रोध फैलिएको भारतीय सञ्चारमाध्यमहरूले जनाएका छन्। मृतक युवकका आक्रोशित आफन्तहरू त्यही गाउँबाट अर्को गाउँमा पुगेर करिब ३० घरमा आगो लगाएका थिए। यस आगजनीमा धेरै घरपालुवा जनावरहरू समेत जलेर मरेको जनाइएको छ।
घटनापछि प्रहरीले सुरक्षा कडा बनाएको छ र त्यसै दिन राति प्रहरीका कलेक्टर, एसपी लगायतका वरिष्ठ अधिकारी घटनास्थल पुगेर स्थिति नियन्त्रणमा लिएका छन्। टामलिया प्रहरी थानाका प्रभारी रमेश पाटिदारका अनुसार मृतक युवकका परिवारले दुई दर्जन भन्दा बढी व्यक्तिविरुद्ध हत्या आरोपमा जाहेरी दर्ता गराएका छन्। जाहेरीपछि मृतकको शव पोस्टमार्टमका लागि अस्पताल लगिएको छ।
प्रहरीका भनाइ अनुसार उक्त युवकको अर्को गाउँकी युवतीसँग प्रेम सम्बन्ध थियो र दुवै पक्षबीच यस सम्बन्धलाई लिएर विवाद चलिरहेको थियो। त्यही विवादकै क्रममा आइतबार युवकको हत्या भएको पुष्टि भएको छ।
आईफोन १७, आईफोन १७ प्रो र नयाँ आईफोन एयर मोडेलहरूमा ब्याट्री सकिएपछि फोन चार्जरमा जोड्दा तुरुन्तै अन नहुने समस्या देखिएको छ। प्रयोगकर्ताहरूले भोल्युम अप, डाउन र पावर बटन थिचेर फोर्स रिस्टार्ट गर्ने प्रयास गरे पनि समस्या समाधान नभएको उल्लेख गरिएको छ। म्यागसेफ वायरलेस चार्जर प्रयोग गर्दा फोन पुनः अन हुने र केही घण्टासम्म चार्जमा राख्दा फोन आफैं अन हुने उपायहरू सुझाइएको छ। १४ वैशाख, काठमाडौं। आईफोन १७, आईफोन १७ प्रो र नयाँ आईफोन एयर मोडेल प्रयोग गर्ने केही प्रयोगकर्ताहरूले ब्याट्री पूर्णतया सकिएपछि फोन बन्द भइसकेपछि चार्जरमा जोड्दा पनि तुरुन्तै फोन अन नहुनु वा स्क्रिन पूर्ण रूपमा कालो हुनु समस्या भोगिरहेका छन्।
मुख्य समस्याहरू:
चार्जिङ समस्या: सामान्यतया ब्याट्री सकिएको फोन चार्जरमा जोड्दा केही बेरमा ब्याट्री लोगो देखिनु आवश्यक हुन्छ, तर यी नयाँ मोडेलहरूमा केही मिनेटसम्म चार्ज गर्दा पनि कुनै प्रतिक्रिया नआएको रिपोर्ट गरिएको छ।
फोर्स रिस्टार्ट असफल: धेरै प्रयोगकर्ताले भोल्युम अप, डाउन र पावर बटन थिचेर फोर्स रिस्टार्ट गर्ने प्रयास गरे तर समस्या समाधान हुन सकेन।
सम्भावित कारण: यो समस्या सफ्टवेयर भित्रको भोल्टेज व्यवस्थापन वा ब्याट्री कन्ट्रोलमा रहेको त्रुटिका कारण हुन सक्ने अनुमान गरिएको छ, यद्यपि एप्पलले यसबारे आधिकारिक पुष्टि गरेको छैन।
यसलाई कसरी समाधान गर्ने?
यदि तपाईँको नयाँ आईफोनमा पनि यस्तै समस्या देखा परेमा निम्न दुई उपायहरू अपनाउन सकिन्छ:
म्यागसेफ चार्जरको प्रयोग: केबलमार्फत चार्ज नभएको अवस्थामा म्यागसेफ वायरलेस चार्जर प्रयोग गर्दा फोन पुनः अन हुने पाइएको छ। केही प्रयोगकर्ताहरूका अनुसार म्यागसेफमा राखेको करिब १५ मिनेटपछि फोनले प्रतिक्रिया दिन थाल्छ।
लामो समय चार्जमा राख्ने: केही प्रयोगकर्ताहरूले फोनलाई केही घण्टासम्म चार्जरमा छोड्दा फोन आफैं अन भएको बताएका छन्।
यो समस्या हाल केही सीमित प्रयोगकर्तामा मात्र देखिएको छ। यदि उपर्युक्त उपायहरूले काम गरेन भने एप्पल स्टोरमा गई प्राविधिक सहयोग लिनु उत्तम हुनेछ।
गुल्मीको इस्मा गाउँपालिकाले ९ वर्षपछि स्थायी केन्द्र चापटारीमा राख्ने निर्णय गरेको छ। गाउँ सभाको बैठकले सर्वसम्मत रूपमा केन्द्र तोकेपछि करिब ९ वर्षदेखि चलेको अन्योल अन्त्य भएको छ। गाउँपालिका अध्यक्ष भगतसिंह खड्काले यो निर्णय इस्माको समग्र विकासका लागि महत्वपूर्ण कोसेढुंगा भएको बताए। १४ वैशाख, गुल्मी।
गाउँपालिका केन्द्र चापटारीमा निर्माण गर्ने निर्णयले लामो समयदेखि चलेको विवाद टुंगो लागेको छ। इस्मा–५ चापटारीमा सम्पन्न गाउँ सभाको बैठकले सर्वसम्मत रूपमा केन्द्र तोक्ने निर्णय गरेपछि करिब ९ वर्षदेखि अन्योलमा रहेका विषयहरु समाप्त भएका हुन्। स्थानीय तह पुनर्संरचनापछि भाडाको संरचनाबाट सेवा सञ्चालन गर्दै आएको गाउँपालिकाले अब आफ्नै स्थायी प्रशासनिक केन्द्र निर्माण गर्ने बाटो खुलेको छ।
चापटारीमा गाउँपालिका केन्द्र बनाउने प्रस्ताव एमालेका पोमप्रसाद भुसालले पेस गरेका थिए भने नेपाली कांग्रेसका ढालबहादुर कुँवरले त्यसलाई समर्थन गरेका थिए। गाउँपालिका अध्यक्ष खड्काले अब आफ्नै प्रशासनिक भवन निर्माण गरी सेवा प्रवाहलाई अझ प्रभावकारी बनाउनेतर्फ केन्द्रित हुने बताएका छन्। गाउँपालिका उपाध्यक्ष पार्वती कुँवरले राजनीतिक मतभेदभन्दा माथि उठेर गरिएको सहमति इस्माको एकताको उदाहरण भएको बताइन्।
एसिया-प्रशान्त क्षेत्रमा २०२५ मा कुल सैन्य खर्च ६८१ अर्ब अमेरिकी डलर पुगेको छ, जुन अघिल्लो वर्षको तुलनामा ८.१ प्रतिशतले वृद्धि भएको छ। अमेरिकी राष्ट्रपति डोनाल्ड ट्रम्पको प्रशासनले सहयोगी राष्ट्रहरूलाई सुरक्षा बजेट वृद्धि गर्न दबाब दिएको र सुरक्षा प्रतिबद्धता सम्बन्धी चिन्ताले यस वृद्धिमा मुख्य भूमिका खेलेको देखिएको छ। विश्वव्यापी सैन्य खर्च २.८९ ट्रिलियन डलर पुगेको छ, जसमा अमेरिका, चीन र रूसले आधाभन्दा बढी हिस्सा ओगटेका छन्।
स्वीडेनस्थित थिंक ट्याङ्क ‘सिप्री’ ले सोमबार सार्वजनिक गरेको वार्षिक प्रतिवेदन अनुसार २०२५ मा यस क्षेत्रको कुल सैन्य खर्च ६८१ अर्ब अमेरिकी डलर पुगेको छ। यो खर्च अघिल्लो वर्षको तुलनामा ८.१ प्रतिशतले बढेको छ। ट्रम्प प्रशासनले आफ्ना सहयोगी राष्ट्रहरूलाई रक्षा बजेट वृद्धि गर्न दबाब दिएको र वासिङ्टनको सुरक्षा प्रतिबद्धतामा देखिएका शंकाले यस वृद्धिलाई प्रेरित गरेको देखिन्छ।
विश्वव्यापी रूपमा हेर्दा कुल सैन्य खर्च २.९ प्रतिशतले बढेर २.८९ ट्रिलियन डलर पुगेको छ, जुन लगातार एघारौं वर्षको वृद्धि हो। यसले विश्वव्यापी सैन्य भारलाई कुल घरेलु उत्पादनको २.५ प्रतिशतमा पुर्याएको छ, जुन सन् २००९ पछिको उच्च स्तर हो। विश्वको कुल सैन्य खर्चको आधाभन्दा बढी हिस्सा अमेरिका, चीन र रूसले ओगटेका छन्। यद्यपि, युक्रेनका लागि नयाँ सैन्य सहायता स्वीकृत नहुँदा अमेरिकाको सैन्य खर्चमा ७.५ प्रतिशतको गिरावट आएको र ९५४ अर्ब डलरमा सीमित भएको छ।
चीनले आफ्नो सैन्य खर्चमा ७.४ प्रतिशतले वृद्धि गर्दै ३३६ अर्ब डलर पु¥याएको छ, जुन लगातार ३१औं वर्षको वृद्धि हो। चीनले सन् २०३५ भित्र आफ्ना सेना पूर्ण रूपमा आधुनिकीकरण गर्ने लक्ष्य राखेको छ। खर्च वृद्धिको दरमा चीनलाई जापानले पछ्याएको छ, जसले चीन र उत्तर कोरियाको सुरक्षा चुनौतीलाई मध्यनजर गर्दै आफ्नो खर्च ९.७ प्रतिशतले बढाएर ६२.२ अर्ब डलर पु¥याएको छ। ताइवानले पनि चीनको बढ्दो सैन्य दबाबका बीच आफ्नो बजेटमा १४ प्रतिशतको उल्लेखनीय वृद्धि गर्दै १८.२ अर्ब डलर पु¥याएको छ, जुन सन् १९८८ यताकै सबैभन्दा ठूलो वृद्धि हो।
अष्ट्रेलिया, जापान र फिलिपिन्सजस्ता अमेरिकी सहयोगी राष्ट्रहरूले क्षेत्रीय तनाव र ट्रम्प प्रशासनको दबाबका कारण सैन्य बजेट वृद्धि गरेका छन्। ट्रम्पको नयाँ राष्ट्रिय सुरक्षा रणनीतिले पूर्वी तथा दक्षिण-पूर्वी एसियाका सहयोगीहरूलाई सामूहिक रक्षामा बढी खर्च गर्न र ताइवान कब्जा गर्ने कुनै प्रयासलाई रोक्न सक्ने क्षमता बनाउन आग्रह गरेको छ। युरोपमा पनि सैन्य खर्च १४ प्रतिशतले बढेर ८६४ अर्ब डलर पुगेको छ। नेटो सहयोगीहरूले सामूहिक रक्षाको भार विभाजन गर्नुपर्ने ट्रम्पको नीतिका कारण शीतयुद्धपछिको सबैभन्दा तीव्र वृद्धि भएको हो।
