१२ वैशाख, जनकपुरधाम। धनुषामा एउटा बसले ठक्कर दिँदा मोटरसाइकल चालकको मृत्यु भएको छ। मृतक महोत्तरीको पिपरा गाउँपालिका–७ का २१ वर्षीय अतुल चौधरी हुन्। शनिबार दिउँसो धनुषाको गणेशमान चारनाथ नगरपालिका–४ स्थित पूर्वपश्चिम लोकमार्गमा चितवनदेखि पूर्व गाईघाटतर्फ गइरहेको प्रदेश २–०३–००१ ख १०११ नम्बरको बसले विपरीत दिशाबाट आउँदै गरेको मधेश प्रदेश ०२–०१० प १२३७ नम्बरको मोटरसाइकललाई ठक्कर दिएको थियो।
दुर्घटनामा गम्भीर घाइते भएका चौधरीलाई उपचारका लागि प्रादेशिक अस्पताल जनकपुर लैजाँदै गर्दा चिकित्सकहरूले मृत घोषणा गरेका छन्, इलाका प्रहरी कार्यालय ढल्केबरले जानकारी दिएको छ। मोटरसाइकलमा पछाडि सवार महोत्तरीको जलेश्वर नगरपालिका–१ की २३ वर्षीया राघनी कुमारी महत्तो गम्भीर घाइते भएकी छन्। उनको जनकपुरस्थित न्युरो अस्पतालमा उपचार भइरहेको छ। बस र चालक बारा जितपुर सिमरा उपमहानगरपालिका–१४ का ३७ वर्षीय युवराज राईलाई प्रहरीले नियन्त्रणमा लिएर अनुसन्धान गरिरहेको छ।
आज देशका विभिन्न जिल्लामा भारी वर्षा भएको छ र लमजुङमा सबैभन्दा बढी ८७.४ मिलिमिटर वर्षा मापन गरिएको छ। जल तथा मौसम विज्ञान विभागले आजदेखि देशका धेरै क्षेत्रमा वर्षा हुने र तातो लहर कम हुने जानकारी दिएको छ। भोलि कोशी, मधेस, बागमती र गण्डकी प्रदेशमा मेघगर्जनसहित मध्यमसम्मको वर्षा र हिमपातको सम्भावना रहेको विभागले जनाएको छ।
१२ वैशाख, काठमाडौं। मौसममा आएको परिवर्तनसँगै आज देशका विभिन्न जिल्लामा भारी वर्षा भएको छ। जल तथा मौसम विज्ञान विभागका तथ्याङ्कअनुसार पछिल्लो १२ घण्टामा लमजुङ, रोल्पा, प्यूठान, काभ्रेपलाञ्चोकमा निकै भारी वर्षा मापन गरिएको छ। सबैभन्दा बढी लमजुङमा ८७.४ मिलिमिटर (धेरै भारी वर्षा नजिक) वर्षा भएको छ भने रोल्पामा ६५.२, प्यूठानमा ७४.६ र काभ्रेमा ६३.६ मिलिमिटर वर्षा (भारी वर्षा) भएको छ। त्यस्तै कास्कीमा ३३, गुल्मीमा ३७ र धनकुटामा ३७ मिलिमिटर वर्षा भएको छ।
विभागका मौसमविद् विनु महर्जनका अनुसार आजदेखि देशका धेरै ठाउँमा वर्षा हुने हुँदा तातो लहर कम हुने बताइन्छ। वर्षा बढेको र यो स्थिति अझै केही समय बढ्ने विभागले जनाएको छ। हाल नेपालमा पश्चिमी तथा स्थानीय हावाको आंशिक प्रभाव रहेको जानकारी विभागले दिएको छ। विभागका अनुसार भोलि आइतबार कोशी, मधेस, बागमती र गण्डकी प्रदेश तथा देशका हिमाली र पहाडी भू–भागमा सामान्यतया बादल लाग्ने र अरु भू–भागमा आंशिक बादल रहने छ।
कोशी, बागमती र गण्डकी प्रदेशका केही स्थान, मधेस प्रदेश तथा लुम्बिनी, कर्णाली र सुदूरपश्चिम प्रदेशका केही पहाडी र हिमाली भू–भागमा मेघगर्जन/चट्याङ सहित मध्यम तहको वर्षा वा हिमपातको सम्भावना रहेको छ। साथै लुम्बिनी प्रदेशको तराई भू–भागका केही स्थानमा पनि मेघगर्जनसहित वर्षा वा हिमपात हुन सक्ने बताइएको छ। यता लुम्बिनी र सुदूरपश्चिम प्रदेशका तराई भू–भागमा आज पनि तातोपन कायम रहने सम्भावना रहेको छ। विभागले आज साँझ मौसम बुलेटिन जारी गर्दै यो जानकारी दिएको छ।
१३ चैतमा ६० दिनभित्र भूमिहीन दलित, भूमिहीन सुकुमवासी र अव्यवस्थित बसोबासीको लगत संकलन र प्रमाणीकरण गरिसक्ने घोषणा गरेको सरकारले वैशाख १२ गते थापाथली, गैरीगाउँ र मनोहरा क्षेत्रको सुकुमवासी बस्ती खाली गराएको छ। संयुक्त राष्ट्रिय सुकुमवासी मोर्चाका उपाध्यक्ष पवन गुरुङ बस्ती उठाउँदा सरकारले मानवीय व्यवहार नगरेको बताउँछन्। लगत संकलन र प्रमाणीकरण गरेर पूर्व सूचना बिनै डोजर लगाएको भन्दै उनले आपत्ति जनाए। सरकारले भूमिहीनहरूलाई संविधान, भूमि ऐन २०२१ लगायतका कानुनी प्रावधान अनुसार व्यवस्थापन गर्नुपर्ने उनको माग छ।
उपाध्यक्ष पवन गुरुङसँग सन्त गाहा मगरले गरेको संवादको सम्पादित अंश: सरकारले बागमती र मनोहरा किनारका बस्ती खाली गराएको छ। यसलाई यहाँले कसरी हेर्नु भएको छ? विगतका सरकारले पनि भूमिहीन र दलित सुकुमवासीको समस्या समाधान गर्न आयोगहरू बनाएका थिए। ती आयोगहरू अहिले पनि अस्तित्वमा छन्। यदि सरकारले वास्तविक रूपमा भूमिहीनको व्यवस्थापन गर्छ भने म त्यसलाई सहर्ष स्वीकार गर्छु र सरकारलाई धन्यवाद दिन्छु। २०६६ सालअघि बसोबास गर्दै आएका व्यक्तिहरूलाई बसिरहेकै ठाउँमा वा जोखिममुक्त अन्य क्षेत्रमा व्यवस्थापन गर्ने कानुनी व्यवस्था छ। सरकारले प्रक्रिया पुर्याएर लालपुर्जा दिने व्यवस्था गरेमा हामी त्यसको स्वागत गर्नेछौं।
थापाथली, गैरीगाउँ र मनोहरा जस्ता क्षेत्रमा सरकारले माइकिङ गरी तत्काल सेल्टरको व्यवस्था गर्छौँ भनी बस्ती खाली गराएको छ। यसबारे तपाईँको धारणा के छ? यो प्रक्रिया धेरै अपुरो र त्रुटिपूर्ण छ। बस्ती भत्काउनु अघि वास्तविक सुकुमवासीको प्रमाणीकरण गर्नुपर्ने थियो। प्रमाणीकरणपछि उचित स्थानमा सारिएको भए त्यो कदम सफल र स्वागतयोग्य हुन्थ्यो। तर अहिलेको शैली अमानवीय छ। माइकिङ गरेर भोलिपल्टै प्रहरी घेरा हालेर उठीबास लगाउने कार्य भइरहेको छ। हतारमा सामान निकाल्दा मानिसका वस्तुहरू फुटेका र नष्ट भएका छन्। एउटा सामान्य सामान किन्न पनि पैसा लाग्छ, सरकारले यो बुझ्नुपर्छ। यस्तो व्यवहार न्यायसंगत छैन।
१२ वैशाख, ललितपुर । दक्षिण ललितपुरको महाङ्काल गाउँपालिकाले सामाजिक सुरक्षा भत्ता वितरणलाई अझ सहज, सरल र नागरिकमैत्री बनाउनका लागि लाभग्राहीको घरदैलोमै पुगेर भत्ता वितरण गर्ने कार्य शुरु गरेको छ। गाउँपालिकाकी उपाध्यक्ष डोल्मा माया गोलेका अनुसार ज्येष्ठ नागरिक, एकल महिला र शारीरिक रुपमा अशक्तता भएका व्यक्तिहरूको सहजताको लागि घरमै भत्ता वितरण गर्ने व्यवस्था लागू गरिएको छ।
‘हाम्रो पालिकाका धेरै वडाहरू टाढा र दुर्गम क्षेत्रमा अवस्थित छन्। ज्येष्ठ नागरिक, एकल महिला र अशक्तता भएका व्यक्तिहरूले पालिका केन्द्र गोटीखेलस्थित बैंकसम्म पुगेर भत्ता लिनुपर्ने बाध्यता अब समाप्त भएको छ। त्यसैले घरमै पुगेर सामाजिक सुरक्षा भत्ता वितरण गर्ने काम अघि बढाएका छौँ,’ उपाध्यक्ष गोलेले बताइन्। उनका अनुसार महाङ्काल गाउँपालिका–६ ठूलादुर्लाङबाट औपचारिक रूपमा यो सेवा सुरु गरिएको हो।
घरमै भत्ता पाएपछि ज्येष्ठ नागरिक, अशक्तता भएका व्यक्तिहरू र एकल महिलाहरूले खुशी व्यक्त गरेका छन्। पालिकाले भविष्यमा यो सेवा सबै वडामा विस्तार गर्ने तयारी गरेको जनाएको छ। साथै, उपाध्यक्ष गोलेले घुम्ती शिविरमार्फत नागरिकता सिफारिस, सामाजिक सुरक्षा सेवा तथा व्यक्तिगत घटना दर्ता लगायतका सेवा वडास्तरमै उपलब्ध गराइने जानकारी पनि दिइन्। ‘अब पालिकामा होइन, सेवा तपाईंको घरमै’ भन्ने नारासहित सेवा प्रवाहलाई थप प्रभावकारी र नागरिक केन्द्रित बनाउन यो अभियान निरन्तरता दिने गाउँपालिकाले जनाएको छ।
काठमाडौं महानगरपालिका–९ स्थित गैरीगाउँको नदी किनारमा रहेको सुकुमवासी बस्ती भत्काउन नेपाल प्रहरी, सशस्त्र प्रहरी बल र महानगर प्रहरीको संयुक्त टोली परिचालन गरिएको छ। सरकारको निर्देशनअनुसार सार्वजनिक स्थल अतिक्रमण गरी बनाइएका संरचनाहरू भत्काउने अभियान सुरु गरिएको हो।
आज दिउँसोदेखि त्यहाँ बस्तीहरू भत्काउन नेपाल प्रहरी, सशस्त्र प्रहरी बल र काठमाडौं महानगर प्रहरीको संयुक्त टोली परिचालन गरिएको छ। जिल्ला प्रहरी परिसर काठमाडौंका प्रवक्ता तथा प्रहरी उपरीक्षक पवनकुमार भट्टराईले सुरक्षाकर्मीहरूको ठूलो उपस्थितिमा बस्तीका अस्थायी र स्थायी संरचना हटाउने काम भइरहेको जानकारी दिए।
आजै बिहान थापाथलीस्थित बागमती नदी किनारका सुकुमवासी बस्ती पनि खाली गराइएको थियो।
काठमाडौं उपत्यकाको मनोहरा नदी किनार क्षेत्रमा सीमाना नाघेका संरचना भत्काउन लागेको डोजरमाथि ढुंगामुढा गरिएको छ। यस घटनामा सशस्त्र प्रहरी र नेपाल प्रहरीका करिब एक दर्जन कर्मचारी घाइते भएका छन्, जसको अवस्था सामान्य रहेको प्रहरीले जनाएको छ। प्रहरीले आजको काम रोक्दै फर्किएको छ र स्थानीयले भोलि भत्काउन आग्रह गरेका थिए। १२ वैशाख, काठमाडौं।
शनिबार बिहानदेखि नै नदी किनारका बस्तीहरूमा बनेका संरचना हटाउने कार्य सुरू गरिएको थियो र साँझमा मनोहरास्थित नदी किनार पुगेको थियो। त्यस क्रममा संरचना भत्काउन लागेको डोजरमाथि एक समूहका युवाहरूले ढुंगामुढा गरेका थिए, प्रहरी स्रोतले जानकारी दिएको छ। ढुंगामुढा हुँदा सशस्त्र प्रहरी र नेपाल प्रहरीका करिब एक दर्जन कर्मचारी घाइते भएका छन्। स्थानियहरुले आज भत्काउन नदिएर भोलि भत्काउन अनुरोध गरेका थिए। एक प्रहरी अधिकारीका अनुसार, मादक पदार्थ सेवन गरेर हिंडेको समूहले उत्तेजित भई आक्रमण गरेको हो।
सरकारले १२ वैशाखदेखि काठमाडौंका सुकुमवासी बस्तीहरूमा रहेका संरचनाहरू हटाउन सुरु गरेको छ। थापाथलीस्थित बागमती नदी किनारमा संरचना भत्काउने क्रममा खानेपानीको पाइप फुटेपछि बालाजु, माइतीघर र एकान्तकुरामा पानी आपूर्ति अवरुद्ध भएको छ। नेपाल प्रहरी, नगरपालिका प्रहरी र सशस्त्र प्रहरीको टोलीले सुकुमवासीलार्ई सुरक्षित स्थानमा सारिरहेको छ।
१२ वैशाख, काठमाडौं। सरकारले आज (शनिबार)देखि काठमाडौंका सुकुमवासी बस्तीमा रहेका संरचनाहरू हटाउन सुरु गरेको छ। बिहानैदेखि थापाथलीस्थित बागमती नदी किनारमा बनेका संरचनाहरू भत्काउन थालिएको छ। सरकारले बस्तीका स्थानीयलाई सुरक्षित स्थानमा सार्ने कार्य अघि बढाएको छ। विशेष गरी शान्तिनगर, गैह्रीगाउँ, मनोहरा लगायतका क्षेत्रमा रहेका सुकुमवासीहरूलाई आज र भोलि हटाउने प्रक्रिया अगाडि बढाइएको छ।
त्यसै क्रममा, थापाथलीस्थित बागमती नदी किनारमा सुकुमवासी बस्ती भत्काउने क्रममा खानेपानीको पाइप फुटेको छ। पाइप मर्मत गर्न आवश्यक भएकाले बालाजु, माइतीघर र एकान्तकुरामा पानी आपूर्ति अस्थायी रूपमा बन्द गरिएको छ। काठमाडौं उपत्यका खानेपानी लिमिटेडका प्रवक्ता प्रकाशकुमार रायले तीन स्थानमा भल्भ बन्द गरी पाइप मर्मत गरिने जानकारी दिनुभएको छ।
नेपाल प्रहरी, नगरपालिका प्रहरी र सशस्त्र प्रहरीको टोलीहरूले स्थानान्तरण कार्यमा सक्रिय रहि सहयोग गरिरहेका छन्। सरकारको बस्ती हटाउने घोषणा पछि केही सुकुमवासिले आक्रोश व्यक्त गरेका थिए, तर शुक्रबारदेखि बस्ती खाली गर्न सुरु गरेका थिए। शनिबार बिहानसम्म थापाथलीका अधिकांश सुकुमवासी बस्ती खाली गरिसकेका छन्। प्रहरी र नगरपालिका प्रहरी दुवैले उनीहरूलाई स्थानान्तरणमा सहयोग गरिरहेका छन्। बिहानदेखि थापाथली क्षेत्रमा डोजरले काम गरिरहेको छ। गैह्रीगाउँ र मनोहरा क्षेत्रमा पनि बस्ती खाली गराउने कार्य धमाधम जारी छ।
१२ वैशाख, काभ्रेपलाञ्चोक। अविरल वर्षाका कारण उच्च जोखिम बढेपछि बीपी राजमार्ग पूर्ण रूपमा बन्द गरिएको छ। राजमार्गका विभिन्न स्थानमा डाइभर्सन बगाएको र लेदो (माटो–पहिरो) खस्दा सवारी साधनहरू बाटोमै रोकिएका छन् भनी प्रहरीले जानकारी दिएको छ। बीपी राजमार्गको काभ्रेपलाञ्चोक खण्ड तथा सिन्धुलीको आँपघारी क्षेत्रका विभिन्न स्थानमा डाइभर्सन बगाएको विवरण इलाका प्रहरी कार्यालय मंगलटारका प्रमुख प्रहरी निरीक्षक ईश्वर कार्कीले दिएका छन्।
उनका अनुसार रोशी खोलाले चौकीडाँडा, घुमाउने, चारसय बेँसी, गिम्दी बेँसी, नार्के, चिउरीबास, कालढुंगा तथा माम्तीमा अस्थायी डाइभर्सन बगाएको छ। सिन्धुलीतर्फ आँपघारी क्षेत्रमा पनि डाइभर्सन बगाएको छ। अत्यधिक वर्षाका कारण रातिको समयमा थप जोखिम हुन सक्ने भएकाले सवारी साधनहरू रोकिएका छन्। जिल्ला प्रहरी कार्यालय काभ्रेका प्रमुख एसपी कोमल शाहले राजमार्गका डाइभर्सन बगेका छन्, विभिन्न ठाउँमा पहिरो जान सक्ने तथा ढुंगा खस्ने जोखिम बढेकाले सवारी आवागमन पूर्ण रूपमा बन्द गर्ने निर्णय गरिएको जानकारी गराएका छन्।
हाल काभ्रेको मंगलटार, भकुन्डे, काभ्रेभञ्ज्याङ र धुलिखेल, साथै सिन्धुलीको नेपाल थोक र खुर्कोट क्षेत्रमा सयौं सवारी साधनहरू रोकिएका छन्। मौसममा सुधार आएर सडक सुरक्षा सुनिश्चित नहुँदासम्म सवारी आवागमन रोकिने प्रहरीको भनाइ छ। यस सम्बन्धमा अर्को सूचना पछि जारी गरिनेछ। यात्री तथा सवारी चालकहरूलाई अनावश्यक यात्रा नगर्न, सुरक्षित स्थानमा बस्न र सम्भव भएसम्म वैकल्पिक मार्ग प्रयोग गर्न अनुरोध गरिएको छ।
थप जानकारीका लागि नेपाल प्रहरीको १०० र ट्राफिक प्रहरीको १०३ नम्बरमा सम्पर्क गर्न सकिने जनाएको छ। त्यस्तै, बाटोमै रोकिएका यात्रुहरुलाई प्रचलित मूल्यभन्दा महँगोमा उपभोग्य सामग्री नबेच्न राजमार्ग क्षेत्रका पसल सञ्चालक र होटेलहरुलाई प्रहरीले सुझाव दिएको छ। एसपी शाहले विपद्का बेला अलपत्र यात्रुलाई सहयोग गर्ने सट्टा कालोबजारी गर्नेलाई कारबाही गरिने र यस्तो गतिविधि देखिएमा तुरुन्त प्रहरीको हटलाइन नम्बर १०० मा सम्पर्क गर्न आग्रह गरेका छन्।
शंखरापुर नगरपालिकाको कात्तिके क्षेत्रमा स्थानीय बासिन्दाले साँझदेखि टिपर रोक्न सुरु गरेका छन् र रातभर जागेर बाटो बन्द गरेका छन्। स्थानीयले टिपरहरूलाई वैकल्पिक मार्ग प्रयोग गर्न सुझाएका छन् र तीन पटक सचेत गराएपनि अटेर गरे कारबाही गरिने नगरपालिकाले जानकारी दिएको छ। नगर प्रमुख रमेश नापितले बाटो साँघुरो र पुल साना भएकाले टिपरलाई रोकिएको र एसियाली विकास बैंकको सहयोगमा सडक निर्माण गरिएको बताए। १२ वैशाख, काठमाडौं।
‘बाटो बन्द छ है हजुर, टिपर फर्काउनुहोस्। जबर्जस्ती नगर्नुहोस्। तपाईंलाई होइन, टिपरलाई रोकेको छौं,’ बुधबार राति साढे ११ बजे शंखरापुर नगरपालिकाको वडा नम्बर ३ र ५ को सिमानामा पर्ने कात्तिकेका स्थानीयहरूले टिपर रोके। स्थानीय सनबहादुर पाख्रिन र रसली तामाङलगायत ५–६ जनाको टोली राति जागेर बसेको थियो। लहरै टिपरहरू आए। उनीहरूले बाटो छेकेर अगाडि बढ्न दिएनन्। जुन बाटो आएका थिए ती टिपरलाई त्यही बाटो फिर्ता पठाए।
‘यहाँ आउन पाइँदैन भन्ने थाहा छैन? थाहा पाएर पनि किन आएको?’ रसलीले चालकलाई प्रश्न गरिन्। अर्को पटक नआउने गरी एक पटक जान चालकर्ताले अनुरोध गरे। केही चालकले ठेकेदारलाई फोन पनि गरे। तर स्थानीयले टिपरलाई अगाडि बढ्न दिएनन्। ‘अँह हुँदैन। जो कसैको फोन होस्, हुँदै हुँदैन। हामी रातभर नसुतेर बसेका छौं,’ रसली बाटो छोड्न तयार भइनन्। साँखुबाट ७ किलोमिटरको दूरीमा पर्ने कात्तिकेबाट काभ्रेपलाञ्चोकको सिपाघाट, भक्तपुरको नगरकोट, र सिन्धुपाल्चोकको मेलम्चीतर्फ जानका लागि चालकहरूले साँखु–कात्तिके सडकखण्ड रोजेका छन्।
चालकहरूले वैकल्पिक बाटोबाट जान पाउनु पर्ने माग गरेका थिए। तर रातभर जागा बसेका स्थानीयहरू तिनीहरूको यो माग मान्न तयार भएनन्। ‘जबरजस्ती नगर्नुहोस्। नगरमा पठायौं, ट्राफिक प्रहरी बोलायौं भने झन् समस्या बढ्न सक्छ,’ पाख्रिनले टिपर चालकलाई सचेत गराए। जहरसिंहपौवा र भक्तपुर हुँदै नगरकोटबाट जान स्थानीयहरूले सुझाएका थिए। अन्ततः चालकहरू टिपर फर्काउन बाध्य भए। तीन पटकसम्म सचेत गराइयो र त्यसपछि पनि अटेर गरे कारबाहीका लागि नगरमा पठाइने गरेको बताए पाख्रिनले।
टिपर रोक्न स्थानीयहरूले क्रमिक रूपमा राति सडकमा बसेर पहरा बहन गरिरहेका छन्। ‘आज हाम्रो पालो हो। भोलि अर्को टोली बस्नेछ। मिलेर बसिरहेका छौं,’ उनले भने। यसरी रातभर जागेर बस्न थालेपछि टिपरहरूको संख्या घट्न थालेको छ। ‘पहिले डेढ देखि २०० को हाराहारीमा टिपर आउँथे। अहिले ८-१० वटा मात्र आउने गरेका छन्,’ उनले भने, ‘घर थर्किने गरी टिपरहरू आउँछन्। रातभर सुत्न नसक्ने हुँदा हामीले आलोपालो गरेर रातभर सडकमै बस्न थालेका छौं।’ दिउँसोको समयमा पनि स्थानीयहरूले उक्त क्षेत्रमा टिपर प्रवेशमा रोक लगाएका छन्।
चुनाव अघि दुई हप्ता नगर प्रहरीहरूले निगरानी गरेका थिए। तर नगर प्रहरी नआएपछि स्थानीयहरू आफैं रातभर जागेर बस्न थालेका हुन्। शंखरापुर नगरपालिका प्रमुख रमेश नापितका अनुसार साँखुदेखि कात्तिकेसम्मको बाटो साँघुरो भएका कारण टिपरलाई रोक लगाइएको हो। ‘बाटो साँघुरो छ। पुलहरू साना छन्। त्यसकारण टिपरलाई यो बाटोमा चल्न दिइएको छैन,’ उनले भने। ‘दुर्घटनाको जोखिम पनि छ। पारवहन क्षमताभन्दा ठूलो गाडी भएकाले हो।’ नगर प्रमुख नापितका अनुसार एसियाली विकास बैंक (एडीबी) को सहयोगमा सडक निर्माण गरिएको हो। ‘धेरै पुरानो सडक हो। पहिले गोरेटो मात्र थियो। ६–७ वर्षअघि पिच गरिएको हो,’ उनले बताए। पर्यटकीय क्षेत्रमा पर्ने कात्तिकेमा अहिले आन्तरिक तथा बाह्य पर्यटकहरू आउने थालेका छन्। तर टिपरका कारण यहाँ समस्या भएको गुनासो उनीहरूको छ। ‘सरकारले नै टिपरहरूको लागि वैकल्पिक व्यवस्था गरे हुन्थ्यो, रातभर हामी जाग्नुपर्ने थिएन,’ स्थानीयहरूले दीर्घकालीन समाधानको माग गरेका छन्।
१२ वैशाख, काठमाडौं । रास्वपा सांसद विश्वराज पोखरेलले आफ्नो गृह जिल्लाका एक प्रधानाध्यापकमाथि देखाएको व्यवहारप्रति नेपाल शिक्षक महासंघले कडा निन्दा जनाएको छ । शनिबार महासंघका अध्यक्ष लक्ष्मीकिशोर सुवेदी र महासचिव तुलाबहादुर थापाले एक विज्ञप्ति जारी गर्दै विद्यालयभित्र पसेर प्रधानाध्यापकमाथि गरिएको व्यवहारको घोर निन्दा गरेका छन् ।
‘माननीय विश्वराज पोखरेलले २०८३ वैशाख १० गते श्री चण्डेश्वरी मावि, सिजिदेम्बा–२, ओखलढुंगाका प्रधानाध्यापक सन्तबहादुर मगरमाथि देखाएको धम्कीपूर्ण र अपमानजनक व्यवहारप्रति हाम्रो ध्यानाकर्षण भएको छ,’ विज्ञप्तिमा भनिएको छ, ‘हरेक पदाधिकारीको आफ्नो पदीय जिम्मेवारी र क्षेत्राधिकार हुन्छ । यस्ता कुरा बिर्सिएर माननीय पोखरेलले विद्यालयभित्र प्रधानाध्यापकमाथि गरेको अशोभनीय व्यवहारले शैक्षिक क्षेत्रको गरिमा र स्वतन्त्रतामाथि गम्भीर चोट पुर्याएको छ भने जननिर्वाचित प्रतिनिधिको गरिमा र विश्वाससमेत ह्रास भएको हाम्रो ठहर छ ।’
उक्त घटनाको तीव्र निन्दा गर्दै शिक्षक महासंघले शिक्षा क्षेत्रको मर्यादा र स्वायत्ततालाई सम्मान गर्न सबैलाई आग्रह गर्दै भविष्यमा यस्ता अभद्र व्यवहार नगर्न चेतावनी दिएको छ ।
शनिबार थापाथलीस्थित सुकुमवासी बस्ती सुरक्षाकर्मीको उपस्थितिमा डोजरले भत्काइयो र बस्तीबासीहरू आफ्नो सामान निकाल्न बाध्य भए। सरकारले पर्याप्त सूचना नदिँदा बस्तीबासीहरूमा अन्योल र चिन्ता उत्पन्न भयो जसले व्यवस्थापनमा समस्या ल्यायो। डोजरले पानी पाइप फुटाउँदा सामान भिजे र बस्तीबासीहरू रोइरहेका थिए। प्रहरीले माइकिङ गरी सामान सुरक्षित भएको जानकारी गरायो। १२ वैशाख, काठमाडौं। शनिबार झरी झम्को परेको मौसममा सुरक्षाकर्मीहरू बाक्लो रूपमा उपस्थित थिए। थापाथलीस्थित सुकुमवासी बस्ती सुरक्षाकर्मीहरूले घेरेका थिए। नेपाल प्रहरी, सशस्त्र प्रहरी र कहिलेकाहीं नेपाली सेनाका गाडीले बस्तीलाई सतर्क गराइरहेका थिए। सुरक्षाकर्मीको भीडबीच बस्तीबासीहरू आफ्नो सामान निकाल्ने व्यस्ततामा थिए। उनीहरूले आफ्ना छाप्रोका जस्तापाता र दुःखजिला जोडेका केही वस्तुहरू जोगाउनु ठूलो कुरा थियो। त्यसैले ती वस्तुहरू घरबाहिर निकालिरहेका थिए।
पहिले पटकपटक बस्ती हटाउन खोज्दा झडप भए पनि शनिबार त्यस्तो अवस्था देखिएन। मानिसहरूले आक्रोश कम र करुणा बढी देखाए। सरकारी सुरक्षा संयन्त्रसामु उनी निर्बल बनेर आदेश मानिरहेका थिए। हतियारधारी सरकारी संयन्त्रसँग भिड्ने ताकत थिएन, न त सामाजिक सञ्जालमा अपमानजनक प्रश्नहरूसँग लड्ने हिम्मत। बस्तीबासीहरूले प्रहरीको सहयोगलाई ‘सहयोग’ भन्दा पनि ‘निकाल्नको हतार’को रूपमा लिइरहेका थिए। ‘के को सहयोग हुन्छ? हामी केही नभएकाहरूलाई कहिले निकाल्ने भन्ने हतार छ, अनि सहयोग गर्दैनन्? यति ख्याल राख्ने भए यति आतंकपूर्ण शैलीमा हतारहतार निकाल्थे?’ बस्तीका शैलेन्द्र पासवानले भने।
बस्तीबासीले रुँदै आफ्नो लामो समय बसेको ठाउँ छोड्दै गर्दा बिहान करिब साढे आठ बजे स्काभेटर बस्तीभित्र प्रवेश गर्यो। त्यसअघि सडकबाट देखिने संरचना भत्काइरहेको प्रशासनले अब बस्तीभित्रै प्रवेश गरी संरचना खाली गर्न सुरु गर्यो। प्रहरीले समेत सामान सार्न सहायता गरिरहेको दृश्य देखियो। शंखमूल र प्रसूति गृह गरी दुईतिरबाट डोजर चलिरहेको बेला सुकुमवासीहरू आफ्नो भत्कँदै गरेको छाप्रो हेर्दै सामानको चिन्ता र रोइरहेको दृश्य अत्यन्तै दुःखद थियो। करिब ९ बजे देखापरेकी चार महिनाकी आमा अन्जली पासवान आफ्नो बच्चा कोक्रोमा झुलाइरहेकी थिइन्। उनका अनुसार, उनीहरूको परिवार यहाँ २० वर्षदेखि बस्दै आएको छ।
२० वर्षको स्मृतिमाथि सरकारी डोजर चलिरहेको बेला उनको चार महिनाको बच्चा कोक्रोमा झुलिरहेको थियो। छाप्रो भत्कँदै गरेको देख्नु सजिलो थिएन। साथै, ‘सरकारले कहाँ लग्ने भनेर थाहा पाउने अवस्था थिएन’, अन्जलीले भनिन्। ‘अचानक सूचना दिएर बस्ती भत्काउन आयो। अब कहाँ लैजान्छन् थाहा छैन। व्यवस्था गर्छौँ भनेको छ, तर कहाँ लगाउने हो थाहा छैन,’ अन्जली थपिन। यसले सरकार र बस्तीबासीबीच पर्याप्त छलफल नभएको देखाउँछ। सरकारले व्यवस्थापनका उपाय गरे तापनि बस्तीबासीहरूले पर्याप्त जानकारी नपाएपछि तनावमा थिए। करिब ९ बज्ने बेला डोजरले पानी पाइप फुटायो। पानी चुहिएर सामान भिज्यो। यसले बस्तीबासीहरूलाई थप चिन्तित तुल्यायो। उनीहरू आक्रोशित भए तापनि प्रकट गर्न सकेनन्। आक्रोशसँगै आँसु पनि बगे। कतिपय बृद्धबृद्धाहरू वर्षौंदेखिको सम्झना मेटिँदै गर्दा दुःखी देखिए।
सरकार बस्ती भत्काइरहँदा कतिपय रोइरहेका, कतिपय निरीह भएर सामान हटाइरहेका र कतिपय खुला आकाशमुनि खाना पकाइरहेका देखिन्थ्यो। अधिकांशले सरकारी व्यवस्थापनबारे पर्याप्त सूचना नपाएको गुनासो गरे। कोही त कोठा खोजेर स्वाभिमानसँग बाँच्न इच्छुक थिए। ‘हामीले कसरी लड्ने? यत्रो प्रहरी र डोजरसँग हाम्रो के तागत? दुःख सहन्छौं, दुःखसुखसँगै बाँच्ने हो। सरकारले अपमानजनक तरिकाले निकाल्छ, समाजले पनि तुच्छ ठानेर गाली गर्छ भने त्यो व्यवस्थापन हो?’ स्थानीय जंगबहादुर मगरले भने। सरकारले थापाथली बस्तीलाई शान्तिपूर्ण तरिकाले भत्काएको दाबी गरेको छ। अहिले त्यहाँका डोजर गौरीगाउँमा रहेको सुकुमवासी बस्तीतर्फ लागेका छन्। मनोहरामा रहेको सुकुमवासी बस्तीमा पनि टहरा भत्काउन डोजर चलिरहेका छन्।
१२ वैशाख, गोरखा। गोरखा नगरपालिका–११ रानादी टोलमा सिंगुसको आक्रमणको घटनामा १० जना बढी घाइते भएका छन्। दुई दिनको अन्तरालमा सिंगुसले १० जनाभन्दा बढीलाई टोकिएको स्थानीयहरूको जानकारी छ। घाइतेमध्ये केही प्रदेश अस्पताल गोरखामा उपचाररत छन् भने केहिले उपचारपछि घर फर्किरहेका छन्। उपचारपछि घर फर्केका स्थानीय कुमार अम्गाईका अनुसार सो टोलमा अहिले सिंगुस आतंक चलिरहेको छ। तेह्रकिलोबाट छेवेटार जाने सडकमा आवतजावत गर्ने व्यक्तिहरूलाई सिंगुस समूहमा आक्रमण गर्ने गरेको उनले बताए।
‘मेरो घरमा नै तीन जनालाई टोक्यो,’ उनले भने, ‘छिमेकीहरू र उक्त बाटोमा हिँड्नेहरूलाई पनि टोकेको छ।’ विशेष गरी मोटरसाइकल चालकहरूलाई सिंगुसले आक्रमण गर्ने गरेको उनले सुनाए। ‘हिजो एक जनाले स्कुटर चढेर आइरहेका बेला यहाँ पुगेपछि सिंगुसले टोकेर स्कुटर लडाउनुभयो, के भयो भनेर हेर्न गएको बेला हामीलाई पनि टोक्यो,’ अम्गाईले बताए। उक्त बाटो हुँदै आवतजावत गर्ने सबैलाई सिंगुस समूह बनाएर आक्रमण गर्ने गरेको उनले थपे।
सिंगुस आतंकका कारण सो क्षेत्रमा स्थानीय त्रसित छन्। घरभित्र बस्नसमेत डर लाग्ने अवस्था सिर्जना भएको भन्दै उनीहरू चिन्तित छन्। ‘कहाँबाट आयो थाहा छैन, गोलो कहाँ छ त्यो पनि फेला परेको छैन,’ अम्गाईले बताए। प्रहरीलाई जानकारी गराए पनि उनीहरूले ध्यान नदिएको उनको गुनासो छ। समस्या समाधानका लागि उनीहरूले वन कार्यालय र प्रशासनलाई अनुरोध गरेका छन्।
काठमाडौँ स्पोर्ट्स एन्ड इभेन्ट्सले वैशाख १३ देखि १६ गतेसम्म तल्लो मुलपानी क्रिकेट मैदानमा कर्पोरेट टी–१० लिग आयोजना गर्ने तयारी सफलतापूर्वक पूरा गरेको छ। प्रतियोगितामा एनसेल, क्लाउडफ्याक्ट्री, सिप्रदी, आईसीएफसी फाइनान्स, सुबिसु र टेक्स्पायर कलेजका ६ कर्पोरेट टोलीहरू भाग लिन लागेका छन्। १२ वैशाख, काठमाडौं। काठमाडौँ स्पोर्ट्स एन्ड इभेन्ट्सद्वारा आयोजना हुन लागेको कर्पोरेट टी–१० लिगको तयारी अब पूर्ण अवस्थामा पुगेको आयोजकले शनिबार काठमाडौंमा पत्रकार सम्मेलनमार्फत जानकारी दिएका छन्। प्रतियोगिता वैशाख १३ देखि १६ गतेसम्म तल्लो मुलपानी क्रिकेट मैदानमा हुने बताइएको छ।
कर्पोरेट टी–१० लिगमा सहभागिता जनाउन लागेका प्रतिष्ठित ६ टोलीमा एनसेल, क्लाउडफ्याक्ट्री, सिप्रदी, आईसीएफसी फाइनान्स, सुबिसु र टेक्स्पायर कलेज रहेका छन्। सम्मेलनमा मुख्य प्रायोजक टेक्स्पायर कलेजका सीईओ तथा प्रिन्सिपल लक्ष्मण पोखरेलले कर्पोरेट टी–१० लिग आयोजना गर्नु कलेजका लागि गौरवको विषय भएको उल्लेख गर्दै कर्पोरेट क्षेत्र र खेलकुदबीच सहकार्य अझ सुदृढ गर्न प्रतियोगिता आयोजना गरिएको बताए। उनले आगामी दिनमा यस्ता कार्यक्रमलाई निरन्तरता दिंदै युवाहरूमा खेलकुदप्रति प्रेरणा जगाउने प्रतिबद्धता पनि व्यक्त गरे।
कर्पोरेट टी–१० का प्राविधिक निर्देशक रविन्द्र गुप्ताले प्रतियोगितालाई प्राविधिक हिसाबले उत्कृष्ट, व्यवस्थित र निष्पक्ष बनाउन पूर्ण प्रतिबद्धता जनाए। उनले खेल मैदानको तयारीदेखि लिएर अम्पायरिङ, स्कोरिङ र समग्र खेल सञ्चालनलाई व्यवस्थित तरिकाले अघि बढाइने जानकारी दिए। गुप्ताले कर्पोरेट टी–१० ले खेलकुदको स्तर उकास्नुका साथै खेलाडीहरूमा अनुशासन र प्रतिस्पर्धात्मक सोच विकास गर्न महत्त्वपूर्ण भूमिका खेल्ने बताए। टुर्नामेन्ट निर्देशक ज्योति भण्डारीले प्रतियोगितालाई सफल, व्यवस्थित र स्मरणीय बनाउन आफू प्रतिबद्ध रहेको बताए।
पत्रकार सम्मेलनमा लिगको फेस अफ कर्पोरेट टी–१० महिला राष्ट्रिय क्रिकेटर खुसी डंगोलले खेलप्रति लगाव र सहभागिता बढाउन यस्ता प्लेटफर्महरू अत्यन्तै आवश्यक रहेको व्यक्त गरिन्। यसले महिला तथा पुरुष दुवै खेलाडीहरूमा प्रेरणा प्रदान गर्ने धारणा उनले राखिन्। प्रतियोगिताको मुख्य प्रायोजन टेक्स्पायर कलेजले गरेको छ भने इनर्जी पार्टनर एक्सट्रिम इनर्जी ड्रिंक, बैंकिङ पार्टनर आईसीएफसी फाइनान्स, इन्टरनेट पार्टनर सुबिसु, हस्पिटालिटी पार्टनर अनमोल बैंक्वेट, मेडिकल पार्टनर होप हस्पिटल, ब्रॉडकास्ट पार्टनर काष्ठमण्डप टेलिभिजन, ट्राभल पार्टनर बुद्ध इन्टरनेशनल रहेका छन्। साथै माया ग्रुप, नेपाली राइनोज र द वन्डरल्यान्डले पनि सहयोग गरेका छन्। आज आयोजित पत्रकार सम्मेलनमा टिम जर्सी र ट्रफी पनि सार्वजनिक गरिएको थियो। कर्पोरेट टी–१० लिग वैशाख १३ देखि १६ गतेसम्म काठमाडौंको तल्लो मुलपानी क्रिकेट मैदानमा सञ्चालन हुनेछ।
रेडबुल दशौँ पीएम कप एनभीएका महिला र पुरुष भलिबल लिग २०८३ मा शनिबार नेपाल पुलिस क्लबका दुवै टोलीले लगातार दोस्रो जित हासिल गरेका छन्। पुरुषतर्फ नेपाल पुलिस क्लबले नेपाल एपीएफ क्लबलाई पराजित गरेको छ भने महिलातर्फ सुदूरपश्चिमलाई हराएको छ। लिगमा पुरुषतर्फ ८ र महिलातर्फ ६ टोली सहभागी छन् र शीर्ष दुई टोलीले फाइनल खेल्नेछन्। १२ वैशाख, काठमाडौं।
शनिबार विभागीय टोली नेपाल पुलिस क्लबका दुवै टोलीले विजयी भएका छन्। पुरुषतर्फ नेपाल पुलिस क्लबले विभागीय मुकाबिलामा नेपाल एपीएफ क्लबलाई सोझो सेटमा हराएको हो। यो पुलिसको दोस्रो जित हो। त्रिपुरेश्वरस्थित दशरथ रंगशाला कभर्ड हलमा भएको खेलमा पुलिसले एपीएफलाई २५-२३, २५-२०, २५-१४ ले पराजित गर्यो। पुलिसले पहिलो खेलमा कोशी प्रदेशलाई जितेको थियो।
महिलातर्फ पनि पुलिसले सुदूरपश्चिमलाई पराजित गर्दै लगातार दोस्रो जित हासिल गरेको छ। पुलिसले सुदूरपश्चिमलाई २५-१२, २५-६, २५-१८ ले हरायो। पुलिसले यसअघि पहिलो दिन एभरेष्ट भलिबल क्लबलाई पराजित गरिसकेको थियो। महिलातर्फको अर्को खेलमा न्यु डायमण्ड युथ स्पोर्ट्स क्लबले एभरेष्ट भलिबल क्लबलाई पराजित गरेको छ।
पुरुषतर्फ नेपाल पुलिस क्लब, हेल्प नेपाल, रुकुम पश्चिमसहित त्रिभुवन आर्मी क्लबले पनि लगातार दुई खेल जित्दै समान ६ अंक जोडेको छ। एनभीए लिगमा आइतबार पुरुषतर्फ ३ र महिलातर्फ २ गरी कुल ५ खेलहरू हुनेछन्। नेपाल भलिबल संघको आयोजनामा भइरहेको लिगमा पुरुषतर्फ ८ र महिलातर्फ ६ टोली सहभागी छन्।
