फिफा विश्वकप इतिहासकै सबैभन्दा ठूलो र भव्य संस्करण फिफा विश्वकप २०२६ अब केही दिनमै उत्तर अमेरिकी महादेशमा सुरु हुँदैछ। यो विश्वकप संयुक्त रूपमा अमेरिका, मेक्सिको र क्यानडामा आयोजना हुँदैछ, जहाँ पहिलो पटक ४८ टोलीहरूले १०४ खेल खेल्नेछन्। मेक्सिकोको ऐतिहासिक एज्टेका स्टेडियम विश्वमै पहिलो पटक तीन पटक विश्वकप आयोजना गर्ने स्टेडियम बन्नेछ, र उद्घाटन खेल ११ जुनमा यहीँ हुनेछ। विश्वकपको फाइनल खेल १९ जुलाई २०२६ मा अमेरिकाको न्यूयोर्कस्थित मेटलाइफ स्टेडियममा हुनेछ जसको क्षमता ८२,५०० भन्दा बढी छ।
२६ जेठ, काठमाडौं। फुटबलको महाकुम्भको प्रतिक्षा गरिरहेका विश्वभरिका फुटबल प्रेमीहरूका लागि अब प्रतिक्षाको घडी सकिन लागेको छ। फिफा विश्वकप २०२६ अब केही दिनमै उत्तर अमेरिकी महादेशमा सुरु हुँदैछ। आयोजक राष्ट्रहरू, सहभागी टोली र खेल संख्या सबैमा नयाँ र कीर्तिमान राखिएको यस विश्वकपले यस पटकलाई विशेष बनाएको छ। तल फिफा विश्वकप २०२६ को सुरु हुने मिति, पूर्ण खेल तालिका, आयोजक राष्ट्रहरू र फाइनल खेलको विस्तृत जानकारी प्रस्तुत गरिएको छ।
विश्वकप २०२६: मुख्य विवरण र मिति
फिफा विश्वकप २०२६ को औपचारिक उद्घाटन तीन फरक देशमा फरक–फरक तरिकाले हुनेछ। उद्घाटन खेल भने ११ जुनमा मेक्सिकोमा हुनेछ। मेक्सिकोको ऐतिहासिक एज्टेका स्टेडियममा मेक्सिको र दक्षिण अफ्रिकी टोलीबीच खेल हुँदै विश्वकपको औपचारिक सुरुवात हुने छ। यो फुटबलको महासंग्राम लगभग ४० दिनसम्म चल्ने छ। फाइनल खेल १९ जुलाई २०२६ मा अमेरिकाको न्यूयोर्कमा हुनेछ। यस पटक विश्वकपमा अहिलेसम्मकै सबैभन्दा धेरै १०४ खेल हुनेछन्।
सुरु हुने मिति: जुन ११, २०२६
फाइनल खेल: जुलाई १९, २०२६
आयोजक राष्ट्रहरू: अमेरिका, मेक्सिको र क्यानडा (संयुक्त रूपमा)
कुल सहभागी टोली: ४८ (पहिले ३२ टोली खेल्ने, तर यसपटक ४८ टोली सहभागी)
कुल खेल संख्या: १०४ (समूह चरणमा ७२ र नकआउट चरणमा ३२)
३ राष्ट्र र १६ सहर: खेल मैदानहरू
यो विश्वकप पहिलो पटक तीनवटा देशमा संयुक्त रूपमा आयोजना हुँदैछ। अमेरिकामा ११ स्टेडियम, मेक्सिकोमा ३ र क्यानडामा २ स्टेडियममा खेलहरू सञ्चालन हुनेछन्।
प्रतियोगिताको नयाँ ढाँचा
पछिल्लो संस्करणको तुलनामा सहभागी टोली ३२ बाट ४८ गराइएकोले प्रतियोगिताको ढाँचा पनि परिवर्तन भएको छ।
समूह चरण: ४८ टोलीलाई १२ वटा समूह (समूह ए देखि एल) मा विभाजन गरिएको छ, प्रत्येक समूहमा ४ टोली हुनेछ।
नकआउट चरण: प्रत्येक समूहका शीर्ष दुई टोली र तेस्रो स्थानका उत्कृष्ट ८ टोलीले राउन्ड अफ ३२ मा प्रवेश गर्नेछन्, जसबाट नयाँ नकआउट राउन्ड थप गरिएको छ।
पूर्ण खेल तालिका र मुख्य चरणहरू
फुटबल उत्सव ३९ दिनसम्म चल्नेछ, तालिका यस प्रकार छ:
१. समूह चरण: जुन ११ देखि जुन २७, २०२६
उद्घाटन खेल ११ जुनमा मेक्सिको सिटीको एज्टेका स्टेडियममा मेक्सिको र दक्षिण अफ्रिकाबीच हुनेछ। क्यानडाको पहिलो खेल जुन १२ मा टोरन्टोमा र अमेरिकाको पहिलो खेल जुन १२ मा लस एन्जलसमा हुनेछ। मेक्सिको फिफा विश्वकप तीन पटक आयोजना गर्ने पहिलो राष्ट्र बन्नेछ र एज्टेका स्टेडियम विश्वमै तीन पटक (१९७०, १९८६, २०२६) विश्वकप आयोजना गर्ने पहिलो स्टेडियम हुनेछ।
२. राउन्ड अफ ३२: जुन २८ देखि जुलाई ३, २०२६
समूह चरणबाट छनोट भएका ३२ टोली नकआउट खेल खेल्नेछन्। प्रत्येक समूहका शीर्ष २ टोलीहरू र तेस्रो स्थानका उत्कृष्ट ८ टोली नकआउट चरणमा प्रवेश गर्नेछन्।
३. राउन्ड अफ १६: जुलाई ४ देखि जुलाई ७, २०२६
राउन्ड अफ ३२ बाट विजेता टोलीहरू प्रिक्वार्टरफाइनलका लागि प्रतिस्पर्धा गर्नेछन्।
४. क्वार्टरफाइनल: जुलाई ९ देखि ११, २०२६
यो चरणका खेलहरू लस एन्जलस, कान्सास सिटी, मियामी र बोस्टनमा आयोजना हुनेछन्। यस चरणमा ८ टोली भिड्नेछन्।
५. सेमिफाइनल: जुलाई १४ र १५, २०२६
सेमिफाइनल खेलहरू अमेरिकाको डलस र एटलान्टामा हुनेछन्। विजेताहरू फाइनल खेलमा प्रवेश गर्नेछन्।
६. तेस्रो स्थानको खेल: जुलाई १८, २०२६
सेमिफाइनलमा पराजित दुई टोली मायमीमा तेस्रो स्थानका लागि प्रतिस्पर्धा गर्नेछन्।
फाइनल खेल विश्व फुटबलको अत्यन्त प्रतिष्ठित ट्रफीको निर्णय गर्ने खेल जुलाई १९ मा हुनेछ। सेमिफाइनल विजेताहरू मेटलाइफ स्टेडियम, न्यूयोर्क/न्यूजर्सीमा भिड्नेछन् जहाँ ८२,५०० भन्दा बढी दर्शकले प्रत्यक्ष मजा लिन सक्नेछन्।
विश्वकप २०२६ किन ऐतिहासिक छ?
अहिलेसम्मकै सबैभन्दा ठूलो विश्वकप: ४८ टोली र १०४ खेलले यो विश्वकप इतिहासकै सबैभन्दा ठूलो हुनेछ।
नयाँ देशहरूको उपस्थिति: कुराकाओ, उज्बेकिस्तान, जोर्डन र केप भर्ड जस्ता नयाँ राष्ट्रहरूले पहिलो पटक विश्वकपमा भाग लिनेछन्।
साविक विजेता: सन् २०२२ को कतार विश्वकप विजेता अर्जेन्टिना, कप्तान लियोनेल मेस्सीको नेतृत्वमा, यसपटक आफ्नो उपाधि रक्षा गर्ने लक्ष्यमा हुनेछ।
