लेखक: space4knews

समाचार सारांश मन्दिरमा पूजा, रक्षाबन्धन, जनै फेर्न र कुण्ड–धारामा स्नान गर्न भक्तजनहरू लाइनमा छन् भने प्रहरी सुरक्षा र लाइन व्यवस्थापनमा तैनाथ छन्। १२ भदौ, काठमाडौं। आज जनैपूर्णिमा र रक्षाबन्धन पर्व मनाइँदै छ। हरेक वर्षझैं यस वर्ष पनि पाटनस्थित कुम्भेश्वर मन्दिरमा मेला लागेको छ। आज कुम्भेश्वर मन्दिर परिसरमा जनैपूर्णिमा मनाउन भक्तजनहरूको घुइँचो छ। कोही मन्दिरमा पूजा गर्न लाइन बसेका छन् भने कोही रक्षाबन्धन बाँधिरहेका छन्। मन्दिर परिसरमा जनै फेर्नेहरूको पनि चहलपहल छ। भक्तजनहरू कुण्ड र धारामा नुहाइरहेका छन्। केही युवाहरू मन्दिर परिसरको तालमा डाइभ हाली पौडी खेलेर रमाइरहेका छन्। सुरक्षा र लाइन व्यवस्थापनका लागि प्रहरी परिचालन गरिएको छ। कुम्भेश्वर मन्दिर परिसरमा रहेको कुण्डलाई धार्मिक मान्यता अनुसार भगवान् श्रीरामले तीर हानी गोसाइँकुण्डको पानी निकालेको विश्वास छ। यही धार्मिक आस्थाले जनैपूर्णिमाको दिन देशका विभिन्न भागबाट भक्तजन कुम्भेश्वरमा स्नान गर्न आउने गरेका छन्।

इप्पानले प्रधानमन्त्री दैवी प्रकोप उद्धार कोषमा बाढीपीडितका लागि ५ करोड ५ लाख ५० हजार रुपैयाँ सहयोग गर्ने निर्णय गरेको छ। भोटेकोशी नदीको भीषण आकस्मिक बाढीले रसुवा, नुवाकोट, धादिङ, गोरखा, चितवन र तनहुँ जिल्लाहरूमा मृत्यु भएका जनावरूपमा इप्पानले श्रद्धाञ्जली व्यक्त गरेको छ। इप्पानले बाढीका कारण क्षतिग्रस्त संचालनमा रहेका र निर्माणाधीन विद्युत् आयोजनाहरूको पुनर्निर्माण र पुनर्स्थापनाका लागि सरकारसँग समन्वय गरी सहयोग गर्ने निर्णय गरेको छ। ११ भदौ, काठमाडौं। स्वतन्त्र ऊर्जा उत्पादकहरूको संस्था नेपाल (इप्पान) ले बाढीपीडितहरूका लागि ५ करोड ५ लाख रुपैयाँ आर्थिक सहयोग प्रदान गर्ने निर्णय गरेको छ। आज बसेको कार्यसमितिको २०६ औं आकस्मिक बैठक तथा सल्लाहकारसहितको संयुक्त बैठकले भोटेकोशी नदीमा आएको भीषण आकस्मिक बाढीका कारण रसुवा, नुवाकोट, धादिङ, गोरखा, चितवन, तनहुँ लगायतका जिल्लाहरूमा मृत्यु भएका जनावरूपमा श्रद्धाञ्जली व्यक्त गरेको छ। शोकाकुल परिवारप्रति समवेदना प्रकट गर्दै घाइतेहरूको शीघ्र स्वास्थ्य लाभको कामना गरेको छ।

साथै इप्पान तथा यससँग सम्बद्ध जलविद्युत् कम्पनीहरूले प्रधानमन्त्री दैवी प्रकोप उद्धार कोषमा ५ करोड ५ लाख ५० हजार रुपैयाँ आर्थिक सहयोग गर्ने निर्णय गरेको छ। इप्पान अध्यक्ष मोहन कुमार डाँगीका अनुसार, ऊर्जा, जलस्रोत तथा सिँचाइ मन्त्री विराजभक्त श्रेष्ठको उपस्थितिमा उपयुक्त समयमा उक्त सहयोग रकमको चेक हस्तान्तरण गरिनेछ। बैठकले बाढीबाट संचालनमा रहेका र निर्माणाधीन थुप्रै विद्युत् आयोजनाहरुमा भएको क्षतिप्रति दुःख व्यक्त गर्दै ज्यान गुमाएका कर्मचारी र मजदुरप्रति श्रद्धाञ्जली अर्पण तथा घाइतेहरूको शीघ्र स्वास्थ्य लाभको कामना गरेको छ।

अध्यक्ष डाँगीले भने, ‘ऊर्जा क्षेत्र नेपालको समृद्धिसँग मात्र नभई नेपाली जनताको सुख दुःखसँग पनि जोडिएको क्षेत्र हो। विपद्का बेला सबै सदस्य कम्पनीहरू एकजुट हुँदा पीडित परिवारको जीवनमा ठूलो राहत र आशाको सन्देश दिन सकिन्छ।’ उहाँले थपे, ‘यस मानवीय अभियानमा इप्पानका सम्पूर्ण सदस्य कम्पनीहरूको सक्रिय र उदार सहयोग आवश्यक छ।’

भोटेकोशीमा आएको बाढीपछि सरकारले प्रधानमन्त्री प्रकोप उद्धार कोषमार्फत राहत संकलन र वितरण गर्न एकद्वार प्रणाली अवलम्बन गर्न आग्रह गरेको छ। १२ भदौ, काठमाडौं। विनाशकारी भोटेकोशी बाढीले ठूलो जनधनको क्षति पुर्‍याएपछि उद्धार तथा राहत कार्य तीव्र बनाइएको छ। सरकार, निजी क्षेत्र, संघसंस्था र विदेशमा रहेका नेपाली सबैले राहत जुटाइरहेका छन्। अर्थ मन्त्रालयले समेत राहत संकलनका लागि ‘एकद्वार प्रणाली’ अवलम्बन गर्न सुझाव दिएको छ, जसले संकलित सहयोग वास्तविक पीडितसम्म व्यवस्थित, पारदर्शी र समान रूपमा पुग्न सहयोग गर्छ।

सरकारले प्रधानमन्त्री तथा मन्त्रिपरिषद्को कार्यालय अन्तर्गत रहेको प्रधानमन्त्री प्रकोप उद्धार कोषलाई राहत संकलन र परिचालनको आधिकारिक माध्यम बनाएको छ। मन्त्रालयका अनुसार यस प्रणालीबाट संकलित आर्थिक सहयोग उद्धार, उपचार, राहत, पुनःस्थापना र क्षतिग्रस्त पूर्वाधार पुनर्निर्माणमा प्राथमिकताका आधारमा परिचालन गरिनेछ। पूर्व अर्थमन्त्री रामेश्वर खनालका अनुसार राहत संकलन र वितरणमा सरकारको एकद्वार प्रणाली सबैभन्दा उपयुक्त व्यवस्था हो। यसले राहत वितरण हुँदा एउटै व्यक्ति वा परिवारले पटक–पटक विभिन्न ठाउँबाट राहत नपाउने र अर्को पीडितले पनि उचित सहयोग पाउने सुनिश्चित गर्छ।

अर्थ मन्त्रालयका सहसचिव अमृत लम्सालका अनुसार विदेशमा रहेका नेपाली, अन्तर्राष्ट्रिय दातृ निकाय तथा संघसंस्थाले पनि प्रधानमन्त्री राहत कोषमा सजिलै आर्थिक सहायता गर्न सक्छन्। लम्सालले विदेशी बैंकबाट स्विफ्ट कोड प्रयोग गरेर प्रधानमन्त्री राहत कोषको खातामा रकम पठाउन सकिने बताए। राहत संकलनको नाममा ठगीको जोखिम बढ्दै गएपछि सरकारले सर्वसाधारणलाई सचेत बनाएको छ। केही व्यक्तिहरूले सामाजिक सञ्जालमार्फत ‘प्रधानमन्त्री दैवी प्रकोप उद्धार कोष’ वा ‘प्रधानमन्त्री राहत कोष’को नाममार्फत व्यक्तिगत बैंक खाता वा ई–वालेटमा रकम पठाउन आग्रह गर्ने गरेको पाइएको छ।

सरकारले सहयोग दिनुअघि सम्बन्धित विवरण आधिकारिक हो कि होइन भन्ने सुनिश्चित गर्न आवश्यक ठानेको छ। प्रधानमन्त्री प्रकोप उद्धार कोषको नाममा सहयोग मागिएको अवस्थामा सरकारको आधिकारिक वेबसाइट वा प्रमाणित सामाजिक सञ्जाल पेजमा प्रकाशित विवरणसँग तुलना गरेर मात्र रकम पठाउन आग्रह गरिएको छ। प्राकृतिक विपत्तिको बेला सहयोग गर्ने भावना महत्त्वपूर्ण भए पनि त्यो सहयोग सही व्यक्तिसम्म, सही समयमा र समान रूपमा पुग्नु अझ महत्वपूर्ण हुन्छ।

धनगढीस्थित निसर्ग अस्पतालले भोटेकोशी बाढी पीडितहरूको राहत र पुनर्स्थापनाका लागि ११ लाख ११ हजार १११ रुपैयाँ सहयोग गरेको छ। अस्पतालले आफ्नो वार्षिक तीज कार्यक्रम नगर्ने निर्णय गरि त्यसका लागि छुट्याइएको रकम समेत राहतका लागि समर्पण गरेको हो। संकलित रकम प्रधानमन्त्री दैवी प्रकोप उद्धार कोषको ग्लोबल आइएमई बैंक खातामा राखिएको अस्पतालले जनाएको छ।

भोटेकोशी बाढी पीडितको राहत तथा पुनर्स्थापनाका लागि कैलालीको धनगढीस्थित निसर्ग अस्पतालले ११ लाख ११ हजार १ सय ११ रुपैयाँ सहयोग गरेको छ। बाढीबाट ठूलो जनधनको क्षति हुँदा कैयौँ परिवार पीडामा रहेका बेला, अस्पतालले आफ्नो वार्षिक तीज कार्यक्रमसमेत नगर्ने निर्णय गर्दै उक्त कार्यक्रमका लागि छुट्याइएको रकम राहतका लागि समर्पण गरेको हो।

निसर्ग अस्पतालका कर्मचारी, स्टाफ नर्स, चिकित्सक तथा शेयर सदस्यहरूबाट कम्तिमा एक दिन बराबरको तलब/सुविधा सहयोग गर्ने निर्णयसँगै तीज कार्यक्रमका लागि छुट्याइएको रकम समेत जोडेर कुल ११ लाख ११ हजार १ सय ११ रुपैयाँ भोटेकोशी बाढी पीडितका लागि सहयोग गरिएको अस्पतालका अध्यक्ष तीर्थराज पन्तले जानकारी दिए।

अस्पतालले हरेक वर्ष महिला कर्मचारी तथा चिकित्सकहरूका लागि तीज कार्यक्रम आयोजना गर्दै आएको थियो। तर यस वर्ष भोटेकोशीमा आएको विनाशकारी बाढीले ठूलो जनधनको क्षति पुर्‍याएपछि तीज कार्यक्रम नगरी त्यसका लागि छुट्याइएको रकम पीडितको राहत र पुनर्स्थापनामा लगाउने निर्णय गरिएको हो। निसर्ग अस्पतालका कर्मचारी, स्टाफ नर्स, चिकित्सक र संस्थाको तर्फबाट संकलित ११ लाख ११ हजार १ सय ११ रुपैयाँ नेपाल सरकारको ‘प्रधानमन्त्री दैवी प्रकोप उद्धार कोष’ अन्तर्गत ग्लोबल आइएमई बैंकको आधिकारिक बैंक खाता नं. ८८००४०१०१०००००५७८८ मा जम्मा गरिएको अस्पतालले जनाएको छ।

अस्पतालका अध्यक्ष पन्तले भने, ‘हामीले गरेको सहयोगले बाढीले पुर्‍याएको सम्पूर्ण क्षतिको पूर्ति गर्न सक्दैनौं। तर पीडामा रहेका परिवारलाई हामी उनीहरूको साथमा छौं भन्ने भरोसा दिन सक्छौं।’ चाडपर्वको खुसीलाई केही समयका लागि स्थगित गरी विपत्तिमा परेका परिवारको साथमा उभिनु आफ्नो सामाजिक उत्तरदायित्व रहेको उनको भनाइ छ। निसर्ग अस्पताल सामाजिक उत्तरदायित्व अन्तर्गत विभिन्न मानवीय र सामाजिक सहयोगका कार्यक्रमहरू सञ्चालन गर्दै आएको छ।

ऊर्जा मन्त्रालयले बाढी तथा विपद्बाट प्रभावित नुवाकोट र रसुवामा वैकल्पिक विद्युत् सेवाका लागि ५०० थान सोलार पावर बैंक हस्तान्तरण गरेको छ। मन्त्रालयले वैकल्पिक ऊर्जा प्रवर्द्धन केन्द्रमार्फत मोबाइल चार्ज गर्न र चार–पाँच वटा बत्ती बाल्न सक्ने क्षमताको पावर बैंक उपलब्ध गराएको हो। यो पहल विपद्का कारण विद्युत् सेवा प्रभावित आएका नागरिकलाई सञ्चार र प्रकाशको सुविधा प्रदान गर्न गरिएको मन्त्रालयले जनाएको छ।

११ भदौ, काठमाडौं। ऊर्जा, जलस्रोत तथा सिँचाइ मन्त्रालयले बाढी तथा विपद्बाट प्रभावित नुवाकोट र रसुवा जिल्लामा वैकल्पिक विद्युत् सेवा प्रवाह गर्न ५०० थान सोलार पावर बैंक हस्तान्तरण गरेको छ। मन्त्रालयले वैकल्पिक ऊर्जा प्रवर्द्धन केन्द्रमार्फत प्रभावित क्षेत्रमा तत्काल विद्युत् आवश्यकता पूर्ति गर्ने उद्देश्यले सोलार पावर बैंक उपलब्ध गराएको हो।

विद्युत् आपूर्ति अवरुद्ध भएका क्षेत्रमा प्रयोग गर्न सकिने उक्त पावर बैंकबाट मोबाइल फोन चार्ज गर्नुका साथै करिब चार–पाँच वटा बत्ती बाल्न सकिने क्षमता छ। विपद्का कारण नियमित विद्युत् सेवा प्रभावित भएका नागरिकलाई अत्यावश्यक सञ्चार तथा प्रकाशको सुविधा प्रदान गर्न सोलार पावर बैंक सहयोगी साबित हुने मन्त्रालयले जानकारी दिएको छ।

प्राकृतिक विपद्का बेला प्रभावित नागरिकको दैनिक जीवन सहज बनाउन तत्काल वैकल्पिक ऊर्जा सेवा उपलब्ध गराउनु र विद्युत् पहुँच निरन्तरता दिन यस प्रकारको पहल गरिएको मन्त्रालयले बताएको छ।

रसुवामा आएको बाढीबाट प्रभावित नागरिकहरूको तत्काल राहत र पुनर्स्थापनाका लागि रेडबुलले प्रधानमन्त्री दैवी प्रकोप उद्धार कोषमा २ करोड रुपैयाँ सहयोग गरेको छ। सरस बेभरेजका प्रबन्ध निर्देशक सुरेन्द्र सिलवालले बिहीबार अर्थमन्त्री डा. स्वर्णिम वाग्लेलाई उक्त सहयोग रकम हस्तान्तरण गरे। कम्पनीले बाढीका कारण भएको मानवीय र भौतिक क्षतिप्रति दुःख व्यक्त गर्दै प्रभावित परिवारप्रति सहानुभूति जनाएको छ। ११ भदौ, काठमाडौं। रसुवा बाढीबाट प्रभावित नागरिकहरूको तत्काल राहत तथा पुनर्स्थापनामा सहयोग पुर्‍याउने उद्देश्यले रेडबुलले २ करोड रुपैयाँ सहयोग गरेको हो। रेडबुलले बिहीबार प्रधानमन्त्री दैवी प्रकोप उद्धार कोषमा २ करोड सहयोग हस्तान्तरण गरेको हो। रेडबुलका उत्पादक कम्पनी सरस बेभरेजका प्रबन्ध निर्देशक सुरेन्द्र सिलवालले अर्थमन्त्री डा. स्वर्णिम वाग्लेलाई उक्त रकम हस्तान्तरण गरे। बाढीका कारण भएका मानवीय तथा भौतिक क्षतिप्रति कम्पनीले दुःख व्यक्त गरेको छ। साथै, प्रभावित परिवारप्रति सहानुभूति पनि प्रकट गरेको छ।

नेपाल राष्ट्र बैंकले रसुवा बाढी पीडितको राहत र उद्धारमा सहजीकरण गर्ने उद्देश्यका लागि शुक्रबारदेखि आइतबारसम्म बैंक तथा वित्तीय सेवा निरन्तर सञ्चालन गर्न निर्देशन दिएको छ। केन्द्रीय बैंकले अत्यावश्यक बैंकिङ सेवा सञ्चालन गरी प्रभावितलाई राहत वितरण र उद्धार कार्यमा सहयोग गर्न भनेको छ। बैंकहरूले सेवा निरन्तर रहेको जानकारी सर्वसाधारणलाई पनि उपलब्ध गराउन राष्ट्र बैंकले अनुरोध गरेको छ। ११ भदौ, काठमाडौं।

बैंक तथा वित्तीय संस्थाहरूले शुक्रबारदेखि आइतबारसम्म निरन्तर वित्तीय सेवा दिने भएका छन्। नेपाल राष्ट्र बैंकले रसुवा बाढी पीडितलाई राहत र उद्धारमा सहजीकरण गर्न सेवा निरन्तर राख्न निर्देशन दिएको हो। केन्द्रीय बैंकका अनुसार, रसुवामा आएको बाढीका कारण प्रभावित जनतालाई राहत वितरण र उद्धार कार्यमा सहयोग पुर्‍याउन अत्यावश्यक बैंकिङ सेवा निरन्तर सञ्चालन गरिनेछ। त्यस्तै, बैंकहरूले सेवा निरन्तर रहेको जनतासम्म जानकारी पुर्‍याउनुपर्ने राष्ट्र बैंकले जनाएको छ।

रसुवा जिल्लामा बुधबार आएको भीषण बाढीले १३ वटा पुलसहित ४१ वटा पुलहरूमा क्षति पुर्‍याएको छ। भोटेकोशी बाढीले ४० किलोमिटर सडकलाई पूर्ण रूपमा बर्बाद बनाउँदा जिल्लाको सडक सम्पर्क विच्छेद भएको छ। पूर्वाधार विकास मन्त्रालयले रसुवालाई सडक सञ्जालमा पुन: जोड्न बेत्रावतीमा बेलिब्रिज राख्ने तयारी गरिरहेको छ। मन्त्रालयका अनुसार सरकारले ५० मिटर लम्बाइका ७ वटा बेलिब्रिज मात्र उपलब्ध गराएको छ, तर भारत र चीनबाट थप बेलिब्रिज प्राप्त गर्ने प्रतिबद्धता पाइसकेको छ।

रसुवाको बेत्रावतीदेखि मैलुङ हुँदै स्याफ्रुभेँसी-रसुवागढी जोड्ने सडक पूर्णरूपमा क्षतिग्रस्त भएको छ। पृथ्वी राजमार्गको १३ किलोमिटर खण्ड लेदोले पुरिएको छ। बेत्रावतीसम्म सडक सञ्चालन नभएसम्म धुन्चे हुँदै स्याफ्रुभेँसीसम्म पुग्न सम्भव छैन। बाढीले मितेरी पुलदेखि मुग्लिनको पुरानो सस्पेन्सन पुलसम्मका पुलहरूमा ठूलो क्षति पुर्‍याएको छ।

रसुवामा रहेका अन्य पुलहरू जस्तै चिलिमे पक्की पुल, हाइड्रोपावर बेलिब्रिज, र त्रिशूली नदीका विभिन्न पुलहरू पनि बाढीको चपेटामा परेका छन्। धादिङ र चितवनका केही पुल भने सुरक्षित रहेका छन्। सरकारले सडक पुनः खोल्नको लागि हाल २० वटा उपकरण परिचालन गरेको छ। क्षतिग्रस्त सडक र पुलहरूको पुनर्निर्माण तथा यातायात सञ्चालनलाई प्राथमिकता दिइएको छ।

रसुवागढी भन्सार यार्डमा भोटेकोशीको बाढीले सयौँ कन्टेनर, मालवाहक ट्रक र पूर्वाधार बगाएर ठूलो मानवीय र आर्थिक क्षति पुर्‍याएको छ। रसुवागढी र तातोपानी नाका अवरुद्ध भएपछि व्यवसायीहरूले मुस्ताङको कोरला नाकालाई विकल्पका रूपमा हेरे पनि ढुवानी लागत र समय बढ्ने भएको छ। चाडपर्वको मुखमा आयात प्रभावित हुँदा बजारमा अत्यावश्यक सामानको अभाव र मूल्यवृद्धि हुन सक्ने भन्दै व्यवसायी र अर्थविद्हरूले सरकारले तत्काल उद्धार, पुनःस्थापना र सहुलियतको व्यवस्था गर्नुपर्ने बताएका छन्।

नेपालीहरूका ठूला चाड तिज, दसैं, तिहार र छठ मुखैमा छन्। चाडपर्वको उल्लास सुरु हुनुपर्ने बेला देशको मुख्य व्यापारिक केन्द्र काठमाडौंका व्यापारीका अनुहारमा गहिरो सन्नाटा र निराशा छाएको छ। चीनसँगको प्रमुख व्यापारिक नाका रसुवागढीमा अप्रत्याशित आएको प्राकृतिक विपद्ले चाडपर्व लक्षित व्यापारका लागि ऋणधन गरेर मगाइएका अर्बौं रुपैयाँका सामानलाई बगाएको छ। यस विनाशकारी बाढीले रसुवागढी भन्सार यार्डलाई पूर्णरूपमा बगरमा परिणत गरिदिएको छ।

रसुवागढी नाकाबाट सामान ल्याउन गएका भन्सार कर्मचारी, एजेन्ट र चालकहरू बेपत्ता भएका छन्, जसले यो विपद् आर्थिक नोक्सानीमा मात्र सीमित नरहेको, गम्भीर मानवीय त्रासदीको रूप लिएको छ। नेपाल समुद्रपार निकासी पैठारी संघ महासचिव जयन्तकुमार अग्रवालले भनेका छन्, “रसुवा र तातोपानी खुल्ने अहिले कुनै सम्भावना नै छैन, त्यहाँ पूर्वाधार नै बाँकी छैनन्, सबै बगर भएको छ।”

कोरला नाकामा बाढीपहिरोको जोखिम कम छ, तर व्यवसायीहरूले यो विकल्पलाई बाध्यतामात्र मान्छन्। मुस्ताङ भन्सार कार्यालयका प्रमुख विदुर चुडालका अनुसार हाल यो नाकाबाट नियमित रूपमा मालवाहक सवारीसाधन आवतजावत गरिरहेका छन्। यद्यपि, कोरला नाकामा खाद्यवस्तु र सड्ने–गल्ने वस्तु आयातमा समस्या छ।

नेपाल हिमालय सीमापार वाणिज्य संघ महासचिव रामचन्द्र पराजुलीका अनुसार रसुवा–केरुङ नाकातर्फको चिनियाँ भूभागमा करिब ५० देखि ६० किलोमिटर सडक पूर्णरूपमा ध्वस्त भएको छ। उनले भने, “रसुवा नाकाको भौतिक अवस्था निकै क्षतविक्षत छ, त्यहाँको सडक पूर्वाधार पुनर्निर्माण गर्न राष्ट्रियस्तरको बजेट र चिनियाँ पक्षको विशेष सक्रियता आवश्यक छ।”

समाचार सारांश: विदुर नगरपालिकाकी उपमेयर प्रभा बोगटीले भोटेकोशी बाढीपछिको उद्धार र शव व्यवस्थापनका लागि फिल्डमा जनशक्तिको अभाव भएको बताएकी छन्। उनका अनुसार नदीमा शवहरू बगेर आएका छन् र बेलकोटगढी क्षेत्रमा धेरै शवहरू देखिएको जानकारी प्राप्त भएको छ। उद्धारका लागि हेलिकप्टर र खाद्यान्न उपलब्ध भए तापनि नदी तटीय प्रभावित क्षेत्रमा पुग्न सडक अवरोधले समस्या सिर्जना गरिरहेको छ।

भोटेकोशीमा बुधबार आएको बाढीबाट प्रभावित नुवाकोटको विदुर नगरपालिकाकी उपमेयर प्रभा बोगटीले उद्धार र शव व्यवस्थापनमा फिल्डमा काम गर्ने जनशक्तिको कमी रहेको बताएकी छन्। उनका अनुसार नदीले बगाएर ल्याएका शवहरू छन्। उपमेयर बोगटीसँग गरिएको संवादमा उनले भनिन्, “बाढीले गतदिन अकल्पनीय क्षति पुर्‍यायो। त्यसपछि उद्धारका लागि लगातार प्रयास भइरहेका छन्। घाइतेहरूको सुरक्षित स्थानमा स्थानान्तरण र उद्धार गरिँदैछ।”

उपमेयर बोगटीले थप जानकारी दिँदै भनिन्, “हेलिकप्टर र खाद्यान्नहरू आइपुगेका छन्, तर ती सामग्री प्रभावित क्षेत्रमा पुर्‍याउन कठिनाइ भईरहेको छ।” उनले भनिन् कि, “यहाँ उद्धार कार्य अत्यन्त जटिल अवस्थामा जारी छ।”

उपमेयरले भने, “हामीलाई तत्काल सुरक्षित सुरक्षाकर्मीहरू, अन्य जनशक्ति र स्वयंसेवकहरूको आवश्यकता छ, जो तत्काल फिल्डमै जान सकून्।” स्वास्थ्य उपचारका लागि टोलीहरूको अवस्था उल्लेख गर्दै उनले भनिन्, “त्रिशूली अस्पताल दुई तर्फबाट पुग्न सकिन्छ।”