लेखक: space4knews

अख्तियार दुरुपयोग अनुसन्धान आयोगले रुकुम पश्चिमको त्रिभुवन जनता माध्यामिक विद्यालयका ८ जना विरुद्ध भ्रष्टाचार मुद्दा दर्ता गरेको छ। मुद्दा अनुसार तत्कालीन प्रधानाध्यापक हरिप्रसाद खनाल र लेखापाल ठकबहादुर बुढाथोकीमाथि प्रत्येक जनाविरुद्ध १० लाख ७५ हजार ७५३ रुपैयाँ बिगो माग गरिएको छ। अख्तियारले प्रविधिमैत्री कक्षा कोठा निर्माणमा नक्कली बिल भौचर बनाएर भ्रष्टाचार गरेको आरोप लगाएको छ। ९ वैशाख, काठमाडौं।

रुकुम पश्चिमको त्रिभुवन जनता माध्यामिक विद्यालयका तत्कालीन विद्यालय व्यवस्थापन समिति अध्यक्ष खेमराज खड्का, प्रधानाध्यापक हरिप्रसाद खनालसहित ८ जनाविरुद्ध विशेष अदालत काठमाडौंमा भ्रष्टाचार मुद्दा दर्ता भएको छ। सार्वजनिक सम्पत्तिमा हानि पुर्‍याएर भ्रष्टाचार गरेको आरोपमा अख्तियार दुरुपयोग अनुसन्धान आयोगले विशेष अदालतमा मुद्दा दर्ता गरेको हो।

तत्कालीन प्रिन्सिपल खनाल र लेखापाल ठकबहादुर बुढाथोकीविरुद्ध जनही १० लाख ७५ हजार ७५३ रुपैयाँ बिगो माग गरिएको छ भने कार्यालय सहायक रमा शाह र गौरी रावत केसीविरुद्ध जनही ४ लाख ८८ हजार ८११ रुपैयाँ बिगो माग गरिएको छ। यसैगरी दाङको तुलसीपुर उपमहानगरपालिका-६ का डिजिटल कम्प्युटर एन्ड इलेक्ट्रोनिक्स वर्ल्डका प्रोपाइटर शिवप्रसाद श्रेष्ठविरुद्ध ७ लाख ८ हजार ८११ रुपैयाँ बिगो माग गरिएको छ।

वित्तिय व्यवस्थापन समितिका अध्यक्ष खड्का, मुसीकोट नगरपालिकाका शाखा अधिकृत बिनाराम खड्का र सूचना प्रविधि अधिकृत गोपाल ओलीलाई भ्रष्टाचार निवारण ऐन २०५९ को दफा १९ (२) बमोजिम कारबाही गर्नुपर्ने उल्लेख गरिएको छ। उनीहरूले आर्थिक वर्ष २०७८/७९ मा प्रविधिमैत्री कक्षा कोठा निर्माण तथा व्यवस्थापन कार्यक्रममा खरिद गरिएको सामग्रीमा नक्कली बिल भौचर बनाएर भ्रष्टाचार गरेको अख्तियारले आरोप लगाएको छ।

सरकारद्वारा गठन गरिएको सम्पत्ति जाँचबुझ आयोगले एक वर्षभित्र अनुसन्धान सम्पन्न गर्ने कार्यकाल पाएको छ। आयोगका अध्यक्ष र सदस्यहरूले बुधबार पद तथा गोपनीयताको शपथ ग्रहण गरेका छन्। सर्वोच्च अदालतका पूर्वन्यायाधीश राजेन्द्रकुमार भण्डारीको नेतृत्वमा गठन भएको आयोगका सदस्यहरूमा पुनरावेदन अदालतका पूर्वमुख्यन्यायाधीश पुरुषोत्तम पराजुली, उच्च अदालतका पूर्वन्यायाधीश चण्डीराज ढकाल, नेपाल प्रहरीका पूर्वनायब महानिरीक्षक (डीआईजी) गणेश केसी र नेपाल चार्टर्ड एकाउन्टेन्ट्स संस्था (आइक्यान) का पूर्वअध्यक्ष प्रकाश लम्साल रहेका छन्।

मन्त्रिपरिषद्को गत साता बसेको बैठकले आयोग गठन गर्ने निर्णय गरेको थियो। कायममुकायम प्रधानन्यायाधीश सपना प्रधान मल्लले बुधबार बिहान आयोगका अध्यक्ष भण्डारीलाई पद तथा गोपनीयताको शपथ दिलाएका थिए भने अध्यक्ष भण्डारीले सदस्यहरूलाई पनि शपथ गराएका छन् भन्ने जानकारी आयोग सदस्य प्रकाश लम्सालले दिएका छन्। छानबिनमा पर्ने कर्मचारी तथा जनप्रतिनिधिहरूसँग सम्बन्धित जानकारी सरकारका प्रवक्ता तथा शिक्षा, विज्ञान तथा प्रविधि, युवा तथा खेलकुद मन्त्री सस्मित पोखरेलले प्रदान गरेका छन्।

आयोगले ‘२०६२/२०६३ देखि हाल २०८२/२०८३ सम्म सार्वजनिक पदमा रहेका प्रमुख राजनीतिक पदाधिकारी र उच्चपदस्थ कर्मचारीहरूको सम्पत्तिको विवरण सङ्कलन, प्रमाणीकरण तथा छानबिन गर्ने’ जिम्मेवारी पाएको छ। आयोग सदस्य तथा पूर्वन्यायाधीश चण्डीराज ढकालले यसबारे पुष्टि गरेका छन् तर थप विवरण भने प्रदान गरेका छैनन्। सदस्य सीए लम्सालले छिट्टै राजपत्रमा यससम्बन्धी विवरणहरू प्रकाशित हुने जानकारी दिएका छन्।

गृह मन्त्रालयको कानुन महाशाखा प्रमुख सहसचिव कृष्णबहादुर कार्कीले पनि आयोगको कार्यादेशबारे कुनै स्पष्ट जानकारी नभएको बताएका छन्। तथापि, नाम नखुलाउन चाहने सरकारी अधिकारीहरूको भनाइ अनुसार राजपत्र प्रकाशनका लागि तयार पारेको कार्यादेशले स्थानीय तहका जनप्रतिनिधिहरूलाई समेत छानबिनमा समेटेको छ। एक अधिकारीका अनुसार, “प्रधानमन्त्री र सांसददेखि स्थानीय तहका प्रमुख र उपप्रमुखसम्मको सम्पत्ति छानबिन गरिनेछ,” कार्यादेश अनुसार प्रदेश तहका जनप्रतिनिधि र कर्मचारीहरू पनि छानबिनमा पर्दछन्।

समाचार सारांश नेकपा एमालेका अध्यक्ष केपी शर्मा ओलीले पार्टी एकता अपरिहार्य भएको र चुनौतीहरू पार गर्न एकताबद्ध हुनुपर्ने बताएका छन्। ओलीले नेपाल कम्युनिस्ट पार्टीको स्थापना दिवसमा सन्देश पठाउँदै पार्टीले निरंकुशताको अन्त्य र गणतन्त्र स्थापनामा नेतृत्वदायी भूमिका खेलेको उल्लेख गरेका छन्। उनको सन्देश पार्टी उपाध्यक्ष रामबहादुर थापा ‘बादल’ले पढेर सुनाएका थिए र ओली अस्वस्थ भएर घरमै आराम गरिरहेका छन्। ९ वैशाख, काठमाडौं।

नेकपा एमालेका अध्यक्ष केपी शर्मा ओलीले वर्तमान चुनौतीहरूलाई पार लगाउन पार्टी एकता अपरिहार्य भएको बताएका छन्। नेपाल कम्युनिस्ट पार्टीको स्थापना दिवसको अवसरमा आयोजित कार्यक्रममा सन्देश पठाउँदै उनले यस्तो बताएका हुन्। अस्वस्थ भएर घरमै आराम गरिरहेका ओलीले आजको कार्यक्रमका लागि सन्देश पठाएका थिए। उनको सन्देश पार्टी उपाध्यक्ष रामबहादुर थापा ‘बादल’ले पढेर सुनाए।

‘पार्टीको नेतृत्वमा भएका विभिन्न आन्दोलनहरूले उपलब्धि पनि हासिल गरेको छ। तर पटक-पटक पीडा पनि व्यहोरेको छ। निरंकुशताको अन्त्य र गणतन्त्र स्थापनाका लागि नेतृत्वदायी भूमिका खेलेको छ पार्टीले,’ ओलीले पठाएको सन्देश सुनाउँदै बादलले भने, ‘मुलुकलाई सुखी र समृद्ध नेपालको मार्गमा डोर्‍यायो। नेकपा एमाले अनेकौं प्रतिकूलता झेलेर यहाँसम्म आएको हो। एकताबद्ध भएर गौरवशाली र ऐतिहासिक चुनौती पार गर्नुपर्नेछ।’ उनले आजको समयमा चुनौती पार गर्न पार्टीलाई एकतावद्ध बनाएर अघि बढ्नुपर्ने अवस्था रहेको बताएका छन्।

९ वैशाख, काठमाडौं । नेपाली कम्युनिस्ट पार्टी(नेकपा)का संयोजक पुष्पकलम दाहाल ‘प्रचण्ड’ले नेपालमा कम्युनिस्ट आन्दोलनले हालसालै क्षणिक रुपमा ठूलो झटका खेपेको बताएका छन्। कम्युनिस्ट पार्टी स्थापना दिवसको अवसर पारेर नेकपाको केन्द्रीय कार्यालय पेरिसडाँडामा आयोजित समारोहमा उनले यस झट्कालाई अग्रगामी र वस्तुवादी दृष्टिकोणबाट समीक्षा गर्नुपर्ने बताउनुभयो।

‘अहिले कम्युनिस्ट आन्दोलनले क्षणिक झटका खेपेको छ। हामीले कमजोरी कहाँ भएको छ त्यसको वस्तुवादी समीक्षा गर्नैपर्छ,’ प्रचण्डले व्यक्त गर्नुभयो, ‘मलाई लाग्छ समय–समयमा यस्ता झटका आउनैपर्छन्, यी हाम्रो भित्रका फोहोर तथा मैला व्यवस्थापन गर्ने अवसर पनि हुन्।’ उनले सत्ता सहभागितामा रहेका बेला पार्टीभित्र धेरै फोहोर फाल्नुभएको टिप्पणी पनि गरे।

प्रचण्डले जनताले आफूप्रति घृणा देखाएको उल्लेख नगरे पनि जनताले हामीलाई ‘नुहाएर, धुवाएर सफा भएर आउ’ भन्नुभएको जस्तो अनुभूति भएको बताउनुभयो। कम्युनिस्ट पार्टीभित्र भएका गलत पक्षलाई सुधार गर्ने यहि अवसरलाई सदुपयोग गर्नुपर्ने उहाँको भनाइ छ।

‘पहिले पार्टीलाई पुनर्गठन गर्नुपर्छ, नयाँ महाधिवेशन आउँदा तल्लो तहदेखि माथिल्लो तहसम्ममा नयाँ युवा र गतिशील नेतृत्वलाई प्राथमिकता दिने योजना बनाइरहेका छौँ। हामी पुराना पुस्ताले पनि कुनै न कुनै गरी नयाँ भूमिका र स्वरूपमा प्रस्तुत गरिने गरी छलफल गरिरहेका छौँ,’ प्रचण्डले जानकारी दिनुभयो। उहाँले आगामी ६ महिनाभित्र महाधिवेशन सम्पन्न गर्ने योजना रहेको र सकेसम्म असोज महिनासम्म यो प्रक्रिया पूरा गर्ने लक्ष्य रहेको उल्लेख गर्नुभयो।

गृह मन्त्री सुधन गुरुङले आफ्नो सम्पत्तिको स्रोतसम्बन्धी प्रश्नहरूको सामना गर्दै “नैतिकताको आधारमा” पदबाट राजीनामा दिएका छन्। गोरखा १ बाट प्रतिनिधि सभा सदस्य निर्वाचित गुरुङले सामाजिक सञ्जालमार्फत् भनेका छन्, “आफूसँग सम्बन्धित विषयको निष्पक्ष छानबिन होस् र पदमा रहँदा स्वार्थको द्वन्द्व नदेखियोस् भन्ने उद्देश्यले” उनले राजीनामा दिएका हुन्।

गुरुङले बुधबार प्रधानमन्त्री वदेन्द्र शाहलाई भेटेर राजीनामापत्र सुम्पेका छन् भन्ने जानकारी प्रधानमन्त्रीकी प्रेस तथा अनुसन्धान विज्ञ दीपा दाहालले दिइन्। उनका अनुसार, प्रधानमन्त्री शाहले गृह मन्त्रालय तत्कालका लागि आफूसँगै राखेका छन्। शाहको नेतृत्वमा मन्त्रिपरिषद् गठन भएको दिनै गुरुङ गृहमन्त्री नियुक्त भएका थिए।

उनको सम्पत्ति विवरण सार्वजनिक गरेपछि आय र लगानीका स्रोतसम्बन्धी विभिन्न प्रश्न उठेका थिए। मन्त्री बनेको २७औँ दिनमा उनले राजीनामा दिएका हुन्। हालको मन्त्रिपरिषद्‌बाट हट्नेछन् गुरुङ दोस्रो व्यक्ति हुन्। पत्नीको नियुक्तिसँग सम्बन्धित विवादपछि दीपककुमार साहले मन्त्री पदबाट दुई सातामै राजीनामा दिएका थिए।

गुरुङले फेसबुक पोस्टमा उल्लेख गरेका छन्, “नागरिक तहबाट मेरो शेयर लगायतका विषयमा उठेका प्रश्न, टिप्पणी र जनचाहल मलाई गम्भीर लागेको छ। मेरो लागि पदभन्दा ठूलो नैतिकता हो, र जनविश्वासभन्दा ठूलो शक्ति अरू केही छैन।” उनले निष्पक्ष छानबिनका लागि दिएको राजीनामाको स्पष्टीकरण गर्दै भनेका छन्, “यदि हामी साँच्चै परिवर्तन चाहन्छौं भने सत्य, इमानदारी र आत्मशुद्धिको बाटोमा सबैले उभिनुपर्छ।”

९ वैशाख, काठमाडौं। हालका लागि गृहमन्त्रालयको जिम्मेवारी प्रधानमन्त्री बालेन शाहले नै सम्हाल्ने भएका छन्। आज सुधन गुरुङले गृहमन्त्री पदबाट राजीनामा दिएपछि प्रधानमन्त्रीको सचिवालयले उक्त जिम्मेवारी प्रधानमन्त्रीले आफू मातहतमा राखेको जानकारी दिएको छ। विवादित व्यापारी दीपक भट्टसँग साझेदारी रहेको तथ्य बाहिरिएपछि उनी पनि विवादमा परेका थिए। त्यसपछि उनले आफू विरुद्ध निष्पक्ष छानबिन हुनुपर्ने माग राख्दै पदबाट राजीनामा दिएका हुन्। यस सरकार गठन भएको २६ दिनमै गृहमन्त्री सुधन गुरुङले राजीनामा दिएका हुन्। सम्पत्तिमाथि उठेका प्रश्नहरूका कारण उनले प्रधानमन्त्रीसँग भेट गरी राजीनामा बुझाएका थिए। केही दिनअघि उनले आफ्नो सम्पत्ति विवरण सार्वजनिक गरिसकेका थिए। त्यो विवरण अस्वाभाविक भएको भन्दै प्रश्न उठिरहेको अवस्थामा उनले माइक्रो इन्स्योरेन्स लगायत अन्य क्षेत्रमा गरेको लगानीको विवरण पनि सार्वजनिक भयो। उनले सञ्चालन गरेको सामाजिक संस्था ‘हामी नेपाल’ मा आएको सहयोग रकम व्यक्तिगत खाताबाट कारोबार गरिएको विषय बाहिरिएपछि गुरुङलाई पदबाट हटाउन विभिन्न पक्षबाट दबाब परेको थियो। उक्त दबाबमा रहेकै बेला बुधबार उनले पदबाट राजीनामा दिएका हुन्।

९ वैशाख, काठमाडौं । सिंहदरबारभित्रै सरकारविरुद्ध नाराबाजी गर्दै प्रदर्शन गर्ने क्रममा नेविसंघका नेताहरू पक्राउ परेको भन्दै नेपाली कांग्रेसले ध्यानाकर्षण भएको जनाएको छ। कांग्रेस प्रवक्ता देवराज चालिसेले एक वक्तव्य जारी गर्दै मंगलबार पक्राउ परेका नेविसंघका नेताहरू भुवन भट्ट, कुम्भराज देउवा, नविन विष्ट, आकाश देवकोटा, शुशील ऐडी र विशाल विसीलाई पक्राउ गरेको घटनाप्रति गम्भीर ध्यानाकर्षण भएको बताएका छन्।

‘लोकतान्त्रिक शासन व्यवस्थामा वाक तथा प्रकाशनको स्वतन्त्रता, शान्तिपूर्ण रूपमा हिँडडुल गर्ने अधिकार तथा विरोध वा असहमति प्रकट गर्ने स्वतन्त्रता नागरिकका मौलिक अधिकारहरू हुन्,’ वक्तव्यमा उल्लेख गरिएको छ, ‘यस्ता अधिकारहरूको प्रयोगका क्रममा नागरिकलाई पक्राउ गरी थुनामा राख्ने कार्यले लोकतन्त्रका आधारभूत मूल्य, विधिको शासन तथा नागरिक स्वतन्त्रताको प्रत्याभूतिमाथि गम्भीर प्रश्न खडा गर्दछ। असहमतिलाई नियन्त्रण गर्ने र दमन गर्ने सरकारको यस्तो शैली लोकतान्त्रिक मान्यता एवं संविधानको मर्म विपरीत छ।’

पक्राउ परेका नेपाल विद्यार्थी संघका नेताहरूलाई विना शर्त तत्काल रिहा गर्न कांग्रेसले माग गरेको छ।

समाचार सारांश अमेरिकी राष्ट्रपति डोनाल्ड ट्रम्पले इरानसँग भएको युद्धविरामको अवधि थपेका छन्, तर कुनै नयाँ समयसीमा घोषणा गरेका छैनन्। इरानी पक्षबाट वार्ता सम्बन्धी जवाफ नआउँदा ट्रम्प प्रशासनमा अन्योल छ र इरानी नेतृत्वमा विभाजन रहेको देखिएको छ। इरानले नाकाबन्दी हटाउनुपर्ने माग गर्दै आएको छ, तर ट्रम्पले होर्मुज स्ट्रेट खुल्ने निर्णय अन्तिम सम्झौतासम्म नहुने बताएका छन्। ९ वैशाख, काठमाडौं। अमेरिकी राष्ट्रपति डोनाल्ड ट्रम्पले मंगलबार दिउँसो ह्वाइट हाउसमा आफ्ना राष्ट्रिय सुरक्षा सल्लाहकारहरूसँग बैठक गरेर एउटा महत्वपूर्ण निर्णय लिए – इरानसँग के गर्ने? उनले घोषणा गरेको युद्धविरामको अवधि अन्त्य हुन लागिरहेको थियो र उपराष्ट्रपति जेडी भान्स अर्को चरण वार्ताका लागि पाकिस्तान जानु अघि जोइन्ट बेस एन्ड्रुजमा एयरफोर्स टु जहाजमै थिए। तर, ट्रम्प प्रशासनमा अन्योल थियो र इरानी पक्षबाट कुनै जवाफ आएको थिएन। यसअघि अमेरिकी पक्षले वार्ताको अर्को चरण सुरु हुनुभन्दा पहिले इरानीहरूलाई केही मुख्य बुँदाहरू पठाएको थियो। तर, तीन अधिकारीहरूको अनुसार कयौँ दिनसम्म कुनै प्रतिक्रिया नआएपछि उपराष्ट्रपति भान्स र टोली पाकिस्तान प्रस्थान गर्दा त्यहाँबाट के कति उपलब्धि हासिल होला भन्नेमा शंका उब्जिएको थियो। मंगलबार ह्वाइट हाउसमा ट्रम्पले भान्स, विदेशमन्त्री मार्को रुबियो, रक्षामन्त्री पिट हेगसेथ, जोइन्ट चिफका अध्यक्ष ड्यान केन र सीआईएको निर्देशक जोन र्याटक्लिफसँग छलफल गर्दा पनि इरानी पक्षबाट कुनै खबर थिएन। अधिकारीहरूले पाकिस्तानका मुख्य मध्यस्थकर्ता फिल्ड मार्शल असिम मुनिरलाई भान्सलाई जहाज चढ्नु अघि जवाफ ल्याउन आग्रह गरेका थिए। यद्यपि घण्टौं बितेपछि पनि इरानबाट कुनै प्रतिक्रिया आएन। ती तीन अधिकारीका अनुसार ह्वाइट हाउसका ट्रम्पका सल्लाहकारहरूले इरानबाट जवाफ नआउनुको मुख्य कारण त्यहाँको नेतृत्वभित्रको विवाद भएको अनुमान गरेका छन्। उनीहरूको यो बुझाइ आंशिक रूपमा पाकिस्तानी मध्यस्थकर्ताबाट प्राप्त सूचनामा आधारित छ। ट्रम्प प्रशासनलाई लागिरहेको छ कि युरेनियम संवर्द्धन र भण्डारजस्ता विषयमा इरानीहरूबीच साझा सहमति छैन, जुन अहिलेको वार्ताका सबैभन्दा जटिल मुद्दा बनेको छ। अमेरिकी विश्वास अनुसार नयाँ सर्वोच्च नेता मोज्ताबा खामेनीले आफ्ना अधिकारीहरूलाई स्पष्ट निर्देशन नदिइरहेको वा उनीहरू अनुमान मात्र लगाइरहेका छन्। मोज्ताबाले आफूलाई पर्दा पछाडि राख्न खोज्दा आन्तरिक छलफलमा अवरोध आएको छ। यसका बाबजुद एक अधिकारीले अमेरिका र इरानी वार्ताकारबीच चाँडै भेट हुने सम्भावना रहेको बताएका छन् तर त्यो कहिले र कसरी हुने धेरै अनिश्चित छ। सैन्य आक्रमण पुनः सुरु नगरी ट्रम्पले युद्धविरामको अवधि बढाउने निर्णय गरेका छन्, तर नयाँ कुनै निश्चित मिति तोकेको छैन। उनले ‘ट्रुथ सोसल’मा इरानी अधिकारीहरू “गम्भीर रूपमा विभाजित” रहेको उल्लेख गरेका छन्। उनी अझै युद्धको कूटनीतिक समाधान खोज्न इच्छुक देखिएका छन्। हाल वार्ता असफल भएका कारण ट्रम्पले वार्तामा धेरै चुनौतीहरूको सामना गर्नुपरेको स्पष्ट छ। इरानले वार्तामा जाने अघि नाकाबन्दी हटाउनुपर्ने माग गरिरहेको छ, विशेषगरी होर्मुज स्ट्रेटका इरानी बन्दरगाहहरूमा ट्रम्पले लगाएको नाकाबन्दी हटाउनुपर्ने। तर ट्रम्पले भने “अन्तिम सम्झौता नहुँदासम्म होर्मुज स्ट्रेट खोल्ने छैनौं” बताएका छन्। मंगलबार दिउँसोको बैठकमा ट्रम्प र टोलीले युद्धविराम अवधि लम्ब्याउने निर्णय गरे, जुन पाकिस्तानी मध्यस्थकर्ताका अनुसार केही घण्टामा सकिन लागेको थियो। ट्रम्पले भने यो बुधबार साँझसम्म रहने विश्वास व्यक्त गरे। यसले इरानीहरूलाई थप समय मिल्ने विश्वास छ, तर ग्यारेन्टी कम रहेको बताएका छन्। इरान वार्ताको टेबुलमा फर्कन तयार भए भ्रमणको व्यवस्था तुरुन्तै गर्न सकिने अधिकारीहरूले बताएका छन्। होर्मुज स्ट्रेट बन्द रहँदा दुवै पक्षलाई आर्थिक क्षति भोग्नुपर्छ, जसले चाँडो समाधान खोज्न प्रेरित गर्ने आशा गरिएको छ। पाकिस्तानी मध्यस्थकर्ताहरूले ट्रम्पलाई पनि युद्धविराम बढाउन उत्साहित गरिरहेका थिए। ट्रम्पले वार्ता प्रस्ताव नआएसम्म र छलफल निष्कर्षमा नआएसम्म युद्धविराम विस्तार गर्ने निर्णय लिएका छन्। तर इरानी अधिकारीहरू यसको खासै प्रभावति देखिएको छैनन्। इरानी वार्ता टोलीका सदस्य मेहदी मोहम्मदीले भने, “ट्रम्पले युद्धविराम लम्ब्याउनुको कुनै अर्थ छैन। हार्ने पक्षले सर्त थोपर्न सक्दैन। नाकाबन्दी राख्नु बमबारी जस्तै हो र यसको प्रतिकार सैन्य माध्यमबाटै गर्नुपर्छ।” ट्रम्पको युद्धविराम जारी रहने घोषणाले अन्योलपूर्ण दिनको अन्त्य गर्‍यो, जबकि सो दिनको सुरुवातमा उनले निकट भविष्यमा इरानलाई पुनः बमबारी गर्ने आशा व्यक्त गरेका थिए। युद्धविरामको नयाँ समयसीमा नतोक्दा दबाब कम हुने र इरानलाई वार्ता लम्ब्याउने अवसर मिल्ने चेतावनी ट्रम्पका सल्लाहकारहरूले गोप्य रूपमा दिएका छन्। कम्तिमा वार्ताकारहरूले यसै हप्ता प्रारम्भिक समझदारी हुने अपेक्षा गरेका थिए र त्यसपछि सूक्ष्म विषयमा छलफल हुने ठानेका थिए। तर आलोचकहरूले यो छलफल लम्ब्याउनु रणनीतिक चाल हुनसक्ने चेतावनी पनि दिएका छन्, जसले इरानका मिसाइल प्रणाली खुलाउन आवश्यक समय पाउनेछन्। इरानले भविष्यमा युरेनियम संवर्द्धन, उच्च संवर्द्धित युरेनियमको भण्डारण र प्रतिबन्ध हटाउने लगायत महत्त्वपूर्ण विषयहरू अझै समाधान हुन बाँकी छन्। सम्झौता सम्भव वा असम्भव हुने अन्ततः दुवै पक्षका सर्तहरूको लचकतामा निर्भर हुनेछ। ट्रम्पका लागि अनिवार्य सर्त ‘ज्वाइन्ट कम्प्रिहेन्सिभ प्लान अफ एक्शन’ जस्तो पुरानो सम्झौतासँग तुलना गर्न योग्य सम्झौतामा सहमत नहुनु हो। ट्रम्प सन् २०१८ मा उक्त आणविक सम्झौताबाट बाहिरिएका थिए र त्यसलाई कमजोर सम्झौता बताउँदै आलोचना गरिरहेका छन्। ट्रम्पले आफ्नो वार्ता कौशलमा ठूलो आत्मविश्वास देखाएका छन् र मंगलबार भने यदि उनले त्यो समयमा राष्ट्रपति भएर युद्ध जित्ने दाबी समेत गरेका छन्। “मलाई लाग्छ अन्ततः हामी उत्कृष्ट सम्झौतामा पुग्नेछौं,” उनले भने। “आधारभूत रूपमा उनीहरूको विकल्प छैन। हामीले उनीहरूको नौसेना र वायुसेना ध्वस्त पारेका छौं र उनका नेताहरूलाई पनि निशाना बनाएका छौं, जसले यो अवस्था जटिल बनाएको छ।” केही घण्टापछि ‘स्टेट डाइनिङ रुम’ मा खेलाडीहरूलाई सम्मान गर्दै ट्रम्पले युद्ध विषयमा असामान्य मौनता राखे र पत्रकारहरूको प्रश्नबाट भागे।

पत्रकार तथा फोटोग्राफर जयनारायण शाहले खिचेका तस्वीरहरूको ‘विटनेश अफ टाइम’ शीर्षकमा आगामी जेठ ११ र १२ गते नेपालगञ्जमा एकल फोटो प्रदर्शनी आयोजना हुन लागेको छ। यस प्रदर्शनीमा समय, समाज, प्रकृति र जनजीवनका महत्वपूर्ण पलहरूलाई तस्वीर मार्फत प्रस्तुत गरिनेछ। यसले नेपाली समाज र सांस्कृतिक जीवनलाई उजागर गर्ने उद्देश्य राखेको छ। आयोजक अन्तरालले नयाँ पुस्तामा फोटोग्राफीप्रति रुचि बढाउने र समाजको जीवन्त चित्र संसारलाई देखाउने लक्ष्यसहित सम्पूर्ण कलेक्सी, विद्यार्थी र सर्वसाधारणलाई निमन्त्रणा गरेको छ।

अन्तरालको आयोजना तथा व्यवस्थापनमा पत्रकार/फोटोग्राफर जयनारायण शाहले खिचेका फोटोहरूको ‘विटनेश अफ टाइम’ शीर्षकमा एकल फोटो प्रदर्शनी आयोजना गर्न लागिएको हो। जेठ ११ र १२ गते नेपालगञ्जमा हुने उक्त प्रदर्शनीमा समय, समाज, प्रकृति र जनजीवनका महत्वपूर्ण क्षणहरूलाई फोटो माध्यमबाट प्रस्तुत गरिनेछ। ‘विटनेश अफ टाइम’ प्रदर्शनीले समयका साक्षी बनेका दृश्यहरू, पात्रहरू, नेपाली समाज, भेषभूषा, संस्कृतिसँगै दैनिक जीवन र प्रकृतिलाई तस्वीरहरू मार्फत उजागर गर्ने उद्देश्य बोकेको छ। प्रदर्शनमा राखिएका तस्वीरहरूले दर्शकलाई मानव सभ्यता र प्रकृतिका विविध आयामहरू अनुभव गराउने विश्वास छ।

‘कहिलेकाहीं केही क्षणहरू केवल स्मृतिमा रहँदैनन्, तिनीहरू इतिहास बन्छन्,’ पत्रकार तथा फोटोग्राफर जयनारायण शाह भन्छन्, ‘उहि क्षणहरूलाई जीवन्त राख्ने प्रयास यस फोटो प्रदर्शनी हो।’ विगत डेढ दशकमा मुलुकमा विभिन्न राजनीतिक घटनाक्रम देखिएको छ। परिदृश्यहरू फेरिएका छन्, धेरै आन्दोलन-झडपहरू भएका छन्। भूकम्प, नाकाबन्दी, कोभिड महामारी र लकडाउनले आम जनजीवनलाई अत्यन्तै कष्टकर बनाएको छ। यी सबै कालखण्डका झलकहरू फोटोग्राफर शाहले कैद गरेका छन्।

‘मैले यात्राका क्रममा जहाँ-जहाँ पुगेँ, त्यो ठाउँको जनजीवन, रहन-सहन, भेशभूषा, बस्ती, प्रकृति, फूलहरू, मनमोहक दृश्यहरू र पदयात्रामा भेटेका मानिसहरूको तस्वीरहरू क्यामेरामा सुरक्षित गरें,’ पत्रकार शाह भन्छन्, ‘अब यी फोटोहरू प्रदर्शनीमार्फत साझा गर्दैछु।’ यस प्रदर्शनी मार्फत नयाँ पुस्तामा फोटोग्राफीप्रति आकर्षण बढाउने तथा समाजको जीवन्त तस्वीर प्रस्तुत गर्ने उद्देश्य राखिएको आयोजक अन्तरालले जनाएको छ। समय, समाज र सम्झनाको कथा बोकेको यी तस्वीरहरू अवलोकन गर्न सम्पूर्ण कलेची, विद्यार्थी, सञ्चारकर्मी र सर्वसाधारणलाई अन्तरालबाट हार्दिक निमन्त्रणा गरिएको छ।