लेखक: space4knews

प्रहरीले नियमित गस्तीका क्रममा काठमाडौं, झापा र चितवनसहित देशका विभिन्न ठाँउबाट लागूऔषधसहित २३ जनालाई पक्राउ गरेको छ। पक्राउ परेकाहरूको साथबाट खैरो हेरोइन, गाँजा तथा चिकित्सकको सिफारिशमा मात्र पाइने ट्रामाडोल र डाइजेपाम लगायतका लागूऔषध बरामद गरिएको छ। २३ जेठ, काठमाडौं।

नियमित गस्तीमा रहेको प्रहरी टोलीले देशका विभिन्न ठाँउबाट लागूऔषधसहित २३ जनालाई पक्राउ गरेको छ। केन्द्रीय प्रहरी समाचार कक्षका अनुसार काठमाडौंबाट ११, झापाबाट ६, चितवनबाट २ तथा सिराहा, उदयपुर, दाङ र कैलालीबाट एक/एक जनालाई पक्राउ गरिएको हो। प्रहरीले तिनको साथबाट लागूऔषध खैरो हेरोइन र गाँजा साथै चिकित्सकको सिफारिशमा मात्र खरिद गर्न पाइने ट्रामाडोल, डाइजेपाम, फेनारगन र बुप्रेनोर्फिन बरामद गरेको छ।

समाचार सारांश देशका पूर्वशासक र आफूलाई मुख्य शक्ति ठान्ने राजनीतिक नेताहरू अहिले न्यायिक प्रक्रियाको सामना गरी आफ्नो अस्तित्व जोगाउन संघर्ष गरिरहेका छन्। परिवर्तन र नयाँ आशाका साथ उदाएका नयाँ नेतृत्वले आशा जगाए पनि यसले निम्त्याउन सक्ने थप जोखिमप्रति चिन्ता बढेको छ। बारम्बार परिवर्तन हुने सत्ता समीकरण र अस्थिर लोकतन्त्रका बीचमा सामान्य नागरिकहरू आफ्ना कर्ममा व्यस्त रहेका छन्। नाच, नेपाल, नाच- अब त्यो मादलको पुरानो तालमा होइन, हावाले बढार्दै ल्याउने हल्लाहरूको तालमा। चोकभरि भाषणका जंगली झारहरू फ़ैलिएका छन्, जहाँ कहिले देशको गौरव मानिने ‘सुनौला सिंहासन’ इतिहासको धूलोमा लडिरहेको छ। आजको काठमाडौं जुवाको अन्तिम दाउ जितेको उन्मत्त खेलाडी जस्तो छ- आँखामा रहस्यमय चमक, ओठमा काँपिरहेको मुस्कान। हिजो साइरनको हुरीभित्र निदाउने अनुहारहरू आज आफ्नै ओछ्यानको छाया देखेर झस्किन्छन्। भट्टीका चिया-कपहरूमा देशको मधुरो भाग्य उम्लिरहेको छ। कतै हजामको काँइयो भोलिको नक्सा कोरिरहेको छ, कतै पाङ्ग्राले डामेका सडकहरूमा क्रान्तिका फिरन्ते ज्योतिषहरू नयाँ ग्रहहरूको भविष्यवाणी गरिरहेका छन्। चियाको बाफभित्र अनुहार लुकाएर कानेखुसी गर्दै कोही भन्छन्- ‘देशलाई परिवर्तनको ऐतिहासिक संघारमा पुर्‍याएका छौं।’ अर्काेले थाम्न खोज्दा-खोज्दै फुस्किएको खित्का छोड्दै भन्छ- ‘यहाँ वकवासहरूको घरि-घरि भ्रूणहत्या हुन्छ।’ बिहानै ढोकामा बजारिन्छन् अखबारहरू- निद्रा भङ्ग गर्न आएका छापामार बुटझैँ। हिजो जो छाती पिटेर देशको ‘मियो’ भएको घोषणा गर्थे, आज ती व्यक्तिहरू अदालतका गल्लीहरूमा आफ्नै नामको अर्थ खोजिरहेका छन्। एउटा जीर्ण झ्यालको धमिलो बत्तीमुनि एउटा भूतपूर्व शासक एक्लै बसेको छ। उसले हाल बुझ्दैछ- सत्ता त वैशाखको घाममा ओइलाएर झर्ने फूलको माला पो रहेछ। रङ्गीन फोनहरू मौन छन्, दलबलका साइरनहरू थकित छन्, र अङ्गरक्षकहरू पनि आफ्नै छायाबाट तर्सन थालेका छन्। सडकहरूले ताली बजाइरहेका छन्, र एउटा मक्किएको पिपल ढलिरहेको छ- धूलोको बादल उठाउँदै, हाँगामा झुन्डिएर बसेका गुँडहरू तर्साउँदै, आकाशमा एउटा क्षणिक रिक्तता कोर्दै। तर जराहरूलाई राम्रोसँग थाहा छ- एउटा बूढो रुख ढल्दा कहिल्यै जङ्गलको कथा सकिन्न! मट्टितेलले भिजेको यो माटोमा नयाँ नायकहरू मसाल बोकेर दौडिरहेका छन्। उनीहरूको आँखामा यो शहर सफा गर्ने सपना छ, तर उनीहरू बिर्सन्छन्- सपनाले पनि कहिलेकाहीँ पुरै शहर जलाउँछ। आज न्याय र प्रतिशोध एउटै ऐनामा उभिएर एकअर्काको अनुहार नियालिरहेका छन्। टेलिभिजनका बहसहरूमा रिस र आक्रोशको व्यापार भइरहेको छ, र मानिसहरूले जाडोमा कोट फेरेझैं आफ्नो आस्थाको रङ्ग फेरिरहेका छन्। आज सिकार हुनेहरू हिजो नै शिकारी थिए। के भर, भोलि फेरि जङ्गलको नियम फेरिन सक्छ। एउटा अनन्त स्क्रोलमा बगिरहेको छ देश- हतकडी, भाषण, षड्यन्त्र, र उत्सव। लोकतन्त्र आजभोलि मोबाइलको स्क्रिनझैं घरि-घरि ‘स्लिप मोड’मा जान्छ। जसलाई जीवित राख्न हरेक क्षण कसैले न कसैले ‘रिफ्रेस’ गरिरहनुपर्छ। दूरदराजको पहाडको एकान्त आँगनमा एउटा बुढो किसान रेडियोको मधुरो आवाज सुन्दै अँध्यारोमा हँसिया धार लगाइरहेका छन्। उसले मुकुटहरूको उदय र पतन देखेको छ, रगतका नदीहरू बगेको देखेको छ, सपनाका जङ्गलहरू डढेर खरानी भएको देखेको छ। त्यसैले ऊ मुस्कुराउँछ- शान्त, गम्भीर, र निरपेक्ष। किनभने उसलाई थाहा छ- यो देश कहिल्यै सीधा रेखामा हिँड्दैन। यो त कहिले आँधीको छातीमा, कहिले आगोको जिब्रोमा, कहिले आफ्नै खरानीमाथि उभिएर, फेरि उठ्छ, र नाच्छ। नाच, नेपाल, नाच! नाच, नेपाल, नाच!

भारतको राजधानी दिल्लीमा कक्रोच जनता पार्टी (सीजेपी) को प्रदर्शनलाई मध्यनजर गर्दै त्यहाँको सुरक्षा व्यवस्था कडा गरिएको छ। ठट्टाको रूपमा स्थापना भएको भारतको सबैभन्दा ठूलो अनलाइन युवा अभियान पहिलोपल्ट सडकमा उत्रिएको छ। अमेरिकाबाट शनिबार बिहान दिल्ली आइपुगेका सीजेपीका संस्थापक अभिजीत दीपके जन्तर मन्तर पुगेका छन्। सुरक्षा कर्मचारीहरू ठूलो संख्यामा परिचालन गरिएको छ। सञ्चारकर्मीहरू पनि धेरै देखिएका छन्। बीबीसी हिन्दीका अनुसार प्रदर्शनकारी युवाहरूको संख्या बढ्दै गएको छ। सीजेपीविरुद्ध भारतीय जनता पार्टीका समर्थकहरू पनि जन्तर मन्तर पुगेका थिए। प्रहरीले उनीहरूलाई विरोध गर्न रोक्दै बाहिर निकालेका छन्। सीजेपीले नाम भारतका प्रधान न्यायाधीशबाट लिएको हो, जसले बेरोजगार युवालाई “कक्रोच” सँग तुलना गरेका थिए। गत महिना सुरु भएको यस अभियानले इन्स्टाग्राममा लगभग दुई करोड २० लाख फलोअर्स पाएको छ। यो सरकार प्रतिको असहमतिको सबैभन्दा ठूलो अभिव्यक्ति बनेको छ।

अभियानका संस्थापक अभिजीत दीपके अमेरिकाबाट शनिबार दिल्ली पुगेसँगै इन्दिरा गान्धी अन्तर्राष्ट्रिय विमानस्थलमा सुरक्षा थपिएको थियो। विमानस्थलबाट बाहिर निस्कँदै दीपकेले सञ्चारमाध्यमलाई भने, “शिक्षामन्त्री (धर्मेन्द्र प्रधान) ले राजीनामा दिनुपर्छ। पाँच विद्यार्थीहरूले आत्महत्या गरिसकेका छन्।” उहाँले ‘न्याशनल इलिजिबिलिटी इन्ट्रान्स टेस्ट’ (नीट) परीक्षाका प्रश्नपत्र चोरी भएपछि आत्महत्या गरेका विद्यार्थीहरूको कुरा समेत उल्लेख गर्नुभएको छ। त्यहाँबाट प्रदर्शन स्थल जन्तर मन्तर पुगेर उनले समर्थकहरूसँग नाराबाजी गरेका छन्। उनले भने, “पछिल्लो ५-१० दिनदेखि मानिसहरूले मलाई सोधिरहेको छन् कि सामाजिक सञ्जालमा पेज चलाएर के हुन्छ? क्यामेरा घुमाएर देखाउनुहोस्, कति कक्रोच घरबाट निस्केर जन्तर मन्तर पुगेका छन्।” शिक्षाविद् र लद्दाखका पर्यावरण अभियानकर्ता सोनम वाङ्चुकले दीपकेलाई प्रहरीले पक्राउ गर्न सक्ने बताएकी थिइन्। “राम्रो हुने आशा गरौं तर खराब अवस्थाको तयारी पनि गरौं, आउनुहोस् यो आन्दोलनलाई भारतको इतिहासकै सबैभन्दा शान्तिपूर्ण आन्दोलन बनाऔं,” उनले शुक्रबार राति सामाजिक सञ्जाल एक्समा लेखेकी छिन्।

तर पक्राउको अनुमान गलत सावित भयो। संस्थापक दीपके दिल्ली आइपुगेका छन् र यसअघि सामाजिक सञ्जालमा लगातार जानकारी दिएका थिए। उहाँले प्रदर्शनलाई शान्तिपूर्ण बनाउन आह्वान गरेका छन्। “कृपया किताब र हाम्रा झुण्डा ल्याउन नबिर्सनु होला,” लेखेका छन्, “प्रहरीलाई फूल दिन्छौं, त्यो करुणा र आभारको प्रतीक हुनेछ, हामीले आन्दोलनलाई प्रेम र शान्तिपूर्ण तरिकाले अगाडि बढाउनुपर्छ।” कक्रोच जनता पार्टीले जन्तर मन्तरमा प्रदर्शन गर्न अनुमति नपाउने अनुमान गरिएको थियो। शिव सेनाका नेता तथा राज्यसभाकी पूर्व सदस्य प्रियङ्का चतुर्वेदीले अनुमति दिएर दिल्ली प्रहरीले ठीक काम गरेको बताएकी छन्। सामाजिक सञ्जाल एक्समा उनले लेखेकी छन्, “साम्भावित रूपमा पहिलोपल्ट दिल्ली प्रहरीले सही काम गरेको छ।”

एक व्यङ्ग्यात्मक सामाजिक सञ्जाल अभियान, “कक्रोच जनता पार्टी” भर्चुअल संसारबाट वास्तविक दुनियाँ अर्थात् सडकमा ओर्लिएको छ। सीजेपीले एक्स ह्यान्डल ‘कक्रोच इज बैङ्क’ मा लेखेको थियो, “अब समय आइसक्यो- यस छोटो ठट्टालाई आन्दोलनमा परिणत गर्नुपर्छ।” यो अभियानमा भारतका चर्चित र वरिष्ठ कानुनविद् प्रशान्त भूषणले यसलाई जेन जी आन्दोलनको संज्ञा दिएका छन्। सामाजिक सञ्जालमा उनले भ्रष्टाचार, बेरोजगारी र दैनिक घोटाला भइरहेको उल्लेख गर्दै विदेश नीति पूर्ण रूपमा ध्वस्त भएको र अमेरिकामाथिको निर्भरता बढेको बताएका छन्। “निर्वाचन आयोग, न्यायपालिका, सञ्चार क्षेत्र लगायत विभिन्न संस्थाहरू कमजोर भएका छन्, हामी ठूलो आँधीबेहरीले घेरिएका छौँ। कक्रोच जनता पार्टी त्यो स्वाभाविक परिणाम हो,” उनले भने, “यस जेन जी आन्दोलनलाई समझदारीयुक्त समर्थन र मार्गदर्शन आवश्यक छ।” राजनीतिक विश्लेषक योगेन्द्र यादवले विरोधी दलहरूलाई सीजेपीको अभियानलाई समर्थन गर्न आग्रह गरे। सामाजिक सञ्जाल एक्समा एउटा भिडियो सार्वजनिक गर्दै उनले भने, पार्टीको नाम जे भए पनि सबै एक ठाउँमा उभिनु आवश्यक भएको बताइन्। “पार्टीभन्दा देश ठूलो छ, हामी सबै मिलेर यो देशलाई बचाउनुपर्छ,” उनले आह्वान गरे।

२३ जेठ, बागलुङ। ताराखोला गाउँपालिकामा निर्माणाधीन जलविद्युत् आयोजनास्थलमा काम गरिरहेका एक मजदुर फलामे पाइपले च्यापिएर ज्यान गुमाएका छन्। रोल्पा जिल्लाको सुनछहारी गाउँपालिका–३ का २० वर्षिया दिलबहादुर विक ताराखोला गाउँपालिका–५ धस्मरस्थित उक्त आयोजनामा कार्यरत थिए।

डोजरबाट खसेको पाइपले च्यापिएको कारण विक गम्भीर घाइते भएका थिए। उनलाई उपचारका लागि गलकोट नगरपालिका–३, हटियास्थित इमर्जेन्सी अस्पताल लगिएको थियो, जहाँ शनिबार दिउँसो उनको मृत्यु भएको जिल्ला प्रहरी कार्यालयका प्रमुख फणिन्द्रप्रसाद प्रसाईंले जानकारी दिएका छन्।

डोजर चालकलाई नियन्त्रणमा लिइएको छ भने विकको शव सोही अस्पतालमै राखिएको छ।

–रासस

एसीसी महिला प्रिमियर कप अन्तर्गत समूह चरणको अन्तिम खेलमा नेपालले हङकङसँग ६९ रनले पराजय व्यहोरेको छ। हङकङले दिएको ११० रनको लक्ष्य पछ्याउँदै नेपाल १३.३ ओभरमा मात्र ४० रनमा अलआउट भयो। सोनी पाख्रिनले सर्वाधिक १२ रन जोडिन् भने रुबिना क्षेत्रीले १० रन बनाइन्। अन्य खेलाडीद्वारा दोहोरो अंकमा रन बनाउन सकिएन।

हङकङका लागि इकरा सहरले ४ ओभरमा चार रन खर्चेर ४ विकेट लिए। चान का र मार्यम बिबीले २-२ विकेट हात पार्न सफल भए। सिउ मेइ र जोइलिन धलिवालले एक-एक विकेट लिए। टस हारेर पहिले ब्याटिङ गरेको हङकङले २० ओभरमा ३ विकेट गुमाएर १०९ रन बनाएको थियो। हङकङका लागि यासमिन दसवानीले अविजित ४२ रन बनाइन्। मारिको हिलले २९ रन र मारिना लाम्पलोह १८ रनमा अविजित थिइन्। नेपालका लागि रिया शर्मा र रुबिना क्षेत्रीले १-१ विकेट लिए।

यस हारका बाबजुद नेपालले क्वाटरफाइनलमा स्थान सुरक्षित गरेको छ। एसिया कप छनोटका लागि सेमिफाइनलमा प्रवेश गर्न आवश्यक हुनेछ।

२३ जेठ, काठमाडौं । राष्ट्रिय स्वतन्त्र पार्टी (रास्वपा)ले आज र भोलि जिल्लास्तरीय अधिवेशन गर्न लागेको छ। दुई दिनभित्र तदर्थ समिति गठन भएका जिल्लामा रास्वपाले अधिवेशन आयोजना गर्दैछ। राष्ट्रिय स्वतन्त्र पार्टीको संगठनात्मक नीतिअनुसार केन्द्रीय समितिद्वारा निर्णयअनुसार देशभर अधिवेशन शनिबार र आइतबार विदाको दिनमा सञ्चालन गरिएको हो।

पहिलो दिन, आज शनिबार, ३६ जिल्लामा अधिवेशन हुँदैछ। आज कोशी प्रदेशका ८ जिल्ला—झापा, मोरङ, तेह्रथुम, ताप्लेजुङ, भोजपुर, संखुवासभा, ओखलढुङ्गा र सुनसरी, मधेश प्रदेशका २ जिल्ला महोत्तरी र रौतहट, बागमती प्रदेशका ८ जिल्ला—दोलखा, काठमाडौं, भक्तपुर, नुवाकोट, मकवानपुर, काभ्रे, सिन्धुपाल्चोक र सिन्धुली, गण्डकी प्रदेशका ५ जिल्ला—स्याङ्जा, कास्की, पर्वत, बागलुङ र म्याग्दी, लुम्बिनी प्रदेशका ८ जिल्ला—गुल्मी, नवलपरासी, पाल्पा, कपिलवस्तु, दाङ, बाँके, बर्दिया र रोल्पा, कर्णाली प्रदेशका २ जिल्ला—कालीकोट र सल्यान, र सुदूरपश्चिम प्रदेशका ३ जिल्ला—बैतडी, बझाङ र दार्चुला मा अधिवेशन हुनेछ।

बाँकी २९ जिल्लामा आइतबार अधिवेशन हुने छ। यसमा कोशी प्रदेशका ४ जिल्ला—उदयपुर, सोलुखुम्बु, खोटाङ र इलाम, मधेश प्रदेशका ४ जिल्ला—सिराहा, धनुषा, पर्सा र सर्लाही, बागमती प्रदेशका २ जिल्ला—चितवन र ललितपुर, गण्डकी प्रदेशका ४ जिल्ला—तनहुँ, नवलपुर, गोरखा र लमजुङ, लुम्बिनी प्रदेशका ३ जिल्ला—अर्घाखाँची, रुपन्देही र प्युठान, कर्णाली प्रदेशका ६ जिल्ला—सुर्खेत, जाजरकोट, दैलेख, रुकुम, मुगु र जुम्ला र सुदूरपश्चिम प्रदेशका ६ जिल्ला—अछाम, डोटी, डडेलधुरा, कैलाली, कञ्चनपुर र बाजुरा रहेका छन्। विवादका कारण बारा जिल्लाको अधिवेशन भने २६ गते हुने तय भएको छ। रास्वपाले यसपाली प्रथम राष्ट्रिय महाधिवेशनअघि ७७ जिल्लामध्ये ६६ जिल्लामा अधिवेशन सम्पन्न गर्ने योजना बनाएको छ। बाँकी ११ जिल्लाको अधिवेशन राष्ट्रिय महाधिवेशनपछि क्रमिक रूपमा गरिने रास्वपाले जनाएको छ। यस्तै जेठ २६ गतेदेखि सात प्रदेशका अधिवेशन सुरु हुने महामन्त्री कवीन्द्र बुर्लाकोटीले जानकारी दिएका छन्।