काठमाडौं । भारतीय विदेश सचिव विक्रम मिस्री दुईदिने औपचारिक भ्रमणका लागि बुधबार काठमाडौं आइपुगेका छन् । नेपाली समकक्षी अमृतबहादुर राईको निमन्त्रणामा आएका मिस्रीले परराष्ट्रमन्त्री शिशिर खनालसँग शिष्टाचार भेट गरेका छन् । परराष्ट्र मन्त्रालयका अनुसार भेटमा नेपाल–भारतबीचको बहुआयामिक साझेदारीलाई थप प्रगाढ बनाउने र पुरानो मैत्रीपूर्ण सम्बन्ध सुदृढ गर्ने विषयमा छलफल भएको छ ।

मिस्रीको भ्रमणलाई प्रधानमन्त्री बालेन्द्र शाहको प्रस्तावित भारत भ्रमणको तयारीसँग समेत जोडेर हेरिएको छ । उनले भारतीय प्रधानमन्त्री नरेन्द्र मोदीका तर्फबाट शाहलाई भारत भ्रमणको निमन्त्रणा दिने अपेक्षा गरिएको छ । प्रधानमन्त्री शाहको भ्रमण यही महिनाको अन्त्यतिर हुने अपेक्षा भए पनि दुवै सरकारले मिति औपचारिक रूपमा घोषणा गरेका छैनन् ।

पदभार सम्हालेपछि भारतमा हुने यो पहिलो द्विपक्षीय भ्रमण हुनेछ । मिस्री र परराष्ट्र सचिव राईबीच बुधबार कार्यभोजसहित प्रतिनिधिमण्डलस्तरीय वार्ता हुने कार्यक्रम छ । वार्तामा द्विपक्षीय सम्बन्धका विभिन्न पक्ष, नेपालले प्रस्ताव गरेको आर्थिक सहायता प्याकेज, भारतीय सहयोगमा सञ्चालित परियोजनाको समीक्षा र सहकार्यका नयाँ क्षेत्रबारे छलफल हुने बताइएको छ ।

भ्रमणका क्रममा मिस्रीले अर्थमन्त्री स्वर्णिम वाग्लेसँग पनि भेट गर्ने कार्यक्रम छ । परराष्ट्र मन्त्रालयका एक वरिष्ठ अधिकारीका अनुसार बिहीबार प्रधानमन्त्री शाहसँग भेट गरेपछि उनी नयाँदिल्ली फर्कनेछन् । भारतको विदेश मन्त्रालयले मिस्रीको भ्रमणमा द्विपक्षीय, क्षेत्रीय तथा साझा चासोका अन्तर्राष्ट्रिय विषयमा छलफल हुने जनाएको छ । नियमित उच्चस्तरीय आदानप्रदानको निरन्तरताका रूपमा हुने यो भ्रमणले समग्र साझेदारी थप सुदृढ गर्ने मन्त्रालयको भनाइ छ ।

काठमाडौं । पूर्वराष्ट्रपति एवं नेकपा एमालेकी वरिष्ठ नेता विद्यादेवी भण्डारीले राजनीतिक दलहरूबारे फैलाइएका भ्रम र अफवाहको तथ्य तथा प्रमाणका आधारमा खण्डन गर्नुपर्ने बताएकी छन् । बुधबार काठमाडौंमा आयोजित प्रवासी नेपाली मञ्च, अन्तर्राष्ट्रिय कमिटीको दोस्रो अधिवेशनलाई सम्बोधन गर्दै भण्डारीले विदेशमा रहेका नेपाली समुदायसम्म नेपालको राजनीतिक घटनाक्रमबारे सही सूचना पुर्‍याउन आग्रह गरिन् । राजनीतिक दलहरूले देश र जनताको हितमा गरेका काम तथा उपलब्धिको वस्तुनिष्ठ मूल्याङ्कन आवश्यक रहेको उनको भनाइ थियो । सामाजिक सञ्जाललगायतका माध्यमबाट फैलिने गलत सूचनाले समाजमा भ्रम सिर्जना गरेको भन्दै उनले स्वस्थ र तथ्यपरक बहसको वातावरण बनाउन प्रवासी नेपालीहरूको भूमिका महत्त्वपूर्ण हुने बताइन् । भण्डारीले राष्ट्रिय हित र लोकतान्त्रिक मूल्य–मान्यताको रक्षामा दृढतापूर्वक उभिन पनि मञ्चका सदस्यहरूलाई आग्रह गरिन् ।

सोही कार्यक्रममा एमाले महासचिव शंकर पोखरेलले पछिल्लो निर्वाचनमा पार्टीले व्यहोरेको पराजयको गम्भीर समीक्षा गर्दै वैचारिक, राजनीतिक र सङ्गठनात्मक पुनर्गठन गर्नुपर्ने बताए । फागुन २१ गतेको निर्वाचनमा प्रत्यक्षतर्फ नौ सिटमा सीमित हुनु पार्टीका लागि अकल्पनीय हार भएको उनको टिप्पणी थियो । विगतमा गरेका कामका आधारमा जनमत फर्किने अपेक्षा गरिए पनि परिणाम अनुकूल नआएको उनले स्वीकार गरे । पोखरेलले भदौ २३ र २४ गतेका घटनाले एमालेको राजनीतिक जीवनमा ठूलो धक्का पुर्याएको बताए । त्यसपछिको अवस्थालाई पार्टीले प्रतिगमनतर्फ उन्मुख भएको विश्लेषण गर्दै अघि बढे पनि निर्वाचन परिणामले पार्टीको अवस्था र भविष्यबारे थप समीक्षा आवश्यक बनाएको उनको भनाइ थियो ।

संविधान जारी भएपछि केपी शर्मा ओली नेतृत्वमा बनेको नौ महिने सरकारले नाकाबन्दीको सामना गर्दै जनतामा आशा जगाएको पोखरेलले दाबी गरे । तर, २०७४ सालमा बनेको शक्तिशाली सरकारले समेत वामपन्थी जनमत विस्तार गर्न नसक्नुको कारण खोज्नुपर्ने उनले बताए । निर्वाचनपछि कार्यकर्ताका सुझाव समेटेर समीक्षा प्रतिवेदन तयार गरिएको र सचिवालयले पार्टी पुनर्गठनसम्बन्धी कार्यदल गठन गरेको उनले जानकारी दिए । कार्यदलले तयार पारेको ४० बुँदे सङ्कल्प प्रस्तावका आधारमा केन्द्रीय कमिटीको तेस्रो बैठकले दुई कार्यभार र १५ वटा कार्ययोजना अघि सारेको उनको भनाइ थियो । विगतका कमजोरीको वस्तुनिष्ठ समीक्षा र पार्टीभित्रको एकताबाट मात्रै वर्तमान चुनौतीको सामना गर्न सकिने पोखरेलले बताए । वामपन्थी शक्तिले विगतमा हासिल गरेको जनमत र उपलब्धिको समीक्षा गर्दै आगामी कार्यदिशा तय गर्नुपर्नेमा उनले जोड दिए ।

काठमाडौं । नेपाली कांग्रेसले पछिल्लो राजनीतिक घटनाक्रम र समसामयिक विषयमा छलफल गर्न शीर्ष नेताहरूको बैठक बोलाएको छ। पार्टी केन्द्रीय कार्यालय सानेपामा केहीबेरपछि बस्ने गरी बैठक आह्वान गरिएको महामन्त्री प्रदीप पौडेलले जानकारी दिए। बैठकमा पार्टी सभापति, वरिष्ठ उपसभापति, उपसभापति, महामन्त्री तथा विपक्षी दलका नेताको सहभागिता रहनेछ।

भ्रष्टाचार प्रमाणित भए राजनीति छाडेर भाँडा माझ्न तयार छु: लिङ्देन
काठमाडौं । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले आफ्नो सम्पत्ति छानबिन गर्न सरकारलाई पुनः चुनौती दिएका छन्। छानबिनबाट भ्रष्टाचार गरेको प्रमाणित भए राजनीति छाडेर विपक्षीको घरमा भाँडा माझ्नसमेत तयार रहेको उनले बताए। बुधबार राप्रपा काठमाडौं जिल्ला समितिले आयोजना गरेको कार्यक्रममा बोल्दै लिङ्देनले सार्वजनिक पद धारण गरेका व्यक्तिहरूको सम्पत्ति छानबिन हुनुपर्ने माग दोहोर्‍याए। त्यसको सुरुवात आफैंबाट गर्नुपर्ने उनको भनाइ थियो।

सरकारले गठन गरेको सम्पत्ति छानबिन आयोगको काम रोकिएको भन्दै प्रश्न उठाएका लिङ्देनले आफूले स्वेच्छाले सम्पत्ति विवरण बुझाइसकेको जानकारी दिए। छानबिनमा भ्रष्टाचार प्रमाणित भए जुनसुकै सजाय भोग्न तयार रहेको उनले बताए। आफू सिद्धान्त, वचन र व्यवहारबाट भ्रष्टाचारविरोधी रहेको दाबी गर्दै उनले राप्रपाले पनि भ्रष्टाचारविरुद्ध दृढतापूर्वक आवाज उठाउनुपर्नेमा जोड दिए। पार्टीको आगामी महाधिवेशनबारे बोल्दै लिङ्देनले नेता तथा कार्यकर्तालाई संयमित रहन आग्रह गरे। सकेसम्म सहमतिबाट नेतृत्व चयन गर्नुपर्ने र सहमति नजुटे स्वस्थ प्रतिस्पर्धामा जानुपर्ने उनको धारणा थियो। नेतृत्वका आकांक्षीहरूले व्यक्तिगत स्वार्थका लागि एकअर्काको मानमर्दन गर्न वा पार्टीको मनोबल कमजोर बनाउने गतिविधि गर्न नहुने उनले बताए। पार्टीको एकता, प्रतिष्ठा र हितलाई प्राथमिकतामा राख्दै महाधिवेशन सफल बनाउन उनले आग्रह गरे।

काठमाडौं । नेपाल प्रहरीका नवनियुक्त प्रहरी महानिरीक्षक (आईजीपी) डा. मनोजकुमार केसीलाई आजै दर्ज्यानी चिह्न प्रदान गरिने भएको छ। गृह मन्त्रालयले आज साँझ ५ः४५ बजे मन्त्रालयमा फुली लगाउने कार्यक्रम तय गरेको हो। मन्त्रालय स्रोतका अनुसार केसीले बिहीबार बिहान दर्ज्यानी चिह्न प्रदान गर्ने कार्यक्रम राख्न आग्रह गरेका थिए। तर, गृहमन्त्री सुधन गुरुङको आग्रहपछि उनी आजै फुली लगाएर पदबहाली गर्न तयार भएका हुन्।

दर्ज्यानी चिह्न प्रदान गरेपछि केसीलाई प्रहरी प्रधान कार्यालय लैजान औपचारिक समारोहमा प्रयोग गरिने कालो गाडी गृह मन्त्रालय पठाइएको प्रहरी प्रधान कार्यालय स्रोतले जनाएको छ। नवनियुक्त आईजीपीको स्वागत तथा पदबहालीका लागि प्रहरी प्रधान कार्यालयमा आवश्यक तयारी पनि सुरु गरिएको छ।

काठमाडौं । सरकारले प्रहरी महानिरीक्षक (आईजीपी) दानबहादुर कार्कीलाई प्रधानमन्त्रीको सुरक्षा सल्लाहकारमा खटाउँदै नेपाल प्रहरीको नेतृत्वमा प्रहरी अतिरिक्त महानिरीक्षक (एआईजी) डा. मनोजकुमार केसीलाई बढुवा गर्ने निर्णय गरेको छ ।

बुधबार बसेको मन्त्रिपरिषद् बैठकले प्रधानमन्त्री तथा मन्त्रिपरिषद्को कार्यालयमा प्रहरी महानिरीक्षकस्तरको सुरक्षा सल्लाहकार पद सिर्जना गरी कार्कीलाई उक्त जिम्मेवारी दिने निर्णय गरेको हो ।

सरकारका प्रवक्ता एवं मन्त्री सस्मित पोखरेलका अनुसार मुलुकको शान्ति सुरक्षा व्यवस्था सुदृढ बनाउन प्रधानमन्त्रीलाई आवश्यक सुरक्षा सल्लाह, सुझाव तथा परामर्श उपलब्ध गराउने उद्देश्यले उक्त पद सिर्जना गरिएको हो ।

कार्कीलाई सुरक्षा सल्लाहकारमा खटाउने निर्णयसँगै रिक्त हुने प्रहरी महानिरीक्षक पदमा डा. केसीलाई बढुवा गरिएको छ । प्रहरी नियमावली, २०७१ को नियम ४१ बमोजिम केसीको बढुवा २०८३ कात्तिक १८ गतेदेखि लागू हुने मन्त्री पोखरेलले जानकारी दिए ।

निर्णयसँगै केसीले नेपाल प्रहरीको नेतृत्व सम्हाल्नेछन् भने कार्कीले प्रधानमन्त्रीलाई सुरक्षा मामिलामा परामर्श दिने जिम्मेवारी निर्वाह गर्नेछन् ।

काठमाडौं । सरकारले दुईवटा अध्यादेश जारी गर्न राष्ट्रपतिसमक्ष सिफारिस गर्ने निर्णय गरेको छ। मंगलबार बसेको मन्त्रिपरिषद् बैठकले उक्त निर्णय गरेको सरकारका प्रवक्ता तथा मन्त्री सस्मित पोखरेलले जानकारी दिए।

उनका अनुसार प्रेस काउन्सिल नेपाल ऐन, २०४८ लाई संशोधन गर्न बनेको अध्यादेश र संस्कृति, पर्यटन तथा नागरिक उड्डयनलगायत केही नेपाल ऐनलाई संशोधन गर्न बनेको अध्यादेश जारी गर्न राष्ट्रपति रामचन्द्र पौडेलसमक्ष सिफारिस गरिएको हो। अध्यादेशमा प्रस्तावित व्यवस्थाबारे भने उनले विस्तृत जानकारी दिएनन्।

मन्त्रिपरिषद् बैठकपछि सञ्चारकर्मीसँग कुरा गर्दै प्रवक्ता पोखरेलले समाचार कक्षमा प्रहरी प्रवेश र पत्रकारमाथि भएको भनिएको धरपकडबारे पनि सरकारको धारणा राखे। उनले उक्त गतिविधि प्रहरीको आन्तरिक सूचना चुहावटसम्बन्धी जाँचबुझका लागि भएको दाबी गरे।

प्रधानमन्त्रीले प्रहरी महानिरीक्षकको राजीनामा मागेको वा कारबाही गर्न लागेको भन्ने समाचारलाई भ्रामक भन्दै उनले त्यस्तो सूचना कहाँबाट आयो र तथ्यजाँच कसरी गरियो भन्ने विषयमा प्रहरीले बुझ्न खोजेको जिकिर गरे।

पोखरेलले उक्त कार्य सरकारको अनुमति लिएर नभएको र सरकार तथा प्रधानमन्त्रीलाई त्यसबारे पूर्वजानकारी नरहेको दाबीसमेत गरे।

प्रधानमन्त्रीलाई घटनाबारे जानकारी भएपछि कुनै पनि पत्रकारलाई सोधपुछका लागि हिरासतमा नराख्न निर्देशन दिइएको उनले बताए। पत्रकारलाई गिरफ्तार वा नियन्त्रणमा लिइएको भन्ने विवरणलाई समेत उनले अस्वीकार गरे।

समाचार कक्षमा प्रहरी प्रवेश र पत्रकारमाथिको धरपकडको विषयमा प्रश्न उठिरहेका बेला सरकारले त्यसलाई प्रहरीको आन्तरिक जाँचबुझका रूपमा व्याख्या गरेको हो।

निर्णयहरूको सूची :

अर्थ मन्त्रालय :

– एसियाली विकास बैंक (ADB) बाट सडक सुधारको लागि प्राप्त हुने २८५ मिलियन अमेरिकी डलर बराबरको सहुलियतपूर्ण ऋण र २० मिलियन अमेरिकी डलर बराबरको अनुदान सहायता स्वीकार गर्ने।  

– नेपाल पुनर्बीमा कम्पनी लिमिटेडमा नेपाल सरकारको थप हकप्रद शेयर लगानी गर्न सहमति प्रदान गर्ने।   

कृषि, वन तथा पर्यावरण मन्त्रालय :

– नानो फर्टिलाइजर, बायोस्टिमुलेन्ट र व्यावसायिक रूपमा उत्पादन तथा बिक्री वितरण हुने जैविक तथा प्राङ्गारिक मल आवश्यक पदार्थको सूचीमा समावेश गर्ने र मल नियन्त्रण आदेश, २०८३ स्वीकृत गर्ने। 

परराष्ट्र मन्त्रालय : 

– तुर्किएको आन्ताल्यामा २०८३ कात्तिक २३ देखि मङ्सिर ४ गतेसम्म आयोजना हुने संयुक्त राष्ट्र संघीय जलवायु परिवर्तनसम्बन्धी महासन्धिका पक्ष राष्ट्रहरूको ३१औँ सम्मेलन (COP31) मा सहभागी हुन उच्चस्तरीय प्रतिनिधिमण्डललाई स्वीकृति प्रदान गर्ने।

काठमाडौं । नेपाली कांग्रेसका नेता डा. प्रकाशशरण महतले पार्टीको १५औँ महाधिवेशन मंसिर २१, २२ र २३ गते काठमाडौंमा आयोजना गरिने बताएका छन्। मंगलबार चुनदेवीस्थित पार्टी सम्पर्क कार्यालयमा आयोजित पत्रकार भेटघाटमा उनले शेरबहादुर देउवाको नेतृत्वमा महाधिवेशन सम्पन्न गरेर नयाँ नेतृत्वलाई जिम्मेवारी हस्तान्तरण गरिने बताए।
महाधिवेशनको तयारीबारे जानकारी दिँदै महतले हालसम्म ६१८ पालिका, २२८ प्रदेशसभा निर्वाचन क्षेत्र र ११४ प्रतिनिधिसभा निर्वाचन क्षेत्रमा अधिवेशन सम्पन्न भएको बताए। उनका अनुसार २६ जिल्लामा जिल्ला अधिवेशन सकिएको छ भने थप चार जिल्लामा प्रक्रिया अघि बढिरहेको छ। छोटो समयमै देशभरका कार्यकर्ताको उत्साहपूर्ण सहभागितामा अधिवेशन प्रक्रिया अघि बढेको उनको भनाइ थियो।
विभिन्न तहका अधिवेशन स्थानीय कार्यकर्ताले आफ्नै स्रोतसाधन र स्वैच्छिक सहयोगबाट सम्पन्न गरिरहेको उनले जानकारी दिए। महतले विशेष अधिवेशनबाट आएको नेतृत्वलाई निर्वाचन आयोगले दिएको मान्यताप्रति असहमति जनाउँदै त्यससम्बन्धी विवादमा सर्वोच्च अदालतमा पुनरावलोकन प्रक्रिया अघि बढिरहेको बताए। पुनरावलोकनबाट देउवा नेतृत्वकै पक्षले आधिकारिक मान्यता पाउने विश्वास उनले व्यक्त गरे।
विशेष अधिवेशन विधि र विधानअनुसार नभएको दाबी गर्दै महतले त्यसलाई मान्यता दिलाउने क्रममा भएका भनिएका गतिविधिबारे अनुसन्धान गर्न माग गरे। उनले विशेष अधिवेशनबाट आएको नेतृत्वले पार्टीको वैचारिक तथा सांगठनिक पहिचान जोगाउन नसकेको आरोपसमेत लगाए। बीपी कोइरालाको प्रजातान्त्रिक समाजवादी विचार र सहमतिका आधारमा निर्णय गर्ने परम्परालाई आफूहरूले निरन्तरता दिइरहेको उनको भनाइ थियो। महतले देशभरका नेता तथा कार्यकर्तालाई मंसिर २१ गतेदेखि हुने भनिएको महाधिवेशन प्रक्रियामा सहभागी हुन आग्रह गरे।

काठमाडौं । नेपाल नागरिक उड्डयन प्राधिकरण (क्यान) ले सोलुखुम्बुको फेरिचेमा आज भएको हेलिकोप्टर दुर्घटनाको छानबिन सुरु भएको जानकारी दिएको छ । क्यानले आज एक विज्ञप्ति जारी गर्दै दुर्घटनाको सम्बन्धमा छानबिन प्रक्रिया अघि बढिसकेको र प्राप्त तथ्य, विश्लेषण तथा निष्कर्षका आधारमा प्रचलित कानुनअनुसार आवश्यक कारबाही र सुधारात्मक उपायहरू अवलम्बन गरिने उल्लेख गरेको छ ।

विज्ञप्तिमा भनिएको छ, “दुर्घटनामा परी भारतको तमिलनाडु राज्य, चेन्नई निवासी अन्दाजी ४७ वर्षीय वसन्तकुमार बलरामुडुको निधन भएको छ।” आज बिहान ८:१२ बजे सोलुखुम्बुको फेरिचे क्षेत्रमा अवतरण गर्ने क्रममा एयर डाइनेष्टीको नाइन एन-एओडी र फिस्टेल एयरको नाइन एन–एजेआर हेलिकोप्टरहरू दुर्घटनामा परेका थिए ।

दुर्घटनामा फिस्टेल एयरको हेलिकोप्टरमा दुई विदेशी नागरिक सवार थिए। घाइते भएकाहरूलाई थप उपचारका लागि काठमाडौंस्थित मेडिसिटी अस्पतालमा ल्याइएको छ। साथै, मृतक भारतीय नागरिकको शव व्यवस्थापनसम्बन्धी आवश्यक प्रक्रिया अघि बढाइएको क्यानले जानकारी दिएको छ।

काठमाडौं । सरकारले लुम्बिनी विकास कोषको सदस्य सचिवमा इन्जिनियर सन्तोष पाण्डेयलाई नियुक्त गरेको छ। मंगलबार बसेको मन्त्रिपरिषद् बैठकले उनलाई उक्त जिम्मेवारी दिने निर्णय गरेको हो। रुपन्देहीको तिलोत्तमा नगरपालिकाका स्थायी बासिन्दा पाण्डेयले प्रधानमन्त्री बालेन्द्र शाह काठमाडौं महानगरपालिकाको प्रमुख हुँदादेखि नै उनको सचिवालयमा काम गर्दै आएका थिए।

नियुक्तिसँगै पाण्डेयले लुम्बिनीको संरक्षण, व्यवस्थापन तथा विकाससँग सम्बन्धित काममा कोषको सदस्य सचिवका रूपमा जिम्मेवारी सम्हाल्नेछन्। यसअघि कोषको सदस्य सचिवमा दीपक श्रेष्ठ थिए। सरकारले केही दिनअघि मात्रै कोषको उपाध्यक्षमा गायिका आनि छोइङ डोल्मालाई नियुक्त गरेको थियो। उनको नियुक्तिबारे विवाद उठिरहेका बेला सरकारले सदस्य सचिवमा पाण्डेयलाई नियुक्त गरेको हो।

काठमाडौं । भारतीय विदेश सचिव विक्रम मिश्री दुईदिने औपचारिक भ्रमणका लागि भोलि बुधबार काठमाडौं आउने भएका छन्। प्रधानमन्त्री बालेन्द्र शाहको प्रस्तावित भारत भ्रमणको तयारी भइरहेका बेला मिश्री नेपाल आउन लागेका हुन्। परराष्ट्र सचिव अमृतबहादुर राईको निमन्त्रणामा आउन लागेका मिश्री बिहीबार स्वदेश फर्कने कार्यक्रम छ। परराष्ट्र मन्त्रालयले सोमबार विज्ञप्ति जारी गर्दै उनको भ्रमणबारे औपचारिक जानकारी दिएको हो।

काठमाडौं बसाइका क्रममा मिश्रीले परराष्ट्र सचिव राईसँग द्विपक्षीय वार्ता गर्नेछन्। वार्तामा नेपाल–भारत सम्बन्धका विविध आयामको समीक्षा तथा आपसी हितका विषयमा विचार आदानप्रदान हुने मन्त्रालयले जनाएको छ। मिश्रीको भ्रमणका क्रममा प्रधानमन्त्री शाहको प्रस्तावित भारत भ्रमणको तयारी र सम्भावित एजेन्डाबारे पनि छलफल हुने निकट स्रोतले जनाएको छ। उनले उच्चस्तरीय राजनीतिक भेटघाटसमेत गर्ने बताइएको छ।

यद्यपि, परराष्ट्र मन्त्रालयले सार्वजनिक गरेको विवरणमा सचिवस्तरीय द्विपक्षीय वार्ताबारे मात्र उल्लेख गरिएको छ। प्रधानमन्त्री शाह मंसिरको पहिलो साता भारत भ्रमणमा जाने चर्चा भए पनि भ्रमणको मिति र विस्तृत कार्यतालिका औपचारिक रूपमा सार्वजनिक भइसकेको छैन। मिश्रीको काठमाडौं भ्रमणले उच्चस्तरीय भ्रमणको तयारी अघि बढाउन सहयोग पुग्ने अपेक्षा गरिएको छ। परराष्ट्र मन्त्रालयका अनुसार दुई देशबीचको घनिष्ठ तथा मैत्रीपूर्ण सम्बन्धलाई थप सुदृढ बनाउने उद्देश्यले भारतीय विदेश सचिवको भ्रमण तय गरिएको हो।

काठमाडौं । प्रतिपक्षी दल कांग्रेस र एमालेका नेताहरूले संसद् बैठक तत्काल आह्वान गर्न सभामुख डोलप्रसाद अर्यालको ध्यानाकर्षण गराएका छन्। मंगलबार सिंहदरबारमा सभामुखसँग छुट्टाछुट्टै भेट गर्दै उनीहरूले पछिल्ला संवेदनशील घटनाक्रमबारे संसद्मा छलफल आवश्यक रहेको बताएका हुन्।

भेटमा सभामुख अर्यालले छिटो संसद् बोलाउने प्रतिबद्धता जनाएको नेताहरूले जानकारी दिएका छन्।

सभामुखसँगको भेटपछि कांग्रेस संसदीय दलका नेता भीष्मराज आङ्देम्बेले सार्वजनिक भएका गम्भीर विषयलाई लामो समयसम्म अनिर्णीत राख्न नहुने बताए। ती विषयमा संसद्भित्र व्यापक छलफल गरेर निकास खोज्नुपर्ने उनको भनाइ थियो।

आङ्देम्बेले संसद् छलेर अध्यादेशमार्फत विभिन्न क्षेत्रमा हस्तक्षेप गर्ने काम भइरहेको आरोप लगाए। लोकतान्त्रिक मूल्यमान्यताको संरक्षण र सरकारलाई जवाफदेही बनाउन संसद् बैठक चाँडो बोलाउनुपर्नेमा उनले जोड दिए।

कर्मचारीहरूलाई कार्यस्थलबाट नियन्त्रणमा लिएर प्रधानमन्त्री कार्यालय वा अन्यत्र लैजाने गरिएको आरोपसमेत उनले लगाए। त्यस्ता घटनाले त्रासको वातावरण सिर्जना गरेको दाबी गर्दै उनले यसको समाधान पनि संसदीय छलफलबाट खोजिनुपर्ने बताए।

त्यस्तै, एमाले संसदीय दलकी उपनेता पद्मा अर्यालले संसद् बैठक नचलेको अवस्थामा विभिन्न समस्या र विकृति देखिएको भन्दै तत्काल बैठक आह्वान गर्नुपर्ने बताइन्।

सरकार, प्रशासन, न्यायपालिका र राजनीतिक दलभित्र बिचौलियाको प्रभाव बढेको उनको आरोप थियो। त्यस्ता गतिविधिको खोजी र नियन्त्रणका लागि राजनीतिक दलहरूले जिम्मेवारीपूर्वक भूमिका निर्वाह गर्नुपर्ने उनले बताइन्।

यसअघि सोमबार बसेको विपक्षी दलहरूको बैठकले संसद् बैठक आह्वानको माग गर्दै सभामुखको ध्यानाकर्षण गराउने निर्णय गरेको थियो। सोही निर्णयअनुसार कांग्रेस र एमालेका नेताहरूले मंगलबार सभामुखसँग भेट गरेका हुन्।

काठमाडौं । पुष्पकमल दाहाल ‘प्रचण्ड’ संयोजक रहेको नेपाली कम्युनिस्ट पार्टी र उमा भुजेल नेतृत्वको नेपाल कम्युनिस्ट पार्टीबीच पार्टी एकता गर्ने सहमति भएको छ। मंगलबार काठमाडौंमा आयोजित एकता घोषणा कार्यक्रममा दुई पार्टीबीच १० बुँदे सहमतिपत्रमा हस्ताक्षर भएको हो।

सहमतिपत्रमा संघीय लोकतान्त्रिक गणतन्त्रको सुदृढीकरण, राष्ट्रिय स्वाधीनताको रक्षा, सुशासन, सामाजिक न्याय र आर्थिक–सामाजिक रूपान्तरणका लागि कम्युनिस्ट आन्दोलनको बृहत् एकीकरण आवश्यक रहेको उल्लेख छ।

एकीकृत पार्टीको मार्गनिर्देशक सिद्धान्त मार्क्सवाद–लेनिनवाद र नेपाली क्रान्तिको कार्यक्रम नेपाली विशेषताको वैज्ञानिक समाजवाद रहने सहमति भएको छ। तत्कालीन कार्यनीतिका रूपमा संघीय लोकतान्त्रिक गणतन्त्रको रक्षा गर्दै आर्थिक समृद्धि, सामाजिक न्याय र रूपान्तरणमार्फत समाजवादको आधार तयार गर्ने लक्ष्य राखिएको छ।

दुई पार्टीले आन्दोलन मूलतः शान्तिपूर्ण हुने जनाएका छन्। समय र परिस्थितिअनुसार आन्दोलनका विभिन्न रूप अपनाउने तथा सडक, संसद् र सरकारलाई राजनीतिक संघर्षका मोर्चाका रूपमा उपयोग गर्ने सहमतिपत्रमा उल्लेख छ।

संगठनात्मक एकता तथा समायोजनको काम आगामी मंसिर मसान्तभित्र सम्पन्न गर्ने सहमति भएको छ। केन्द्रीय समिति, कार्यसमिति, सचिवालय, कार्य संयोजन समिति तथा अन्य केन्द्रीय निकायसँगै सबै तहका पार्टी समिति र जनसंगठनमा सहमतिका आधारमा समायोजन गरिनेछ। एकता राष्ट्रिय महाधिवेशन भने आगामी स्थानीय तहको निर्वाचनपछि आयोजना गर्ने तय भएको छ।

कार्यक्रमलाई सम्बोधन गर्दै प्रचण्डले एमालेसहित सबै कम्युनिस्ट घटकलाई एकतामा आउन आह्वान गरे। विगतमा विभिन्न कम्युनिस्ट समूहलाई एकताबद्ध गर्ने प्रयास भएको स्मरण गर्दै उनले पछिल्लो एकतालाई त्यसैको नयाँ कडीका रूपमा व्याख्या गरे।

‘यो अन्तिम होइन। हामीले अरू थुप्रैलाई पनि एकताबद्ध गर्न बाँकी छ,’ प्रचण्डले भने।

उनले केपी शर्मा ओली, मोहनविक्रम सिंह, मोहन वैद्य र नेत्रविक्रम चन्दलगायत नेताहरूलाई देशको आवश्यकता हेरेर एकताबद्ध हुन आग्रह गरे। विगतमा माओवादी र एमालेका विभिन्न धारामा रहेका समूहलाई एक ठाउँमा ल्याउन सोच र दृष्टिकोण फराकिलो बनाउनुपर्ने उनको भनाइ थियो।

नेपाल कम्युनिस्ट पार्टीकी महासचिव उमा भुजेलले पनि राजनीतिक उपलब्धिको रक्षा, राष्ट्रिय स्वाधीनताको संरक्षण र वर्तमान संकटको सामना गर्न प्रचण्ड तथा माधवकुमार नेपालको नेतृत्वमा कम्युनिस्ट शक्तिहरू गोलबन्द हुनुपर्ने बताइन्।

जनयुद्ध र विभिन्न जनआन्दोलनबाट प्राप्त उपलब्धि कमजोर पार्ने प्रयास भइरहेको उनको आरोप थियो। त्यसको सामना गर्न कम्युनिस्टसँगै देशभक्त र लोकतन्त्रवादी शक्तिबीच पनि सहकार्य आवश्यक रहेको उनले बताइन्।

भुजेलले कम्युनिस्ट आन्दोलनको घट्दो जनसमर्थनबारे गम्भीर समीक्षा गर्नुपर्नेमा जोड दिइन्। विगतमा ठूलो जनमत र दुईतिहाइ बहुमतको सरकारको नेतृत्व गरेका कम्युनिस्टहरू अहिले कमजोर अवस्थामा पुगेको भन्दै उनले नेतृत्व र संगठनको रूपान्तरण आवश्यक रहेको बताइन्।

पार्टीको आकार बढाउनुका साथै कार्यशैली र संगठनमा सुधार गर्नुपर्ने उनको भनाइ थियो। ‘ठूलो पार्टी पनि बनाउने, राम्रो पनि भएपछि समाजवादमा पुग्ने उद्देश्यसहित एकता गर्न जरुरी छ,’ उनले भनिन्।