१ वैशाख, काठमाडौं । नेपाली कांग्रेसका महामन्त्री प्रदीप पौडेलले नयाँ वर्षको अवसरमा चारवटा नयाँ संकल्प प्रस्तुत गरेका छन्। उनले सामाजिक सञ्जालमार्फत शुभकामना सन्देश जारी गर्दै देशको बदलिँदो परिस्थिति र नागरिकका अपेक्षाहरूलाई ध्यानमा राख्दै चार विषयमा जीवन समर्पित गर्ने प्रतिबद्धता व्यक्त गरेका छन्।
पार्टीभित्रका सबै मतभेदलाई संवादमार्फत समाधान गर्दै कांग्रेसलाई कानुन र प्रक्रियामा आधारित एकताबद्ध, आधुनिक र प्रविधिमुखी पार्टी बनाउन तथा नयाँ पुस्ताका नवीन सपना र विचारलाई पार्टीको मुख्य प्रवाहमा जोड्न निरन्तर सक्रिय रहने उनले बताएका छन्।
ज्ञानमा आधारित अर्थतन्त्र र युवा उद्यमशीलतालाई राष्ट्रिय बहसको मुख्य एजेन्डा बनाउँदै युवा जनशक्तिलाई स्वदेशमै मर्यादित अवसर सिर्जना गर्ने ठोस नीतिगत नेतृत्व र कार्यान्वयनका लागि क्रियाशील रहने प्रतिबद्धता व्यक्त गरेका छन्।
‘भ्रष्टाचारविरुद्ध शून्य सहिष्णुताको नीति व्यवहारमा उतार्दै राजनीतिलाई जनसेवा र सदाचारको मार्गमा डोहोर्याउने तथा आम जनसरोकारका विषय–महँगी नियन्त्रण, गुणस्तरीय शिक्षा र सर्वसुलभ स्वास्थ्य सेवा जस्ता विषयमा परिणाममुखी र संरचनात्मक सुधारका लागि प्रभावकारी भूमिका निर्वाह गर्नेछु,’ उनले तेस्रो संकल्पमा उल्लेख गरेका छन्।
देशको दीर्घकालीन हित, राजनीतिक स्थिरता र आर्थिक समृद्धि साथै अन्तर्राष्ट्रिय सम्बन्धको सन्तुलित विकासका लागि सबै राजनीतिक दलबीच न्यूनतम साझा सहमति निर्माण गर्न जिम्मेवार र समन्वयकारी भूमिका निर्वाह गर्ने प्रतिबद्धता समेत व्यक्त गरेका छन्।
अठौं राष्ट्रिय पुरुष र सातौं महिला राष्ट्रिय खो खो प्रतियोगितामा त्रिभुवन आर्मी क्लबले उपाधि जितेको छ। पुरुषतर्फ आर्मीले लुम्बिनी प्रदेशलाई १९-१६ ले पराजित गरेको छ भने महिलातर्फ १६-४ को सहज अन्तरले विजयी बन्न सफल भएको छ। उपाधि विजेताले ७५ हजार नगद र मेडल प्राप्त गरेका छन् भने उपविजेताले ५० हजार, तेस्रो स्थान हासिल गर्नेले २५ हजार नगद पुरस्कार पाएका छन्। १ वैशाख, काठमाडौं।
कीर्तिपुरस्थित कभर्डहलमा सोमबार सम्पन्न फाइनल खेलमा त्रिभुवन आर्मी क्लबका दुवै टोलीले लुम्बिनी प्रदेशलाई हराउँदै राष्ट्रिय च्याम्पियनको उपाधि प्राप्त गरे। पुरुषतर्फको रोमाञ्चक फाइनलमा आर्मीले लुम्बिनी प्रदेशलाई १९-१६ ले हराएको थियो। त्यस्तै महिलातर्फको फाइनलमा पनि आर्मीले लुम्बिनीलाई १६-४ को स्पष्ट अन्तरले हरायो।
उपाधि विजेता आर्मीका दुवै टोलीले ट्रफीसहित ७५ हजार नगद र मेडल प्राप्त गरे भने उपविजेता लुम्बिनी प्रदेशले ५० हजार रुपैयाँ पुरस्कार पाएको छ। दुवै विधामा तेस्रो स्थान हासिल गरेको बागमती प्रदेशले २५ हजार नगद पुरस्कार प्राप्त गरेको छ। चार दिनसम्म चल्ने यस प्रतियोगितामा पुरुष समूहमा नेपाली आर्मीसहित आठ टोली तथा महिला समूहमा सात टोलीले प्रतिस्पर्धा गरेका थिए भनी नेपाल खो खो संघका अध्यक्ष प्रदिप महर्जनले जानकारी दिएका छन्।
१ वैशाख, रोल्पा । पश्चिम उत्तर रोल्पाको परिवर्तन गाउँपालिकामा एक लाख एक हजार १११ रुपैयाँ बराबर पुरस्कार राशिसहित खुला पुरुष भलिबल प्रतियोगिता आयोजना हुन लागेको छ। यो प्रतियोगिता वैशाख ५ गतेदेखि १२ गतेसम्म परिवर्तन गाउँपालिका-३, बागमारा स्थित लाली गुराँस युवा क्लबको २८औं वार्षिक उत्सवको अवसरमा गरिनेछ। लाली गुराँस युवा क्लबका अध्यक्ष हिरालाल खड्काका अनुसार, खुला पुरुष भलिबल प्रतियोगितामा विजेता टिमले नगद पुरस्कार एक लाख १ हजार १११ रुपैयाँ, ट्रफी, मेडल र प्रमाणपत्र प्राप्त गर्नेछन्।
त्यसैगरी, उपविजेता टिमले नगद पुरस्कार ५१ हजार १ सय ११ रुपैयाँ, मेडल र प्रमाणपत्र हासिल गर्नेछन् भने सेमिफाइनलमा पुगेका दुई टिमले प्रत्येकलाई २५ हजार १ सय ११ रुपैयाँसहित मेडल र प्रमाणपत्र प्राप्त गर्नेछन्। खुला महिला भलिबल प्रतियोगितामा विजेता टिमले नगद पुरस्कार ३५ हजार ५ सय ५५ रुपैयाँ, ट्रफी, मेडल र प्रमाणपत्र पाउनेछन्। उपविजेता टिमले नगद पुरस्कार २० हजार ५ सय ५५ रुपैयाँसहित मेडल र प्रमाणपत्र प्राप्त गर्नेछ भने सेमिफाइनलमा पुगेका दुई टिमलाई १० हजार ५ सय ५५ रुपैयाँ नगद पुरस्कार दिइने आयोजकले जानकारी दिएका छन्।
पश्चिम रोल्पामा अवस्थित लाली गुराँस युवा क्लबले यसअघि पनि ठूलो पुरस्कार राशिसहितको खुला भलिबल प्रतियोगिता आयोजना गर्ने पहिलो संस्था बनेको छ। हालसम्म पश्चिम रोल्पामा यति ठूलो पुरस्कार राशि सहितको भलिबल प्रतियोगिता नभएको बताइएको छ। रोल्पा जिल्लामा क्लब दर्ताको हिसाबले सनस्टार युवा क्लब पहिलो स्थानमा रहेको छ भने लाली गुराँस युवा क्लब दोस्रो नम्बरमा रहेको छ। वि.सं. २०५५ साल वैशाख ५ गते अध्यक्ष विश्वकुमार चन्दको नेतृत्वमा स्थापना भएको लाली गुराँस युवा क्लबले विभिन्न गतिविधिहरू सञ्चालन गर्दै राष्ट्रिय र क्षेत्रीय खेलाडी उत्पादनमा समेत सफलता हासिल गरेको छ।
नेपाल सरकारले भलिबल खेललाई वि.सं. २०७४ जेठ ८ गतेदेखि आधिकारिक राष्ट्रिय खेलको रूपमा घोषणा गरेको थियो। तत्कालीन प्रधानमन्त्री पुष्पकमल दाहाल (प्रचण्ड) नेतृत्वको मन्त्रिपरिषद्ले यसको लोकप्रियता र भौगोलिक सहजतालाई ध्यानमा राख्दै हिमाल, पहाड र तराई क्षेत्रलाई समेटेर यो निर्णय गरेको थियो। राष्ट्रिय खेल घोषणा भएको ९ वर्ष बितिसक्दा पनि अझै नेपालमा व्यवस्थित भलिबल हल निर्माण हुन सकेको छैन। तथापि, पश्चिम नेपालका धेरै जिल्लामा भलिबल प्रतियोगिताहरू निरन्तर रूपमा हुँदै आएका छन् भने रोल्पाका थुप्रै क्लब र संघसंस्थाहरूले नियमित रूपमा भलिबल प्रतियोगिता संचालन गर्दै आएका छन्।
१ वैशाख, काठमाडौं। पाकिस्तानको इस्लामावादमा आयोजित अमेरिका र इरानबीचको युद्धविराम वार्ता निष्कर्षविहीन भएपछि तनाव थप बढेको छ। इरानले आफ्नो परमाणु परियोजना ५ वर्षका लागि रोक्ने प्रस्ताव राखे पनि अमेरिका तर्फबाट २० वर्षसम्म प्रतिबन्ध लगाउनुपर्ने अडानले गर्दा वार्ता निष्कर्षबिना समाप्त भएको छ। न्युयोर्क टाइम्सको रिपोर्ट अनुसार, इस्लामावाद वार्तामा इरानले परमाणु गतिविधि ५ वर्षका लागि स्थगित गर्ने प्रस्ताव गरेको थियो। तर अमेरिकाले २० वर्षसम्म कुनै पनि परमाणु गतिविधि नगर्नुपर्ने र इरानसँग रहेको प्रशोधित युरेनियम फिर्ता गर्नुपर्ने सर्त राखेको छ। अमेरिकी उपराष्ट्रपति जेडी भान्सले ‘बल अब तेहरानको कोर्टमा’ रहेको भन्दै, इरानले परमाणु हतियार नबनाउने पक्का ग्यारेन्टी दिनुपर्ने बताए।
इरानी प्रतिनिधिमण्डलसँग अन्तिम निर्णय गर्ने अधिकार नभएको कारण सम्झौता हुन नसकेको उनको भनाइ छ। यद्यपि पाकिस्तानका प्रधानमन्त्री शहबाज शरीफ र रक्षामन्त्री ख्वाजा आसिफले वार्ता सकारात्मक दिशातर्फ अगाडि बढिरहेको र छिट्टै अर्को चरणको वार्ता हुने आशा व्यक्त गरेका छन्। ट्रम्पले नाकाबन्दीपछि इरान सम्झौताका लागि आतुर रहेको दाबी गरेका छन्। उनले यदि युद्धविरामको समयसीमा भित्र सम्झौता नभए इरानले गम्भीर परिणाम भोग्नुपर्ने चेतावनी दिएका छन्।
इरानका राष्ट्रपति मसुद पेजेस्कियनले फ्रान्सका राष्ट्रपति इमानुएल म्याक्रोंसँग टेलिफोनमा कुराकानी गर्दै अमेरिकाले अन्तर्राष्ट्रिय कानुनको पालना गराउन युरोपले सकारात्मक भूमिका खेल्नुपर्ने बताए। यसैबीच, अमेरिकी राष्ट्रपति डोनाल्ड ट्रम्पको निर्देशनमा अमेरिकी नौसेना होर्मुज स्ट्रेटमा समुद्री नाकाबन्दी सुरु गरेको छ। सोमबार साँझदेखि होर्मुज जलसन्धिमा अमेरिकी समुद्री नाकाबन्दी लागू भएको छ। अमेरिकाले मध्यपूर्वमा विमानवाहक जहाज ‘युएसएस अब्राहम लिंकन’ र ११ वटा डिस्ट्रोयरसहित कम्तीमा १५ वटा युद्धपोत तैनाथ गरेको छ। ट्रम्पले अमेरिकी नाकाबन्दीको नजिक जाने कुनै पनि इरानी जहाजलाई लागूऔषध तस्करको जहाजझैं तुरुन्त र कडाइका साथ नष्ट गरिने चेतावनी दिएका छन्।
नाकाबन्दी सुरु भइरहँदा ‘रिच स्टारी’ र ‘अस्ट्रिया’ नाम गरेका दुई तेल ट्यांकरहरूले होर्मुजबाट बाटो मोडेर फर्किएका छन्। यसैबीच इरानी विदेशमन्त्री अब्बास अराघचीले रुसी समकक्षी सर्गेई लाभरोभसँग कुराकानी गर्दै होर्मुजमा अमेरिकाको उक्साहटपूर्ण गतिविधि विश्व शान्तिको लागि खतरा हुने चेतावनी दिएका छन्। इरानले आफ्ना बन्दरगाहहरूमा आक्रमण भएमा फारसको खाड़ी र ओमान सागरका कुनै पनि बन्दरगाह सुरक्षित नरहने चेतावनी पनि दिएको छ।
विश्व बजारमा कच्चा तेलको मूल्य बढेर प्रति ब्यारेल १०० डलरभन्दा माथि पुगेको छ। यद्यपि पुनः वार्ताका लागि सानो आशा देखिएपछि अमेरिकी सेयर बजार (एस एन्ड पी ५०० र न्यासड्याक) मा सामान्य वृद्धि आएको छ। ट्रम्पले चीनलाई इरानलाई सैन्य मद्दत गरेमा गम्भीर परिणाम भोग्नुपर्ने चेतावनी दिएका छन्। तर चिनियाँ राष्ट्रपति सी चिनफिङ युद्ध अन्त्यको पक्षमा रहेको ट्रम्पको विश्वास छ। ट्रम्पले आगामी मे १४ र १५ मा बेइजिङ भ्रमण गर्ने तय पनि गरेका छन्।
१ वैशाख, काठमाडौं । इरानले आफ्ना छिमेकी देशहरू साउदी अरब, संयुक्त अरब इमिरेट्स (युएई), कतार, बहराइन र कुवेतलाई युद्धको क्रममा भएका क्षतिहरूको क्षतिपूर्ति माग गरेको छ। इरानका तर्फबाट संयुक्त राष्ट्रसंघका राजदूत अमिर सईद इरावानीले संयुक्त राष्ट्र संघका महासचिव एन्टोनियो गुटेरेसलाई पत्र पठाएका छन्। पत्रमा यी पाँच देशहरूले अन्तर्राष्ट्रिय कानुनको उल्लङ्घन गरेको तथा अब उनीहरूले इरानलाई परेको क्षतिको पूर्ण क्षतिपूर्ति गर्नुपर्ने उल्लेख गरिएको छ।
एक समाचार एजेन्सीले प्रकाशन गरेको अनुसार, इरानी राजदूत अमिर सईद इरावानीले लेखेको पत्रमा भनिएको छ, ‘यी पाँच देशहरूले अन्तर्राष्ट्रिय कानुन उल्लङ्घन गरेका छन् र इरानप्रति आफ्नो जिम्मेवारी पूरा गरेका छैनन्। त्यसैले उनीहरूको अन्तर्राष्ट्रिय जिम्मेवारी निर्धारण भइसकेको छ। उनीहरूले इरानलाई लागेको सबै प्रकारका भौतिक र मानसिक क्षतिहरूको पूर्ण भुक्तानी गर्नुपर्छ।’
इरानले यस्ता मागहरू पहिलो पटक नगरिरहेको छ। यसअघि पनि इरानले अमेरिकासँग भएको युद्धका कारण पाएको क्षतिको भरपाई माग गरिसकेको छ। यसैबीच, पाकिस्तानले जनाएको छ कि इरान र अमेरिकाबीच छिट्टै वार्ताको अर्को चरण सुरु हुनसक्छ। पाकिस्तानका रक्षामन्त्री ख्वाजा आसिफले आईरहेका युद्धविरामलाई कायम राख्दै सकारात्मक परिस्थितिलाई ध्यानमा राखेर इरान र अमेरिकाबीच अर्को वार्ता छिट्टै हुने अपेक्षा गरिएको बताएका छन्। सोमबार इस्लामाबादमा संसद भवन बाहिर पत्रकारहरुलाई सम्बोधन गर्दै उनले भने, ‘हालको वार्तापछि सन्तोषजनक वातावरण छ र अहिलेसम्म कुनै नकारात्मक स्थिति देखिएको छैन। सामान्य अवस्था कायम छ र यसलाई कूटनीतिक प्रयासले सही दिशामा अघि बढिरहेको संकेतका रूपमा लिनुपर्छ।’
निर्माणाधीन उद्योगको अवलोकन गर्दै सभामुख डीपी अर्याल। १ वैशाख, धादिङ। आर्थिक मन्दी, लगानीकर्ताहरूको संकोच र विश्वव्यापी द्वन्द्वका प्रभावले देशको अर्थतन्त्र प्रभावित बनेको छ। यस्ता चुनौतीहरू बीच पनि धादिङको नीलकण्ठ नगरपालिका वडा नं ८, कमेरे गाउँमा नयाँ उद्योग स्थापना हुँदैछ। गत भदौमा भएको जनजी आन्दोलन, आयात–निर्यात अवरोधहरू र लगानीमैत्री वातावरणको अभावका कारण निजी क्षेत्र थलिइरहेको बेलामा सुरु गरिएको यो परियोजनाले स्थानीयहरू माझ कृषि र उद्योगलाई सँगसँगै अघि बढाउने विश्वास जगाएको छ। धादिङ सदरमुकाम धादिङबेंसी नजिकै रहेको कमेरे गाउँमा अहिले उद्योगका संरचनाहरू निर्माणाधीन छन् र भारी मेसिनरी जडान भईरहेको छ। कामदारहरूको चहलपहल र किसानहरूको उत्साहित दृष्टिले त्यहाँ नयाँ ऊर्जा उत्पन्न भइरहेको छ।
किसानहरूमा जागेको आशा: १ अर्ब ५० करोड रुपैयाँ लगानीमा स्थापना हुँदै गरेको यो उद्योगको वरपर ६/७ वटा ठूलो खेतीयोग्य क्षेत्र छन्– कमेरे फाँट, कोइराले फाँट, तल्लोबेंसी फाँट, ससाह फाँट, बिर्ताबेंसी फाँट र जलविरे फाँट। यी क्षेत्रमा परम्परागत रूपमा धान र मकै खेती हुँदै आएको छ। हिउँदे बालीको रूपमा आलुको प्रशस्त सम्भावना भएतापनि बजारको अभावले किसानहरूले सामान्य मात्रामा मात्र घरायसी प्रयोजनका लागि आलु खेती गर्दै आएका थिए। अब सोही क्षेत्रमा आलु सम्बन्धी उद्योग स्थापना भएपछि किसानहरूमा नयाँ आशा जागेको छ। उद्योगले किसानहरूलाई आलु उत्पादनमा प्रोत्साहन गर्ने र उत्पादित आलु खरिद गर्ने योजना बनाएको छ।
नीलकण्ठ नगरपालिका वडा नं ८ को सिफारिसमा स्थानीय कृषकहरूलाई आलु भण्डारणमा २५ प्रतिशत छुट दिने घोषणा गरिएको छ। त्यस्तै, उत्तरी धादिङका प्रख्यात आलुखेती गर्ने बासिन्दाहरूलाई पनि यो उद्योगले नयाँ आशा दिएको छ। उच्च हिमाली क्षेत्रका आलुहरू बजार नपाउँदा फालिनु पर्ने अवस्थामा अहिले राम्रो बजार पाउने सम्भावना बढेको छ। नीलकण्ठ नगरपालिका वडा नं ८ का सीताराम कोइरालाले भने, “धानखेती र घरायसी प्रयोजनका लागि मात्रै खेती हुने ती क्षेत्रहरूमा अब आलु खेती सफल हुने छ। खेतबाट सिधै उद्योगमा आलु बिक्री हुन थालेपछि किसानहरू निकै उत्साहित भएका छन्।”
स्थानीयलाई रोजगारीको अवसर: उद्योग पूर्ण सञ्चालनमा आएपछि करिब २०० जनाले प्रत्यक्ष रोजगारी पाउने सञ्चालक रमेशभाइ अधिकारीले बताए। त्यस्तै, लगभग २० हजार किसान अप्रत्यक्ष रूपमा लाभान्वित हुने उनको दाबी छ। स्थानीय युवालाई रोजगारी दिन प्राथमिकता दिइने भएकोले वैदेशिक रोजगारीभन्दा आफ्नो ठाउँमै सीप सिकेर काम गर्ने अवसरहरू प्रदान गर्ने योजना अधिकारीले बताए। जर्मन प्रविधिमा आधारित पूर्ण स्वचालित प्रणाली जडान भैरहेको छ जसले नेपाली कृषि उत्पादनलाई अन्तर्राष्ट्रिय स्तरमा प्रतिस्पर्धी बनाउन मद्दत गर्ने लक्ष्य राखेको छ। सामान्यतया कच्चा मालमै सीमित रहेको कृषि उत्पादनलाई प्रशोधन गरी मूल्य अभिवृद्धि गर्ने प्रयासले देशको व्यापार सन्तुलनमा समेत सकारात्मक प्रभाव पार्ने सम्भावना छ। उद्योगले दैनिक १० टन आलु उपभोग गर्दै आलुजन्य खाद्य पदार्थ उत्पादन गर्ने जानकारी अधिकारीले दिएका छन्। औद्योगिक उत्पादनसँगै सीप विकास, प्रविधि हस्तान्तरण र स्थानीय जनशक्तिको सदुपयोग गरी ‘आर्थिक इकोसिस्टम’ निर्माण गर्ने उद्देश्य स्थानीय उद्योगीहरूले राखेका छन्।
नयाँ सरकारले हौसला दिएको सभामुख डोलप्रसाद अर्यालले पहिलोपटक आफ्नो गृहजिल्ला धादिङ भ्रमणका क्रममा निर्माणाधीन उद्योग क्षेत्रको अवलोकन गर्दै निजी क्षेत्रको लगानीलाई सुरक्षित बनाउने तर्फ सरकारले गम्भीर कदम चालिरहेको बताए। अर्यालको उक्त वक्तव्यले लगानीकर्ताको हौसला र मनोबलमा वृद्धि भएको छ भन्ने व्यवसायीहरूले बताएका छन्। नेपालमा सदैव कृषि र उद्योगबीच दूरी चुनौतीको विषय रहँदै आएको छ। तर धादिङमा निर्माणाधीन यो उद्योगले कृषि उत्पादनमा वृद्धि र बजारीकरणमा सहयोग पुर्याउने नीति अपनाएकोले त्यो दूरी घट्ने संकेत देखिएको छ।
१ वैशाख, काठमाडौं। श्रम संस्कृति पार्टीका अध्यक्ष तथा सांसद हर्क साम्पाङले चाँडै आफ्नो सम्पत्ति विवरण सार्वजनिक गर्ने प्रतिबद्धता व्यक्त गरेका छन्। मङ्गलवार सामाजिक सञ्जाल फेसबुकमा स्टाटस लेख्दै उनले आफ्नो नाममा जग्गा जमिन नभएको र सामान्य बैंक ब्यालेन्स तथा केही सुन मात्र रहेको प्रारम्भिक जानकारी दिएका छन्। जनस्तरबाट सम्पत्ति विवरण मागिएपछि त्यसको जवाफ दिंदै सांसद साम्पाङले आफ्नो नाममा कुनै अचल सम्पत्ति नभएको दाबी गरेका छन्।
‘मेरो सम्पत्ति विवरण चाहिएको रहेछ, केही दिनभित्र सार्वजनिक गर्नेछु,’ उनले भनेका छन्, ‘मेरो नाममा केही छैन। वैदेशिक रोजगारीबाट कमाएको ४–५ तोला सुन होला। बैंक ब्यालेन्स २–४ लाख रुपैयाँ मात्र होला।’ उनले आफ्नो पैतृक सम्पत्तिका रूपमा खोटाङमा केही खेतबारी मात्र रहेको र त्यो पनि आमाको नाममा रहेको कुरा पनि उल्लेख गरेका छन्।
खोटाङको केपिलासगढी गाउँपालिका–२ चोखाने गाउँमा भिरालो पाखा, खरबारी, बाँस र उत्तिसघारीसहित थोरै खेतबारी आमाको नाममा रहेको बताएका छन्। बुवाआमाले कमाएको उक्त पैतृक सम्पत्तिमा दाजु-बहिनीहरूले अहिलेसम्म कुनै अंश लिएको छैन भन्ने कुरा पनि साम्पाङले स्पष्ट पारेका छन्। जनप्रतिनिधिहरूले आफ्नो सम्पत्ति विवरण सार्वजनिक गर्नुपर्ने कानुनी व्यवस्था र नागरिकतर्फबाट उठाएका प्रश्नहरूलाई सम्बोधन गर्दै उनले औपचारिक रूपमा सम्पत्ति विवरण सार्वजनिक गर्ने प्रतिबद्धता व्यक्त गरेका छन्।
इरानका बन्दरगाहहरूमा अमेरिकाद्वारा लागू गरिने नाकाबन्दीको समय सुरु भइसकेको छ। राष्ट्रपति डोनल्ड ट्रम्पले अमेरिकी पूर्वीय समय अनुसार सोमबार बिहान १०:०० बजे (१४:०० GMT) मा नाकाबन्दी सुरु हुने बताएका थिए। यी घटनाक्रमहरूबीच अमेरिकी उपराष्ट्रपति जेम्स डिफान्टिस भान्सले इरान सरकारमाथि होर्मुज स्ट्रेट हुँदै आवतजावत अवरुद्ध गरी “आर्थिक आतंकवादको कार्य” गरेको आरोप लगाएका छन्।
एक टेलिभिजन अन्तरवार्तामा उनले भने, इरानीहरू “आर्थिक आतंकवादको कार्यमा संलग्न” छन् र अमेरिकाले “कुनै पनि इरानी जहाजलाई बाहिर जान नदिने” नीति अपनाउनेछ। भान्सले साप्ताहिक वार्ताबारे पनि चर्चा गरेका थिए। “बल इरानको कोर्टमा छ,” उनले भने। यस अघि इरानी संसदका सभामुखले तेहरानलाई “धम्कीका अगाडि नझुक्ने” बताएका थिए। ट्रम्पका पछिल्ला भनाइहरूमा भने इरानी अधिकारीहरूबाट कुनै प्रतिक्रिया आएको छैन।
यूके मरिटाइम ट्रेड अपरेसन (UKMTO) ले जारी गरेको चेतावनीमा जहाजहरूले उक्त क्षेत्रमा “सैन्य उपस्थिति” र “जाँचका प्रक्रियाहरू” सामना गर्न सक्ने बताइएको छ। यसैबीच ‘न्युयोर्क टाइम्स’ ले वरिष्ठ इरानी अधिकारीहरूको उद्धरणमा उल्लेख गरेको छ कि इरानले पाँच वर्षका लागि परमाणु गतिविधि रोक्ने प्रस्ताव ल्याएको थियो, जुन अमेरिकाले अस्वीकार गर्यो। अमेरिकाले २० वर्षसम्म रोक्नुपर्नेमा जोड दिएको थियो।
रिपोर्टमा भनिएको छ कि अमेरिका र इरानबीच पाकिस्तानमा वार्ता भयो, तर कुनै सम्झौतामा पुग्न सकेन। यस विषयमा ह्वाइट हाउससँग प्रतिक्रिया मागिएको छ। इरानको परमाणुसम्बन्धी महत्वाकाङ्क्षा द्वन्द्वको मुख्य विषय हो। राष्ट्रपति ट्रम्पले बारम्बार भनेका छन् कि अमेरिकाले इरानसँग परमाणु हतियार नभएको सुनिश्चित गर्नेछ। यसैबीच संयुक्त राष्ट्रसंघका महासचिव एन्टोनियो गुटेरसले अमेरिका र इरानलाई वार्ता पुन: सुरु गर्न आह्वान गरेका छन्। उनले भनेका छन्, युद्धको कुनै सैन्य समाधान छैन र यो कुरा स्पष्ट छ।
राष्ट्रिय स्वतन्त्र पार्टीका सभापति रवि लामिछानेले नयाँ वर्ष २०८३ लाई खिल निकाल्ने वर्ष हुने टिप्पणी गरेका छन्। उनले भने, “खिल निकाल्ने वर्ष हो, मज्जाले दुख्छ, सहने शक्ति मिलोस्।” १ वैशाख, काठमाडौं।
सभापति लामिछानेले पार्टीको तर्फबाट सबैलाई नयाँ वर्षको शुभकामना दिएका छन्। उनले नयाँ वर्षको अवसरमा शुभकामना दिँदै यस वर्षलाई विशेष रूपमा व्याख्या गरेका छन्।
राष्ट्रपति रामचन्द्र पौडेलले नयाँ वर्षलाई साझा राष्ट्रिय लक्ष्य निर्धारण गर्ने र त्यसलाई सफलतापूर्वक पूरा गर्ने दृढ सङ्कल्प गर्ने अवसरका रूपमा व्याख्या गर्नुभएको छ। उहाँले नयाँ सरकार स्थापना भइसकेको र जनताले विधिको शासन, दिगो शान्ति र विकासको अपेक्षा गरेको बताउनुभयो। राष्ट्रपति पौडेलले संघीय लोकतान्त्रिक गणराज्य शासन प्रणालीमा निष्ठावान् हुनु, सुशासन र सामाजिक न्यायप्रति प्रतिबद्ध रहन अनिवार्य रहेको जोड दिनुभयो। १ वैशाख, काठमाडौं।
राष्ट्रपति पौडेलले नयाँ वर्ष २०८३ को अवसरमा सुख, शान्ति, समृद्धि, राम्रो स्वास्थ्य र दीर्घायुको शुभकामना व्यक्त गर्दै लक्ष्यहरू सजिलै प्राप्त नहुने, त्यसका लागि दृढ सङ्कल्प र कठोर प्रयास आवश्यक पर्ने बताएका छन्। उहाँले निर्धारित लक्ष्य हासिल गर्न विधि तथा विधानको पालना अनिवार्य र सुसंस्कृत आचरण आवश्यक रहेकोमा जोड दिनुभयो।
राष्ट्रपति पौडेलले देशका विभिन्न संवतहरू हाम्रो इतिहास, सभ्यता र सामाजिक जीवनका महत्वपूर्ण अङ्ग भएको स्मरण गर्दै तीले नेपालको गौरवमय अतीतलाई सम्झाउने र निरन्तर प्रगतिशील भविष्यतर्फ अघि बढ्न प्रेरित गर्ने बताएका छन्। उहाँले भन्नुभयो, ‘हामी नेपालीहरूले नयाँ वर्षलाई विशेष दिनका रूपमा मान्दै विगतको समीक्षा गर्ने तथा आगामी कार्यका लागि प्रतिज्ञा र सङ्कल्प गर्ने शुभसाइतका रूपमा मनाउँदै आएका छौँ।’
राष्ट्रपति पौडेलले हालै सम्पन्न प्रतिनिधि सभा सदस्य निर्वाचन सफलतापूर्वक सम्पन्न भइसकेको र देशमा देखिएका जटिल परिस्थितिहरू समाधान भएको उल्लेख गर्दै नयाँ जनादेशका आधारमा नयाँ सरकार गठन भइसकेको जानकारी दिनुभयो। उहाँले भन्नुभयो, ‘यो निर्वाचनमार्फत नेपाली जनताले संघीय लोकतान्त्रिक गणराज्य शासन प्रणालीमा आधारित विधिको शासन, दिगो शान्ति, सुशासन, सामाजिक न्याय र समृद्धिको चाहना प्रकट गरेका छन्।’
राष्ट्रपति पौडेलले नयाँ वर्षले संघीय लोकतान्त्रिक गणतन्त्रको लक्ष्य हासिल गर्न सङ्कल्प र सामर्थ्य प्रदान गरोस् र नेपालीबीचको विश्वास, सद्भाव, सहिष्णुता र सहकार्यलाई अझ प्रगाढ बनाएर राष्ट्रिय एकतालाई मजबुत पार्न प्रेरणा मिलोस् भन्ने कामना व्यक्त गर्नुभएको छ।
नयाँ सरकारले सहकारीका साना बचतकर्ताका रकम फिर्ता गराउने काम १०० बुँदे कार्यसूचीमा समेटेपछि आवश्यक पहल थालिएको अधिकारीहरूले बताएका छन्। समस्याग्रस्त सहकारी व्यवस्थापन समितिकी एक अधिकारीले एक लाख रुपैयाँसम्म बचत गरेका बचतकर्ताहरूलाई पहिला प्राथमिकतामा राखेर रकम फिर्ता गर्न सकिने बीबीसीलाई बताइन्। तर सहकारी पीडितहरूको सङ्गठनका प्रमुखले सरकारका तर्फबाट साना बचतकर्तालाई मात्रै रकम दिन खोजिए त्यो मान्य नहुने चेतावनी दिए। विद्यमान ऐनले पाँच लाख रुपैयाँसम्म जम्मा गरेका व्यक्तिलाई साना बचतकर्ताको रूपमा परिभाषित गरेको छ।
प्रधानमन्त्री वालेन्द्र शाह नेतृत्वको सरकारले चैत १३ गते सार्वजनिक गरेको १०० बुँदे कार्यसूचीको बुँदा नं ९९ मा साना बचतकर्ताहरूको बचत फिर्ता प्रक्रिया सय दिनभित्र शुरू गर्ने उल्लेख छ। प्राथमिकतामा साना बचतकर्ताहरू रहेका छन्। अधिकारीहरूका अनुसार सरकारको घोषणासँगै समिति र भूमि व्यवस्था, सहकारी तथा गरिबी निवारण मन्त्रालयबीच आवश्यक समन्वय गरी काम भइरहेको छ। “हामीले अहिले एक लाख रुपैयाँसम्म राखेका साना बचतकर्तालाई प्राथमिकता दिई एक चरण सकेपछि मात्रै अर्को चरणमा जाने कि भन्ने छलफल र गृहकार्य गरिरहेका छौँ,” समितिकी सदस्य सचिव विमला रोका श्रेष्ठले बीबीसी न्यूज नेपालीसँग भनिन्।
समितिका अनुसार समस्याग्रस्त सहकारी संस्थाका कुल ८० हजार बचतकर्तामध्ये ३६ हजार ७५४ जना जति साना बचतकर्ता रहेका छन्। उनीहरूको कुल एक अर्ब ३६ करोड रुपैयाँ मागदाबी हुन आउँछ। “यीमध्ये पनि सबैका फिर्ता गर्न नसके कुनै निश्चितबाट शुरूवात गर्ने या अझै एक लाख रुपैयाँभन्दा पनि कम बचत गरेकाहरूको क्लिअर गर्दै जाने कि भन्ने छलफल भइरहेको छ,” उनले अगाडि थपिन्। चक्रीय कोषमार्फत् हालका निम्ति त्यसरी रकम फिर्ता गराउने गरी गृहकार्य अधिकारीहरूले गरिरहेका हुन्।
“सरकारले नै सीधै बचतकर्ताहरूको फिर्ता गर्नेभन्दा सहजीकरणका रूपमा अगाडि बढाउने भन्ने हो। अहिलेको छलफलमा आइरहेको यही हो,” सदस्य सचिव श्रेष्ठले भनिन्। समस्याग्रस्त घोषित भएका २३ वटा सहकारीमध्ये हालसम्म तीन वटाको हिसाबकिताब फर्स्यौट भएको छ। फर्स्यौट गरिएका सहकारीमा कुबेर बचत तथा ऋण सहकारी संस्था लिमिटेड, स्ट्यान्डर्ड मल्टिपर्पोज कोअपरेटिभ लिमिटेड र चार्टर्ड सेभिङ् एण्ड केडिट कोअपरेटिभ लिमिटेड रहेका छन्।
समितिले हालसम्म ३ अर्ब ७६ करोड ८० लाख रुपैयाँभन्दा केही बढी ऋण असुली गरिएको जनाएको छ। “अचल सम्पत्ति विक्री लगायतबाट प्राप्त भएको रकम गरी हालसम्म कुल चार अर्ब ३६ करोड ५१ लाख बचत फिर्ता भएको छ,” श्रेष्ठले भनिन्। विभिन्न चुनौतीबीच समितिले हालसम्म काम गर्दै आएको सदस्य सचिव श्रेष्ठ बताउँछन्। “ऋण र सम्पत्ति व्यवस्थापनबाट असुल गरी सबै रकम फिर्ता गर्न सक्ने अवस्था देखिन्न।”
साना बचतकर्तालाई मात्र नभई ठूलालाई पनि केही रकम दिनुपर्ने सहकारी बचतकर्ता संरक्षण राष्ट्रिय अभियान (महासङ्घ) का अध्यक्ष कुशलभ केसीको माग छ। “हामीले यो कुरा मन्त्रीज्यूसँग भएको छलफलमा पनि भनिसकेका छौँ। हामीले साना बचतकर्तालाई दिनु हुँदैन भनेका होइनौँ, त्यति भए पनि ठूला बचतकर्तालाई पनि दिनुपर्छ भन्ने हाम्रो माग हो,” उनले भने।
भूमि व्यवस्था, सहकारी तथा गरिबी निवारणमन्त्री प्रतिभा रावलले समेत अन्याय हुने गरी अगाडि नबढ्ने आफूहरूलाई आश्वासन दिएको केसीले दाबी गरे।
१ वैशाख, तेह्रथुम। पूर्वी नेपालको मुख्य पर्यटकीय गन्तव्य चोलुङ पार्कदेखि तीनजुरे हुँदै गुफापोखरीसम्मको क्षेत्र नयाँ वर्षको अवसरमा पर्यटकहरूको प्रमुख आकर्षण बनेको छ। तेह्रथुम, संखुवासभा र ताप्लेजुङको संगम क्षेत्रमा फैलिएको तीनजुरे-मिल्के-जलजले (त्:व्) पदमार्ग हाल प्रकृतिप्रेमी, ट्रेकिङ रुचाउनेहरू र फोटोग्राफरहरूको केन्द्र भएको छ। वसन्त ऋतुमा यो क्षेत्र गुराँसको बहुरंगी संसारमा परिणत हुन्छ। ‘गुराँसको राजधानी’ भनेर परिचित यस क्षेत्रमा नयाँ वर्षको दिन हजारौं पर्यटकहरूको भीड लाग्ने गर्दछ। विभिन्न प्रजातिका गुराँसले डाँडाकाँडा रातामय भएपछि यहाँको प्राकृतिक सौन्दर्य अझै मनमोहक बन्छ। तीनजुरे डाँडादेखि मिल्के र जलजले क्षेत्रसम्म फैलिएको गुराँसे वन पर्यटकहरूको पहिलो रोजाइ बन्न सफल भएको छ।
चोलुङ पार्क यस क्षेत्रको प्रवेशद्वारको रुपमा कार्य गर्छ। यहाँबाट यात्रा आरआर गार्डेन, घुर्पिसे, पाथीभरा हुँदै उकालो चढेर तीनजुरे डाँडासम्म पुग्छ। तीनजुरेबाट देखिने कञ्चनजंघा, मकालु र कुम्भकर्ण हिमालको मनमोहक दृश्यले दर्शकलाई मन्त्रमुग्ध बनाउँछ। तीनजुरेबाट अघि बढ्दा पर्यटकहरूले चौकीबजार र मंगलबारे हुँदै मिल्के–जलजले क्षेत्रमा रहेको गुफापोखरीसम्म पुग्छन्। धार्मिक तथा प्राकृतिक दृष्टिले महत्वपूर्ण गुफापोखरीको शान्त वातावरण, वरिपरिको गुराँसे वन र चिसो हावाले पर्यटकलाई आध्यात्मिक तथा मानसिक शान्ति दिन्छ। नयाँ वर्षको अवसरमा यस स्थानको चहलपहल झन् बढ्ने गर्दछ। नेपालका पूर्वी तराइका जिल्लाहरू मात्र होइन छिमेकी भारतका सिक्किम, दार्जिलिङ र पश्चिम बंगालबाट पनि हजारौं पर्यटकहरू यहाँ आउने गर्छन्।
गुराँस फुल्ने मौसम, हिमालको सुन्दर दृश्य र चिसो मौसममा नयाँ वर्ष मनाउने उद्देश्यले यहाँ पर्यटकको उल्लेखनीय भीड लाग्ने गरेको छ भने स्थानीयवासीहरूले पनि यो कुरा पुष्टि गर्छन्। पर्यटकहरूको बढ्दो संख्या कारण यहाँका होटल तथा होमस्टेहरू पूर्ण रूपमा भरिन्छन्। गुफा बजारका होटल व्यवसायी हिमा खनालका अनुसार नयाँ वर्ष र गुराँस फुल्ने सिजनमा दुई–चार दिन मात्र नभई अझै अघि नै कोठा बुकिङ गर्नुपर्ने अवस्था हुन्छ। स्थानीय श्रीप्रसाद कार्कीका अनुसार यस मौसममा होटल तथा होमस्टेहरू दुवैलाई पर्यटकहरूको चाप जाल्न चुनौतीपूर्ण हुन्छ। यहाँ ठूला र साना दुवै सवारीसाधनबाट सहज रूपमा पुग्न सकिँदा पर्यटक आकर्षण निरन्तर बढिरहेको छ।
सडक सञ्जाल विस्तारसँगै मोटरसाइकल, जीप र बसमार्फत पर्यटकहरूले नजिकसम्म सजिलै पुग्न सकेका छन्। यस सहज पहुँचले त्:व क्षेत्रलाई अन्य दुर्गम पर्यटकीय गन्तव्यभन्दा फरक स्थानमा पुर्याएको छ। बढ्दो सवारी सञ्चार व्यवस्थित गर्न घुर्पिसे क्षेत्रमा बसपार्क पनि निर्माण गरिएको छ। यसले यातायात व्यवस्थापन, ट्राफिक नियन्त्रण र पर्यटक आवतजावतलाई सहज बनाउन महत्वपूर्ण भूमिका खेलेको छ। स्थानीय तह र समुदायको सहकार्यमा गरिएको प्रयासले पर्यटन प्रवर्द्धनमा सकारात्मक प्रभाव ल्याएको छ। त्:व क्षेत्र जैविक विविधताको दृष्टिले अत्यन्त समृद्ध छ। यहाँ सयौं प्रजातिका वनस्पति, दुर्लभ जडीबुटी, चराचुरुङ्गी र वन्यजन्तु पाइन्छ। ट्रेकिङको हिसाबले पनि चोलुङ पार्कदेखि गुफापोखरीसम्मको यात्रा शान्त, सुरक्षित र रमणीय मानिन्छ। गाउँ–गाउँ जोड्ने पदमार्ग, स्थानीय सांस्कृतिक जीवन, होमस्टे व्यवस्था र अर्गानिक खाना अनुभवले पर्यटकलाई ग्रामीण जीवनशैलीसँग नजिक पुर्याउँछ। तथापि, यति ठूलो सम्भावना हुँदाहुँदै पूर्वाधार विकास, प्रचार–प्रसार र दीर्घकालीन पर्यटन व्यवस्थापनमा अझ सुधार आवश्यक छ। सम्बन्धित निकायहरूले योजनाबद्ध र छरितो कार्यान्वयन गरेमा यो क्षेत्र नेपालकै प्रमुख पर्यटकीय गन्तव्य बन्न सक्नेछ। नयाँ वर्षमा चोलुङ पार्कदेखि तीनजुरे हुँदै गुफापोखरीसम्मको यात्रा प्रकृति, संस्कृति र शान्तिको खोजी गर्नेहरू र साहसिक पदयात्रा रुचाउनेहरूको लागि उत्कृष्ट विकल्प बनेको छ। गुराँसले रंगिएको डाँडा, हिमालको मनमोहक दृश्य, सहज पहुँच र व्यवस्थित सवारी व्यवस्थापनले यो क्षेत्रलाई साँच्चै ‘नयाँ वर्षमा घुम्नै पर्ने गन्तव्य’को रुपमा स्थापित गरेको छ।
नेपाली कांग्रेसका सभापति गगनकुमार थापाले नयाँ वर्ष २०८३ को अवसरमा सबैलाई दलगत स्वार्थ र सीमाभन्दा माथि उठेर सहकार्य गर्न आवश्यक रहेको बताएका छन्। उनले राष्ट्रिय चुनौतीहरूको सामना एकताबद्ध प्रयासले गर्नुपर्ने दृढ सङ्कल्पसहित अगाडि बढ्न जोड दिएका छन्। नयाँ वर्षले सबै नेपालीबीच एकता, भाइचारा र सहकार्य सुदृढ बनाओस् भनी शुभकामना व्यक्त गरेका छन्।
१ वैशाख, काठमाडौं। सभापति थापाले मुलुक र जनताको हितमा सबैले दलगत स्वार्थ तथा सीमा भन्दा माथि उठेर सहकार्य गरी अगाडि बढ्नुपर्ने बताएका छन्। नयाँ वर्ष २०८३ को अवसरमा सुख, शान्ति, समृद्धि तथा निरन्तर प्रगतिको कामना गर्दै उनले शान्त, सभ्य, सुसंस्कृत र आर्थिकरूपले समृद्ध राष्ट्र निर्माणका अभियान सफल बनाउन सबै राजनीतिक दल र जिम्मेवार निकायहरू एकजुट भएर काम गर्नुपर्नेमा जोड दिएका छन्।
सभापति थापाले नेपाली जनताको लामो त्याग, सङ्घर्ष, आन्दोलन र बलिदानबाट प्राप्त ऐतिहासिक उपलब्धिहरूको संरक्षण र सुदृढीकरण गर्दै भविष्यमा देखापर्न सक्ने राष्ट्रिय चुनौतीहरूको सामना एकताबद्ध सङ्कल्पसहित गर्नुपर्ने बताए। उनले नयाँ अवसरको सदुपयोग गर्दै सुशासन सुदृढ पार्न, आर्थिक विकास र समृद्धिको दिशामा दृढतापूर्वक अघि बढ्नुपर्ने महत्वपूर्ण समय आएको पनि उल्लेख गरे।
नयाँ वर्षले सबै नेपालीबीच आपसी एकता, भाइचारा, सद्भाव र सहकार्य अझ सुदृढ बनाउँदै सङ्घीय लोकतान्त्रिक गणतन्त्रलाई संस्थागत रूपमा मज़बुत बनाओस् भन्ने कामना गर्दै उनले आर्थिक, सामाजिक र सांस्कृतिक समृद्धितर्फ अघि बढ्न नयाँ ऊर्जा, उत्साह र प्रेरणा प्रदान गरोस् भन्ने शुभकामना व्यक्त गरेका छन्।
सोमवारदेखि इरानी बन्दरगाहबाट आउने र त्यहाँ जाने सबै पानीजहाजहरूलाई रोक्ने अमेरिकी सेनाले जनाएको छ। अन्य स्थानबाट आवतजावत गर्ने पानीजहाजहरूलाई होर्मुज जलमार्गबाट आवतजावत गर्न अनुमति दिइनेछ। इरानले अमेरिकी-इजरायली आक्रमणपछि विश्वव्यापी व्यापारका लागि महत्वपूर्ण उक्त जलमार्गमा अवरोध सिर्जना गर्दै आएको छ। फेब्रुअरी २८ मा शुरू भएको आक्रमणपछि गत सप्ताहान्त इरान-अमेरिका वार्ता असफल भएपछि राष्ट्रपति डोनाल्ड ट्रम्पले उक्त जलमार्गमा अमेरिकाले सामुद्रिक नाकाबन्दी लगाउने चेतावनी दिएका छन्। इरानले आफ्नो परमाणु महत्वाकाँक्षा नत्यागेकाले वार्ता असफल भएको ट्रम्पको दाबी छ। तर इरानका विदेश मन्त्रालयका प्रवक्ताले भने अमेरिकालाई अत्यधिक माग र अवैध अनुरोधको दोष लगाएका छन्।
आइतबार ट्रुथसोशलमा पोस्ट गर्दै ट्रम्पले होर्मुज जलमार्गमा आवतजावत गर्ने सबै पानीजहाज रोकिने बताएका छन्। “मैले हाम्रो जलसेनालाई इरानलाई शुल्क तिरेका कुनै पनि जहाजलाई अन्तर्राष्ट्रिय जलक्षेत्रमा रोक्न आदेश दिएको छु,” ट्रम्पले भने। साथै जलमार्गमा बिच्चाइएका विस्फोटक पदार्थलाई अमेरिकाले नष्ट गर्न थाल्ने उनले बताए। यदि कुनै इरानीले हाम्रो वा शान्तिपूर्ण जहाजलाई आक्रमण गरे उनीहरुलाई “नरकमा पुर्याइने” उनले चेतावनी दिएका छन्।
अमेरिकी सेनाको सेन्ट्रल कमान्ड (सेन्टकम) का अनुसार सोमबार साँझदेखि नाकाबन्दी सुरु गरिनेछ। “अरब खाडी र ओमानको खाडीमा रहेका सबै इरानी बन्दरगाहबाट आवतजावत गर्ने सबै देशका जहाजहरूलाई बिना भेदभाव नाकाबन्दी लागू हुनेछ,” सेन्टकमले जनाएको छ। ट्रम्पले अरू देशहरू पनि नाकाबन्दीमा सहभागी हुने भए तापनि ती देशहरूको नाम खुलाएका छैनन्; यूकेले यसमा भाग नलिने जानकारी छ।
विश्लेषकहरूका अनुसार ट्रम्पका यी टिप्पणीहरू इरानमाथि अमेरिकी शर्तहरू स्वीकार गराउन दबाव हुन्। सीबीएससँग कुराकानीमा रिपब्लिकन कङ्ग्रेसम्यान माइक टर्नरले होर्मुज जलमार्गको गतिरोध अन्त्य गर्न नाकाबन्दी उपयुक्त उपाय हुनसक्ने बताए। तर भर्जिनियाका डेमोक्र्याट सिनेटर मार्क वार्नरले नाकाबन्दीले इरानलाई जलमार्ग खोल्न बाध्य पार्ने उपाय कसरी काम गर्छ भन्ने आफूले बुझ्न नसकेको बताए।
१ वैशाख, काठमाडौं । आजबाट विक्रम संवत् २०८३ को सुरुवात भएको छ। नयाँ वर्षलाई उत्साह, नयाँ उमङ्ग र नयाँ सुरुवातको प्रतीक मान्ने परम्परा छ। आज वैशाख १ गते, देशभर शुभकामना साटासाट गर्दै हर्षोल्लासका साथ नयाँ वर्ष मनाइँदैछ। विश्वभर नयाँ वर्षलाई विशेष पर्वको रूपमा मनाउने चलन रहेको छ। नेपालमा पनि वैशाख १ गतेलाई नयाँ वर्षको रूपमा मनाउँदै आएको छ। विक्रम संवत् सबैभन्दा पुरानो संवत् मानिन्छ र आज यसको पहिलो दिन पनि हो। आज सूर्यले मीन राशिको भोग पूरा गरी मेष राशिमा प्रवेश गर्ने दिन हो र यसलाई वैशाख सङ्क्रान्ति वा मेष सङ्क्रान्ति भनिन्छ।
