लेखक: space4knews

समाचार सारांश नेकपाले विद्यार्थी संगठनहरूलाई विद्यालय वा कलेजमा प्रतिबन्ध लगाउन नपाइने निष्कर्ष निकालेको छ। पार्टीको केन्द्रीय कार्यसंयोजन बैठकले यस्तो निष्कर्ष निकालेको पार्टी नेता जगन्नाथ खतिवडाले जानकारी दिएका छन्। सरकारले १ सय बुँदे कार्यसूचीमा विद्यार्थी संगठन खारेज गर्ने प्रस्ताव राखेको थियो। उक्त निर्णयप्रति राजनीतिक दलका संगठनहरूले आपत्ति जनाउँदै आएका छन्। २८ चैत, काठमाडौं। नेपाली कम्युनिस्ट पार्टी (नेकपा) ले विद्यार्थी संगठनहरूलाई विद्यालय वा कलेजमा प्रतिबन्ध लगाउन नपाइने निष्कर्ष निकालेको छ। शनिबार केन्द्रीय कार्यालय पेरिसडाँडामा बसेको पार्टीको केन्द्रीय कार्यसंयोजन बैठकले यस्तो निष्कर्ष निकालेको पार्टीका नेता जगन्नाथ खतिवडाले जानकारी गराए। यसैबीच नेकपाले पनि यो विषय अनुचित भएको बताउँदै यसले जनता र ट्रेड युनियनको अधिकारलाई कुण्ठित गर्ने निष्कर्ष निकालेको छ। ‘जनसंगठनहरू, विशेष गरी युवा विद्यार्थी लगायतका विद्यार्थी संगठनहरूलाई कलेजमा प्रतिबन्ध लगाउनु र ट्रेड युनियनहरूलाई प्रतिबन्ध लगाउनु गलत हो,’ बैठकको निष्कर्षबारे जानकारी दिँदै नेता खतिवडाले भने, ‘यसले जनता र ट्रेड युनियनको अधिकारलाई कुण्ठित बनाउँछ। यस्तो गर्न पाउन हुँदैन। यसको विरोधमा हामी उभिन्छौं भन्ने पार्टीले निष्कर्ष निकालेको छ।’ उनका अनुसार, केन्द्रीय कार्यसंयोजन समितिको अर्को बैठक ३ वैशाखमा बस्नेछ। उक्त बैठकका बाँकी निष्कर्ष र निर्णयहरू पनि त्यतिबेला सार्वजनिक हुने उनले बताए।

एप्पलले आफ्नो अपरेटिङ सिस्टम IOS 26 को अन्तिम मुख्य अपडेट ‘IOS 26.5’ सार्वजनिक गर्न तयारी गरेको छ। यो अपडेट मुख्य रूपमा आईफोनको कार्यक्षमता सुधार, प्रणालीको स्थिरता वृद्धि र सानातिना फिचरहरूको परिमार्जनमा केन्द्रित हुनेछ। IOS 26.5 को सार्वजनिक भएसँगै एप्पल आफ्नो आगामी नयाँ संस्करण IOS 27 तर्फ ध्यान केन्द्रित गर्ने छ।

नयाँ अपडेट कहिले सार्वजनिक गरिनेछ? एप्पलको नियमित तालिका र हालको बिटा परीक्षणलाई आधार बनाएर, IOS 26.5 को सार्वजनिक विमोचन आगामी मे ११ वा १२ मा हुने अपेक्षा गरिएको छ। एप्पलको योजनाअनुसार यस प्रकार हुनेछ: अप्रिल १३ मा दोस्रो बिटा संस्करण सार्वजनिक गरिनेछ, मे ४ मा रिलिज क्यान्डिडेट अर्थात् अन्तिम परीक्षण संस्करण उपलब्ध हुनेछ, र मे ११/१२ मा विश्वभरका सबै योग्य आईफोन प्रयोगकर्ताका लागि सार्वजनिक अपडेट उपलब्ध हुनेछ।

नयाँ परिवर्तनहरू के–के हुनेछ? IOS 26.5 मा कुनै ठूला क्रान्तिकारी फिचर नहुने भए पनि यसले प्रयोगकर्ताको दैनिक अनुभव अझ सहज बनाउनेछ। यसमा मुख्य तीन क्षेत्र सुधार गरिएका छन्: १. कार्यक्षमता सुधार: एप्लिकेशन छिटो खुल्नेछन् र मल्टिटास्किङ थप सहज हुनेछ। २. प्रणालीको स्थिरता: विभिन्न बगहरू हटाइएका छन् जसले फोन ह्याङ्ग वा क्र्यास हुने समस्या घटाउँछ। ३. ब्याट्री क्षमता: पावर म्यानेजमेन्ट सुधार गरी ब्याट्री आयु बढाउन सहयोग पुर्‍याउनेछ।

IOS 27 को तयारी यस अपडेट सार्वजनिक भएको लगभग एक महिनापछि एप्पलले ‘वर्ल्डवाइड डेभलपर्स कन्फरेन्स’ जुन ८ मा आयोजना गर्नेछ। उक्त कार्यक्रममा IOS 27 को घोषणा हुने छ, जसमा विशेष गरी आर्टिफिसियल इन्टेलिजेन्स र सिरीका क्षेत्रमा ठूला परिवर्तन आउने अपेक्षा गरिएको छ। आईफोनमा IOS 26 चलिरहेकोले नयाँ 26.5 अपडेट सहजै प्राप्त गर्न सकिनेछ। अपडेट गर्नुअघि आफ्नो डाटा सुरक्षित राख्न ब्याकअप लिनु राम्रो हुने प्राविधिक विज्ञहरूले सल्लाह दिएका छन्।

नेकपा एमालेका महासचिव शंकर पोखरेलले वर्तमान सरकार र नयाँ भनिएका शक्तिहरूको ‘सुशासन’ को मुखौटा हटेको बताएका छन्। पोखरेलले सभामुख डोल प्रसाद अर्यालले विदेशमा कमाएको भनिएको सम्पत्तिको स्रोत र कर तिर्नुपर्ने विषयमा जवाफ दिनुपर्ने उल्लेख गरे। उनले पार्टी अध्यक्ष केपी शर्मा ओलीलाई दुःख दिने काम भएको भन्दै कडा प्रतिवादको चेतावनी दिएका छन्। २८ चैत, काठमाडौं।

पोखरेलले सुशासनको नाममा आएकाहरू, मन्त्री र सभामुखले पारदर्शिताको अपमान गरेको आरोप लगाए। उनले सभामुख डोल प्रसाद अर्यालको सम्पत्ति विवरणमा प्रश्न उठाउँदै भने, “श्रमिकबाट मालिक बन्नु अपराध होइन, तर विदेशमा कमाएको भनिएको त्यो सम्पत्ति कुन च्यानलबाट आयो? राज्यलाई कर तिर्ने काम भएको छ कि छैन? सभामुखज्यूले यसको जवाफ दिने जिम्मेवारी छ।”

मन्त्रीहरूले सम्पत्ति विवरण बुझाउने कार्यमा ढिलाइ गरेको प्रतिकृया व्यक्त गर्दै उनले आफ्नो पार्टीका नेतृत्व जुनसुकै अग्निपरीक्षा दिन तयार रहेको बताए। उनले भने, “सुशासन अरूलाई त्रास दिन होइन, आफूले पालना गर्नुपर्छ। एमालेका नेताहरू जुनसुकै अग्निपरीक्षा दिन तयार छन्, के नयाँ भनिनेहरू तयार छन्?”

जेनजी आन्दोलनबारे छानबिन गर्न गठन गरिएका आयोगलाई ‘प्रतिशोधको हतियार’ बनाइएको भन्दै उनले पार्टी अध्यक्ष केपी शर्मा ओलीलाई दुख दिने काम भएको पनि सम्बोधनमा बताए। साथै, उक्त कदमको पार्टीले कडा प्रतिवाद गर्ने चेतावनी महासचिव पोखरेलले दिएका छन्।

राष्ट्रिय स्वतन्त्र पार्टीका सांसद सुशान्त वैदिकले नयाँ सरकारको सय दिने कार्ययोजनामा उद्यमशीलतालाई महत्वपूर्ण स्थान दिइएको जानकारी दिएका छन्। उनले गाउँगाउँका साना, लघु उद्यम र स्टार्टअपहरूले देशको आर्थिक रुपान्तरण र सामाजिक न्यायमा योगदान पुर्‍याउने विश्वास व्यक्त गरे। सरकार व्यवसाय दर्ता र नविकरण प्रक्रियामा कागजी कामलाई सजिलो बनाउन लागिपरेको र आगामी हप्ता परिणाम देखिने उनले बताए। २८ चैत, काठमाडौं।

राष्ट्रिय स्वतन्त्र पार्टी (रास्वपा) का सांसद सुशान्त वैदिकले नयाँ सरकारले सार्वजनिक गरेको सय दिने कार्ययोजनामा उद्यमशीलताको विषयलाई पर्याप्त महत्व दिइएको बताएका छन्। रास्वपा नेतृत्वको नयाँ सरकारले प्रस्तुत गरेको कार्ययोजनामा उद्यमशीलताका विषय कसैलाई पनि छुट्न नदिएको उनको भनाइ छ। राष्ट्रिय उद्यम विकास सहजकर्ता महासंघ नेपालको तेस्रो राष्ट्रिय महाधिवेशनमा शनिबार राजधानीमा गरेको सम्बोधनमा उनले आर्थिक रुपान्तरण र सामाजिक न्यायसहितको आर्थिक प्रगति हासिल गर्न गाउँगाउँका साना तथा लघु उद्यमीदेखि स्टार्टअपसम्मका उद्यमहरूले महत्वपूर्ण भूमिका निर्वाह गर्ने बताए।

‘नयाँ सरकारले ल्याएको सय प्राथमिकतामा उद्यमशीलताका विषयहरू पूर्ण रूपमा समावेश छन्। उद्यमशीलतालाई महत्वका साथ समेटिएको छ। हामी स्पष्ट छौं कि देशको आर्थिक रूपान्तरण र सामाजिक न्यायलाई समेटेर आर्थिक प्रगति गर्न गाउँगाउँमा रहेका साना लघु उद्यमीदेखि स्टार्टअपसम्मका उद्यमहरूले सबैभन्दा ठूलो भूमिका निभाउने छन्। सय दिने कार्यसूचीमा रास्वपाले व्यवसाय दर्ता र नविकरण प्रक्रियामा सहजीकरण गर्ने प्रतिबद्धता जनाएको छ,’ सांसद वैदिकले भने।

सरकारले गर्दै आएको प्रयासको परिणाम आगामी साताबाटै देखिने उनले बताए। ‘व्यवसाय दर्ता स्थानीय तह, प्रदेश र कम्पनी कार्यालय जहाँ भए पनि कागजी प्रक्रियामा कुनै समस्या नपरोस् भनेर हामी प्रक्रिया सरल बनाउन तर्फ लागेका छौँ। उद्यमी बन्ने सपना कागजी प्रक्रियाले अवरोध पुर्‍याउने छैन,’ उनले बताए। कार्यक्रममा सहभागीहरूले निजी क्षेत्र र उद्यमशीलतालाई राष्ट्रिय अर्थतन्त्रको मुख्य इन्जिन बनाउनुपर्नेमा विशेष जोड दिएका थिए।

२८ चैत, नुवाकोट। नुवाकोटको बेलकोटगढीमा रुख काट्ने क्रममा हाँगा लागेर एक व्यक्तिको मृत्यु भएको छ भने दुई जना गम्भीर घाइते भएका छन्। बेलकोटगढी नगरपालिका–९ नलगाउँस्थित आलडाँडामा शनिबार बिहान रुख काट्दा हाँगा लागेर स्थानीय ३३ वर्षिय प्रेमबहादुर तामाङको मृत्यु भएको हो। तामाङ आफ्नै बारीमा रहेको कुटमिरोको रुख काटिरहेको बेला उक्त दुर्घटना भएको बाघखोर प्रहरी कार्यालयका प्रमुख प्रहरी सहायक निरीक्षक (असई) रूपक थापाले बताए।

उनका अनुसार, रुख काट्न सहयोग गरिरहेका अन्य दुई जना घाइते भएका छन्। घाइतेमध्ये बेलकोटगढी नगरपालिका–१० का माधव भुजेल र अरुण तामाङ रहेका छन्। उनीहरूको अवस्था गम्भीर छ र दुवै जनालाई उपचारका लागि अस्पताल लगिएको छ।

२८ चैत, तनहुँ । यहाँको ऐतिहासिक तथा सांस्कृतिक सहर बन्दीपुर र धार्मिक इतिहास बोकेको व्यास नगरपालिकालाई जोडेर ‘होमस्टे सर्किट निर्माण’ प्रक्रिया अगाडि बढाइएको छ। व्यास नगरपालिका र बन्दीपुर गाउँपालिकाको सहकार्यमा ‘बन्दीपुर–केशवटार होमस्टे सर्किट’ ग्रामीण पर्यटन विकासको नयाँ ‘मोडेल’ का रूपमा प्रस्तुत गरिएको छ। संस्कृति सम्पदालाई मूल आधार बनाई स्थानीय उत्पादन, परम्परा र वातावरणमा आधारित पर्यटनलाई प्रवर्द्धन गर्न खोजिएको गाउँपालिकाका अध्यक्ष सुरेन्द्र थापाले बताए।

कुनै समय व्यापारिक केन्द्रका रूपमा रहेको बन्दीपुर सदरमुकाम दमौली सरेपछि ओझेलमा परेको थियो। आजभोलि सोही सहर पुन: खुला र जीवन्त सांस्कृतिक सङ्ग्रहालयका रूपमा स्थापित हुँदै गएको छ। ‘पहाडकी रानी’ उपनामले समेत यो सहरले छुट्टै पहिचान बनाइसकेको छ। अब होमस्टेमार्फत यहाँको पर्यटन प्रवर्द्धनका लागि थप काम गर्न खोजिएको अध्यक्ष थापाले बताए। ‘बन्दीपुर भ्रमण वर्ष २०२५ को सफलतापछि गाउँपालिकाले सन् २०२६ लाई ग्रामीण पर्यटन भ्रमण वर्षका रूपमा मनाउने घोषणा गरेको छ,’ उनले भने, ‘सोहीबमोजिम विविध प्राकृतिक, सामाजिक र सांस्कृतिक सम्पदालाई उपयोग गर्दै नयाँ गन्तव्यको विकास गर्ने क्रममा ‘सर्किट’ को अवधारणाअनुसार महत्त्वपूर्ण योजनाका रूपमा अघि बढाइएको छ।’

करिब ७५ किलोमिटर चक्रीय दूरीमा फैलिएको यस ‘सर्किट’मा १४ वटा ‘होमस्टे’ र २० भन्दा बढी गाउँ समेटिनेछन्। गुरुङ, मगर, नेवारसँगै क्षेत्री, ब्राह्मण र दलित समुदायबाट सञ्चालित होमस्टेहरूले फरक–फरक सांस्कृतिक अनुभव प्रदान गर्नेछन्। गाउँपालिकाका अधिकांश वडाका साथै व्यास नगरपालिकाको वडा नं १४ यसमा समेटिएको छ। थापाका अनुसार यस सर्किटले होमस्टे सशक्तीकरणसँगै पर्यटनमार्फत ग्रामीण समुदायको आम्दानी वृद्धिमा टेवा पुग्नेछ। यसको विकासका लागि तीन चरणमा कार्यक्रम अघि बढाइएको जनाइएको छ।

पहिलो चरणअन्तर्गत चैत १४ र १५ गते पर्यटन तथा संस्कृतिविद्, पर्यटन व्यवसायी र प्राविधिक टोलीले संयुक्त रूपमा क्षेत्रको अध्ययन, अवलोकन तथा प्रत्येक ‘होमस्टे’ गाउँमा सचेतनामूलक कार्यक्रम सम्पन्न गरिसकेका छन्। यस्तै, नेपाल पर्यटन बोर्ड पोखरासँगको सहकार्यमा आगामी वैशाख १८ र १९ गते आयोजना हुने गण्डकी प्रदेशस्तरीय ‘गाउँ पर्यटन मार्ट २०८३’ मार्फत ‘सर्किट’को राष्ट्रिय तथा अन्तरराष्ट्रियस्तरमा प्रचारप्रसार गरिनेछ। ग्रामीण पर्यटनलाई थप सहज बनाउन गाउँपालिकाले सफारी जीप सेवासमेत सञ्चालनमा ल्याइसकेको छ, जसले गाउँ–गाउँमा पर्यटकको पहुँच विस्तार गर्ने अपेक्षा गरिएको गाउँपालिका पर्यटन शाखा प्रमुख सुरज भट्टराईले बताए। यो ‘सर्किट’ नेपालकै पहिलो नमुना परियोजनाका रूपमा विकास गर्न खोजिएको र यसले विश्वसामु नेपाली ग्रामीण पर्यटनको नयाँ पहिचान स्थापित गर्ने लक्ष्य लिएको पर्यटनविज्ञ हरिसिंह गुरुङले बताए। स्थानीय संस्कृति, परम्परा र जीवनशैलीलाई जोगाउँदै पर्यटन विकास गर्नु आजको आवश्यकता भएको महसुस गरी योजना अगाडि बढाउन लागिएको र यसले दिगो पर्यटन प्रवर्द्धनमा महत्त्वपूर्ण योगदान पुर्‍याउने उनले विश्वास व्यक्त गरे।

२८ चैत, काठमाडौं। अध्यागमन विभागले वैदेशिक रोजगारीमा जाने नेपाली श्रमिकले एयरपोर्टमा हवाई टिकटको बिल र भुक्तानीको रसिद देखाउन नपर्ने जानकारी दिएको छ। वैदेशिक रोजगार विभागले टिकटको बिल र म्यानपावर कम्पनीलाई तिरेको सेवा शुल्कको रसिद अनिवार्य रूपमा देखाउनुपर्ने व्यवस्था गरेपछि उत्पन्न भएको अन्योललाई समाधान गर्दै अध्यागमन विभागले यस्तो स्पष्टीकरण दिएको हो।

विभागले जारी गरेको सूचनामा श्रमिकले श्रम स्वीकृति, राहदानी लगायतका न्यूनतम आवश्यक कागजातहरू बाहेक अन्य कुनै पनि बिल वा रसिद देखाउन नपर्ने उल्लेख गरिएको छ। अध्यागमन विभागले वैदेशिक रोजगार विभागबाट चैत २३ गते जारी सूचनातर्फ ध्यानाकर्षण गर्दै प्रचलित अध्यागमन ऐनअनुसार प्रक्रिया स्पष्ट गरेको छ।

विभागका अनुसार गृह मन्त्रालयको २०८२ कात्तिक १३ गतेको मन्त्रिस्तरीय निर्णय र वर्तमान कानुनी व्यवस्थाअनुसार, भिजिट भिसामा विदेश जाने नेपालीले कम्तिमा ६ महिना वैध राहदानी, गन्तव्य मुलुकसम्मको हवाई टिकट र सम्बन्धित मुलुकको भिसा हुनुपर्नेछ। त्यस्तै, वैदेशिक रोजगारीका लागि जाने श्रमिकहरूलाई श्रम स्वीकृति र राहदानी लगायतका आधारभूत कागजातहरू मात्र अनिवार्य हुने जनाइएको छ। विभागले विदेश जाने नागरिकलाई कुनै भ्रममा नपरी, आवश्यक जानकारी लिएर निश्चिन्त भएर यात्रा गर्न आग्रह गरेको छ।

गुटिया जडिबुटीमध्ये गानेगुर्जो संरक्षण गर्दै स्वदेशमै यसको खेती गर्ने, प्रशोधन प्रविधिमा विकास गर्ने साथै बजार व्यवस्थापन र निर्यात सक्षम बनाउन सके नेपाल आर्थिक र स्वास्थ्य दुवै क्षेत्रमा ठूलो लाभ लिन सक्छ।

२८ चैत, सप्तरी। सप्तरीको हनुमाननगर कंकालिनी नगरपालिकाको विशेष नगरसभा शुक्रबार सम्पन्न भएको छ। सभाले एक महत्वपूर्ण निर्णय गर्दै हाल सञ्चालनमा रहेको नगर कार्यपालिकाको कार्यालयलाई अस्थायी रूपमा स्थानान्तरण गर्ने निर्णय गरेको छ। नगरसभामा प्रस्तुत प्रस्तावमाथि छलफल गरिँदै कोशी तटबन्ध क्षेत्रअन्तर्गत भारत सरकारको स्वामित्वमा रहेको भवनमा सञ्चालन भइरहेका कार्यालयले वर्षाका कारण असर पारेको निष्कर्ष निकालिएको छ।

वर्षाका कारण भवनमा पानी भित्रिएकोले महत्वपूर्ण कागजात तथा सार्वजनिक सम्पत्तिमा क्षति पुग्ने जोखिम बढेको र दैनिक सेवा प्रवाहमा पनि अवरोध आएको उल्लेख गरिएको छ। साथै, कर्मचारीहरूले नियमित रूपमा कार्यालय सञ्चालन गर्न कठिनाइ भोगिरहेको मुख्य प्रशासकीय अधिकृत रमेशकुमार यादवले जानकारी दिएका छन्। यी परिस्थितिहरूलाई ध्यानमा राख्दै नगरसभाले वडा नं. ५ र ७ को सीमामा हालै निर्माण सम्पन्न भएको पशु भेटेरिनरी अस्पतालको नयाँ भवनमा नगर कार्यपालिकाको कार्यालय अस्थायी रूपमा सार्ने निर्णय गरेको छ।

उक्त भवन नेपाल सरकारको जग्गामा निर्माण गरिएको र आवश्यक कोठा तथा संरचना व्यवस्थित भएपछि सेवा निरन्तरता सुनिश्चित गरिने विश्वास गरिएको छ। नगरपालिकाको आफ्नै स्थायी प्रशासनिक भवन निर्माण र व्यवस्थापन नभएसम्म उक्त भवनबाट सबै कामकाज सञ्चालन गर्ने निर्णय नगरसभाले स्वीकृत गरेको छ। यस निर्णयले सेवा प्रवाहमा प्रभावकारिता ल्याउने र नागरिकलाई सहज सेवा उपलब्ध गराउने अपेक्षा नगरपालिकाले राखेको छ।

२८ चैत, काठमाडौं । इरानी संसदका अध्यक्ष मोहम्मद बगर गालिबाफले अमेरिकामाथि भरोसा नगर्ने बताएका छन्। उच्चस्तरीय वार्ताका लागि पाकिस्तान पुगेका गालिबाफले, वार्ता सुरु हुनुअघि इस्लामाबादबाट यस्तो प्रतिक्रिया दिएका हुन्। बीबीसीका अनुसार, इस्लामाबाद पुगेपछि प्रतिनिधिमण्डलसँग आएका इरानी पत्रकारहरूसँग कुरा गर्दै गालिबाफले भने, एक वर्षभन्दा कम अवधिमा दुई पटक असल मनसायले वार्ता भए पनि इरानमाथि आक्रमणहरू जारी रहेको र धेरै युद्ध अपराधहरु भएको बताएका छन्।

‘हाम्रो उद्देश्य सही छ, तर हामीलाई अमेरिकाप्रति भरोसा छैन,’ उनले भने। इरानी रिभोल्युसनरी गार्ड कोर (आईआरजीसी) सम्बन्धित सरकारी समाचार एजेन्सी ‘तसनिम’ का अनुसार, गालिबाफले यदि अमेरिकाले साँचो सम्झौताका लागि तयार भयो र इरानी नागरिकको वैध अधिकार मान्यता दियो भने, इरान पूर्ण रूपमा सम्झौताका लागि तत्परता देखाउने बताए।

‘यदि अमेरिकाले वार्तालाई शक्ति प्रदर्शन वा धोका दिने रणनीतिमा प्रयोग गर्न चाहे, इरान आफ्ना नागरिकको अधिकारको सुरक्षा गर्न आफ्नो क्षमतामा भरोसा गर्नेछ,’ उनले थपे। वार्ताका लागि अमेरिका र इरानको उच्चस्तरीय टोली आज पाकिस्तानको इस्लामाबादमा पुगेका छन्। त्यहाँको सुरक्षा व्यवस्थालाई कडा बनाइएको छ।

२८ चैत, काठमाडौं । पछिल्लो २४ घण्टामा सवारी नियम उल्लंघन गर्ने १७१९ जना चालकहरूलाई ट्राफिक प्रहरीले कारबाही गरेको छ। काठमाडौँ उपत्यका ट्राफिक प्रहरी कार्यालयका अनुसार, मादक पदार्थ सेवन गरी सवारी चलाएका ११३ जना, यान्त्रिक अवस्थाले ठीक नभएका ३५ जना, सङ्केत बत्ती उल्लङ्घन गर्ने १०२ जना, तीव्र गतिमा सवारी चलाउने ९३ जना, लेन अनुशासन पालना नगर्ने १७९ जना र सार्वजनिक यातायातका साधनहरूलाई असुरक्षित तरिकाले सञ्चालन गर्ने ३८ जना चालकलाई कारबाही गरिएको छ।

त्यस्तै, अनावश्यक हर्न बजाउने ४६ जना, निर्धारित स्थानबाहिर यात्री चढाउने र ओराल्ने २० जना तथा अन्य विभिन्न सवारी नियम उल्लङ्घन गर्ने १०९३ जना चालकलाई समेत कारबाही गरेको छ। ट्राफिक कारबाहीबाट जम्मा ११ लाख ८४ हजार ५०० रुपैयाँ राजस्व राज्यकोषमा सङ्कलन भएको उक्त कार्यालयले जानकारी दिएको छ।