अमेरिकी क्लब इन्टर मियामीले लियोनेल मेस्सीको देब्रे ह्यामस्ट्रिङमा मांसपेशी थकानसँग सम्बन्धित ओभरलोड समस्या देखिएको जानकारी दिएको छ। मेस्सी अमेरिकी मेजर लिग सॉकर अन्तर्गत आइतबार फिलाडेेल्फियाविरुद्धको खेलमा ७३औँ मिनेटमा मैदानबाट बाहिरिएका थिए। क्लबले मेस्सीको मैदानमा फर्किने समय उनको शारीरिक अवस्था र रिकभरीको प्रगतिमा निर्भर रहने जनाएको छ।
१२ जेठ, काठमाडौं। अमेरिकी मेजर लिग क्लब इन्टर मियामी एफसीले अर्जेन्टिनी स्टार लियोनेल मेस्सीको स्वास्थ्य अवस्थाबारे जानकारी दिएको छ। मियामी कम्युनिकेसन विभागका अनुसार सोमबार थप चिकित्सकीय परीक्षणपछि प्रारम्भिक रिपोर्टमा उनको देब्रे ह्यामस्ट्रिङमा मांसपेशी थकानसँग सम्बन्धित ‘ओभरलोड’ समस्या देखिएको छ।
आइतबारको खेलमा मेस्सी ७३औँ मिनेटमा मैदानबाट बाहिरिएका थिए। प्रतिस्थापनका लागि मेस्सी आफैंले अनुरोध गरेका कारण पनि उनी घाइते भएको हुनसक्ने धेरैले चिन्ता व्यक्त गरेका थिए। विश्वकपअघि घाइते हुँदा मेस्सीले विश्वकप गुमाउने सम्भावना धेरै समर्थकमा बढेको थियो। मेस्सीको मैदान फर्कने समय भने उनको शारीरिक अवस्था र रिकभरीको प्रगतिमा निर्भर रहने क्लबले जानकारी दिएको छ।
१२ जेठ, काठमाडौं । पूर्वाधार विकास मन्त्रालयमा प्रवेश गरी होहल्ला र अभद्र व्यवहार गरेको आरोपमा काठमाडौं प्रहरीले एक जनालाई पक्राउ गरेको छ। पक्राउ पर्नेमा कालिकोटको साविक मान्म गाउँपालिका–५ घर भई हाल भक्तपुरमा बसोबास गर्ने ३५ वर्षीय उपेन्द्रकुमार शाही रहेको प्रहरीले जनाएको छ। उनी सोमबार साढे ११ बजे पूर्वसूचना नदिइकन पूर्वाधार विकास मन्त्रालय सिंहदरबार प्रवेश गरेका थिए र मन्त्रालयका सचिवको कार्यकक्षमा पुगेर अभद्र व्यवहार गरेका थिए।
सचिवको कार्यकक्षमा प्रवेश गरी हुलहुज्जत गर्ने, बाहिर जान सम्झाइबुझाइ गर्दा अश्लील शब्द प्रयोग गर्ने तथा धम्की दिने कार्य गरेको काठमाडौं प्रहरीले बताएको छ। त्यसपछि उनलाई पक्राउ गरी आपराधिक लाभ लिन नहुने कसुरमा काठमाडौं जिल्ला अदालतबाट पाँच दिनको म्याद लिएर अनुसन्धान भइरहेको छ, काठमाडौं प्रहरीका प्रवक्ता एसपी पवनकुरमा भट्टराईले जानकारी दिए।
बिहान खाली पेटमा धनियाँ भिजाएको पानी पिउँदा शरीरबाट हानिकारक विषाक्त पदार्थहरू बाहिर निकाल्न मद्दत पुर्याउँछ। धनियाँ केवल तरकारी र अचारमा स्वाद बढाउने मात्र होइन, यसमा औषधीय गुणहरू पनि भरिपूर्ण हुन्छन्। आयुर्वेदमा धनियाँको दाना फाइदाहरूको विषयमा चर्चा गरिएको छ। धनियाँको दानामा फाइबर, क्याल्सियम, तामा, म्याग्नेसियम, फलाम साथै भिटामिन ए, सी र के प्रशस्त मात्रामा पाइन्छ। धनियाँको दानालाई पानीमा भिजाएर यस पानीको सेवनले थुप्रै स्वास्थ्य लाभहरू प्राप्त हुन्छन्।
बिहान खाली पेटमा धनियाँ पानी पिउँदा शरीरमा धेरै सकारात्मक प्रभाव पर्ने गर्दछ। यसले पाचन इन्जाइमहरू सक्रिय पार्छ, जसले पेट फुल्ने, अपच र भारीपन जस्ता समस्याबाट मुक्ति दिलाउन सहयोग पुर्याउँछ। धनियाँ पानीले राम्रो डिटक्स वाटरको रूपमा काम गरी शरीरबाट हानिकारक विषाक्त पदार्थहरू हटाउन सहयोग गर्दछ। यसले वजन घटाउन पनि मद्दत पुर्याउन सक्छ, यद्यपि केवल धनियाँ पानी सेवन गरेमा मात्र वजन घट्ने होइन।
धनियाँ पानीको एन्टी-इन्फ्लेमेटरी गुणले सुन्निने समस्या कम गर्न मद्दत गर्छ। यसले एसिडिटी र पेटसँग सम्बन्धित अन्य समस्याहरूबाट पनि राहत दिलाउन प्रभावकारी हुन्छ। धनियाँ पानी पिउँदा छालाको लागि पनि फाइदाजनक हुन्छ; यसका एन्टिब्याक्टेरियल र एन्टिअक्सिडेन्ट गुणहरूले छालालाई डन्डीफोरबाट मुक्त राख्न सहयोग पुर्याउँछन्।
धनियाँ पानी बनाउन एक गिलास पानीमा एक चम्चा धनियाँको दाना रातभर भिजाउनुहोस्। भोलिपल्ट बिहान यो पानीलाई अलिकति तताएर सेवन गर्नुहोस्।
१२ जेठ, काठमाडौं। नेपाली कांग्रेसकी सांसद गीता गुरूङले कुप्रथा र विभेदकारी कानुनका कारण पीडा भोगिरहेका महिलाहरूसँग सरकारले सार्वजनिक रूपमा माफी माग्नुपर्ने आग्रह गरेकी छन्। प्रतिनिधि सभाको मंगलबारको बैठकमा उनले भनिन्, “सरकारले माग्ने माफी केवल शब्दमा मात्र नभएर महिलाको प्रतिनिधित्व सुनिश्चितता, आर्थिक आत्मसम्मान र आत्मनिर्भरता सहितको हुनुपर्दछ।”
सांसद गुरूङले विगतका कुप्रथा र विभेदकारी कानुनका कारण महिलाले भोगेको पीडाको लागि नेपाल सरकारले औपचारिक रूपमा माफी माग्नुपर्ने आवश्यकतालाई औंल्याइन्। उनले सरकारको नीति तथा कार्यक्रममा महिलाको विषय समावेश नभएको भन्दै संसदको ध्यानाकर्षण गराइन्।
“हामीले सरकारको नीति तथा कार्यक्रमलाई नियाल्यौं, त्यहाँ महिलाको विषय विशेष रूपमा समावेश गरिएको देखिएन,” उनले भनिन्। आगामी बजेटमा सहरदेखि ग्रामीण क्षेत्रका महिलाहरूलाई न्यायको अनुभूति हुने गरी बजेट ल्याउन सरकारलाई सुझाव दिँदै उनले भनिन्, “अब आउने बजेटमा ग्रामीण क्षेत्रमा कुप्रथाको बलमा पीडा भोगिरहेका महिलाहरूदेखि सहर बजारमा उद्योग र विभिन्न पेशा–व्यवसायमा संलग्न महिलाहरूलाई न्यायको अनुभूति हुने गरी बजेट ल्याओस्।”
सांसद गुरूङले महिलाहरूको योगदानको उचित कदर नगर्दासम्म देशको लोकतन्त्र अधूरो रहने धारणा व्यक्त गरिन्। उनले पहिलो जननिर्वाचित प्रधानमन्त्री बीपी कोइरालाले बैतडीकी द्वारिकादेवी ठकुरानीलाई स्वास्थ्य सहायक मन्त्री बनाएको स्मरण गराउँदै भनिन्, “उनी मात्र नेपालको होइन, दक्षिण एशियाकै पहिलो महिलामन्त्री हुनुहुन्थ्यो।”
इलन मस्कको आर्टिफिसियल इन्टेलिजेन्स स्टार्टअप ‘एक्सएआई’ ले खर्बौँ डलरको एआई बजारमा आफ्नो पकड जमाउने दाबी गर्दै आएको छ। यस आधारमा मस्कका कम्पनीहरूको बजार मूल्याङ्कन अत्यन्तै उच्च राखिएको छ। तर, एक्सएआईको ‘ग्रोक’ च्याटबोट अमेरिकी सरकारी क्षेत्रमा पूर्णरूपमा असफल भएको छ। यो तथ्य रोयटर्सले सरकारी कागजात र अधिकारीहरूसँगको कुराकानीबाट बाहिर ल्याएको हो।
सरकारी तथ्याङ्कहरूले के देखाउँछन्? सन् २०२५ का सरकारी अभिलेख अनुसार अमेरिकी संघीय एजेन्सीहरूमा एआई प्रयोगका ४०० भन्दा बढी उदाहरणहरू छन्। तीमध्ये केवल तीन ठाउँमा मात्रै ग्रोक एआई प्रयोग भएको देखिएको छ। यसको विपरीत २३४ कार्यहरूमा ओपनएआईको च्याटजीपीटी र माइक्रोसफ्ट कोपाइलट प्रयोगमा आएका छन्। त्यसैगरी ३३ काममा गुगलको जेमिनी र २६ काममा एन्थ्रोपिकको ‘क्लोड’ प्रयोग गरिएको छ। एक्सएआईले अमेरिकी सरकारी एजेन्सीहरूलाई आकर्षित गर्न ग्रोकको शुल्क प्रति एजेन्सी मात्र ४२ सेन्ट राखेको थियो, जुन लगभग नि:शुल्कमत तुल्याउन सकिने मूल्य हो।
प्रविधि कम्पनीहरूले प्रारम्भिक रूपमा ग्राहकलाई आफ्नो उत्पादनमा अभ्यस्त गराउन यस्ता रणनीति अपनाउँछन्। तर यति सस्तो भए तापनि सरकारी कर्मचारीहरूले ग्रोकलाई मन पराएका छैनन्। यस तथ्याङ्कले एक्सएआईको महत्त्वाकाङ्क्षी व्यावसायिक मूल्याङ्कनमाथि प्रश्न उठाएको छ। मस्कले ठूला कम्पनी र संस्थाहरूका लागि एआई बनाएर खर्बौ डलर कमाउने दाबी गरेका थिए, तर सरकारी क्षेत्रमै यसको माग नपर्नुले उनको योजना ठोकेको छ।
विश्लेषकहरूका अनुसार सरकारी मान्यता नपाउँदा निजी कम्पनीहरूले पनि ग्रोकप्रति शंका गर्नेछन्। यसले ग्रोकको सुरक्षा र गुणस्तरमा कमी रहेको सूचक हुन सक्छ। मस्कले सरकारी क्षेत्रमा ग्रोकको प्रयोग थप प्रवर्द्धन गर्न ठूलो लबिङ गरेका थिए। उनले राष्ट्रपति डोनाल्ड ट्रम्पसँग मिलेर सरकारभर एआई प्रवर्तन गर्ने घोषणा गरेका थिए। मस्कको डिपार्टमेन्ट अफ गभर्मेन्ट एफिसियन्सी (डोज) ले पनि ग्रोक प्रयोगका लागि दबाब दिएको थियो। तर डिपार्टमेन्ट अफ होमल्याण्ड सेक्युरिटीले अनुमति नदिएको कारण ग्रोक प्रयोग गर्न अस्वीकार गर्यो। पेन्टागन र अन्य मन्त्रालयहरूले पनि ग्रोकलाई परीक्षणकै सीमामा राखेका छन् र अहिले ऊर्जा मन्त्रालय तथा निर्वाचन सहायता आयोगमात्र यसलाई प्रयोग गरिरहेका छन्।
ती मन्त्रालयमा ग्रोकलाई सामान्य चिठ्ठीपत्र लेख्न वा सामाजिक सञ्जालमा पोस्ट गर्न प्रयोग गरिन्छ। अमेरिकी रक्षा मन्त्रालयसँग एक्सएआईको २०० मिलियन डलरको सम्झौता भएपनि त्यहाँका कर्मचारीहरूले पनि ग्रोकभन्दा अन्य प्रतिस्पर्धी एआई उपकरणहरूलाई प्राथमिकता दिएका छन्। पेन्टागनको अनुसन्धान निकायमा इन्जिनियरिङ विश्लेषणका लागि गुगल जेमिनी र कोडिङका लागि क्लोड एआई नै प्रयोग गरिन्छ। त्यहाँका प्राविधिकहरूले ग्रोकलाई बजारको उत्कृष्ट मोडल मान्दैनन्। यसै क्रममा हालै ग्रोकले भेटेरान्स अफेयर्स मन्त्रालयको एउटा ठेक्का पनि गुमाएको छ, किनकि ग्रोकले सो मन्त्रालयले तोकेका प्राविधिक मापदण्डहरू पूरा गर्न सकेन। व्यावसायिक बजारमा पनि ग्रोक सरकारी क्षेत्रमा मात्र नभई निजी बजारमा पनि पछाडि परेको देखिन्छ।
एउटा प्रविधि अनुसन्धान संस्थाको प्रतिवेदन अनुसार कर्पोरेट क्षेत्रमा ग्रोकको प्रयोग लगातार घट्दै गएको छ। पहिले हजार प्रयोगकर्तामध्ये पाँच जना ग्रोक प्रयोग गर्ने गर्थे, अहिले त्यो संख्या घटेर दुई जनामा सीमित भएको छ। साथै ग्रोक प्रयोगकर्ताहरू च्याटजीपीटी प्रयोगकर्ताहरूको तुलनामा आधा पनि समय उक्त एपमा बिताउँदैनन्। यसले ग्रोक एआईलाई अमेरिकी कर्पोरेट र सरकारी बजारको मुख्य धारा भित्र आउन नसक्ने स्पष्ट सन्देश दिएको छ। एआई बजारमा गुगल, माइक्रोसफ्ट र ओपनएआई निकै अगाडि छन् भने एक्सएआई पछाडि परेको देखिन्छ।
युरोपेली सङ्घले नेपालका वायुसेवामाथि लगाएको प्रतिबन्ध हटाउन कूटनीतिक प्रयासहरू जारी छन्। उच्य अधिकारीहरूले प्रमुख चासो सम्बोधन गर्ने सम्बन्धी कानुन सम्भवतः एक महिनाभित्र संसद्मा प्रस्तुत गरिने बताएका छन्। मंगलबार युरोपेली सङ्घ आवद्ध देशका गैरआवासीय राजदूत र मिसन प्रमुखहरूले प्रधानमन्त्री बालेन्द्र शाहसँग समूह भेटवार्ता गरेका थिए। पछिल्लो दुई दिनमा ईयूका २२ राजदूत र नियोग उपप्रमुखहरूले परराष्ट्रमन्त्री शिशिर खनाल, पर्यटन तथा नागरिक उड्डयनमन्त्री खड्कराज पौडेल र शिक्षामन्त्री सस्मित पोखरेलसँग भेटवार्ता गरेका छन्। परराष्ट्र मन्त्रालयले सरकारले ‘सक्रिय रूपमा सुधारका कामहरू गरिरहेको’ भन्दै ईयूको हवाई सुरक्षा सूचीमार्फत नेपाली वायुसेवाहरूलाई लगाइएको प्रतिबन्ध हटाउन ध्यानाकर्षण गराएको थियो।
प्रधानमन्त्री बालेन्द्र शाह र ईयू सदस्य देशका राजदूतबीच भेटवार्ता सत्ता सम्हालेपछि गएको चैत २५ गते नेपालस्थित विभिन्न देशका राजदूत तथा कूटनीतिक नियोगका प्रमुखहरूसँग सामूहिक भेट र संवाद गरेका प्रधानमन्त्री शाहले मंगलबार युरोपेली युनियन (ईयू)मा आवद्ध देशका गैरआवासीय राजदूत तथा मिसन प्रमुखहरूसँग संयुक्त भेटवार्ता गरेका थिए। प्रधानमन्त्रीको सचिवालयले जारी गरेको विवरणमा लामो समयदेखि नेपालले ईयूसँग पैरवी गरिरहेको कालोसूची हटाउने विषयमा विशेष उल्लेख छैन, तर प्रधानमन्त्रीले नयाँ सरकार गठन भए पनि नीतिगत निरन्तरता रहने बताएका छन्।
संस्कृति, पर्यटन, नागरिक उड्डयन मन्त्रालयका सहसचिव जयनारायण आचार्यले भने, ईयूका सरोकारहरूको सम्बोधनका लागि ‘गहिरो’ संवाद भएको बताएका छन्। “संवादमा अहिले कुनै अवरोध छैन। विशेष गरी हाम्रो नागरिक उड्डयन ऐनमा संशोधन आवश्यक छ। हामी नियामक निकाय र सञ्चालन निकाय अलग बनाउने तयारीमा छौं र त्यसका लागि कानुन मस्यौदा बनिसकेको छ। मन्त्रालयले नियामक निकाय बनाउन तयार छ,” उनले भने।
ईयू प्रतिनिधिहरूसँग भएका संवादमा उनले भने, “सञ्चार, कूटनीतिक लबिङ र सुधार आवश्यक पक्षहरू सबैमा छलफल भयो र प्रक्रिया अघि बढिरहेको छ।” जानकारहरूका अनुसार ईयूको सुरक्षा सूचीमा नेपाली वायुसेवाहरू समावेश भएपछि नेपालको हवाई सुरक्षाको गुणस्तर कमजोर रहेको सन्देश विश्वस्तरमा फैलिरहेका छन्। नागरिक उड्डयन प्राधिकरणका पूर्व महानिर्देशक राजकुमार क्षेत्री भन्छन्, “हामीले युरोपतर्फ कुनै विमान पठाउन सक्दैनौं। भविष्यमा जे नयाँ कम्पनीहरू आए पनि युरोप जान पाउने छैनन्। यस कारण युरोपबाट नेपालमा पनि जहाज आउन पाएको छैन।”
समाचार सारांश नेपाली कांग्रेसको भ्रातृ संस्था नेपाल महिला संघको केन्द्रीय कार्यसमितिलाई मंगलबार पूर्णता दिइएको छ। संघकी अध्यक्ष मिनाकुमारी खरेलले सभापति गगन थापाको कार्यादेश अनुसार कार्यसमितिलाई पूर्णता दिएको बताएकी छिन्। १२ जेठ, काठमाडौं। नेपाली कांग्रेसको महिला संघले पूर्णता पाएको छ। संघकी अध्यक्ष मिनाकुमारी खरेलले मंगलबार केन्द्रीय कार्यसमितिलाई पूर्णता दिइएको जानकारी गराएकी छन्। सभापति गगन थापाले उनलाई अध्यक्ष मनोनित गर्दै कार्यसमितिलाई पूर्ण बनाउने कार्यादेश दिएका थिए। सोही कार्यादेश अनुसार समितिलाई पूर्णता प्रदान गरिएको खरेलले बताएकी छन्। को को भए मनोनित ?
‘क्लाइमेट स्मार्ट सिटीज’ परियोजनाअन्तर्गत काठमाडौं र चितवनका २० सरकारी विद्यालयहरूलाई अनुदान प्रदान गरिएको छ। १२ जेठ, काठमाडौं। यस परियोजनाको मुख्य साझेदार संस्था एनिमल नेपालले विद्यार्थीहरूलाई मार्फत वातावरण संरक्षण, फोहोर व्यवस्थापन र मानव–जनावर–वातावरणबीच सम्बन्धबारे जनचेतना बढाउने कार्य गर्दै आएको छ। एनिमल नेपालले लामो समयदेखि पशुकल्याणमा सक्रिय भएर काम गर्दै आइरहेको भए पनि यस वर्ष काठमाडौं, भक्तपुर र ललितपुरका केही विद्यालयका बालक्लब समितिहरूसँग मिलेर भिन्न क्षेत्रमा काम गरेको छ।
यस परियोजना अन्तर्गत विद्यालयमा कम्पोष्ट मल उत्पादन, विद्यालय परिसर सरसफाइ, फूलका बिरुवा रोप्ने, विद्यालयका भित्तामा सन्देशमूलक चित्र बनाउने जस्ता गतिविधिहरू संचालन गरिएको छ। एनिमल नेपालले एक वर्षको काम समीक्षा गर्न कार्यक्रम आयोजना गरेको थियो। सो कार्यक्रममा सहभागी विद्यालयका शिक्षक, बालक्लब समिति सदस्य र अभिभावकहरूले संस्थाको काम निकै उपलब्धिमूलक भएको बताएका थिए। बालबालिकामा घरमा पनि कुहिने र नकुहिने फोहोर छुट्टाछुटै राख्ने बानी बसेको अभिभावकहरूले जनाएका छन्।
संस्थाले बालक्लब समितिहरूलाई पानी पिउने बोतल, क्याप टोपी, झोला, विभिन्न स्टेशनरी सामग्री र गार्डेन सफाइका लागि आवश्यक औजारहरू समेत वितरण गरेको थियो। परियोजनाको मुख्य साझेदार एनिमल नेपालकी कार्यक्रम संयोजक सुलक्षणा राणाका अनुसार, यस परियोजनाले प्लास्टिक प्रदूषण घटाउने, जनावरमाथि गरिने क्रूरताप्रति मानसिक प्रभाव कम गर्ने र बालबालिकामा करुणा तथा समानुभूतिको भावना विकास गर्ने लक्ष्य राखेको छ। क्रिएसन नेपालको नेतृत्वमा सञ्चालित यस परियोजनामा प्रत्येक विद्यालयमा ‘क्लाइमेट स्मार्ट क्लब’ गठन गरी विद्यार्थीहरूलाई नेतृत्वदायी भूमिका दिइएको थियो।
विद्यार्थीहरूले आफैं योजना बनाएर रुखहरू रोप्ने, फोहोर वर्गीकरण, डस्टबिन व्यवस्थापन, नाटक प्रदर्शन र समुदाय सरसफाइ जस्ता क्रियाकलापहरू सञ्चालन गर्दैछन्। यसप्रकारको विद्यार्थी केन्द्रित दृष्टिकोणले बालबालिकाको नेतृत्व क्षमता विकास गर्दै दीर्घकालीन रूपमा वातावरण संरक्षण र पशुप्रतिको दयाभाव अभिवृद्धि गर्ने अपेक्षा गरिएको छ।
सर्लाहीको पर्सा गाउँपालिका–२ संग्रामपुरस्थित नेपाल–भारत सीमाको दशगजा क्षेत्रमा करिब ५० वर्ष उमेरका पुरुषको बेवारिसे शव फेला परेको छ। शवसँग मदिरा र भारतीय रुपैयाँ भेटिएको छ। शव परीक्षणका लागि प्रादेशिक अस्पताल मलंगवा पठाइएको छ।
१२ जेठ, सर्लाही। सर्लाहीको पर्सा गाउँपालिका–२ संग्रामपुर क्षेत्रमा रहेको नेपाल–भारत सीमा नजिक दशगजा क्षेत्रमा एक पुरुषको बेवारिसे शव फेला परेको हो। जिल्ला प्रहरी कार्यालय सर्लाहीका प्रवक्ता तथा डीएसपी सरोज राईका अनुसार सोमबार दिउँसो करिब ४ बजे सीमा स्तम्भ नम्बर ३१७/२ नजिक दशगजाको डिलमा नेपालतर्फ करिब ५० वर्ष उमेरका एक पुरुषको शव भेटिएको हो। मृतकको नाम र थर अझै खुल्न सकेको छैन।
प्रहरीले घटनास्थलमा बोरामा राखिएको मदिरा र केही भारतीय रकम भेटिएको जानकारी दिएका छन्। स्थानीयले शव देखेपछि प्रहरीलाई खबर गरेका थिए। शवलाई पोस्टमार्टमका लागि प्रादेशिक अस्पताल मलंगवा पठाइने तयारी भइरहेको प्रहरीले जनाएको छ। घटनाबारे थप अनुसन्धान पनि भइरहेको छ।
सूचनाझापा जिल्लामा सोमबार पशुमा लाग्ने खोरेत रोगसम्बन्धी कार्यक्रम आयोजना गरिएको थियो। त्यस कार्यक्रममा नेपालबाट भारततर्फ हुने गाईगोरेको अवैध निकासी विषयमा छलफल भयो। भेटरिनरी अस्पताल तथा पशुसेवा विज्ञ केन्द्र भद्रपुर झापाका प्रमुख शीतल भट्टराईका अनुसार, सीमावर्ती भारतीय राज्य पश्चिम बङ्गालमा नयाँ सरकार गठन भएपछि विगतमा हुने गरेको तस्करी फेरि समसामयिक विषय बनेको छ। “अनौपचारिक कुराकानीको क्रममा नेपाली हाट बजारबाट किसानहरूले नकिने पशुहरू भारततर्फ अवैध रूपमा निकासी गरिने र भाजपाले यसलाई रोक्न कडाइ गरेको बताइएको थियो,” उनले जानकारी दिइन्।
भारतीय जनता पार्टी (भाजपा) नेतृत्वको पश्चिम बङ्गाल सरकारले गोरक्षामा जोड दिने नयाँ नीति अपनाउँदा भारतका पशु हाटबजारहरू प्रभावित भएका छन् भनी खबरहरू आदानप्रदान भैरहेका छन्। अल जजिराले सोमबार प्रकाशित गरेको समाचार अनुसार मुस्लिम पर्व ईद नजिकिँदै गर्दा पश्चिम बङ्गालको राजधानी कोलकाताको बाहिरी क्षेत्र फैलिएको धुलागढ हाट बजार सुनसान अवस्थामा रहेको छ। नयाँ भाजपाको सरकार गठनसँगै सन् १९५० को पशुबध सम्बन्धी कानुनलाई कडाइका साथ लागु गर्ने नीति ल्याइएको छ। यस कानुनमा सार्वजनिक रूपमा पशु बध गर्न नपाइने लगायतका कडा मापदण्डहरू समावेश छन्।
पश्चिम बङ्गाल सरकारले बाङ्ग्लादेशमा अवैध व्यापार रोक्न सीमा क्षेत्रमा तारबार लगाउने निर्णय पनि गरेको छ। जानकारहरूको अनुसार, उक्त अवैध कारोबारमा गाईगोरेको तस्करी पनि समावेश छ। यो तस्करी बिहार, झारखण्ड लगायतका भारतीय राज्यहरूमा मात्र नभई नेपालबाट पनि पश्चिम बङ्गाल हुँदै बाङ्ग्लादेशतर्फ गरिन्छ। “तारबार लगाउन सुरु भएयता अवैध निकासी धेरै कम भएको खबर प्राप्त भएको छ,” भट्टराईले बताइन्, “सशस्त्र प्रहरी र पशु क्वारेन्टिन प्रमुखहरूले यस सम्बन्धमा बढी जानकारी राख्ने देखिन्छन्।”
१२ जेठ, काठमाडौं । प्रमुख विपक्षी दल नेपाली कांग्रेसले सभामुख डोलप्रसाद अर्यालको क्षमता सम्बन्धमा प्रश्न उठाएको छ। प्रतिनिधिसभाको बैठकमा नेपाली कांग्रेसका सांसद अभिषेक प्रताप शाहले प्रधानमन्त्री बालेन्द्र शाहलाई सदनमा उपस्थित गराउन किन रुलिङ नगरेको भनेर प्रश्न गरेका छन्। ‘प्रधानमन्त्रीमाथि रुलिङ गर्ने अधिकार तपाईंलाई छ। कुनै पनि मन्त्री, प्रधानमन्त्री र सांसदलाई रुलिङ गर्ने अधिकार तपाईंको छ। त्यो अधिकार प्रयोग गर्नलाई कसले रोकेको छ?’ शाहले भने। यहीँ उनले सभामुखको क्षमतामाथि समेत प्रश्न उठाएका छन्। ‘यो सदन जान्न चाहन्छ, तपाईंलाई रुलिङ अधिकार प्रयोग गर्न कसले रोक्यो? कसले छेक्यो?’ शाहले भने, ‘तपाईं कार्यपालिकाप्रमुख प्रधानमन्त्रीलाई सदनप्रति जवाफदेह बनाउन सक्नुहुन्न र?’ यस विषयमा सम्पूर्ण नेपालले जवाफ चाहिरहेको उनले बताए। सभामुखबाट रुलिङ गरि प्रधानमन्त्रीलाई सदनमा उपस्थित गराउनुपर्ने उनको आग्रह छ। जवाफमा सभामुख अर्यालले प्रधानमन्त्रीले संसद्मा आउने तयारी गरिरहेको बताएका छन्। उनले छिट्टै प्रधानमन्त्रीले सदनमा आएर जवाफ दिने विषय बारम्बार दोहोर्याए। ‘माननीय सदस्यहरूले मिति माग्नुभएको छ। मिति, समय। सदन चलेकै दिन सम्माननीय प्रधानमन्त्रीज्यू आउनुहुनेछ। म सदन चलेकै दिन सम्माननीयज्यूलाई बोलाउँछु’ सभामुख अर्यालले भने। प्रधानमन्त्रीले समय तोक्नासाथ त्यसको सूचना सदनलाई दिने उनले बताए।
समाचार सारांश सामाजिक सञ्जालमा अरूसँग तुलना गर्ने बानीले मानिसको आत्मविश्वास कमजोर पार्ने भएकाले आफ्नो शरीरलाई स्वीकार्नुलाई फेसनको पहिलो पाठ मानिन्छ। आजको डिजिटल युगमा फेसन मानिसको दैनिक जीवनसँग गहिरो रूपमा जोडिएको विषय बनेको छ। सामाजिक सञ्जाल, टिकटक, फिल्म, सेलिब्रिटी संस्कृति र निरन्तर परिवर्तन हुँदै गरेका ट्रेन्डहरूले हरेक व्यक्तिलाई कुनै न कुनै रूपमा प्रभावित गरिरहेका छन्। बिहानदेखि बेलुका मोबाइलमा विभिन्न प्रकारका फेसन, मेकअप, स्टाइल र ‘परफेक्ट’ शरीरका तस्वीरहरू हेर्न पाइन्छ। त्यसैले धेरैलाई एउटै प्रश्न उठ्छ, ‘किन त्यो लुगा अरूलाई जस्तो मलाई राम्रो लाग्दैन?’ धेरै पटक मानिसहरूले मनपरेका सेलिब्रिटी, इन्फ्लुएन्सर वा साथीको स्टाइल नक्कल गर्न खोज्छन्। उनीहरूले लगाएको लुगा किन्छन्, उस्तै हेयरस्टाइल बनाउँछन्, उस्तै मेकअप गर्छन्, तर त्यसपछि पनि आफूलाई त्यति आत्मविश्वासी वा आकर्षक महसुस हुँदैन। यसको मुख्य कारण हो कि फेसन केवल लुगा मात्र होइन, यो व्यक्तित्व, शरीरको बनावट, आत्मस्वीकारोक्ति र जीवनशैलीसँग सम्बन्धित विषय हो। सबैभन्दा पहिला आफूलाई बुझ्न सिक्नुपर्छ। अरूसँग तुलना नगरी आफ्नो शरीर, सहजता र व्यक्तित्वलाई आधार बनाएर स्टाइल बनाउनु आवश्यक छ। हामी सबै फरक छौं। कसैको आँखा, कसैको नाक, कसैको शरीर, कसैको उचाइ फरक हुन्छ। यही फरकपन नै हाम्रो सुन्दरता हो। तर हामी त्यो स्वीकार गर्नुअघि अरूजस्तै बन्न खोज्ने गर्छौं। तुलना गर्ने बानीले कसरी आत्मविश्वास कमजोर पार्छ? आजभोलि धेरै मानिसको सबैभन्दा ठूलो समस्या निरन्तर तुलना हो। सामाजिक सञ्जालमा कसैलार्ई राम्रो देख्दा आफूलाई कम आँकलन गर्ने बानी बढिरहेको छ। कुनै अभिनेत्रीले लगाएको ड्रेस राम्रो लाग्यो भने त्यही लुगा किनिन्छ। कुनै टिकटक क्रिएटरको फेसन भाइरल भयो भने त्यही पछ्याउने प्रयास हुन्छ। तर समस्या तब सुरु हुन्छ, जब त्यही लुगा आफूले लगाउँदा असहज महसुस हुन्छ। त्यसपछि धेरैले ‘म राम्रो छैन’, ‘मेरो शरीर ठीक छैन’, ‘मलाई केही पनि सुहाउँदैन’ भन्ने निष्कर्ष निकाल्न थाल्छन्। समस्या लुगामा होइन, तुलना गर्ने सोचमा छ। हामीले अरूलाई हेरेर आफूलाई मूल्यांकन गर्न थालेका छौं।
उसको जस्तो आँखा, नाक, शरीर भए मात्र राम्रो देखिन्छ भन्ने सोच बनिसकेको छ। तर हामीले आफ्नै शरीरलाई कहिल्यै धन्यवाद दिईनौं। मानिसहरूले आफ्नो शरीरलाई धेरै पटक केवल बाहिरी सौन्दर्यको आधारमा हेर्छन् तर शरीरले दैनिक जीवनमा गर्ने कामको कदर कमै गर्छौं। हामीसँग आँखाहरू छन्, जसले संसार देखाउन सक्छन्। कान छन्, जसले सुन्न सक्षम बनाउँछन्। हात छन्, जसले काम गर्न मद्दत गर्छन्। यी कुरालाई सम्मान गर्न सिक्नुपर्छ। जबसम्म मानिसले आफूलाई अरूसँग तुलना गर्न छोड्दैन, तबसम्म कुनै पनि फेसनले आत्मविश्वास दिन सक्दैन। आफ्नो शरीर बुझ्नु नै फेसनको पहिलो पाठ हो। धेरैले फेसन भनेपछि ट्रेन्ड, ब्रान्ड वा महँगो कपडाहरू सम्झन्छन्, तर वास्तवमा फेसन सुरु हुन्छ आफ्नो शरीर बुझ्नबाट। लुगा त शरीरमै लगाइने हो। शरीर नबुझे फेसनलाई कसरी बुझ्न सकिन्छ? हरेक व्यक्तिको शरीर फरक हुन्छ। कसैको टिपमा तौल बढी देखिन्छ, कसैको पाखुरामा, कसैको पेट वरिपरि। कपडा लगाउँदा कसैलाई ऊपर टाइट हुन्छ भने कसैलाई तल। यही कुराले शरीरको बनावट, अर्थात् बडी सेपको सङ्केत गर्छ। सामान्यतया मानिसको शरीरलाई पाँच प्रकारमा विभाजन गरिन्छ: त्रिभुजाकार, उल्टो त्रिभुजाकार, आयताकार, गोलो र आवरग्लास अर्थात् हेर्दा डमरू आकार जस्तो देखिने शरीर। तर कुनै पनि मानिस पूर्णरूपमा एउटै सेपमा फिट हुँदैन, केवल मिल्दोजुल्दो संरचनामा पर्छ।
हामी आफैंलाई ‘पियर शेप’, ‘एप्पल शेप’ जस्ता नामले चिनाउँछौं, त्यो केवल शरीरको सन्तुलन बुझ्ने माध्यम हो। आफूलाई कुनै फलसँग तुलना गरेर तनाव लिनु आवश्यक छैन। शरीरको बनावट बुझिसकेपछि कपडा छनोट सजिलो हुन्छ। कुन फिटिङ सहज हुन्छ, कुन कट राम्रो देखिन्छ, कुन कपडाले शरीरलाई सन्तुलित देखाउँछ भन्ने थाहा हुन्छ। कस्तो शरीरलाई ‘आइडल बडी’ भन्ने? फेसन उद्योगले लामो समय ‘परफेक्ट बडी’ को धारणा बनायो, तर अहिले त्यो सोच परिवर्तन हुँदैछ। आइडल बडी भन्नु गलत हो। सौन्दर्य मापदण्ड समाज र संस्कृतिअनुसार फरक-फरक हुन्छ। कुनै देशमा गोरो छाला सुन्दर मानिन्छ भने कतै गहुँगोरो रङलाई आकर्षक मानिन्छ। कतै ठूलो ओठ राम्रो मानिन्छ भने कतै लामो घाँटी। त्यसैले आफूलाई मोडल वा सेलिब्रिटीसँग तुलना गर्नु उचित हुँदैन। मोडलहरूले आफ्नो शरीरमा धेरै समय खर्च गर्छन्, जीवनशैली, आहार, फाटनेस सबैमा केन्द्रित हुन्छन्। तर हाम्रो जीवन फरक छ। हामी अफिस जान्छौं, घर सम्भाल्छौं, बच्चा हुर्काउँछौं, दैनिक जिम्मेवारी पूरा गर्छौं। हरेक व्यक्तिसँग केही न केही असुरक्षा हुन्छ, तर धेरैले आफ्नो समस्या मात्र ठूलो सोच्छन्। पर्सनल स्टाइल बाह्य छैन, भित्र छ। मानिसहरू ‘मलाई कस्तो स्टाइल सुहाउँछ?’ भनेर धेरै सोच्दछन्। यसको जवाफ बजारमा, टिकटकमा वा सेलिब्रिटीमा होइन, आफैँभित्र हुन्छ र खोज्नुपर्छ। पर्सनल स्टाइल भन्नाले आफूलाई सहज, आत्मविश्वासी र स्वाभाविक महसुस गराउने शैली हो। ‘आफूलाई के मनपर्छ, कुन रङ लगाउँदा राम्रो देखिन्छ, कुन कपडा सहज महसुस हुन्छ, कुन स्टाइल आफ्नो व्यक्तित्वसँग मेल खान्छ’ — यही बुझ्ने प्रक्रिया नै पर्सनल स्टाइल हो। जब मानिसले आफ्नो स्टाइल पहिचान गर्छ, तब अरूसँग तुलना गर्न आवश्यक पर्दैन। जब इनर वर्ल्ड र आउटर वर्ल्ड मेल खान्छ, त्यसबेला आउने आत्मविश्वासलाई कसैले हराउन सक्दैन। तर दराज भरिए पनि ‘लगाउने केही छैन’ जस्तो लाग्नुको कारण के हो? यो समस्या विशेष गरी महिलाहरूमा हुन्छ। दराज कपडाले भरिएको हुन्छ तर बाहिर जान्छन् भने ‘मसँग लगाउन केही छैन’ जस्तो लाग्छ। यसको कारण फेसनको कमी होइन, स्पष्टताको अभाव हो। धेरैजसो मानिसले ट्रेन्ड, सेल, अरूको सल्लाह वा ‘फोमो’ का कारण कपडा किन्छन्। आफूलाई वास्तवमा के चाहिन्छ भन्ने नबुझी किनमेल हुँदा वार्डरोब भरिन्छ, तर प्रयोगमा आउने कपडा कम हुन्छ। यसलाई भान्सासँग तुलना गर्न सकिन्छ। हामी दैनिक जीवनमा भात र दाल चाहिन्छ, तर यदि किचन सस, स्न्याक्स र ब्रेडले मात्र भरिएको छ भने समस्या हुन्छ। वार्डरोब पनि त्यसैगरी हुन्छ। यदि प्रायः अफिस जानु छ भने अफिस वेयर बढी हुनु पर्छ। यदि जीवनशैली साधारण छ भने पार्टी वेयर मात्र धेरै हुँदा काम लाग्दैन। धेरै मानिस ट्रेन्डको पछाडि लाग्छन्। एउटा सिजन भाइरल कपडा अर्कोमा चल्दैन। परिणामस्वरूप दराज भरिन्छ तर दैनिक जीवनका लागि आवश्यक कपडा अभाव हुन्छ। अफिस वेयरमा सादगी किन महत्वपूर्ण छ? अफिस फेसनमा सबैभन्दा महत्वपूर्ण कुरा सादगी र बहुउपयोगिता हो। अफिसका लागि न्यूट्रल रङहरू उपयुक्त छन् जस्तै: कालो, सेतो, बेझ, क्यामेल, ग्रे, नेभी ब्लु। यी रंगहरू सजिलै अरू रंगहरूसँग मिलाउन सकिन्छ। सुसज्जित फिटिङ भएको सर्ट, साधारण टिसर्ट, फर्मल प्यान्ट, ब्लेजर वा कोट जस्ता आधारभूत कपडा वार्डरोबमा हुनु आवश्यक छ। पहिलो चरणमा राम्रो क्वालिटीका बेसिक लिनुपर्छ, त्यसपछि लुगा मिसाउन सजिलो हुन्छ। आमा बनेपछि फेसन सेन्समा किन परिवर्तन आउँछ? आमा हुनु महिलाको जीवनमा सबैभन्दा ठूलो परिवर्तनहरूमध्ये एक हो। शरीर, भावना, समय, प्राथमिकता र आत्मछवि सबै परिवर्तन हुन्छ। धेरै महिला बच्चा जन्माएपछि आफूलाई बिर्सन्छन्। ‘मैले दुई वर्षदेखि ऐनामा आफूलाई हेरेको छैन’ भन्ने धेरै महिला भेटिन्छन्। बच्चाको हेरचाहमा यति धेरै समय र मानसिकता खर्च हुन्छ कि महिलाले आफूलाई प्राथमिकतामा राख्न बन्द गर्छन्। शरीरमा आएको परिवर्तनले आत्मविश्वासमा कमी ल्याउँछ। साथै समाजको टिप्पणीले समस्या झन झन् गहिरो बनाउँछ। ‘कति मोटाएकी’, ‘अहिलेसम्म घटेन’, ‘पहिले कस्ती थिई अहिले कस्ती भइन्’ जस्ता टिप्पणीहरूले महिलालाई मानसिकरूपमा कमजोर बनाउँछ। आमा बनेपछि आफूलाई कसरी प्राथमिकतामा राख्ने? आमा बनेपछि पनि महिलाले आफूलाई पूर्णरूपमा बिर्सनु हुँदैन। मानसिकरूपमा स्वस्थ हुनु र खुसी भइरहनु जरूरी छ। जब आफू खुसी हुन्छ, त्यो खुसी परिवारमा पनि बाँड्न सकिन्छ। यसका लागि ठूलो परिवर्तन आवश्यक छैन। साना-साना सेल्फ केयर रिचुअलहरूले ठूलो फरक पार्न सक्छ। बिहान केही मिनेट आफ्नो लागि समय निकाल्ने, कपाल मिलाउने, स्किन केयर गर्ने, आफूलाई मनपर्ने कपडा लगाउने जस्ता कुराले आत्मविश्वास फर्काउन सहयोग गर्छ। घरमै बस्नुपर्छ भने पनि पुराना कपडा लगाउनै पर्ने होइन। घरमै बस्दा पनि आफूलाई राम्रो महसुस गराउने कपडा लगाउनु पर्छ। नयाँ आमाहरूका लागि आरामदायी र स्टाइलिश फेसन बच्चा जन्माएपछि धेरै महिलाले आफ्नो शरीर लुकाउन अत्यधिक ठूलो कपडा लगाउने गर्छन्। तर शरीर लुकाउने होइन, सहज तरिकाले प्रस्तुत गर्ने प्रयास गर्नुपर्छ। नयाँ आमाहरूका लागि कटनका आरामदायी कुर्ता, सर्ट ड्रेस, फ्लोइ स्कर्ट, साधारण टप, लाइट आउटवेयर र सहज फिटिंग भएका कपडा उपयुक्त हुन्छ। विशेष गरी छाती र पेट क्षेत्रहरूमा परिवर्तन आउँदा त्यहाँ आरामदायक डिजाइन रोज्नुहोस्। शरीरको त्यो भागलाई हाइलाइट गर्न सकिन्छ जसले आत्मविश्वास बढाउँछ।
समाचार सारांश समीक्षा पश्चात तयार। नेकपाका प्रमुख सचेतक युवराज दुलालले प्रधानमन्त्रीलाई संविधानभन्दा माथि नठान्न र संसदप्रति जिम्मेवार बन्न आग्रह गरेका छन्। संसद्को नियमावलीअनुसार प्रधानमन्त्रीले संसदको रोष्ट्रममा उभिएर अनिवार्य सम्बोधन गर्नुपर्ने दुलालले बताए। विपक्षीको विरोधको बावजुद बलपूर्वक विधेयक पारित गर्ने सरकारी शैलीको विरोध गर्दै दुलालले बहुमतको दम्भ नगर्न चेतावनी दिए। १२ जेठ, काठमाडौं । नेपाली कम्युनिस्ट पार्टी (नेकपा)ले प्रधानमन्त्री बालेन शाहलाई संविधानभन्दा माथि नठान्न आग्रह गरेको छ। पार्टीको तर्फबाट प्रतिनिधिसभामा विशेष समयमा बोल्दै नेकपाका प्रमुख सचेतक युवराज दुलालले संसदबाट जन्मिएको प्रधानमन्त्री संसदप्रति उत्तरदायी हुनुपर्ने बताए। प्रधानमन्त्री शाह संविधानभन्दा माथि भए सदनमा जानकारी गराउन सत्तारुढ रास्वपालाई उनको आग्रह थियो। कम्तीमा एक मिनेट पनि भए प्रधानमन्त्री संसदको रोस्टममा उभिएर सम्बोधन गर्नुपर्ने दुलालले बताए। ‘प्रधानमन्त्री संविधानभन्दा माथि हुनुहुन्छ, त्यसकारण उहाँलाई छुट दिनुपर्छ भन्ने कुरा सरकारका तर्फबाट यो सदनमा आउनुपर्छ,’ उनले भने, ‘हाम्रो दल सभामुखमाफर्त सरकारको जवाफ चाहन्छ। नत्र प्रधानमन्त्री यही संसदबाट जन्मिएको हो र यो संसदलाई उनले सम्बोधन गर्नैपर्छ। एक मिनेट नहोस्, प्रधानमन्त्रीले रोष्ट्रममा आएर उभिनुपर्छ।’ दुलालले शाह विपक्षीको समेत प्रधानमन्त्री भएको उल्लेख गरेका छन्। प्रधानमन्त्रीलाई संविधान र प्रतिनिधिसभाको नियमावलीभित्र रहेर सदनलाई सम्मान गर्न आग्रह गर्नु उनीहरुको अधिकार भएको तर्क गरे। सत्तापक्षको बहुमत छ भन्दै विपक्षीको विरोधबीच विधेयक पारित गर्ने हो भने सिधै सभामुखलाई राष्ट्रपतिसमक्ष प्रमाणीकरणका लागि पठाउन चुनौतीसमेत दिए। ‘केही दिन अगाडि विपक्षीको अवरोधबीच वैकल्पिक वित्तसम्बन्धि विधेयक पारित गरियो। सत्तापक्षका सांसदहरूले समेत विधेयक पारितमा योगदान पाउन सकेनन्। संसदमा बहस गरेर तर्क वितर्क गर्दा मात्र महत्त्वपूर्ण विधेयक पारित हुनुपर्छ। सरकारले जे ल्यायो त्यो बहुमत छँदैछ भन्ने हो भने हामी भत्ता लिएर किन बस्नुपर्यो? सबै सरकारले ल्याएपछि सभामुखज्यूले राष्ट्रपति कहाँ पठाइदिए भनेर भइहाल्छ। यो प्रक्रिया पालनाको अर्थ के?’, दुलालले प्रश्न गरे। संसद नियमावलीका कतिपय व्यवस्था आफ्नो सुविधामाथि पालना गर्ने सत्तापक्षले प्रश्नोत्तरमा प्रधानमन्त्रीलाई संसदमा उपस्थित गराउने व्यवस्था पालना नगरेको दुलालको टिप्पणी थियो। प्रधानमन्त्रीले संसदमा आएर बोल्नुपर्नेमा संविधान वा कानुन उल्लङ्घन भएको भए रास्वपालाई चुनौती दिए। ‘नियमावलीअनुसार प्रधानमन्त्रीले सदनमा आएर बोल्नुपर्छ भने हामीले गल्ती गरेका छैनौं। गल्ती हो भने सभामुखमार्फत भन्नुहोस्, हामीलाई कसरी उठाउन पाउँछौं भनेर प्रश्न गर्न चाहन्छौं,’ दुलालले भने, ‘प्रतिनिधिसभा नियमावलीको नियम ३८ (१) को सुविधा प्रयोग गर्नेले नियमावलीको ६१ (१) को कर्तव्य पूरा गर्नुपर्छ कि पर्दैन? यो जवाफ संसदमा खोज्नु जायज हो कि होइन?’ दुलालले सदनमा बहुमत भएतापनि जनमतमा प्रतिपक्षलाई आधा जनताको मत प्राप्त भएको नबिर्सन भने। ‘संसदीय व्यवस्थामा वा प्रजातन्त्रमा बहुमतले वास्तविक बहुमत जनाउँदैन। हाल सत्तारुढ दल बहुमतमा छ हामीले स्वीकारेका छौं। त्यसैगरी आधा जनसंख्याको प्रतिनिधित्व गर्नेहरू प्रतिपक्षी बेञ्चमा पनि हुनुपर्छ भन्ने कुरा संसदले बुझ्नुपर्छ,’ उनले भने, ‘निर्वाचित प्रणालीमा बहुसंख्यक र अल्पसंख्यक दुवैले प्रतिनिधित्व पाउँछन्। आधा नेपाली नागरिकको प्रतिनिधित्व प्रतिपक्षीले गरेको छ र त्यसको आवाजलाई पनि महत्त्व दिनुपर्छ। सबै नेपालीको आवाजलाई महत्त्व दिनु हो।
प्रतिनिधिसभामा विपक्षी दलहरूले प्रधानमन्त्री बालेन्द्र शाह संसद्मा नआएसम्म सदन सञ्चालन गर्न नदिने अडान लिएका छन्। नेपाली कांग्रेस, नेकपा एमाले, र राप्रपा लगायतका विपक्षी दलका प्रमुख सचेतकहरूले प्रधानमन्त्रीलाई संसद्मा आएर सांसदका प्रश्नहरूको जवाफ दिनुपर्ने माग राखेका छन्। श्रम संस्कृति पार्टीका आरेन राइले भने, “प्रधानमन्त्री संसद्मा आएर सांसदका प्रश्नहरूको जवाफ दिन तयार नभएसम्म हाम्रो विरोध जारी रहनेछ।” १२ जेठ, काठमाडौं।
विपक्षी दलहरूले प्रधानमन्त्री बालेन्द्र शाह (बालेन) संसद्मा नआएसम्म सदन सञ्चालन हुन नदिने अडान अपनाएका छन्। सोमबार प्रतिनिधिसभाको बैठकमा आकस्मिक समय, शून्य समय र विशेष समय सकिएपछि कार्यसूचीमा जानुअघि विपक्षी दलहरूले विरोध जनाए। सभामुखले बोल्न समय दिएपछि विपक्षी दलका सांसदहरूले प्रधानमन्त्री उपस्थित नभएसम्म सदन सञ्चालन नगर्ने बताएका छन्।
नेपाली कांग्रेसकी प्रमुख सचेतक बासना थापाले नागरिकका प्रश्नहरूको जवाफ प्रधानमन्त्रीले दिनुपर्ने बताए। नेकपा एमालेका प्रमुख सचेतक ऐन महरले संविधान र कानुनी व्यवस्था अनुसार पनि प्रधानमन्त्री संसद्मा उपस्थित हुनुपर्ने उल्लेख गरे। नेपाली कम्युनिस्ट पार्टीकी प्रमुख सचेतक युवराज दुलालले सबैले संविधान र कानून मानेर अगाडि बढ्नुपर्ने आग्रह गरेका छन्।
प्रधानमन्त्रीले केही समय लागे पनि संसद्मा आएर रोष्टममा उभिएर बोल्नुपर्ने उनीहरूका माग रहेको छ। श्रम संस्कृति पार्टीका आरेन राइले इतिहासमा के नजिर बसाउने भन्ने विषय रहेको उल्लेख गर्दै आगामी पुस्तालाई के सन्देश दिने भन्नेमा सबैले ध्यान दिनुपर्ने बताए। संख्याको गर्व अस्थायी हुने भएकाले पाँच वर्षपछि चुनाव हुँदै नयाँ समीकरण बन्ने पनि उनले थपे। ‘प्रधानमन्त्री संसद्मा आएर सांसदका प्रश्नहरूको जवाफ दिन तयार नभएसम्म हाम्रो विरोध जारी रहनेछ,’ उनले भने। राप्रपाकी प्रमुख सचेतक खुश्बू ओलीले प्रधानमन्त्रीको उपस्थितिका लागि सत्तारुढ दलले पनि पहल गर्नुपर्ने बताए। ‘जनप्रतिनिधिसँग किन संवाद गर्न चाहनुहुन्न?’ उनले प्रधानमन्त्रीलाई प्रश्न गरिन्।
