संरचनात्मक सुधार र परीक्षा प्रणालीमा सुधारका लागि १०० दिनभित्र नतिजा प्रकाशन गर्ने प्रतिबद्धता
त्रिभुवन विश्वविद्यालयका उपकुलपति प्रा.डा. दीपक अर्यालले ९ महिना २४ दिनको नेतृत्वपछि १७ वैशाखमा राजीनामा दिएका छन्। उनले कार्यकालका क्रममा विश्वविद्यालयमा संरचनात्मक सुधार, परीक्षा प्रणाली सुधार र अनलाइन सेवा प्रवाह विस्तार गर्ने काम गरेका बताएका छन्। अर्यालले विश्वविद्यालयको जग्गा संरक्षण, क्याम्पस स्तरोन्नति र सेवा प्रवाह सरलीकरणका लागि विभिन्न समितिहरू गठन गरिएको पनि उल्लेख गरेका छन्। २१ वैशाख, काठमाडौं।
प्रा.डा. दीपक अर्याललाई तत्कालीन प्रधानमन्त्री एवं कुलपति केपी ओलीले २०८२ असार २५ मा उपकुलपतिमा नियुक्त गरेका थिए। उनको कार्यकाल चार वर्षको भए तापनि नयाँ सरकार गठन भएपछि १७ वैशाखमा उनले राजीनामा दिएका हुन्। ९ महिनाको अवधिमा राजनीतिक पक्षधरता नगरेको दाबी गर्दै उनले भने, “कुनै राजनीतिक पक्षधरता वा पदीय दुरुपयोग नगरी मर्यादित र निष्पक्ष ढंगले कार्यसम्पादन गर्न इमान्दार प्रयास गरिएको हो।”
अर्यालले कार्यकालमा भएका सुधारका कदमहरू सार्वजनिक गरेका छन्। उनले शिक्षामा गुणस्तरीय सुधार ल्याउने उद्देश्यले त्रिविको संरचनात्मक तथा व्यवस्थापकीय सुधार गरेको बताए। परीक्षा प्रणालीका अन्तर्गत शैक्षिक पात्रो कार्यान्वयन गरी परीक्षा समाप्त भएको मितिले १०० दिनभित्रै नतिजा प्रकाशनको थालनी गरिएको पनि उनले जानकारी दिएका छन्। उनले थपे, “विश्वविद्यालयका अभिलेखहरूको संरक्षणका लागि सूचना तथा नवप्रवर्तन केन्द्र सशक्त बनाई अनलाइन सेवाको विस्तार र सुदृढीकरण गरिएको छ। शिक्षक तथा कर्मचारीको वृत्तिको विकास, कार्यसम्पादनमा पारदर्शिता र निष्पक्षता सुनिश्चित गर्ने दिशामा ठोस पहल गरिएको थियो।”
