फिनालिसिमा खेलमा नआएको भेट विश्वकप फाइनलमा
दुई फरक पुस्ताका उत्कृष्ट खेलाडी मेसी र यमालको भिडन्त फिफा विश्वकप २०२६ को फाइनलमा हुने निश्चित भएपछि अहिले विश्वभर यसको चर्चा छ। फिफा विश्वकप २०२६ को फाइनलमा पूर्व विजेता अर्जेन्टिना र स्पेन उपाधिका लागि भिड्दैछन्। यो खेल अर्जेन्टिनाका लियोनल मेसी र स्पेनका उदयमान युवा स्टार लामिन यमालबीच पहिलो प्रतिस्पर्धात्मक भिडन्तका रूपमा विश्वव्यापी चर्चा बटुलिरहेको छ। १९ वर्षअघि मेसीले बच्चा यमाललाई नुहाइरहेको तस्बिर हाल भाइरल भएपछि दुई पुस्ताका खेलाडीबीचको यो फाइनल भेट धेरै भावनात्मक अर्थ बोकेको छ। २ साउन, काठमाडौं।
दुई फरक पुस्ताका स्टार खेलाडी, दुई फरक टिमबाट खेल्दैछन्। र ती दुवै फुटबलको महाकुम्भ विश्वकपमा एकआपसमा भिड्दैछन्। त्यो पनि सामान्य खेल होइन, विश्वकपको फाइनलमै। एकातिर दुई दशकदेखि विश्व फुटबलमा शासन गरिरहेका लियोनल मेसी, अर्कोतिर नयाँ पुस्ताका सबैभन्दा चम्किला युवा स्टार लामिन यमाल। यी दुई फरक पुस्ताका खेलाडी पहिलो पटक विश्वकप फाइनलमा आमनेसामने हुँदैछन्। पूर्व विजेता अर्जेन्टिना र मेसी उपाधि रक्षा गर्ने अभियानमा छन् भने लगातार ३७ खेल अपराजित स्पेनले १६ वर्षपछि उपाधि जित्ने लक्ष्य राखेको छ।
यो खेल अमेरिकाको न्यु जोर्सी न्युयोर्कस्थित मेटलाइफ स्टेडियममा नेपाली समय अनुसार सोमबार विहान पौने १ बजे हुनेछ। एक सयभन्दा बढी खेलपछि संसारभरका फुटबल प्रेमीले प्रतिक्षा गरेको त्यो एक मात्र खेल हो, त्यो अर्जेन्टिना र स्पेनबीचको फाइनल, अनि विश्वकै महान खेलाडी मेसी र उदाउँदै गरेका सुपरस्टार यमालबीचको भिडन्त। कस्तो हुनेछ खेल? नतिजा के आउनेछ? मेसी र यमालबाट को गोल गर्नेछ? ट्रफी कोसले समाउनेछ? यी सबै प्रश्नका जवाफ केही दिनमै आउँनेछ।
फिनालिसिमा खेलमा नआएको भेट मेसी र यमालको पहिलो प्रतिस्पर्धात्मक भेट २०२६ मार्चमा तय गरिएको फिनालिसिमा खेलबाट हुने अपेक्षा गरिएको थियो। कोपा अमेरिका विजेता अर्जेन्टिना र युरो विजेता स्पेनबीच कतारको लुसेल स्टेडियममा मार्च २७ मा खेल तय गरिएको थियो। तर मध्य पूर्वको सुरक्षा अवस्थाका कारण यो खेल आयोजना हुन सकेन। युरोपका स्पेनदेखि इंग्ल्यान्ड लगायत विभिन्न देशमा खेल आयोजना गर्ने प्रयास भए पनि असफल रह्यो र अन्तमा रद्ध गरियो। विश्वकपका सुपरस्टार मेसी र युवा स्टार यमालको भिडन्त हेर्ने दर्शकहरू उत्साहित थिए, तर फिनालिसिमा रद्द भएपछि तत्कालका लागि उनीहरूको भिडन्त टरेको थियो।
तर विश्वको ठुलो स्टेज फाइनलमा विश्वकप ट्रफीका लागि यी दुई टोली भिड्ने भएका छन्। दुई फरक पुस्ताका स्टार खेलाडीहरूको भिडन्त हेर्ने चाहना अब पूर्ण हुने भएको छ। तर त्यो फिनालिसिमा होइन, विश्व फुटबलको महाकुम्भ फिफा विश्वकप २०२६ मा। त्यो पनि चानचुने खेल होइन, विश्वकप फाइनल। लियोनल मेसीको कप्तानीमा रहेको अर्जेन्टिना र यमालको प्रेरणामा स्पेन दुबै टोली अपराजित हुँदै फाइनलसम्म पुगेका छन्। अर्जेन्टिना लगातार दोस्रो पटक विश्वकप फाइनल खेल्दैछ र उपाधि रक्षा गर्ने प्रयासमा छ भने २०१० पछि पहिलो पटक फाइनल पुगेको स्पेन दोस्रो पटक विश्वकप जित्ने लक्ष्यमा छ।
