लेखक: space4knews

२२ भदौ, लेबनान (रासस/एएफपी) । लेबनानको सरकारी सञ्चारमाध्यमका अनुसार दक्षिणी लेबनानको एउटा गाउँमा रातभरि भएको इजरायली हवाई आक्रमणमा दुई शिशुसहित ११ जनाको मृत्यु भएको छ। यसअघि भएका छुट्टाछुटै आक्रमणमा थप सात जनाको मृत्यु भएको जनाइएको छ। इजरायलले बिहीबार हिजबुल्लाहको नियन्त्रणमा रहेको रणनीतिक महत्वको ‘अली अल–ताहेर’ पहाडी क्षेत्र कब्जामा लिएको दाबी गरेपछि दक्षिणी नबातिह क्षेत्रमा आक्रमण तीव्र पारेको हो। इरानसमर्थित हिजबुल्लाहले भने उक्त दाबीबारे कुनै प्रतिक्रिया दिएको छैन।

इरानको समर्थनमा रहेको हिजबुल्लाहले इजरायलमाथि आक्रमण गरेपछि मार्चमा लेबनानमा पुनः द्वन्द्व चर्किएको थियो। जुनमा वासिङ्टन र तेहरानबीच भएको समझदारी तथा सोही महिनाको अन्त्यतिर इजरायल र लेबनानबीच भएको रूपरेखा सम्झौतापछि लडाइँ केही कम भएको थियो। तर इजरायलको विदेश मन्त्रालयले सोमबार हिजबुल्लाहले बारम्बार ड्रोन आक्रमण गरेको र दक्षिण लेबनानमा आफ्नो सैन्य क्षमता पुनःनिर्माण गर्ने प्रयास गरेको आरोप लगाएको छ। मन्त्रालयले हिजबुल्लाहले इजरायल र लेबनानबीच भएको युद्धविराम सम्झौताको उल्लङ्घन गरेको बताएको छ।

लेबनानको आधिकारिक नेसनल न्युज एजेन्सी (एनएनए) का अनुसार, नबातिह नजिकैको फार रुम्मानमा रातभरि भएको आक्रमणमा तीनतले आवासीय भवन ध्वस्त हुँदा नौ जनाको मृत्यु भएको थियो। आक्रमणमा लक्षित एउटा गाडीमा रहेका दुई उद्धारकर्मीको पनि मृत्यु भएको एनएनएले जनाएको छ। एएफपीका एक फोटोग्राफरका अनुसार भवन पूर्ण रूपमा ध्वस्त भएको थियो भने भग्नावशेषमा विद्यालयका किताब र फर्निचरका टुक्रा छरिएका थिए। सोमबार बिहान उद्धार टोलीहरूले भग्नावशेष हटाउँदै अन्य पीडितको खोजी गरिरहेका थिए।

द्वन्द्वका कारण विस्थापित भएका फार रुम्मानका बासिन्दा जुनमा भएको युद्धविरामपछि घर फर्किएका थिए। “यहाँ फर्किएदेखि नै हामी डरको वातावरणमा बाँचिरहेका छौँ,” स्थानीय बासिन्दा फुवाद चाकारोनले एएफपीलाई बताए। उनका अनुसार आक्रमणमा परेको भवनमा “कसैसँग कुनै सम्बन्ध नभएका शान्तिप्रिय मानिसहरू” बस्दै आएका थिए। आक्रमणपछि छिमेकीहरू घर छाडेर भागेका थिए। एएफपीका फोटोग्राफरका अनुसार विस्फोटका कारण आसपासका अन्य भवनमा समेत क्षति पुगेको थियो। इजरायलले फार रुम्मानमा आक्रमण गर्नुअघि कुनै चेतावनी जारी नगरेको जनाइएको छ। तर नजिकैको देइर जाहरानीमा भएको अर्को आक्रमणअघि भने बासिन्दालाई सुरक्षित स्थानमा जान आदेश दिइएको थियो।

इजरायली सेनाका अनुसार उसका सैनिकलाई लक्षित गरी विस्फोटक बोकेको ड्रोन प्रहार गरिएको थियो। सेनाले “हिजबुल्लाहको आतङ्कवादी गतिविधिले इजरायली रक्षा बल (आईडीएफ) लाई उनीहरूविरुद्ध कडा कदम चाल्न बाध्य पारेको” बताएको छ। घटनामा कुनै इजरायली सैनिक घाइते भए वा नभएकोबारे भने सेनाले जानकारी दिएको छैन। सेनाले अरबी भाषामा जारी गरेको सन्देशमा आफूले हिजबुल्लाहको आतङ्कवादी अखडा लक्षित गरिरहेको भन्दै उक्त क्षेत्रमा रहेका मानिसहरू जोखिममा रहेको चेतावनी दिएको थियो। एनएनएका अनुसार चेतावनी जारी भएको २२ मिनेटपछि इजरायली आक्रमणमा देइर जाहरानीस्थित एउटा भवन ध्वस्त भएको थियो। आइतबार लेबनानका राष्ट्रपति जोसेफ आउनले इजरायली आक्रमण रोक्न सहयोग गर्न अमेरिका र अन्तरराष्ट्रिय समुदायसँग आग्रह गर्नुभएको थियो। बेरुतका अनुसार मार्चदेखि लेबनानमा भएका इजरायली हवाई तथा स्थल आक्रमणमा चार हजार ३०० भन्दा बढी मानिसको मृत्यु भइसकेको छ। इजरायली सेनाले सीमा क्षेत्रमा लेबनानभित्र करिब १० किलोमिटर (६ माइल) सम्म फैलिएको आफ्नो स्वघोषित सुरक्षा क्षेत्रमा कारबाही जारी राखेको छ।

कतारका विदेश मन्त्रालयका प्रवक्ता माजिद अल–अन्सारीले खाडी राष्ट्रहरूले सुरक्षाका लागि अमेरिका वा अन्तरराष्ट्रिय गठबन्धनमा मात्र निर्भर रहन नसक्ने बताएका छन्। उनले आबुधाबीको ‘हिली फोरम’ मा भने, “सुरक्षा क्षेत्रमा आत्मनिर्भरता नै अघि बढ्ने मुख्य बाटो हो र साझेदारको आवश्यकता रहे पनि मात्र निर्भर हुन नहुने कुरा हो।”

कतार अमेरिका–इरान द्वन्द्वमा मध्यस्थकर्ताका रूपमा सक्रिय छ, जबकि हर्मुज जलसन्धि र क्षेत्रीय ऊर्जा पूर्वाधारसम्बन्धी तनाव अझै जारी छ। प्रवक्ता अल–अन्सारीले भनेका छन् कि खाडी क्षेत्रमा अन्तरराष्ट्रिय सेनाको उपस्थिति र अमेरिकासँगको रणनीतिक गठबन्धन महत्वपूर्ण भए तापनि त्यसले मात्र क्षेत्रको सुरक्षा सुनिश्चित गर्न सक्दैन।

कतारले मध्यपूर्वमा रहेको अमेरिकाको सबैभन्दा ठूलो सैन्य आधारहरू मध्ये एकलाई आश्रय दिँदै आएको छ। द्वन्द्वका क्रममा इरानले अमेरिकी आक्रमणको जवाफमा अमेरिकी सैन्य आधार तथा क्षेत्रका ऊर्जा पूर्वाधारलाई लक्षित गर्दै आक्रमण गरेको छ। गत महिना कतारका प्रधानमन्त्री शेख मोहम्मद बिन अब्दुलरहमान अल थानी तेहरान पुगेका थिए।

२२ भदौ, तेहरान (रासस/एएफपी) — इरानको परराष्ट्र मन्त्रालयले सोमबार दक्षिण कोरियालाई होर्मुज जलसन्धिमा अमेरिकी अभियानमा सैन्य समान उपस्थिति वा सहभागिता नदिन चेतावनी जारी गरेको छ। इरानले यस्तो कदमले ‘गम्भीर परिणाम’ निम्त्याउन सक्ने बताएको छ। दक्षिण कोरियाले शुक्रबार रणनीतिक दृष्टिले महत्त्वपूर्ण होर्मुज जलसन्धिमा अमेरिकी सुरक्षा प्रयासमा सहयोग गर्ने विषयमा विचार गरिरहेको जनाएको थियो।

फेब्रुअरी २८ मा संयुक्त राज्य अमेरिकासँग युद्ध सुरु भएदेखि इरानले उक्त क्षेत्रमा ठूलो हदसम्म नियन्त्रण कायम राखेको छ। सोलले आफ्नो सैन्य तत्परतामा कुनै असर नपर्ने सर्तमा सम्भावित सहभागिताबारे विचार गरिरहेको जनाएको छ, तर यस सम्बन्धमा अहिलेसम्म कुनै निर्णायक कदम नलिएको पनि स्पष्ट पारेको छ। इरानी परराष्ट्र मन्त्रालयका प्रवक्ता इस्माइल बाकायीले सोमबार दक्षिण कोरियालाई अमेरिकी दबाब र धम्कीको सामना नगर्न आग्रह गरे।

“फारसी खाडी वा होर्मुज जलसन्धिमा अन्य देशले गर्ने कुनै पनि सैन्य उपस्थिति वा अभियानमा सहभागीलाई आक्रमक पक्षको प्रत्यक्ष समर्थनको रूपमा मात्रै हेर्न सकिन्छ र यसका गम्भीर परिणामहरू हुनेछन्,” उनले सामाजिक सञ्जाल ‘एक्स’ मा उल्लेख गरेका छन्। अप्रिलमा भएको युद्धविरामले प्रारम्भिक तीव्र बमबारी बन्द गराए पनि इरान र अमेरिकाबीच होर्मुज जलसन्धि र वरिपरिका क्षेत्रमा तनाव र गोलीकाण्ड जारी रहेको छ।

सामान्य अवस्थामा विश्वका लगभग २० प्रतिशत तेल तथा तरलीकृत प्राकृतिक ग्यास (एलएनजी) यही जलसन्धिमार्फत ढुवानी हुन्छ। युद्ध सुरु भएयता यस महत्वपूर्ण जलमार्गमा जहाज आवतजावत लगभग ठप्प हुँदा विश्वव्यापी ऊर्जा बजारमा समेत समस्या देखा परेको छ। इरानले यस जलसन्धिमार्फत आवतजावत गर्ने जहाजहरूलाई आफ्नै अनुमति लिन अनिवार्य गरेको छ। वाशिङ्टन लगायत क्षेत्रका धेरै देशहरूले यसको विरोध गरेका छन्। इरानले भने युद्धअघि जस्तै अवरुद्ध रहित जहाज आवतजावतको व्यवस्था पुनःस्थापित नहुने अडान राखेको छ।

जापानी प्रधानमन्त्री सानाए ताकाइचीले मन्त्रिमण्डल र सत्तारूढ लिबरल डेमोक्रेटिक पार्टी (एलडीपी) को कार्यकारी टोलीलाई सकेसम्म चाँडो परिवर्तन गर्ने योजना बनाइरहेका स्थानीय सञ्चारमाध्यमहरूले सोमबार रिपोर्ट गरेका छन्। सोमबार, ताकाइचीले टोकियोस्थित आफ्नो कार्यालयमा वरिष्ठ एलडीपी अधिकारीहरूसँग पार्टी नेतृत्व परिवर्तन अघि भविष्यको व्यवस्थापनबारे छलफल गरेका थिए। बैठकमा एलडीपी नीति प्रमुख ताकायुकी कोबायाशी, कार्यवाहक महासचिव कोइची हागिउडा, र मुख्य क्याबिनेट सचिव मिनोरु किहारा सहभागी थिए।

सोमबार अपरान्ह, ताकाइचीले एलडीपी महासचिव शुनइची सुजुकीसँग पनि भेटवार्ता गरेकी थिइन्। यो नेतृत्व परिवर्तनको चर्चा असाधारण संसदीय अधिवेशनको पूर्वसन्ध्यामा गरिएको हो जुन शरद ऋतुमा आयोजना गरिने छ। रिपोर्टमा उल्लेख छ कि “ताकाइचीले आगामी शरद ऋतुमा हुने पार्टी अध्यक्ष निर्वाचनमा सम्भावित प्रतिद्वन्द्वीहरूलाई नियन्त्रित राख्न उनीहरूलाई प्रमुख पदहरू प्रदान गरेर आफ्नो प्रशासनलाई सुदृढ बनाउन योजना बनाइरहेकी छन्।”

२२ भदौ, अमेरिका । अमेरिकाको मियामी अन्तर्राष्ट्रिय विमानस्थलमा अमेजन एयरको कार्गो विमान रनवेबाट बाहिरिएर दुर्घटना गर्दा कम्तीमा पाँच जनाको मृत्यु भएको छ भने अन्य पाँच घाइते भएका छन्। स्थानीय समय अनुसार आइतबार दिउँसो करिब २ बजे अवतरण गरेको बोइङ ७६७–३०० विमान रनवेबाट बाहिरिएर दुर्घटना भएको हो। प्रारम्भिक विवरणअनुसार विमान करिब २०९ किलोमिटर प्रतिघण्टाको गतिमा रनवेबाट बाहिरिएको थियो।

दुर्घटनापछि विमानले विमानस्थल परिसरमा रहेका केही सवारी साधनहरूलाई ठक्कर दिएको थियो र त्यसपछि विमानमा आगो लागेको थियो। दुर्घटनाको सूचना पाए लगत्तै करिब २०० जना दमकलकर्मी घटनास्थलमा पुगेका थिए। उद्धार तथा राहत टोलीले आगो नियन्त्रणमा लिएर घाइतेहरूको उद्धार गरेको थियो। अधिकारीहरूका अनुसार घाइतेमध्ये तीन जनालाई स्थानीय ट्रमा सेन्टरमा राखिएको र बाँकी दुई जनाको अस्पतालमा उपचार जारी रहेको छ।

२२ भदौ, जयपुरा (इन्डोनेसिया) (रासस/एएफपी)। इन्डोनेसियाको पूर्वी पपुवा क्षेत्रमा सोमबार भएको आगलागीमा छ बालबालिकासहित ११ जनाको मृत्यु भएको छ। मध्य पपुवा प्रान्तको पानियाई सहरमा मध्यरातपछि सुरु भएको आगो तीव्र रूपमा फैलिँदा कम्तीमा ४० पसल, कियोस्क तथा घरहरू नष्ट भएका छन्। स्थानीय प्रहरी प्रवक्ता हेनरी जे मनुरुङ्का अनुसार मृतकमध्ये पाँच वयस्क र छ बालबालिका रहेका छन्। मृत्यु भएका बालबालिका दुईदेखि नौ वर्ष उमेरका रहेको उनले बताएका छन्।

तीन घण्टाभन्दा बढी समय लागेको आगो नियन्त्रणमा दमकल र पानीका फोहराहरू प्रहार गर्ने सवारीसाधन परिचालन गरिएको थियो। घर तथा पसलहरू एकअर्कासँग निकट भएकाले आगो नियन्त्रणमा कठिनाइ भएको बताए। आगलागीको कारण अहिलेसम्म खुल्न सकेको छैन। घटनाको विषयमा अधिकारीहरूले अनुसन्धान गरिरहेका छन्। इन्डोनेसियामा यसअघि पनि घातक आगलागीका घटना भएका छन्। गत डिसेम्बरमा जकार्ताको साततले कार्यालय भवनमा आगलागी हुँदा २२ जनाको मृत्यु भएको थियो।

२२ भदौ, किएभ (रासस/सिन्ह्वा) । युक्रेनका राष्ट्रपति भोलोदिमिर जेलेन्स्कीले अमेरिकी विशेष दूत स्टिभ विट्कफ र जारेड कुशनरसँग भएको वार्ता अत्यन्तै सार्थक र महत्वपूर्ण रहेको बताएका छन्। आइतबार भएको भेटवार्तापछि पत्रकारहरूसँग कुरा गर्दै जेलेन्स्कीले रुस–युक्रेन द्वन्द्व समाधानका लागि रोकिएको शान्ति वार्ता पुनः सुरु गर्ने विषयमा महत्वपूर्ण छलफल भएको जानकारी दिए। साथै युक्रेनका लागि सुरक्षा तथा आर्थिक प्रत्याभूति र आगामी जाडो मौसमका लागि आवश्यक सहयोगबारे पनि कुराकानी भएको उनले बताए। जेलेन्स्कीले युक्रेनले हवाई प्रतिरक्षा तथा ऊर्जा क्षेत्रमा थप सहयोगको अपेक्षा गरेको उल्लेख गरे। साथै अमेरिकी तरलीकृत प्राकृतिक ग्यासको पर्याप्त आपूर्ति र त्यसको उपयोगका सम्भावनाबारे पनि आफूहरूले आशा राखेको उनले बताए।

वार्ताको तेस्रो चरणमा बेलायत, फ्रान्स र जर्मनीसहित केही युरोपेली मुलुकका प्रतिनिधिहरू पनि सहभागी भएका थे। आगामी दिनमा शान्ति वार्तालाई निरन्तरता दिने उद्देश्यले पुनः बैठक बस्ने सहमति भएको जेलेन्स्कीले जानकारी दिए। उहाँले युक्रेन, अमेरिका र रुसबीच रोकिएको त्रिपक्षीय वार्ता पुनः सुरु गर्ने प्रयासलाई पनि अघि बढाइएको बताए। यस्तो वार्ताले द्वन्द्वको शान्तिपूर्ण समाधान खोज्न सहयोग पुग्ने अपेक्षा गरिएको छ। अमेरिकी विशेष दूत विट्कफले पनि मस्कोमा भएको वार्ताका क्रममा महत्वपूर्ण प्रगति हासिल भएको बताएका छन्। उनले युक्रेन, अमेरिका र रुसबीचको त्रिपक्षीय वार्ता छिट्टै घोषणा हुने आशा व्यक्त गरे। विट्कफ र कुशनर आइतबार युक्रेन पुगेका हुन्। युक्रेन भ्रमणअघि उनीहरूले मस्कोमा रुसी राष्ट्रपति भ्लादिमिर पुटिनसँग भेटवार्ता गरेका थिए। रुस–युक्रेन द्वन्द्व अन्त्य गर्ने प्रयासस्वरूप युक्रेन, अमेरिका र रुसका प्रतिनिधिमण्डलबीच यसअघि अबुधाबीमा दुई चरण र जेनेभामा एक चरण त्रिपक्षीय वार्ता भएको थियो। तर पछिल्लो समय ती वार्ता रोकिएका छन्।

रुससँगको युद्धबीच युक्रेन सरकारले एडल्ट कन्टेन्ट व्यवसायलाई कानुनी मान्यता दिँदै कर लगाउने तयारी गरेको छ, जसबाट वार्षिक २ करोड ५० लाख अमेरिकी डलर बराबर रकम सङ्कलन हुने अपेक्षा गरिएको छ। युक्रेन संसद्ले जुलाई १४ मा वयस्कहरूबीच सहमतिमा उत्पादन गरिने पोर्न सामग्रीलाई अपराधको दायराबाट हटाउने विधेयक पहिलो पठनमा २३१ मतले पारित गरेको छ। हालको कानुनअनुसार क्रिएटरहरूले आफ्नो आम्दानीमा कर तिर्न खोज्दा अनुसन्धान, ब्ल्याकमेल र घूसखोरीको समस्या भोगिरहेका छन्।

रुससँग जारी युद्धको समयमा युक्रेन सरकारले देशभर चलिरहेको एडल्ट कन्टेन्ट व्यवसायलाई कानुनी मान्यता दिंदै कर लगाउने योजना अघि बढाएको छ। अमेरिकी पत्रिका द वाल स्ट्रिट जर्नलको रिपोर्ट अनुसार, यसबाट सरकारले वार्षिक रूपमा लगभग २ करोड ५० लाख अमेरिकी डलर कर थप आम्दानी गर्ने अनुमान गरिएको छ। युक्रेनी एक सांसदको भनाइमा, सो रकमले युद्धकालीन आवश्यकताका लागि करिब ३० हजार ड्रोन खरिद गर्न सकिनेछ।

भ्रष्टाचार नियन्त्रण र कर सङ्कलन सुधार सन्दर्भमा युक्रेनमा हालसम्म पोर्नोग्राफी पूर्ण रूपमा कानुनी मान्यता पाएको छैन्। यसलाई वैधानिक बनाउने मुख्य उद्देश्य सरकारको आम्दानी वृद्धिलाई मात्र होइन, व्यापक रूपमा फैलिएको भ्रष्टाचार रोक्नुलाई पनि राखिएको सरकारी अधिकारीहरूले बताएका छन्। यस प्रस्तावका समर्थकहरूका अनुसार, यसबाट प्रहरीलाई साना मुद्दा भन्दा ठूलो अपराधहरूमा ध्यान दिन सजिलो हुनेछ।

युक्रेन संसद्ले जुलाई १४ मा वयस्कहरूबीच सहमतिमा सिर्जना गरिने पोर्न सामग्रीलाई अपराधको दायराबाट हटाउने विधेयक पहिलो वाचनमा पारित गर्यो। यस विधेयकको लागि २३१ सांसदले मतदान गरे, ८ ले विरोध गरे, ३ जना तटस्थ रहे भने ५५ सांसदले मतदान गरेका थिएनन्। अब यो विधेयकलाई अर्को चरणको छलफलका लागि पेश गरिनेछ।

२२ भदौ, काठमाडौं । फिलिपिन्समा गत अगस्ट महिनाको सुरुदेखि सक्रिय मनसुन र चारवटा उष्णकटिबन्धीय चक्रवातले ४३ जनाको मृत्यु भएको छ। फिलिपिन्सको नागरिक प्रतिरक्षा कार्यालयले आइतबार दिएको जानकारीअनुसार यी प्राकृतिक विपत्तिका कारण कृषि तथा पूर्वाधार क्षेत्रमा निकै नकारात्मक असर परेको छ। विपत्तिबाट ११ अर्ब ९२ करोड पेसो (करिब १९ करोड १ लाख अमेरिकी डलर) बराबरको आर्थिक क्षति पुगेको प्रारम्भिक अनुमान गरिएको छ।

क्षतिको तथ्यांक विवरणः मानवीय क्षति : हालसम्म ४३ जनाको मृत्यु भइसकेको छ भने २० जना घाइते भएका छन्। बेपत्ता रहेका ५ जनाको खोजी कार्य अझै जारी छ। प्रभावित जनसंख्या : विपत्तिबाट फिलिपिन्सका ६ हजार ९०० गाउँका करिब २९ लाख परिवारका १ करोड २ लाखभन्दा बढी मानिस प्रभावित भएका छन्। भौतिक क्षति : कुल ४ हजार ५०० घरमा क्षति पुगेको छ। जसमध्ये ३ हजार ९०० घरमा आंशिक क्षति भएको छ भने ५८५ वटा घर पूर्ण रूपमा नष्ट भएका छन्। मनसुन र लगातारका चक्रवातहरूले जनजीवन अस्तव्यस्त पारेका साथै कृषि उत्पादन र सडक सञ्जालमा ठूलो क्षति पुर्याएको त्यहाँका अधिकारीहरूले बताएका छन्। (एजेन्सीहरूको सहयोगमा)

६ सेप्टेम्बर २०२६ मा म्याग्डेबर्गमा निर्वाचनको नतिजापछि एएफडीका उम्मेदवार उलरिश जिगमुन्ड (बायाँ) र पार्टी अध्यक्ष एलिस वाइडल २२ भदौ, काठमाडौं । जर्मनीको चरम-दक्षिणपन्थी पार्टी अल्टरनेटिभ फर जर्मनी (एएफडी) ले पूर्वी राज्य सक्सोनी-आनहाल्टको राज्य चुनावमा ऐतिहासिक जित हासिल गरेको छ। एक्जिट पोल र प्रारम्भिक नतिजाअनुसार एएफडीले लगभग ४४ प्रतिशत भोट प्राप्त गर्दै राज्यको सबैभन्दा ठूलो पार्टी बन्ने पक्का भएको छ। दोस्रो विश्वयुद्धपछि पहिलो पटक कुनै चरम-दक्षिणपन्थी पार्टी जर्मन राज्यस्तरमा सत्ताको यति नजिक पुगेको हो। यो नतिजा चान्सलर फ्रेडरिक मर्ज र उनको कन्जरभेटिभ क्रिश्चियन डेमोक्रेटिक युनियन (सीडीयू) पार्टीका लागि ठूलो झट्का मानिएको छ। अघिल्लो चुनावको तुलनामा सिडीयूको भोट आधाभन्दा बढी घटेर करिब १७.४ प्रतिशतदेखि १८.५ प्रतिशतमा सीमित हुने प्रक्षेपण छ।

अमेरिकी राष्ट्रपति डोनाल्ड ट्रम्प, उप-राष्ट्रपति जेडी भान्स र अर्बपति व्यवसायी इलोन मस्कलगायतले एएफडीको जितप्रति खुशी व्यक्त गरेका छन्। जर्मनीको राजनीतिमा एएफडीको जित कति ठूलो हो ? जर्मनीमा नाजी शासनको इतिहासका कारण मुख्यधाराका पार्टीहरूले लामो समयदेखि चरम-दक्षिणपन्थी पार्टीहरूसँग दूरी राख्दै ‘फायरवाल’ को नीति अपनाउँदै आएका छन्। एएफडीलाई आप्रवासी विरोधी, मुस्लिम विरोधी र उग्र-दक्षिणपन्थी चरमपन्थी समूहको आरोप लाग्दै आएको छ र जर्मन गुप्तचर संस्थाले सक्सोनी-आनहाल्ट शाखालाई त्यस्तै संगठनका रूपमा वर्गीकृतसमेत गरेको छ। त्यसैले यो पार्टी राज्य सत्ताको नजिक पुग्नुलाई जर्मन राजनीतिमा भूकम्पकै रूपमा हेरिएको छ। एएफडी राष्ट्रिय स्तरमा पनि निकै लोकप्रिय बनिसकेको छ। हालैका राष्ट्रिय सर्वेक्षणमा यसले २८ प्रतिशत भोट ल्याउँदै चान्सलर मर्जको गठबन्धनलाई पछि पारेको छ।

यो पार्टीले आप्रवासनमा कडाइ गर्ने, युक्रेनलाई दिइने सहयोग रोक्ने, युरो मुद्रा त्याग्ने र रुससँग सम्बन्ध सुधार गर्ने एजेन्डा अघि सारिरहेको छ। एएफडीको समर्थन किन बढिरहेको छ ? एएफडीले आफूलाई स्थापित राजनीतिक दलहरूको बलियो विकल्पका रूपमा प्रस्तुत गरेको छ। चुनाव प्रचारका क्रममा यसले आप्रवासी सङ्कट, अर्थतन्त्र, सुरक्षा र जर्मन पहिचानलाई मुख्य मुद्दा बनाएको थियो। यसपटक एएफडीले ३५ वर्षीय उलरिश जिगमुन्डलाई मुख्य उम्मेदवार बनाएको थियो। जिगमुन्डले चुनाव नतिजालाई ‘ऐतिहासिक’ भनी भनेका छन्, ‘हामीले यो देशमा इतिहास रचेका छौं। मानिसहरूले देखाएका छन् कि अब यसरी चल्न सक्दैन।’ उनले यस जितलाई सन् २०२९ को राष्ट्रीय चुनाव अघि सत्तामा पुग्ने पहिलो खुड्किला भएको बताएका छन्। एएफडीका राष्ट्रिय सह-अध्यक्ष एलिस वाइडलले यो नतिजालाई ‘सनसनीपूर्ण’ भनेकी छन्।

ट्रम्प, मस्क र रुसको समर्थन अमेरिकी राष्ट्रपति डोनाल्ड ट्रम्पले सामाजिक सञ्जाल ट्रुथ सोसलमा चुनाव नतिजाको तस्बिर बिना कुनै क्याप्सन सेयर गरेका थिए। ट्रम्प र उनका उप-राष्ट्रपति जेडी भान्सले एएफडीसँगको ‘फायरवाल’ तोड्न जर्मन पार्टीहरूलाई पहिले देखि नै दबाब दिँदै आएका थिए। रुसी राष्ट्रपतिका विशेष दूत किरिल दिमित्रिएभले ट्रम्पको पोस्टको स्क्रीनसट सेयर गर्दै ‘व्यावहारिक एएफडीको ऐतिहासिक जित’ भनी खुशी व्यक्त गरेका छन्। अर्बपति इलोन मस्कले पनि एएफडीलाई बधाई दिएका छन्। एलिस वाइडलले सामाजिक सञ्जाल ‘एक्स’ मा चुनावको नतिजा पोस्ट गरेपछि मस्कले जर्मन भाषामै ‘धेरै राम्रो’ लेखेर प्रतिक्रिया दिएका थिए। उम्मेदवार जिगमुन्डले मस्कलाई धन्यवाद दिँदै आगामी दिनमा ‘बलियो सहकार्य’ को अपेक्षा राखेको बताएका छन्।

फ्रान्स र पोल्यान्डले भने: युरोपका लागि गम्भीर मोड एएफडीको सफलतालाई लिएर युरोपेली छिमेकीहरूले गम्भीर चिन्ता व्यक्त गरेका छन्। फ्रान्सका युरोप मामिला मन्त्री बेन्जामिन हद्दादले यसलाई युरोपका लागि ‘गम्भीर क्षण’ बताएका छन्। ‘हामीले हाम्रो इतिहास भुल्न हुँदैन,’ हद्दादले चेतावनी दिएका छन्। रुसप्रति एएफडीको नरम रवैयालाई लिएर आलोचकहरूले चिन्ता व्यक्त गरेका छन्। यदि एएफडीले राज्य सरकारको नेतृत्व लियो भने राज्यको गुप्तचर संयन्त्र र सुरक्षा संयन्त्रमा उनीहरूको पहुँच पुग्नेछ, जसले युरोपभर र विशेष गरी छिमेकी देशहरू (पोल्यान्ड, बाल्टिक राष्ट्रहरू) मा त्रास बढाउनेछ। यद्यपि, ४४ प्रतिशत भोट पाए पनि एएफडीले ८३ सिटको संसद्‌मा बहुमत (४२ सिट) ल्याउन सकेन भने अन्य पार्टीहरूले उसलाई सरकार बाहिरै राख्न लामो गठबन्धनको कसरत गर्न सक्छन्। (एजेन्सीहरूको सहयोगमा)